DOCTOR KHATIN LIM TAWH HIH BANG NA GELH HI
Tu ni pen ka nuntakna hun sung adingin ka dah ni pen hong suak mawk hi. Siavuan (doctor) ka hihna tawh kituakin nupi naupaai nau nei tampi ka na buaipih khin zo a, nau neisak dingin ka kithawi sim in naungek leh a nu' nuntakna hunkhia in, a bitna dingun thu ka ngetsak hi.
Nau nei ding nupite' adingin thupha ka ngetsak thei zel hi. Kha kua sung a gil sung uh-ah a paai leh puak bek uh hi loin, nau neih hun in numeite' thuakna leh natna (pain and suffering) gen zawh hilo hi. Nuntakna nei mihing khat hong piangkhia ta hi....
Tu ni-in bel khasiat mahmahna tawh ka kap ngeungeu hi. A hang bel, Pasian' kianga kipanin ka lamet lohpi, Pasian' pilna ka gensiat khak ding ka lau hi. Bang hangin hih zah lianga ka thuaklah dingin hih nupi' nuntakna hong laksak ahi hiam???
Hih nupi pen kum 14 bang ta nei loin na om a, nau a deih luat manin a hanciam theih khempeuh siit loin - zatui zangin kisut (injection) leh pasal' natui thunsak (artificial insemination) cihte zang liangin nau a paai theihna dingin ka huh ahi hi. A tawpna ah, Pasian' thukimpih hi ding hi ven a suul a tumor (cancer hangin cibawk) om pen zatui leh pilna siamna (medicine and science) ah thukhun (law) zattheih teng zangin kep theih-kepmawh a kep a na hi hi. Nau a hong paai a kipanin a suul a tumor om pen hong kiam hiaihiai in, hong hoih hi. Pasian' hehpihna leh thupitna a kilatna dingin a nau neih hun hong hun ta a, a pasal in ka kiangah hong tonpih biangbuang in, maban-a a khang (generation) hong om ding uh kei khut sung, nau neihna dei sung (delivery room) ah hong sial miau mawk hi.
Naikal sagih sung vilvel nau neisak dingin buaipih in ka sual khit nungun a naungek ka at khia zo ngawngaw uh a, a tano a pom kawm sa-in nui hiuhiau in hong mualliamsan ta hi. A nu sihsan a, a ta suakta in cidam hi. A pasal in zi' sih lam a theih phetin sibup pah hi. Bang hanga hih lungdamna ni kimlai mangbatna (lungkhamna) ni suak mawk hi ding hiam?!!
Naungek khat ka piansakna hangin nuntakna khat ka taan lawh ta hi. Numeite' zahtak dan siam ni, nuntakna na neih theihna dingin a nuntakna piakhia ngam uh a, kha kua sung haksatna, gimthuakna namcih teng thuak uh hi. Nang bel na pian hun in tomkha sung bek haksatna na thuak a, naupang khat hong khankhiatna dingin zan khuavak in numeite' gim thuakna pen kipumpiakna (sacrifice) kam a gen zawh ding hi loin thupi mahmah hi.
Tua banah, na nu' tungah lungkim loin hopih ut lo na hih leh tu mahmah in contact in hopih in la, na itna leh na zahtakna kilangsak in.
#Shared via #Meddy_Bear
(WhatApps a kikhah Zokam tawh kong tei sawn ahi hi - Thang Khan Lian #ZUNs)
No comments:
Post a Comment