OSAMA BIN LADEN IN AL-QAEDATE $ 29 MILLION NUSIAT
March 4, 2016: US ten Osama document a thusim a pholakna ah a khut tawh a gelh laimal sungah al-Qaeda makaipipa Osama bin Laden in a sih ma-in a neihsa sum $29 million al-Qaedate zat dingin nusia hi ci hi.
Hih Bin Laden' lai gelh pen 2011 in Pakistan gam sunga om Abbotabad khua-ah US Special Force ten Bin Laden a thah lai un Bin Laden' thusim '113 documents' a laksakte lak ah kimu hi ci'n US ulian ten gen uh hi. A laimal pen Arabic in kigelh a, US intelligence agencies ten a laimal a tei khiat uh ahi hi. Bin Laden document a laksakte uh US intelligence ten nih vei a pulak khiatna uh hita a, thusim tampi mah pholak khia nai lo uh hi.
US intelligence ulian ten Bin Laden in hih lai pen 1990 khit pawlin a gelh hi dingin ummawh uh a, Bin Laden in a nusiat $29 million lak panin 1% pen al-Qaeda senior member Mahfouz Ould al-Walid (Abu Hafs al-Mauritani zong a kicipa) tungah piak ding hi ci'n Bin Laden in gelh hi ci uh hi. Bin Laden in a neihsa $ 29 million lak pan 1% pen Sudan gam-ah a om lai in Wadi al-Aqiq Co. Company a honna theihna dingin a huh Abu Ibrahim al-Iraqi Sa'ad tungah piak dingin a lai ah gelh a, a dangte pen Bin Laden in a innkuanpih ten al-Quadate nasempa dingin a piak khiatna ding un thei sak hi.
Bin Laden Sudan ah kum 5 gam beel in va om ngei a, May 1996 in US in Sudan kumpi tungah Bin Laden hawl khia dingin thupia a, tua khit in Pakistan a tai hi. Sudan a nusiat ma-in Bin Laden in, "Allah adingin nasep kipanin Sudan nusiatsan ding ka hih manin ka lunggulhna bangin hih sumte na zang un," ci'n a innkuanpihte tungah lai-at hi. Bin Laden a neihsa kham leh ngunte pen a nu, a tate leh a pu tungah piak dingin gen hi. August 15, 2008 in Bin Laden in a pa kiangah lai a khakna ah, "Nang sangin ka sih masak zawk leh ka zite leh kate hong kepsak in la, na deihna bangin ka gamtat khak lohnate hehpihna tawh hong maisak in," ci'n gen hi.
-Agencies
