MIHINGTE NAM LI LIAN PHA
Sia Gin Khat Suan in Rangoon panin 1974-75 kum-a kikhen Zomi University Magazine sunga laimal 19 sungah a gelh "Mihing Nam Li Lian Pha," a cih sungah:
Mihingte nam li lian pha,
Tua sungah kihel lote
Zu leh va, leh mi leh sa,
Kimanna nei lo hi ve.
A khatna mi nam pawlte'n
Pilna siamna nei napi,
Tuate zat lohpi'n koih ven,
Bilhcip thong, pammaih si!
A nihna mi namte'n lah
Sem napi-in pilna nei lo;
Tuate sepna sia kik pah,
A tawntung kimang thei lo.
A thumna pawl ahih leh,
Pil lah pil a, sem lah sem;
Tuate'n sepkhiat a neih teh
I leitung hoihna tawh zem.
A lina pawlte bel
Thei lo, sem lote pawl hi;
Tuate bel mi lak-a hel
Dinga zong deihtak lopi!
Behlapna: Biakna vai ahi a, gam vai tawh kisai ahi ta zongin pilna leh saupi muhna leh geelna (vision) om lopi-in sep cihtakin sem, cintui kang liangin i hanciam zongin kimanna mel nei loin a tawntung a kimang zo ding om lo ding ahih manin huihpi nungdelh bat khak ding thubaih hi. Tua loin thei lah thei lo, sem lah sem lo leh thapia nuam lo lai sawnsawn, a sem leh mapangte a galbawl zaw laite pawl bel mi lakah zong hel dinga zong deihtak lo pawl hi.
Pilna siamna nei napi zat lohpi'n koihin bilhcip thong, pammaih ahih manin i pilna leh siamna neihte i gam leh minam ading, a hong pia Pasian' adingin zat ciilbawl kei ni. Pil lah pil, sep lah a sem te in sepkhiat a neih uh teh i leitung hoihna tawh zem uh hi.
Tua ahih manin pil lah pil, sepkhiatna tawh a lak nuamte min leh za bek a deih, angsung ding bek a khuat nuam pilna leh siamna nei napi-in min leh za, makai tutna mun bek a khialah ten ot hun ta hi. Sepkhiatna nei lopi-in tutna ah khe thuapsa-in a mot tuttut pawlte pen lo lai-ah khacite a deep tum mang kimanna a nei lo suangtum tawh kibang hi.
(Christian Literature Center, Guwahati in 2004 in a khetsat Rev. Khup Za Go' "Leivui Panin" a cih laibu sunga laimai 173-174 sungah "Thu I Cih La Hi" cih article panin kong lakkhiat leh hop sawn hi. - Thang Khan Lian #ZUNs reports)
