EX-TRUMP' ADVISER FLYNN IN FBI KIANGAH MAWH MAH HI'NG CI TA
Dec. 2, 2017: Trump' National Security Adviser lui Michael Flynn in Trump a zum ah a tut ma-in FBIte kiangah zuau thupulakna (false statement) na pia mah hi'ng ci-in kipulakkhia ta hi. 2016 US presidential election ah Russia kigolhna thu ngawhna vai ah Flynn in a zuau na gen hi. Associated Press in a genna ah Flynn in Trump campaign a senior transition ulian ten tang takin kimaituahin (directly) Russiate kimuhpih mah hi ci-in a a beisa-in kimuhpih lo hi ci-in a zuau a genna thu zan in kipholakkhia hi ci hi.
Trump' thukhen/sitna Ty Cobb in, "Flynn lo adang tungah ngawhna om lo a, amah lo kuamah in mawh hi'ng ci lo uh hi. Special Council Robert Muller' nasepna thukhupna ah Special Council a pai ding bangin mainawt a, thukhupna kician tawh khum hi cih kitel hi," ci-in thukhupna man nai lopi thukhupna man hi ci-in a statement bawlna ah pulak hi.
Flynn pen hun khat lai-in Trump adingin mi muanhuai mahmah leh amah huh (aide) hi a, US presidential election ah Russia tawh kigullukna ah a min Trump administration ah awk kha ahih manin Trump in kitawp dingin a sawlna bangin February kha-in kitawp hi. Zan a court document kifiled ah Flynn in "utna" leh "theih kilkel sa-in" "thuman lo, "phuahtawm," leh "thuzuau" genna 2016 in FBI kiangah pia hi cih tuang hi. February kha-in Flynn a kitawp in US vice president Pence kiangah Russian ambassor tawh a kihona thu a kician loin pia hi.
Flynn in Trump advisers-te kiangah Russian ambassador Sergey Kislak kiangah US in Russia tungah khalna a koih lakkhiatna ding ka gen kha kei uh hi ci hi. Ahih hangin tua khitin White House uliante kiangah khalna thu kumpi kilaih hun (transition period) sungin ka gen kha mai thei uh ci kik leuleu hi. Russia tawh Trump campaign kigullukna ngawhna thukhanna "Russian probe" kici a Special Council Robert Muller' thukanna ah Trump administration sung panin ngawhna tuak senior pen Flynn hi.
Flynn in mawh hi ci-in ci-in statement a bawlna ah, "Ka gamtatna man lo h. Mawh hi'ng ci-in ka kipulak a, Special Council' office tawh kipawl dingin (thukanna neihna ah) ka innkuanpihte leh ka gam phattuamna leh hoihna dingin ka thukim hi," ci hi. October kha-in zong Trump campaign a manager lui Paul Manafort leh sum bawl mi a kizoppih Rick Gates in US minsiatna ding, sum a man loin ngah, leh sum vai ngawhna tuamtuam kihel in ngawhna (charges) 12 tak na tuak uh hi. Tua loin Trump huh ngei (former-aide) George Papadopoulos in zong October kha-in FBI kiangah mawh hi'ng ci-in na kipulak hi. Hih teng pen Russia kigullukna ngawhna thukanna ah awk kha vive ahi uh hi.
Al Jazeera reporter Kimberly Halkett hih bangin Flynn in mawh mah hi'ng ci-a a kipulakkhiat pen a ciamtehtham leh thulianpi hi ci-in Washington, DC, panin gen hi. Flynn' thukhente leh Trump thukhente (legal team) in kizopna nei nawn lo uh cih news report om ahih manin Flynn leh thukanna nei Muller in kihona nei uh cih analys tampi in ummawh uh hi. "Thuman lo gen hi'ng ci-in kamciamna a bawl pen Special Councel Muller leh Flynn in kihona nei-in kipawl (co-operate) uh hi cih kitel a, hih bangin a pulakna panin Russia tawh kigulluk (collude) hi cih kitel hi Trump a zum ah a tut ma-in Obama administration in Russia tungah khalna a koih lakkhiatna ding Russia tawh genkhawmna nei uh hi," ci-in attorney and executive director of Citizens for Responsibility and Ethics Malanie Sloan in ci hi.
Flynn in Russian ambassador Sergey I. Kislyak tawh nih vei kimuhkhawmna na nei napi kimuhkhawm lo hi ung ci-in FBI kiangah a zuau gen hi. FBI kiangah a zuau a gen manin mawhsakna a tuah leh kum nga thongkia thei hi. Amau gel in kimukhawmna a neih lai un Obama administration in Israel ten UN thukham palsat in Palestine mite leitang ah teenna ding a lamna a mawhpaihna ding dal ding vai zong genkhawmna nei uh hi. Special Councel in a thukanna ah Trump tranistion team ten gamdang ten zong Israel PM Netanyahu in Israel a gupna ding a ngetna bangin a thuzawhna ding leh Israel gupna dingin pawl na zong uh hi cih mukhia hi. Hih bang pian theihna ding hanciamna ah Israel gum ding gamte pawl zongin Flynn leh Trump' makpapa Jared Kushner (tu-in Trump' senior adviser len) in tavuan len hi.
Flynn in Trump campaign ah zong adviser na len a, Trump hong cing ciangin national security adviser len hi. Obama administration in terrorism lehdona dingin counteroperation operations a bawlna langpang leh gensia in na pang a, 2016 in US Army general a pension khitin Trump campaign ah adviser hong let manin a min hong dawk hi. Obama' hun lai-in thau tawi kipawlna (armed groups) lauhuaina vai a kigen lai-in Flynn in Defense Intelligence Agency (DIA) lutang leh intelligence agency makai lianpen thumna na len a, tua hunin zong Obama' uliante tawh na kinial uh a, 2014 in DIA panin a sepna kitawpsak a, tua khitin pension hi.
Trump administration ah Flynn in national security adviser kha khat zong len man loin kitawp hi. US Army panin a pension khitin Flynn leh a tapa Michael G. Flynn in Flynn Intel Group Inc. ah sem uh a, tua a kipanin foreign government tawh a nasepkhop lam uh hong kitheikhia hi. Flynn company in Turkey government tawh kizopna nei Dutch company tawh nasem khawm uh hi. Trump campaign ah adviser a let la-in Flyn in 2016 in Turkey uliante na kimuhpih a, Turkey kumpi galkap thahatna ding tawh laih a sawm makaipi leh US a galtai a om Fetullah Gullen pimang ding geelna na nei uh hi. Ahih hangin Flynn' thukhen ten hih thu man lo hi ci hi.
US thukam (law) ah ulian ten foreign government tawh nasep khawm theihna dingin foreign agents ci-in minkhumna (register) a bawl uh kul a, Flynn in March 2017 in register na bawl pan hi. Flynn thusim kipholakkhia panin Trump administration buahna thu tawm bek hong kitawlemkhia hi pan a, US pen leitungah thunei pen danin mi tamzaw in a ngaihsut hangun Israel in tengta bang leh nasem bangin a ut bangbangin a thukham palsatna teng a sel dingin vanzat in a zat gige ahihna thu a thei lote theih dingin kipholakkhia hi. Trump in bel tu dong Russia tawh kigullukna thu pen thuphuahtawm, mi up theih dinga thu kibawltawm (fake, hoax) ci lai hi.
Source: Al Jazeera; The Hindu
@Thang Khan Lian #ZUNs
