GITLOHNA TAWH THUK KIKNA IN GITLOHNA KIKIM LEH A NASIA ZAW PIAN'SAK BEH

GITLOHNA TAWH THUK KIKNA IN GITLOHNA KIKIM LEH A NASIA ZAW PIAN'SAK BEH

Ni khat khuata khatah singkung-ah khau tawh lano (colt) kikhih hi. Dawi mangpa hong pai-in singkung ah lano kikhih a muh ciangin hehpih ahih manin a kikhihna khau phelin khah hi. Tua khitin khua sunga lokhomi pa (farmer) lo ah a lano va lut a, a lo lai-a khaici omte ban tuatcil sak in, va nek sak gawp hi. Lokhomi pa' zi in tua lano' gamtatna a muh ciangin a lo a khaici khempeuh a suksiatsak khak ding lau ahih manin a thau (rifle) la-in tua lano kaplup sak ziau hi.

Tua lano neipa in a lano si a muh ciangin a sinso lua-in a hehna kideek zo lo ahih manin a thau la-in lokhomi pa' zi kaplum hi. Lokhomi pa in inn hong ciah ciangin a zi si sa-in mu a, kua thah hiam cih hong kankhia pah samsam hi. Lano neipa in a kaplup hi cih a theih ciangin heh lua ahih manin a thau la-in lano neipa kaplum hi.

Lano neipa' tapate in a pa' luanghawm a muh ciangun heh lua uh ahih manin lokhomi pa lo ah pai-in namgimtui buakin a lo a khaici ding lai teng haltum sak uh hi. Lokhomi pa zong thangpai lua ahih manin a thukkik theihna dingin (phu lakna dingin) lokhomi pa tapa teng thah sak hi.

A khua sung uh-a kilom thahna (massacre) lipkhaphuai hong kipatna thu khua mite in a bul a bal in hong kan ciangun singkung khat-a lano kikhih kimlai dawi mangpa in a kikhihna suk sak in, a khahna hang hi cih hong thei khia uh hi. Tua ciangin khua mite dawi mangpa kiangah hong pai uh a, "Na gamtatna bang hi peuhmah hiam?" ci-in va dong uh hi. Dawi mangpa in, "Bangmah siatna gamtang kei veng aw. Singkunga lano kikhih ka muh ciangin gilkial dangtak ding hi ci-in ka lainatna manin a kikhihna sut sakin, ka khah hi bek hi," ci-in dawng hi.

Hih tangthu a deihna na telsiam hiam? Dawi mangpa in na lianpi septheihna ding leh hong suk theihna dingin vangliatna a neih thupi lo a, mihingte khut zang loin a vangliatna neih a thupit tei sam hangin zang thei lo hi. Dawi mangpa in a ngimna hoih lo a sepkhiat theihna ding leh mihingte' tungah siatna a bawl theihna ding nasep khiat na neu no a hamsa lo (simple thing) bek ahi hi. Leitunga mawhna hong kipatna bulpi Eden huan sunga mawhna hong pian'na thu i et ciangin zong dawi mangpa in Eve kiangah nek loh ding theigah a nekna dingin a va khem hi bek a, Eve' kam sungah nek loh ding theigah va guan'lut sak lo hi.

Phu (revenge) i lak kik ma leh siatna leh gitlohna i tunga hong kibawlte siatna leh gitlohna mah tawh i thuk kik ma-in lim takin ngaihsun masa ni. Phu lak kikna dingin na gamtat ma-in tam veipi ngaihsun masa in. Dawi mangpa sepkhiat leh gamtatna pen singkungah khau tawh kikhih lano sut khia-in a khahkhiat bek ahi hi.

Mahatma Gandhi in, "Mittang khat adingin mittang khatin leitung bup khuamu loin mitdel sak hi (An eye for an eye makes the whole world blind)," a cih phu lak kikna dingin i gamtat ma-in lim takin ngaihsuthui hi. English Physicist, Natural philosopher, Alchemist, Theologian, Mathematician, Astronomer leh Economist Sir Isaac Newton in a Third Law of Motion ah, "Gamtatna;sepkhiatna (action) khatpeuh in a kikim thuk kikna kibang (equal reaction) mah piangsak hi," na ci hi.

Dawi mangpa’ hong hihna ding khempeuh na dalzawhna dingun Pasian’ galvan namkim na zang un. Eite’ do pen leitung mite hilo a, vantung huih lakah a om ukna, aana a neite, hih leitung khuamial a uk a tuamtuamte ahi hi. Tua ahih manin hun haksat hun hong tun ciangin galte’ hong sukna teng khempeuh nangzo-in, a tawpna-ah a gualzo na hih theihna dingun Pasian’ galvan namkim na zang un. Tua ahih ciangin kawnggak gak bangin thutak zang un la, awmdal bulh bangin thuman zang un la, kithawi a khedap bulh bangin Lungdamna Thu a hilhkhia dingin kiging un. Tua banah, dawi mangpa’ hong kapna thaltang kuangte na sukmitna dingun lum puak bangin upna na nei tawntung un. Sik lukhu khuk bangin hotkhiatna nei un la, Kha Siangtho in a hong piak Pasian’ thu pen namsau zat bangin na zang un. Kha Siangtho tawh kopin a tawntungin Pasian kiangah na kisapna khempeuh uh ngenin na thum un la, tatsat loin Pasian mi khempeuh adingin thu na ngetsak un. (Efesa 6:11-18)

Mite' hong bawlsiatna thuk ding ngaihsun kei in la, Topa' hong huh ding ngak in. Tawi suang nam nih a zangte Topa in mudah a, amah in tawi khaina man lote hoih sa lo hi (Paunak 20:22 - 23). Na hehna uh kuama tungah thuk kik kei un la, Pasian' thukkik dingin koih lel un. Bang hang hiam cih leh Lai Siangtho sungah, "Keimah in amaute tungah ka thuk ding a, mi dangte a gimsak bangun ka gimsak ding hi, Topa in ci hi.'' (Rom 12:19) Tua ahih manin gitlohna kizosak kei un la, a pha gamtatna tawh gitlohna a zo na hi ta un (Rom 12:21).

✍️ Thang Khan Lian #ZUNs

PAAKTE LEH CHOCHOLATE GIM BANGIN VEIH A NAMTUINA DING ZATANG COMPANY IN ZUAK ZIAHZIAH TA

PAAKTE LEH CHOCHOLATE GIM BANGIN VEIH A NAMTUINA DING ZATANG COMPANY IN ZUAK ZIAHZIAH TA

Nov. 29, 2019; Laithai: France gam-a Gestvres khuata a teng kum 65 a upna na thak mu leh bawlkhia (inventor) Christian Poincheval in veih a namtuina dingin zatang poimawh khat a bawlkhiat manin leitung bup gam tuamtuam-a innkuan sungah a min kizeelmang ta hi. A zatang bawl pen capsules hi a, a min Lutin Malin kici hi. A zatang pen ama website pilulepet.com kici panin online in lei theih hi. Veih namtuisakna dingin a zatang bawl tam man lo a, bawm khat sungah tang 60 om a, $23 kiim man hi.

Poincheval in veih a gim nam tuamtuam a neih theihna dingin a zatang bawl order a bawl customers mite deih bangin nam tuamtuam bawl a, tuate lakah chocolate gim nam ding veih, sing (ginger) gim nam ding, paak nam tuamtuam gim nam ding, lopakung; kiaknote (herbs) leh mehpuahna masala (spices) nam tuamtuamte nam dingin bawl hi. Poinchevai website in gankhoite (pets - gentehna: ui leh zawhngeu) cihte nagawn in veih a hauh uh a khiamna dingin fart-reducing powder offer zong bawl hi.

Poincheval in Telegraph news kiangah, "Hih bang zatang bawl ding ngaihsutna ka neih pen 2006 in ka lawmte mi tam lo tawh restaurant ah an ka nek laitak un veih hong sang/peek om ahih manin maizumhuai mahmah dinmun hong pian'sak manin veih namtui theihna dingin zatang bawl nopna ka nei hi. An tampi i nek khit ciangin i veihte uh uih thei lua ahih manin i husam dekdek liang uh hi. Restaurant ah an ka nek lai-un ka lawmte khatin veih hong peek ciangin ka kiang nai uh-a sabuai (table) a tute lungdam lo uh hi. Bang hiam khat bawl kisam hi cih ngaihsutna ka nei hi," ci hi.

Tua khit nungin Poincheval in hih buaina ven' sak theihna ding ngaihsut hong kipan hi. "Anteh lohing bek ne (vegetarian) i hih leh i veih anteh lohing gim nam a, bawng ek gim nam hi. Ahih hangin sa i nek ciangin i veih gim nam pen thukim zawh ding hilo (much disagreeable) hi. A veih gim nam a kilawm zawkna dingin bang hiam bawl kisam hi," ci hi.

Poincheval in maizumna dinmun mite a tuahna ding panin hutkhiat theihna dingin ka zatang bawlte pen cidamna tawh zong kituak a, sungpuak manin veih sansan leh vegetable coal, fennel, seaweed, plant resin, bilberry leh cacao zest kihel carbonated beverage dawn'na hangin sungpuak manin veih hauh khiam thei hi ci hi.

Poincheval in ka zatang bawlte pen holidays ciangin ciamnuih letsong (joke gifts) in a kipiak hangin a kizatna manpha hi ci hi. "Customers tuamtuam mi ka nei hi. Sung hat lohna hangin buaina neite leh a lawmte kiangah ciamnuihna dan in a khak nuamte in ka zatang bawlte hong leisak uh hi. Christmas ciangin hong kinak leisak mahmah hi," ci hi.

Poincheval' product’s website ah, “Hih veih zatang (Fart Pill) pen kum tampi research bawlna leh hoih mah cih etkhiatna (trails) a kibawl khit nungin 2007 panin kizuak hi. Gim nam tuamtuam a neih manin hun tuamtuam adingin ciamnuihna suak hi. Hong leisak customers ten bhong zuan kikkik uh ahih hoih hi cih kilang hi," cih tuangsak hi.

A zatang ne khin Buzzfeed writer in, "Ka gil a nop loh ciang, ka sung a puak ciang leh temporary digestive problems tuamtuam ka neih ciang adingin hoih a, ka nek ciangin kuamah in ka veih gim za lo uh a, ka lawmte pawl khatte in lingpaak (rose) gim nam hi hong ci uh hi," ci hi.

"Kei tuah khitsa lawhcin'na ahi a, a zatang violets gim a nam zongin lawhsam hi. Ahih hangin ka veih gim kiza lo ahih manin placebo effect hiam cih ka thei kei hi. Ahih kei leh ka lungsim in ka pumpi khem in a uih lo zaw veih sang ka hiam cih ka thei kei hi. Gualnopna pawi hun ciangin veih uih peek manin gualnop laitak ka nawngkaisak nuam kei hi. Kuamah in muammawh a sak lohna hih zatangte ka ne hi. Ahih hangin khat vei nekin tang guk bang nek kisam ahih manin ka ne den kei hi. Ahih kei leh ni 10 sung val activated charcoal nek loh kisam kisam hi," ci-in Buzzfeed journalist numei in gen beh hi.

Veih uih a nei lo banga om nuam Zoliate khualna tawh Zokam in hong kiteisawm ahih manin na kihilhsawn ziahziah lel vo leh :P

Source: AOAN News

@ Thang Khan Lian #ZUNs

I thu up zia leh thusan ziate ngaihsun thei leng na mah hi

I thu up zia leh thusan ziate ngaihsun thei leng na mah hi

Tu hun in Khristian pawlpi sunga kideidantuamna leh ki-angvantuamna leh kideihsaktuamna hih bang hi zen hi. Ni khat khuata khat ah......

1. Pawlpi makaite: Pastor pa in car thak kisam ta ahih manin sum kithawh in leisak ni.

1. 2. Pawlpi makaite: I pawlpi sunga cina khat zato inn ah at ding mi om ahih manin ama adingin thu ngetsak ni.

Car sangin cina khat nuntakna humbit theihna dingin Pasian in dam lote kem dingin pilna siamna pia-in a mi zat siavuante in na a sep theihna dingun lampi hong ding maw ahih kei leh khaktansak zaw ding maw? Koi thupi zaw i sa hiam?

Hih bang gentehna i gen lai takin car kisam Pastor pa' car neih theihna dingin thu ngetna kisam loin sum bekmah kisam masa zaw sa sese ihi hiam? A nuntakna a suplawh thei ding khat i huh theihna a manlang thei pen omsun sum tawh huh ding sangin cina damsak theihna vangliatna (healing power) leh BY FEIH khauh mahmah nei ihih le bel thungetna bek kisam kha mah ding hi. Tua bangin cina damsak theihna dingin vangliatna (healing power) leh BY FEIH khauh mahmah nei na hih leh na it mahmah na innkuanpite, na zi, na pasal leh na tate in sih theihna dingin natna leh liamna a tuah ciangin sum zat sawm loin thungetna bek na nei ngam takpi diam? Na cinat lunat ciangin zatui zatang ne sese lo, siavuante kiangah kilak sese loin thungetna bek tawh na dam sawm takpi mah hiam?

Hih tangthu lungngai beh ni:

Ni khat thu um mahmah leh BY FEIH khauhpai mahmah thuah nei leh tuipeek thei lo pasal khat tuipi sungah kia hi. Cimawh mangbangin thu hong ngen a, "Topa aw, na tapa tuikia in ka sih khak lohna dingin hong hunkhia in," ci hi. Pasian in amah hunkhia dingin teembaw khat sawl pah hi. Ahi zongin gua teembaw sunga hutkhiatna nasemte in a hutkhiat sawmin khutzan in khauh a khiat hangun, "Pasian' kiangah thungen ka hih manin amah in hong hunkhia ding hi," ci-in ut lo hi. Teembaw sunga tuangte in cihna ding thei loin taisan uh hi. Tua khitin Pasian in helicopter zang hutkhiatna nasemte sawl a, tukia mipa zam theih dingin kahlei a khiatsuk hangin a khut in zam in na man nuam lo ahih manin nusiatsan leuleu uh hi.

Tua khitin Pasian in government' nasem tuipeek siamte leh tui thukpi sung luh siamte tua mipa hunkhia dingin a sawl hangin, "Ka thungetna za lo dingin Pasian bilngawng lo a, ihmu loin zawngkhal beek lo ahih manin ama' khut ngiat tawh hong hunkhia ding hi," ci-in na nolh leuleu hi. Tua mite in cihna ding thei loin nusiatsan uh a, tuikia mipa ngapi in nawmvalh a, Jonah bangin sia khia kik lo ahih manin si hi.

Tua tuikialum mipa' kha Pasian mai-ah a tun ciangin Pasian hehsan in a mai-ah kitom phangphang a, "Kong thungetna bang hangin hong thudon loin hong hunkhia lo na hi hiam? Na bil ngawng ahi hiam? Hong hunkhia zo dingin na thanem lua hiam?" ci-in Pasian phin gawp hi. Pasian in, "Na kampi bek tawh hong um a kineihkhem mipa aw, nang hong huh ding mi thum vei tak kong sawl hangin kong sawl mite muang lo, sang loin na hawlkhia hi. A hai thu um kineih mipa aw, na thungetna hong kidawng napi a thudon lo leh ka maitang muh sese tawh kei hong um zo pan ding mi na hih manin nang omna dingin a kilawm hell khuk ah manlang takin pai in," ci-in hawlkhia hi.

@ Thang Khan Lian #ZUNs

ZIMBABWEAN PRESIDENT LUI ROBERT MUGABE IN AFRICAN MITE A KIDEIDANTUAMNA THU A GENNA

• Europe panin mikangte Africa ah hong lut uh ciangin "tuipi tung tawn in mun gamlapi ah khualzin mite" (voyagers) kici hi.
• Africa panin Europe ah i lut ciangin "thukham palsatin mi dang gam-ah peemtate;gambeelte" (illegal immigrants) kici hi.
• Europe ah African a hon in a lut ciangun "galtaite" (refugees) kici hi.
• Africa ah European mite a hon in hong lut ciangun "khualzin mite" (tourists) kici hi.
• African mite a hon in gammang/singbuk lakah a lut ciangun "thukham palsatin sabengte" (poachers) kici hi.
• European mite a hon in gammang/singbukna mun-ah a lut ciangun "sabengte" (hunters) kici hi.
• Gam dang ah mivom nasem in omte "gamdangmite" (foreigners) kici hi.
• Gam dang ah mikang nasemte "amau gam pulam-a teng mite" (expratiates) kici hi.
• Leitung in Africa hong lawhsamsak hi.

#Behlapna:

Archbishop Desmond Tutu' kammal:

"Africa ah (mikang) missionary-te hong pai cil lai un amaute in Lai Siangtho nei uh a, ko (African ten) leitang ka nei uh hi. Missionarty-te in 'Thungen ni,' hong ci uh hi. (A thungetna uh a man khit ciangun) ka mitte uh ka hak ciangun Lai Siangtho ko khut sungah na om (ka nei uh) a, amaute khut sungah ka leitang uh om in amau aa suak hi.

Maan: Robert Mugabe leh Desmond Tutu

@ Thang Khan Lian #ZUNs reports