MAKAI HOIH I CIH IN ...
"Makai hoih i cih in....
A zuih ding leh a paina ding LAMPI thei a,
Tua LAMPI mah ah pai in,
Midangte tua LAMPI lak hi".
"Makai hoih i cih in....
Phatna leh pahtawina a ngah ciangin
Thanemna ding sangin thalakna dingin zang zaw a,
Gensiatna, elna leh hawmthawhna a thuak ciangin....
Heh pah lungkia pah phangpang loin,
Ki-etphatna ding leh kibawlphatna dingin zang zaw a,
Makai hoihzaw sem suahna ding leh
Kipuahphatna dingin zang ahih manin...
Phatna a ngahna sangin lungdam zaw lai hi."
"Makai hoih i cih in a sepsa leh a bawlsate sutsut in kisialpih lo a,
Mai lam hun-a kansuan ding zia, ngimnate leh
Thuhoih a muhte tawh mipite tha pia in, makaih a,
Makai zaa Sazuk kii bangin mawk puak ngaungau lo hi."
"Makai hoih i cih in ....
Ama' ngaihsutna bek hoih hi ci lo a,
Amah langpangte leh gumte' gente a kibang kimin ngaihkhiatsak a,
Kuamah deidan nei loin, a lai hawl zui in paipih thei hi."
"Mikai hoih i cih in din'na kician khat nei a,
Midang ten langpangin a lehdo hangin lungkia loin
A din'na mahah ding kipin a ngimna mun a tun' dong hanciam a,
Tua mun a tun' dong kalsuan in mipite tunpih hi".
Makai hoih i cih in a tavuan puak ding gik hi cih tel a,
A citlahnate a kiphunsan hangin maingum ngeungau pah lo,
A kiphat ciangin zong lungdam lua pah pekpak lo a,
A tavuan zawhna ding bek hanciam belin nei den hi".
"Mikai hoih i cih in ama' elna dinga suangtang kilawmte,
Thuk kik se loin na kai khawmkhawm lel a,
A kidalna ding kulhbaang muanhuai mahmah dingin bawl a,
Kulhpi muanhuai mahmah suaksak zaw hi."
TUA AHIH MANIN ...
"Koimah ciang na tun' nuam kei a, lametna kician na neih kei leh..
Khuasunga lampi ah a vakthap khat zui zaw le cin...
Mailam hun ding muhkholhna nei lo makai khat na zuih sangin
Na meet zaw lai ding hi."
