JAPAN TEN SOUTH CHINA SEA AH HELICOPTER PUAKNA TEEMBAW SAWL SAWM

JAPAN TEN SOUTH CHINA SEA AH HELICOPTER PUAKNA TEEMBAW SAWL SAWM

March 16, 2017: Japan in South China Sea (SCS) leh Indian Ocean ah a baan tha saanna dingin helicopter puakna teembaw a neih lak panin a golpen "Izumo helicopter carrier" kici kha thum sung om dingin sawl sawm hi. July kha ciangin hih galdona teembaw Izumo pen Indian Ocean ah US Navy leh Indian Navy-te tawh galdo ding dan sin khawmna nei ding uh a, tua khit ciangin Sri Lanka, Philippines, Singapore leh Indonesia ah tawlkhat va kinga dinga, August kha ciangin Japan ah kileh kik ding hi. China in hih bangin Japan in SCS ah Izumo a sawl sawm manin na gamtatna uh na kidawm un ci-in thu zasak ta hi.

Izumo pen helicopter destroyer-class warship kici nam teembaw hi a, Japan Maritime Self-Defense Force (JMSDF) adingin a kibawl hi a, gamdang ah hih bang teembawte pen helicopter carrier ahih kei leh light aircraft carrier ci-in kituat hi. Izumo in vangik 27,000 tons pua zo a, European light aircraft carriers teembawte sangin vangik tam pua zo zaw in, USte' amphibious ships kici teembaw tuamtuamte tawh a van puak zawh zah kikim hi. A thu in (theory) in Izumo in F-35B vanlengte a tung lam a leng khia (vertical takeoff) leh jet fihter bawh (landing jet fighter)-te pua zo ahih manin vanleng gik lua lo pawl (full-fledged light aircraft)-te pua zo hi. Ahih hangin Japan in tua banga vanleng gik lua lote lei sawm hiam cih report bangmah kiza nai lo hi. Izumo in vanleng gik lua lote a puak zawhna ding leh a leng khiate a puah zawhna dingin a teembaw a technology pawl khat a puahphat kisam lai hi kici hi. Izumo in helicopter kua pua zo a, a kisap/poimawh leh a tam zaw puak beh zo lai ding ahih manin navy galkapte adingin teembaw hoih pawl in kituat veve hi.

Tua banah Izomo teembaw ah tuinuai teembaw dal theihna ding "anti-submarine capabilities" kikoih thei a, galte pan mun etsimna ding leh a ngimna mun thu ngah theihna ding (reconnaissance and provide target information) a teembaw ah kithuah a, teembaw kap siat theihna missiles "anti-ship missiles" kici zong kithuah hi. Japan in kha thum sung SCS leh Indian Ocean ah Izomo a sawl ciangin Japan in a teembaw ah galte pan mun suksiat theihna (destroyer) anti-ship missiles destroyer leh air-defense system thahat mahmah thuah ding hi.

Japan in hih bangin helicopter puakna teembaw golpen leitunga mun simtham (remote areas) kiim ah a sawl sawm pen a thahatna uh a lak khiatna lak panin a nasia pen hi lai a, Izumo leh teembaw galkap naval group ten SCS tawn kha ding uh ahih manin China in hih thu namtui na sa khol lo ding hi ci-in Russian military expert Vasily Kashin in Sputnik Japan newste kiangah ci hi.

China in tu lianin vanleng puakna teembaw "aircraft carriers" kicite khat nei a, tu lai takin nih a bawl saan laitak ahi hi. Japan in bel li na nei ngei a, lui lua ta ahih manin kizang (thei) nawn lo (decommissioned) a, India in guk nei a, li kizang nawn loin nih a bawl saan laitak hi. China in aircraft carrier a neih pen "Liaoning" kici a, 2012 panin na zang uh hi. Lioning pen Soviet multirole aircraft carrier (ni dangin "Riga" kici a, tua khit in "Varyag" ci-in a minkilaih) hi a, Soviet gam a kikhen khit nungin Ukraine gam panin $25 million tawh a lei ahi hi. Tu lianin China in vanleng puakna teembaw bawlna dingin "aircraft carrier program" nuai ah teembaw bawl a, amau khut ngiat tawh a bawl uh vanleng puakna teembaw 2020 ciangin Chinese Navy ten nei ta ding uh hi. Japan in SCS ah Izumo a taisak ciangin China in a baan tha saanna dingin SCS ah Liaoning zang kha thei dingin ki-ummawh hi.

Japan naval forces ten US navy force-te tawh SCS nisuahna lam ah galdo sin khawmna nung kalin na nei uh hi. Japan in Indian Ocean ah US leh Indian navyte tawh galdo sin khawmna a neih ding ciangun Chinate sumbarines-te panin a van puakna lampite (transportation routes) humbitna dingin Izumo zang ding hi. "Japan in an leh namgimtui/datsi (fuels) tampi pua ding ahih manin tuate a humbit ding pen a poimawh pen hi," ci-in Russian military expert Vasily Kashin in ci hi. Tua banah Japan in galdona teembaw hoih nei ung cih a lahna ding, Japanese Maritime Self-Defense Forces galkapte min hoihna kepbitna ding leh US tawh kipawl hi ung cih a lak khiatna dingun Izumo a zat sawm uh hi ci-in gen beh hi.

Source: Sputnik

RUSSIATE' VANLENG NIH IN US-TE' TEEMBAW KAPSAK

RUSSIATE' VANLENG NIH IN US-TE' TEEMBAW KAPSAK

March 16, 2017: Camera footage thak a kisuahsakna ah Trump in US President a let ma, Feb. 10 in Russiate' Su-24 jets nih in Black Sea ah USte' teembaw "destroyer USS Porter" kici 200 yards naih in va leng in, a sangna lam (altitude) feet 300 panin va suk kap uh hi. "Hih banga thupiangte pen tuahsiatna (accident) ahih leh leh geel khialna (miscalculation) piangsak thei hi," ci-in US European Command spokesman Navy Capt. Danny Hernandez in ci hi.

UK Mirror in a genna ah hih bangin Su-24 jets nih kihtakhuai takin a va gamtatna uh hang bang hang hi ding hiam cih kitel lo a, ahih hangin Russia in tu nai diak a kipanin Black Sea kiim pen mun poimawh hi ci-in ngaihsun in amau a uk sawmna muh theih dingin lak uh hi ci hi.

Russia in bel Sevastopol ah galdona teembaw tampi koih a, a galkapte uh thahatna dingin sum tampi zat behbeh hi kici hi. Putin’ galkap ten Cold War hun lai bangin khua vot mahmahna leh vuk tam mahmahna mun Arctic khuahun tawh kibatna munte ah galdo ding dan sinna nasia takin nei uh a, Black Sea kiim ah a galkapte koih behbeh hi. (Hih pen NATO in Russia in Russia ngimna dingin Poland leh Romania ah air defence a koih banah Baltic States- Lithuana, Latvia leh Estonia ah koih beh sawm lai-in galkap leh galvan hoih nono a koih beh niloh man hi).

2,000 kilometre vuk lak-a galkap mataw honte (convoy of snow trucks) leh nawk zawh loh/lut zawh ding tankte (impenetrable tanks) Latvea Sea tuikhal panin "state-of-the-art military base" kici galphual thak ah Russia in taisak in, a thawm uh vanging bang hehu uh hi. Tiksi a om Arctic teembaw kingakna panin Kotelny tuikulh ah galvan thak leh puan hoih nono galkap puan silhte a lut theihna dingun 30 Celsius thuak zo uh hiam cih hih Unit-te sitna (tests) nei ding uh hi. Deputy Defence Minister Gen. Dmitry Bulgakov in hih bangin Unit-te sitna a kineihna hang pen Arctic ah galvan thakte, vanzat hoih tuamtuamte leh galkapte zat theih ding hiam cih lim tak-a et khiatna dingin “research and test new and promising models of weapons and military and special equipment in the Arctic” cih a kineih nuam manin hih bang geelna kinei hi ci hi.

Source: Your News Wire

A tei: Thang Khan Lian 

SYRIA BUAINA PANIN KUATE GALKAPTE THAHAT PEN HIAM CIH KITEL HI: DEFENCE ANALYSTS

SYRIA BUAINA PANIN KUATE GALKAPTE THAHAT PEN HIAM CIH KITEL HI: DEFENCE ANALYSTS

March 16, 2017: Russia pen leitung bup ah galkap lapsang thahat pen (most powerful militaries in the world) rating ah a nihna in a kiciamteh hangin defense analysts ten Radio Sputnik ah a genna ah galvan neih zah amau hihna bang ciat a khenna (quantity-based analysis) pen galkap thahat a ciamtehna "true state of affairs" hilo ci uh hi. Bang hang hiam cih leh:

"Ngimna leh upna lah khiat zawhna ding taktak neihna (morale) pen galdona mun ah kitel bek a, hong kimu tel khia thei pan bek hi. Syria buaina en leng kua galkapte thahat pen hiam cih kitel hi. Tua ahih manin leitung bup ah galkap thahat pen a ciamtehna pen galdona leh buaina mun taktak ah kitel loin galvan neih zah (quantity) sangin galkapte siamna (quality) in thu pua zaw hi. Syria gam-a galdona ah US leh Russia galkapte tehkak hi leng Russia galkapte pen US galkapte sangin phatuam zaw leh a thu bun in hattuam zaw (effective) uh hi cih cih ngaihsutna ka nei hi," ci-in defense analyst Vladimir Evseev in ci hi.

Hih bangin defence lamsang siam ten a ngaihsutna uh hong gen khiatte (comments) uh pen Global Conflict leh YouTube channel khawngah leitunga "ten countries with the strongest military list" kipiakna panin a thahat pen a ngaihsutna uh a genna uh ahi hi. Global Conflict leh YouTube channel in a genna ah defense lamsang ah gam 10 ten a sum zat zah uh, tanks, gal vanleng leh galdona teembaw a neih zah uh tawh kituakin a thahat pen leh a vanglian pen in na ciamteh uh a, United States, Russia, China leh India gamte a thahat pen 1-4 ah kihel hi.

Evseev pen Moscow a om Institute of CIS Countries ah Deputy Director len hi a, leitunga galvan tam man penpen Lockheed Martin in a bawl USte F-35 Lightning II pen a man a tam tawh teh in hih khialhna (failures) tam mahmah hi ci-in warning gen hi. Evseev in galvan tam man sangin tawm man napi-in a hoih leh lim tak-a kisit (tests) galvante zattak zaw a, galvan tam man pente a hoih pen na hi tuan lo hi ci hi. Gentehna in en pak leng USte vanleng Fifth-generation jets F-35 ahih kei leh F-22 Raptor pen tam man mahmah napi a tam mat tawh teh in galdona dingin a tam mat zah in hoih loin kimang thei tuan lo hi ci hi. Evseev in USte galphualpi Pentagon in bel galdona teembaw Russia sangin tam nei zaw tham mah hi. Ahih hangin Russiate teembawte hoihzaw (higher quality) hi ci hi. "Russia in a bawl nunung pen Admiral Grigorovich pen tu lai teembaw (modern ship) hi a, US in a bawl watercraft tawh a hoih dan kikim hi. Dot kul se loin US in tuinuai leh tui tungah teembaw hau pen a, ahih hangin a teembawte uh kum khat ahih kei kum khat leh a lang sungin a nuntak hun/kizat theih hun sung (lifespan) bei-in, tui tungah a laam (often turn into floats) suak ziau pahpah uh ahih manin USte teembawte leh Russiate teembawte teh theih ding hilo hi," ci hi. Tua banah USte tawh Russia kibang loin Russia in a lawm leh a kipolhpih gam a poimawh lua lote (allies which is also "of no small importance") mawk nusiatsan lo hi ci-in gen beh hi.

Defense analyst Viktor Baranets in Radio Sputnik newste kiangah kuamah in leitung-a galkap lamsang a thahat pen a kiciamtehna panin a vanglian pente mawk muan' pah thei lo hi. Galkap lamsang ah thahatna i cih pen gal hong om taktak ciang bekin a thahatna taktak uh hong kitel khia pan a, adangte khempeuh pen ngaihsutna thu thuk, pilna thuk (philosophy) hi zaw hi ci hi. Gam tuamtuamte galvan neih tuamtuamte uh bangci bang hiam cih etna panin zong a thahat ahihna uh ngaihsutna nei kha thei mi om pahpah uh hi. Gentehna dingin military defence budgets en pak leng US in defense in tam zang pen a, Russia' defense budget sangin a leh sawm in tam zaw hi. USte defence budget pen Russia a sangin sawm vei a tam mah hi. Ahih hangin US galkapte pen Russia galkapte sangin hatzaw uh hi ci leng man pah thei mawk ding hiam? ci hi.

#Behlapna: US in defense ah sum tam a zat hang pen leitung gam tuamtuam 160 kiim ah galphual 800 kiim nei hi ci-in military scholar ten gen uh hi. Galpi Nihna bei khit kum 70 zawh, Korean War bei khit kum 62 zawh nangawn in US in Germany ah galphual 174, Japan ah 113, South Korea ah 83 leh gamdang 80 val ah zong galphual nei a, tuate lakah Saudi Arabia, Australia, Bahrain, Bulgaria, Colombia, Kenya, Qatar cihte kihel hi ci-in David Vine in "Based Nation: How US Military Based Abroad Harm America and the World" cih laibu a gelhna ah gen hi. Hih bangin gam tuamtuam ah galphual a neih manin US in defence adingin sum tampi zang a, Trump in hih bangin US in galkap kikoih in humbitna i piakna gam ten galkap i koih man hong sik ding uh hi ci-in a kam keekkeek ta hi.

Source: Sputnik
A tei: Thang Khan Lian