TRUMP IN CONFEDERATE CIAMTEHNA LIMTE BANGMAH LAWH LOH DINGIN GUM

TRUMP IN CONFEDERATE CIAMTEHNA LIMTE BANGMAH LAWH LOH DINGIN GUM

Aug. 18, 2017: Mikangte vanglian pen in thupi pen hi cih ngaihsutna nei "white supremacist" leh Judahte langpang a mudah "neo-Nazis or anti-Semitism" (right-wings) kici ten US thunei ten million 300 kiim sihna a piangsak American Civil War (12 Apr 1861 – 9 May 1865) lai-in US panin lengkhia nuam a kiphinna nei Southern States gum pawl Confederate kicite galkapte leh makaite leh Confederate phawkna dinga lim leh na lui (symbol and monuments) kibawlte suksiat/lakkhiat ding a geelna uh deih loin nung Kiginni in Durham khua ah white supremacist lungphona nei ten Confederate galkap makai Robert E. Lee' lim sumngo a kibawl susia uh a, khe tawh sui gawp in, awng ngeingai uh hi.

White supremacist ten Confederate lim lahna dinga kibawl milim leh lan kikhaite lakkhiat ding deih lo uh a, lakkhiat ding deih a kiphin pawl tawh a kinawktuahna uh hangin kum 32 numei Heather Hyer tangvalno kum 20 mi khat in a car tawh taihlum a, mi 19 a liam khit banah helicopter a leng patrol police nih tuahsia in si ta hi. US thunei ten Confederate phawkna lim khempeuh lakkhiat vek sawm veve uh hi. Trump in white supremacist ngongtatna leh lakkhiat ding deih a lungphona neite pen khat lam ah a hoih ngongtat om in, a lang lam ah a hoih lo om a, a lang tuak uh-ah a hoih mah om veve cih tawh a mawhpaihna hangin a lungkim lo tam mahmah hi.

Trump in tuanthu/tangthu pen kilaih thei lo a, hih bangin Confederate phawkna limte a kisuksiatna pen i gam ua milim (statues) leh pu leh pa phawkna dinga kibawl van lui (monuments) kilawm tampi a kisuksiat pen dahhuai mahmah hi ci-in amah a pum gup leh President a let khit nungin hong maingal leh racist attacks mun tampi ah bawl in a ngongtat white supremacist lamte a gup bawlna leh Confederate phawkna limte suksiat/lakkhiat ding a deih Senators-te geelna a thukimpih lohna thu zan in a Twitter ah tuangsak hi.

Confederate phawkna dinga lim omte lak khiatna dingin 2015 in Charleston khua ah white supremacist leh neo-Nazist tangvalno khat in African-American biakinn sungah biak piakna nei a kikhawm mivomte 9 a kaplum khit nung thunei ten Confederate phawkna lim khempeuh lakkhiat dingin nawhna nakpi in hong nei uh hi. (Hih tangvalno pen sih dan kipia napi a gum a tam luat manin tu dong thukhensatna tawpna kibawl nai loin a thu kidiah lai hi).

Behlapna: Ahih hangin tua milim leh lan (flag) kikhaite lakkhiatna hang peuh tawh minam kideidanna leh minam kideidanna hanga kivuak leh kithahna (racism and racist attacks) pen a bei dingin lamethuai tuan lo a, racism pen American tangthu tawh a kikhen thei lo, a khangkhawm den ngitnget ahi hi. 2016 report ah kum zalom 19 hun lai-in sila a kineihna (slavery system) zang States tuamtuam sunga mipi omna munte (public places) ah Confederate phawkna lim 1,503 tak om lai hi ci hi. Confederate phawkna dingin milim leh van lui (statues and monuments) 718 lak ah Georgia, Virginia leh North Carolina bek ah 300 tak om hi. Confederate phawkna dingin US galphual (military base) 10 Confederate min tam om a, Confederate makai Robert E. Lee, Jefferson Davis leh Confederate galkap minthang tam in public schools 109 tak om a, Confederate min nei counties 80 a om banah state guk ah Confederate phawkna dingin maan ni/khawl ni (holiday) 9 om hi. US thunei ten hihte khempeuh suksiat/lakkhiat leh beisak ding deih uh a, white supremacist, neo-Nazis leh Ku Klux Klan leh adng dng ten Confederate symbols leh monuments khempeuh lakkhiat ding deih lo uh hi. Ngaihsutna tuam nei tuak pawl nih - US liberals leh sila a kineihna deih lo thuneite (authorities) leh a ngaihsutna uh a lahna dingin ngongtat ding phamawh a sa lo white supremacists teng hong kinawk tuah in, hong kikang tuah ding uh ahih manin US gam a keek theihna ding lampi a sial zawh kei uh leh zong ngongtatna hangin kitualvatna (riots) a pian ding baih mahmah ding bat tuak mawk hi.

*Cartoon: Trump pen white supremacists (right-wing) ngaihsutna nei ahih manin tua dan lah kici nuam lo ahih manin a kiseelna dingin right-wing dang (alternative) lam a delh a tai hi cih lahna lim hi.
*Gam lim ah Confederate phawkna dingin statue leh monuments omna munte leh a om zah a nambat tuang kim hi. A om lohna state tawm mahmah a, a tawm zaw pen Southern states lam veve ah om hi.

Source: Associated Press; Southern Poverty Law Center
@Thang Khan Lian

MAKAITE MAWHNA MAW, MIPITE MAWHNA?

MAKAITE MAWHNA MAW, MIPITE MAWHNA?

Ka khua theih cil lai-in gam makai ten, "UT, 6th Schedule i ngah ciangin zawngtah helicopter in kilo ding hi," ci uh hi ci-in upa ten holimna in zangin 6th Schedule ngah ding kal ngaklah mahmah uh hi. 1980s panin Suahtakna (independence) ngahna dingin India kumpi do ding leh Kawlgam leh Vaigam a Zomi teng tuibang gawm khopna ding movement tuamtuam hong hat kik mahmah hi.

Ahih hangin tu dong Suahtakna ngah malak sangin, a tuam a ki-ukna (Separate administration), UT, autonomy, 6th Schedule, district nangawn kingah nai lo hi. Mipite deihna tawh kingah ding maw ahih kei leh makaite makaihna tawh kingah ding? Makai ten hong makaih khial maw, hong khem hai gawp maw, makai a cin nop man un a vision uh muh theih dingin tu dong khutcin them cia zong muh theih ding om nai lo maw? Ahih kei leh mipi ten makaite nung thuap zo lo, nawh zo lo maw?

Manna ding om lo makaite mah kimakaih sak ngaungau lai ding maw? Makai ding a om loh luat manin makai mah in pangsak lailai, pangsak den ding maw? Manna ding makai a kimanna ding thei lo napi tua bangte makai dinga teelcing den lai teng kuate? Democracy ah thuneihna sangpen nei mipi ten kimanna ding makai teng bek teelcing den ding maw?

Vision nei lo makai a kimanna ding om lo a, vision nei napi in a vision muh theih dingin a tak (reality) suah thei lo makai zong a kimanna ding om tuan lo hi. Gensiatna leh citlahna nei lo ki-om lo a, ahih hangin tuate khempeuh nawk ngam leh thuak ngam dingin mipi lak panin a dingkhia ngam, a kipankhia ngam, mipi mai-ah pai ma a phuk ngap leh a nawk ngamte pen makai kici thei pan hi. Makai khat in a mawhpuakna (tavuan) a zawh zo kei kei leh tua thu a kigen ciangin makaite gensia kici thei lo a, lamet bangin a mawhpuakna a zawh kei leh mipi ten muanna tawh makai dinga kiteel ahih manin phunsan theihna ding rights nei lua uh hi. Dictatoship a khangkhia leh dictatorship gu kham lai, gu kham a nga lung-am a hoi tai duaiduai teng leh democracy nuai-ah khangkhia napi democracy bang hiam, politics bang hiam cih thei lo teng bekin makaite hawmthawhna kampau ngam teng mawhsak ngam in, makaite thuman lohna leh citlahna teng pumgup nam eueu lai uh hi.

A mawh puakna thudon lo, hong mainawtpih ding banga hong mainawtpih lo, a nawk ding banga nawk ngam lo, maphu ngam lo kimanna ding nei lo makai dinga deih lai-a teelcing lailai a, lametna neite (mipite) pen mitdel sialkhau len leh mittaw lam kihilhsak a a tun nopna tun ding a lamen lai teng ahi hi?

Makai muan tham ding ding leh na rights a vangliatna theih sawm in la, phawk in. Nang khut ah zong mawhpuakna lianpi kinga hi. Na rights thei in, a vangliatna zatsiam in. Mipite hamphatna ding laikhia thei lo makai khat leh mihai khat a manphatna kikim a, mipite hamphatna ding lampi ah hong makai thei lo makai khat muang ngam den pa/nu leh mihai khat a kilamdan'na om tuan lo hi. Leitung kinawh lua ta ahih manin ei hamphatna ding mah delh in, i laihkhiat sawm a, i nawk mengmeng kei leh kuamah in i khut sungah i deih leh hamphatna ding hong pia lo ding hi. Na galpa na zawh theihna dingin do lo phamawh a, kuamah in a lutang hong tansak in, na khut sungah kuang in na galpa lutang hong pia diaiduai lo ding hi.

-Thang Khan Lian

TEXAS A&M UMIVERSITY IN 'LIVES MATTERS' PAWLTE LAMZUIHNA LEH KIPAWLKHAWM DING PHAL LO

TEXAS A&M UMIVERSITY IN 'LIVES MATTERS' PAWLTE LAMZUIHNA LEH KIPAWLKHAWM DING PHAL LO

Aug. 19, 2017: US gamah Confederate phawkna dinga lim leh na lui (symbols & monuments) om khempeuh lakkhiat ding thunei ten a hanciam laitak un nung Kiginni a kipanin mikangte vanlian pen hi ci 'white supremacist' ten lungphona a neihna hangun Confederate phawlna limte lakkhiat ding deih leh deih lo pawl lungphona neihte kinawktuahna hangin mi 3 a sih ban ah mi 19 in liamna tuak hi. Hih bangin Charlottesvile, Virginia ah kinawhtuahna hanga ngongtatna thu Trump' comments kilawm lo hangin a lungkim lo tam mahmah a, kitelsiam lohna khangsak beh hi. White supremacist ten mipi kipawlkhawm ahih kei leh lampi zuihna (rally) "White Lives Matters" kici rally September 11 ciangin a neih sawm uh Texas A&M University's (TAMU) in phalna phiat kik (cancelled) sak ahih manin white supremacist-te a lungkim lo tam mahmah leuleu uh hi.

White Lives Matter rally saina ah makai leh local white supremacist makai Preston Wiginton in Charlottesville khua-ah "Unite the Right" rally a saina pen US khangthu adingin white supremacist-te mihon kikhopkhawmna thupi pen pawl leh tamna pen pawl ahi hi. TAMU in hih bangin rally a neih kik sawmna uh-ah far-right leh neo-Nazi speakers-te kihel ding ahih manin TAMU huang sung, sangnaupangte leh mipi adingin bit lo ahih manin rally a neih ding uh phalna kipia pen kiphiat kik hi ci-in Monday statement ah tuangsak hi. TAMU in a phalna a a phiat kiksak manin Preston Wiginton in TAMU hek sawm in sitnite (lawyers) tawh mapangkhawm ta uh hi ci-in Texas Tribune in suaksak hi. Wiginton in TAMU in rally neih ding phalna a phiat kik pen mikangte nuntakna man nei lo a, mikangte a sih ding phamawh sa lo ("it appears that at TAMU white lives don't matter and the demise of the white population is of no concern to them") ci-in ngawh hi.

Midam kideidanna langpang lungphona ( anti-racist protests) neihna US sung mun tuamtuam ah nei kawikawi uh ahih manin mikangte nuntakna in man nei a, mikangte pen thupi/vanglian pen hi ci pawl far-right ten hun a neihna uh Trump' cing khit zawh hong nasia semsem ahih manin a gamtatna uh kipawlna hunte (events) lim takin ki-encik a, US sunga politicians, uliante (officials) leh minam makai (community leaders) tuamtuam mawhpaih mun mahmah ta uh hi. Charlottesville khua-ah Unite the Right rally a kihel Ohoi panin a kuan James Alex Fields kici pa pen a car tawh tua rally neih deih lo lungphona neite lak a car tawh nawksak in kum 32 numei Heather Heyer taihlum sak in kingawh ta hi. Charlottesville-a Unite the Right rally neih ding sai Wiginton in Charlottesville thupiang hangin Texas ah White Lives Matter rally neih ding leh liberal anti-white agenda langpan nopna tha hong pia hi ci zaw lai a, "tu ni-in Charlottesville, zing ciangin Texas A&M ah," cih gelh a, far-right groups a kihel white supremacists leh neo-Nazis-te (a nuai-a maan en lecin Judahte mudah Nazi galkapte zahtakna i.e. salute piak dan a lut laamte) kipumkhatna dingin alt-right makai Richard Spencer zong TAMU rally ah tonpih dingin geelna ka nei hi ci hi.

TAMU ah rally neih ding kiphal hi leh thugen dingte lakah Richard Spencer, neo-Nazi tawh kizopna nei White Lives Matter group organiser Ken Reed, far-right radio zindo (host) leh "white sharia'' poimawhna tangkopih leh numeite ngim dingin mi tha pia in "white rape gangs'' kite makaih Sacco Vandal cih ten thugenna nei ding uh hi. Nung kum December in TAMU ah Richard Spencer in a thugenna ah mi 1,200 paikhawm uh hi. TAMU a Ph.D sangnaupang Adam Kelly in white supremacist ten TAMU ah rally hong neihna ding uh a kiphal leh sangnaupangte leh khuami ten a deih lohna lahna dingin lungphona (counterprotest) tul tampi in kinei ding hi ci hi. "Wiginton in nung kal-a Charlottesville ngongtatna hangin tuahsiat leh Heather Heyer' sihna political thupuahtawh tangkopihna (cheap political propaganda) dingin nei a, amau pawlte ngaihsutna leh thubullet pen kihuatna leh kihuatna hanga ngongtatna gamtat ahih manin TAMU ah kimuak lo hi," ci-in Al Jazeera newste kiangah gen a, a ut bang uh gen theihna ding hamphatna (rights) a neih hangun a ut bang teng uh gen theihna ding rights nei lo uh ahih manin ka langpanna uh lahna nei ding hi ung ci-in gen beh hi.

University of Florida pen zong Spencer' think-tank National Policy Institute ten hun a neih ding phalna pia nuam lo uh hi. Alabama pansan Southern Poverty Law Center (SPLC) watchdog in in White Lives Matter pen huatna kipawlkhawmna (hate group) hi ci hi. SPLC pen US ah mikangte leh police ten mivomte tampi a ngong bawlna leh a thahna hangin 2015 in Black Lives Matter civil rights movement ci-in hong kiphuankhia a, White Lives Matter pen Texas pansan Aryan Renaissance Society tawh kizopna nei a, a national director uh Ken Reed hi. SPLC in White Lives Matter pen ''neo-Nazi group" hi a, a memberte un social media ah Judahte muhdahna leh minam kideidanna thu (anti-Semitic and racist content) post den uh hi ci hi. Gentehna dingin White Lives Matter members ten a maante uh a tate uh tawh Nazi salutes a piakna post uh a, neo-Nazi mabatte lakah "1488" cih nak zat mahmah uh hi. Nambat 14 a genna pen, "Mikangte tate maban ding leh mikangte bitna bawl ding," cih leitung bup a white supremacist-te thudeih tangkopih (slogans) nak zat mahmah uh hi. Nambat 88 pen manglai a mal a mal giatna "h" - "Hitlet khansau hen!" a cihna ahi hi. Tua loin "Kek" kici zong far-right social media zang ten a zat mun mahmah uh kammal hi a, "k*ke khempeuh that un," a cihna uh hi.

Ken Reed in ama maan a postna ah (a muai-a maan) Rhodesia (1965-1979) lan (flag) tawh kipost hi. Rhodesia pen Africa leitaw lam-a gam tu-in Zimbabwe kici gam hi a, Zimbawbwe kumpi in a ciamtehna a piak nuam loh white-separatist state deihte kiphinna ahi hi. Houston, Austin leh Texas khuapi mun tuamtuam ah White Lives Matter lungphona nei ten hun a neih uh ciangin rifles thau leh thau neu (firearms) tuamtuam tawi uh hi (Ei Zomi thukan lo pawl in pakta dep in gam it galkap a cihte uh hi). October 2016 in Houston ah White Lives Matter ten Anti-Defamation League (ADL) ah mipi paikhawm in thau pua tam mahmah hi. August 2016 in zong National Association for the Advancement of Colored People (NAACP), Houston ah "white lives matter" ci-in gam ui bangin awng ngeingai uh hi.

US Court in phalna a piak leh Houston Socialist Movement
makai David Michael Smith in White Lives Matter kumpi in a phiatna dingin College Station ah trek kinei ding hi ci a, ama pawlte leh White Lives Matter + far-right groups tuamtuam Texas ah kinawktuah mun mahmah ta uh hi. Hih White Lives Matters memberte pen neo-Nazi organisations pawl tuamtuam, tuate lakah Aryan Renaissance Society leh a dangdang kihel a, Texas state sung mun tuamtuam leh a pua lamah a vak kawikawi in mipite kiangah mikangte pen namdangte sangin thupi/vanglian zaw hi cih tangkopih uh hi ci-in Smith in ci hi. "Nazite thubullet fascist (party khat bek omna leh kumpi in na khempeuh tungah thuneihna a neihna -totalitarianism) leh Theird Reich (dei thumna a cihna, Nazi kumpi in Germany Jan. 1933-May 1945 sung a uk sungun Judahte a lom thahna hun uh "Holocaust" kici Judate 6 million val a kithah hun) dinna leh kipawlna kisang lo a, a thubullet uh pen a sisan leh leitang a dinna uh-ah om ahih manin a upna nin uh uh a kizelh ding kideih lo hi," ci-in gen beh hi.

Far-rights/white supremacist - Ku Klux Klan, neo-Nazis leh "alt-left" ten Trump in 2016 president election ah gualzawhna a ngah khit nung June kha dong American Universities tuamtuam ah minam khat leh khat kimuhdahna dingin lai 330 suahkhia (documented) suang ta uh hi ci-in SPLC in ciamteh hi. White supremacists kicite lakah Vanguard America (amau leh amau fascist) mikangte hamphatna ding bek state (white ethnostate) kici pawi khat a zatna uh a, Texas state sunga universities tuamtuam ah "the Texan offensive" cih kammal tu kum bulin suang uh hi. Texas A&M professor Tommy Curry in African American ten amau leh amau amau kihumbit theihna dingun rights mikangte bangin nei hi cih kammal a zat manin white supremacists ten thah dingin vau uh hi. White supremacist pen thu-upna kawcik, man lo leh minam deidantuamna tawh gam itna (narrow, erroneous and ethnonationalist philosophy) ahih manin tua bang ngaihsutna democracy ah mun nei lo hi ci hi.

Laigelh Patrick Strickland on Twitter: @ @P_Strickland_
Source: Al Jazeera

#Bottom line: Hih dan khawng hi bualbual ei #Make America Great Again ci-a tangkopih pawl leh tua kammal kigelh puan silh leh lukhu khu White Supremacist makaite leh memberte deihna pen "Make America Hate Again", "Make America Go Insane (Hai) Again" suaksak teng hi zaw hi. Zomite hi banga ngongtatte a pakta kitam dep zaw lai hi. Hih dan ngaihsutna neite thubullet leh Buddhist nationalists, Hindu terror/Hindu fundamentalists (bawngsa kem dinga upmawhte nangawn a that ngam) leh Muslim ngontat ISte kilamdanna tam lo hi. Hih dan ngaihsutna neite a hat peuh leh gam bit lo a, kitualvatna piangin, a sawt teh gam kiphelkhap hi. Mikangte nungtakna bekin man nei lo a, mi khempeuh nuntakna in man nei hi. Trump in President sawt a let leh American Civil 2na hong nam hiaihiai ding bang hi. *Puan kang bekbek silh in, a kang bekbek ne le uh pha ve.

#Everybody's lives Matters

@Thang Khan Lian #ZUNs