DUTERTE IN GUIHTHEIH ZUAKTE HITLER IN JUDAHTE A THAH BANGIN THAT LENG LUNGDAM DING HI'NG CI PHIAUPHIAU LEL

DUTERTE IN GUIHTHEIH ZUAKTE HITLER IN JUDAHTE A THAH BANGIN THAT LENG LUNGDAM DING HI'NG CI PHIAUPHIAU LEL

Sept. 30, 2016: Philippine President Rodrigo Duterte gensia ten Hitler tawh kibang hi ci-in a gamtatna a tehkak man un Davao City ah a thugenna ah Duterte in Kidopi Nihna hun lai-in Nazi makaipipa Hitler in Jewte a thah bangin guihtheih zangte leh zuakte million thum thah ding pen lungdam mahmah ding hi'ng cihsan ziau hi.

Hitler in Jewte million tampi a thah bangin Philippines ah guihtheih zang million thum bang om a, tuate a vekin kithat leh ka lungdam mahmah ding hi ci-in Duterte in biaubiau hi. Germany in Hitler a neih mah bangin Philippines in zong....(a thugen khawl vat in) amah leh amah kikawk hi. Ka khutlum thuakte na thei uh hi. Ka gam sungah thukham palsat khempeuh hangin buaina ven'sak ding ka deih a, khangthakte bawl kik zawh loh leh theih loh khop-a siat dimdemna (perdition) panin ka gumkhia nuam hi ci-in gen thuah lai hi. (Kidopi Nihna hun in Nazi ten Jewte 6,000,000–11,000,000 kiim 1941-45 sungin na that uh hi).

Duterte pen President dingin May kha in kiteelna ah na cing a, June 30 panin a zaa len hi. President a let khit nung guihtheih zang leh zuakte mi 3,100 police operations leh thonginn ah kithat ta hi.

-Haaretz/Wikipedia

ISRAEL PRESIDENT LUIPA PERES TU NI-IN KIVI TA DING

ISRAEL PRESIDENT LUIPA PERES TU NI-IN KIVI TA DING

Sept. 30, 2016: Israel President 8na (July 15, 2007 – July 24, 2014) leh Prime Minister (November 4, 1995 – June 18, 1996 Acting: 4 November 1995 – 22 November 1995) tu ni-in Jerusalem khuapi sunga om Mt. Herzl hanmual ah a kivuina hun 9:00am in kipan a, leitung gam tuamtuam 70 panin gam makaite kihel uh hi. Israel Police chief Roni Alsheich in buaina bawl dinga ummawh om hi ci-in Jew leh Arab mite min hon khat Shin Bet security service leh police intelligence ten hong pia uh ahih manin tuate kiman hi ci hi.

A vuina hun pen nai 9am in kipan a, 9:30 am Israel President Reuven Rivlin, Prime Minister Benjamin Netanyahu, Knesset Speaker Yuli Edelstein leh Supreme Court President Miriam Naor tung hi. Gam makaite lakah US President Barack Obama, Palestinian President Mahmoud Abbas, French President Francois Hollande, German President Joachim Gauck, US President lui Bill Clinton, Secretary of State John Kerry leh US Congress ulian 20 zong kihel hi. Obama in Jewte lukhu neu (kipahpah cap) khu a, "Ka lawm Shimon Preres mangpha khakna nei thei dingin Jerusalem kong hawh theih pen hih zah val in angtan'na ding nei lo hi'ng. Hih hun ah Palestine President Abas zong hong kihel thei a, ama' hong kihelna panin kilemna taktak a om theihna ding nasep ding tavuan kizo nai lo hi cih lim hong lak hi," ci-in gen hi. Shimon Peres kivuina hangin lampi mun tampi ah kikhak a, 1995 in Jew mi khat in a thah Prime Minister Yitzhak Rabin kivuina hun ah mi tam a kihel mah bangin Preres' kivuina ah mi tam mahmah a, Israel uliante kivuina ah hih bangin mi tam lua ngei lo hi kici hi.

Jerusalem pen Palestine mi 250,000 kiim tenna ahih hangin a beisa kum 20 sungin Palestine President Abbas' lut ding kiphal lo a, Peres in teenna mun ding a kibawl phal lohna munte ah Jewte inn lam theihna dingin suai (letmat thuh) a kaihna hangin teenna mun kiphal lohna mun sunga teng 50% in khang ahih manin thuman leh phuahtawm thu kigente khen hun ta a, a kigensa thu tam zawte pen phuahtawm (fiction) vive ahi hi. Abas in a lut theihna ding phalna a nget masak kul a, kua tung panin phalna lak ding kisam se lai hiam ci-in Al Jazeera senior political analyst Marwan Bishara in gen hi.

-Haaretz/Associated Press

INDIA GALKAP TEN ZAN IN LoC AH “SURGICAL STRIKE” VA NEI

INDIA GALKAP TEN ZAN IN LoC AH “SURGICAL STRIKE” VA NEI

Sept. 30, 2016: A beisa Sept. 18 in Pakistan gam panin gamnuaimi ten Line of Control (LoC) kianga India galkapte phual Uri suam in galkap 18 va that uh hi. India PM Modi in Uri suam mi gilote kikoihkhong lo ding hi ci-in kamciamna a neih bangin zan zingsang nai 2:30 am in LoC sunga om Hot Springs, Kel, Lipa leh Bhimber Gali Sectors sungah gamnuaimite bukna leh India gam hong lutsimna dingun a panmunte uh va suam uh hi.

Hih sector lite a suamna uh India galkap ten gamnuaimi 40 val va golum uh hi.
Pakistan galkap ten zong India galkapte a panmun panin na gal kap uh a, zingsang nai 2:20 pann 8:00 am dong kigal kap uh a, Pakistan galkapte nih in sihna a tuak banah kua in liamna tuak hi. Hih LoC i cihna kiim sung pen India galkapte leh Pakistan galkapte “control line” ciamtehna gi kikhungna mun hi a, ni dangin “Ceasefire Line” na kici ngei hi. July 2, 1972 in Shimla Agreement hangin LoC kici a, Jammu and Kashmir sung India in ngah in, Pakistan in gam neucik Gilgit-Baltistan leh Pakistan-occupied-Kashmir (PoK) kicihna sung teng bek ngah hi. Hih thukimna hangin Pakistan lungkim thei lo ahih manin Pakistan in gamnuaimi tuamtuam sum, galvan leh training pia in LoC panin India suam dingin tu dong hong lutsak den uh hi.

Pakistan galkap ten zan zingsangin LoC panin Pakistan gam sungah hong lutsawm India galkap khat kihingmat hi a cih hangun kitelcian lo a, India leh Pakistan ulian ten zong gen in nei vet nai lo uh hi. India in zan zingsang in LoC ah gamnuaimite omna a va sim manin Pakistan thangpai mahmah a, nuclear galvan tawh kithuk ding hi a cih hangin India in a gamtat loh dingpi uh mi up dingin kampauna (bluffs) hi lel hi cihsan hi. Zan zingsanga thupiang hangin USte India ambassador Richard Verma zong a meeting poimawh mahmah nusiatsan in manlang takin Washington panin Delhi ah hong leng pah hi. UN spokesperson Stephane Dujarri in India leh Pakistan in a kitelsiam lohnate uh kamdam in a vensakna ding leh a gamtatna uh a kikhaam/dal/kidop (restrain) nading in kunh hi.

# India in hih bangin a sim tham in surgical strike/covert operation a bawlnate:
1.East Pakistan : 1971 Bangladesh War lai-in India galkapte leh East Pakistan (tu-in Bangladesh a kici) makai Mukti Bahini tawh kithuza khol masa in operation va bawl a, hih operation pen official takin kithei lo hi.
2. Kashmir: Indian Special Forces leh Ghatak platoons (lei galkap/infantry) ten Kashmir sunga om Loc ah tactical ops (operation) kici va nei in, Pakistan galkapte panmun va simsak uh hi.
3. Bhutan: December 2003 in India galkap ten Bhutan gambeel a om North East sunga gamnuaimi pawl tuamtuam khempeuh beisakna dingin “Operation All Clear” kici gal simna Bhutan gamah va nei uh a, ULFA, NDFB leh KLOte bukna camp 60 va sim in gamnuaimi 650 va golum uh hi.
4. Myanmar (April-May 1995): Bangladesh panin galvan honpi tawh Myanmar-Mizogam gamgi panin NSCN, ULFA leh KLO gamnuaimi 200 kiim hong lut sawmte dalna dingin India leh Myanmar galkapte kipawl in “joint military operation” kici nei uh hi.
5. January 2006: India leh Myanmar galkapte kipawl in Myanmar sunga kibu NSCN (K)-te do dingin “joint military operations” nei uh hi. India in Myanmar Armyte galvan tampi a piak manin hih operation hong piang thei hi.
6. June 2015: Manipur ah NSCN ten India galkapte suam in galkap 18 kiim a thahna hang un Indian Army ten Myanmar gam sungah Commando galkap 70 zangin Naga gamnuaimi 38 minute 40 sungin va golum uh hi.

-The Times of India and The Hindu.