RUSSIA TEN SYRIA AH SPECIAL FORCE COMMANDO 2014 PANIN OM TA

April 21, 2016: Russiate special forces commando ‘Spetsnaz’ kicite Syria ah 2014 pek panin kikoih ta hi. Russia news Insider in a genna nung kha-in Palmyra khuapi ISte khut sung panin a kilak lai-in Syria galkapte leh Spetsnaz commandote kipawl uh hi ci'n gen hi. Ahih hangin hih Spetsnaz ten galdo taktak lo uh a, ground controllers kici in pangin Russiate bomb khiatna vanleng leh helicopter gunshipte lamlak leh a kapna ding mun hilh dingin nasem uh hi. Spetsnazte pen galte omna mun ensim dingin siamna (reconnaissance skills) nei uh ahih manin ISte panmun en khia dingin kizang a, tua khit ciangin Syria galkapte leh tung lam panin ISte kapte sam dingin kizang uh hi. Palmyra khuapi a kilak lai-in zong IS ten Spetsnaz commando khat mu kha-in a umcih lai un Russiate vanleng hawlte samin vanleng hawl ten a umcih teng leh amah kaplum khawm uh hi.

Russia in Communist government Afghanistan ah a gup manin 1980s in Afghanistan ah Islamic ngongtatte do dingin zong na zang uh a, 1990s in zong Chechnya ah zong na zang ngei uh hi. Spetsnazte pen kuamah lut ngam lohna galte panmun ensim (reconnaissance mission) dingin kisawl a, a poimawh hun ciangin galte omna mun zong a suam [“direct action” (raids)] dingin kizang hi. Syria ah Spetnazte a kizat hang pen Russia in galkap tampi a sup ding khualna in a zat ahi hi.

Russian Spetsnaz commandote Syria ah official in October 2015 panin kikoih hi. Spetnazte pen Syria commandote training pia ding leh IS makai liante that ding leh a thah sawmte huhna pia dingin kizang a, amau pen a sim tham in a gamtang galkapte (special operations forces) ahih manun a lawhcin'na thute uh zong kigenkhia meel lo hi. Russian commandote pen gamdangte commandote tawh kibang veve a, ahih hangin a kipiakhia ngamte bek kila se hi.

Chechnya gam-a Spetsnaz kisawl za lakah 10 bangin liamna leh sihna tuak uh a, Chechen gamnuaimi kithat 80% pen Spetsnazte thah ahi hi. Tu-in zong Chechnya leh Ukraine ah kumpi lehdo (rebels) ten camp leh khualzinna dinga a lampi a zatte uh ensim dingin Spetsnazte kizang a, rebelste camp leh panmunte uh a muh ciangin thaupi leh bomb khiatna vanleng (artillery or bombers) sam zel uh hi. Spetsznazte pen tui leh lei lakah galdo (amphibious operations) a siam banah sniper kap siam vive ahih manun embassy leh gamdanga kumpi nasemte (diplomats overseas) cing dingin zong kizang hi.

-Your News Wire

US TEN IRAQ AH GALKAP 217 LEH APACHE HELICOPTERS SAWL BEH SAWM

US TEN IRAQ AH GALKAP 217 LEH APACHE HELICOPTERS SAWL BEH SAWM

April 20, 2016: US ten Iraq galkap ten Mosul khuapi a lak kikna dingin in a huh dingin galkap 217 leh Apache helicopters kisawl beh ding hi ci'n US defense ulian ten gen hi. RT in a genna hih galkap kisawlte banah Iraq galkapte training leh advise pia dinga US advisers leh training pia dinga om khinsate pen ISte do ding Iraq galkapte tawh kipawl ding uh a, US adviserte Mosul do dinga kuan khia Iraqi units kici galkapte galphual kiangah om ding hi ci'n gen hi. Apache helicopterte pen Mosul dona ah Iraq galkapte tung lam panin huhna pia dingin kizang ding hi ci'n AP news in gen hi. Mosul pen Iraq gamah khuapi lian pen nihna hi a, nung kumin IS ten a lak uh ahi hi.

US Secretary of Defense Ashton Carter in April 16 in Iraq ah ISte do ding galkap kisawlbeh ding hi ci'n na gen ngei hi. US ah a tangzai zawin gal kido ding hi ci'n gen beh hi (US in 2003 panin a gamnuaimi tuamtuam do uh a, Sept. 30, 2014 a kipanin a kipawlpihte tawh ISte a do uh hi ven bang cik ciangin do taktak ding uh hiam bel theih haksa mawk hi). US in Syria ah ISte do US tawh kipawl Syrian fighters kicite (kumpi lehdote a genna) huh ding leh advise pia dingin special operations forces kici galkap 200 kisawl ding hi ci'n ci'n New York Times in suaksak hi (kam uang deuh ten US special operation foces galkap 200 in Kawlgalkapte zo thei ding hi cp veh uh e :P)

April 12 in US makaih leh a pawlte (gam 64, US tawh gawmin gam 65) US-led Operation Inherent Resolve kici ten Syria leh Iraq ah tung lam panin mun 11,539 kap uh a, US bekin 8,825 vei kap hi ci'n US galphualpi Pentagon in gen hi (koi mun teng kap uh ai tam maw?). Pentagon in ISte dote lak panin a citak pen leh a madawk pen a kigen Kurdish peshmerga units kici ten Iraq ah ISte a dona dingin sum tang $415 million tawh huhna kipia ding hi ci'n gen beh hi. Kurdish peshmerga units ten Mosul leilu lam, nisuahna lam leh nitumna lam teng umcip ta uh hi kici hi.

Mosul lak kikna dingin Iraq galkapte huh ding pen tona lianpi hi ci'n US defense ulian ten gen uh hi. Mai Pizing (Monday) ciangin US Defense Secretary Carter in top Iraq leh US military commanderte kimuhpih dinga, Iraq Prime Minister Haider Al-Abadi leh Defense Minister Khalid Al-Obeidi zong kimuhpih ding hi ci'n CBS News in gen a, Iraq a Kurdish makai Massoud Barzani zong phone in hopih ding hi.

Iraq ulian ten ISte dona ah USte citak zo lo hi ci'n muang zo nawn meel lo uh ahih manin Iraq ah US galkap a om ding zong deih nawn lo uh hi. Ahih hangin hun sawtpi Iraq leh US uliante a kiho khit ciangun Mosul ah ISte dona dingah US ten Iraq galkapte advise pia dingin hong sang zo bek uh hi ci'n US defense ulian khatin gen hi ci'n CBS News in suaksak hi. Aston Carter in bel White House in ISte dona dingin Pentagon in galkap sawl beh ding cih a deihna kithukimpih hi ci'n gen hi.

-Your News Wire

CHINA KUMPI IN TECHIE KHAT THAHNA DINGIN DAN PIA

CHINA KUMPI IN TECHIE KHAT THAHNA DINGIN DAN PIA

April 20, 2016: China gam sunga om Sichuan khua a computer technician Huang Yu in kumpi thusim lai poimawh (classified documents) 150,000 val gamdang tungah a piaksim manin thah dingin thukhenna dan kipia hi. Huang Yu pen Chinese government department ah state secret lamsang tawh kisai nasem hi a, a nasepna ah thuman lo hi ci'n kitawpsak a, a thusim pen kuate tungah a piak hiam cih kigenkhia lo hi. A nasepna panin a kitawpsak manin thangpai lua ahih manin Internet panin “foreign spy organisation” message khak a, ka sepna lui panin thusim na lei nuam uh leh zuak nuam ing ci'n zasak hi.

Tua khit a sawt loin Huang Yu in a kithuzakpihte Southeast Asia leh Hong Kong ah kimuhpih a, state secrets tuamtuam , Communist Party, galkapte leh sum vai lamsang buaina (financial issues) 1500 val zuak a, tua teng tawh lungkim zo loin government department a sem a zi leh a makpa' tung panin zong thusim guksak sawm lai hi ci'n Chinese state television in gen hi.

Tua khitin thusim guk ding zongin a zin kawikawina lamah sum tampi pua in kiman a, a sum ngahna mun kician gen thei lo ahih manin 2011 in kiman a, thah dingin thukhenna kipia hi. State telivision report in bel kithat khin ta hiam, cik ciangin kithat ding hiam cih gen lo a, koi munah thusitna kinei a, kimawhsak hiam cih zong gen tuan lo hi.

— Reuters