UNHR IN KAWLGAM AH THUKHAM PALSATNA THU KAN DING

UNHR IN KAWLGAM AH THUKHAM PALSATNA THU KAN DING

March 26, 2017: United Nations rights body makaih UN Human Rights Council in Kawl galkap ten Rohingya Muslimte a bawlsiatna thu "fact-finding mission" kici Myanmar ah thukanna nei dingin sawl ding hi. Nung kum in mel theih loh thau tawi ten gamgi ah Kawl galkapte suam in, police 9 a that manun October kha a kipanin Kawl galkap ten Rakhine state sungah security operation bawl na pan uh a, tua khit nung Rohingya Muslimte tul sawm tampi gamdang ah bawlsiatna hangin galtai uh hi. Hih banga Rohingya nautang mawh nei lote Kawl galkap ten ngim in bawlsia uh hi cih February kha-in UN report in a piakna ah galkap ten numei tampi hon buan (mass rapes) in, mi tampi lom thah uh ahih manin galkapte gamtatna pen mihingte tungah thukham palsatna "crimes against humanity" tawh kikim hi ci-in gen hi.

UNHC in galkapte ngongtatna thu kanna nei dingin independent mission leh international mission manlang takin sawl ding hi ci-in zanhal (Friday) in Geneva khuapi ah UN Human Rights Council in resolution thukim takin nei hi. Hih bang resolution bawl ding vai pen EU in UN ah a puak lut hi a, UN member khempeuh (US kihel in) a nial om loin thukim (consensus) pah uh a, manlang takin ngongtate thuman tawh thukhen ding leh bawlsiatna thuakte tungah thuman piak dingin thukimna nei uh hi.

Rohingyate bawlsiatna vai kanna pen thukan ten September kha ciangin "oral update" kici report pia ding uh a, full report kici report kicing pen kum kik ciangin piak ding hi ci-in thukimna (resolution) a neih hangun gam pawl khat in (China, India leh Cuba kihel in) hih resolution panin kidaang koih (disassociated) in thukimpih lo uh hi. Kawlgam panin UNte' special rapporteur on rights Yanghee Lee in hih thukanna ding vai tawh kisai UN council ah thukanna lak panin a sangpen Commission of Inquiry in thukanna a neih ding vai a nial sawm hangin UN council in na dal a, Kawl galkapte poi sakna nei loin a ngongtatna (violence) uh thu kikan ding hi ci-in gen hi.

Nung kha-in Yanghee Lee in Europe gam makai ten top-level inquiry kici thukanna a kineih ma-in Nobel Peace pahtawina ngah Aung San Suu Kyi makaih Myanmar' civilian government thak NLD tungah hun tawm khat piak ding deih uh hi na ci ngei hi. Kawlgam in hih bangin UN ah thukanna sangpen Commission of Inquiry in thukanna a neih ding deih lo a, Myanmar rights council ambassador Htin Lynn in zong Commision of Inquiry sanga niam zaw "lower level investigation" kici thukan dingin UN in hong sawl zaw hen ci hi.

Myanmar kumpi in zong amau gam thukanna "domestic inquiry" kici zangin Rahkine ah thukham palsatna thu kan dingin sawl a, hih banga thukanna nei dingin UN General-Secretary lui Kofi Annan in thukanna nei commission makaih ding leh Buddhist leh Muslimte kikal a kigal neihna hangin liamna tuamsak dingin seh hi. Myanmar rights council ambassador Htin Lynn in zanhal in resolution a kineih lai-in Kawlgam mi ten a hoih pen ding thukan dingte teel zaw hen ci-in Commision of Inquiry in thukanna a neih ding a deih lohna thu gen a, a kisam khempeuh cihtakna lianpen suah khia in ka hih ding uh hi ci-in gen hi.

Human rights activists tuamtuam 47-member forum ten zanhal a UN in thukanna nei dingin Commission of Inquiry sawl dingin thukimna a neih pen a "Ciamteh tham thukhentatna" hi ci uh a, ahih hangin "full international commission of inquiry" kici tawh thukanna a kineih loh ding pen dahhuai mahmah hi ci uh hi. Kawl kumpi in lim takin UN Commission of Inquiry a kithuahpihna dingin kunh uh hi. Kawlgam in hih banga UN resolution a deih loh pen dahhuai mahmah hi ci-in FORUM-ASIA executive director John Samuel in ci hi.

#Behlapna: 1970s panin Rohingya Muslimte kibawlsiat manin Kawlgam panin Rohingte million khat bang gam tuamtuam ah galtai khin zo uh hi. Rohingyate galtaina gamte hih bang ahi hi: UAE ah 10,000, Pakistan ah 350,000, Bangladesh ah 500,000, Saudi Arabia ah 200,000, India ah 14,000, Thailand ah 5,000, Malaysia ah 150,000. Kawlgam Rakhine state sungah teenna ding inn leh lo kician nei lo "internally displaces peoples (IDPs)" kici 2012 kum panin mi 140,000 kiim om hi. Zomite zong tuili, tuita ah bawlsiatna thuaklah manin galtai tampi tak tuan a pupa hun pek a kipanin ki-om kawikawi napi tu dong thukanna neih dingin UN resolution ah nawhna i neih zawh loh pen a dahhuai thu khat ahi hi. UN ah palai nei hang, UN khawmpi sim dingin kuan hang ci-in otpihpih in Kawlgalkapte hong nuainehna leh bawlsiatna kanna dingin nawhna i neih ngei kei leh hong bawlsia a sa zo nai mel lo a ci nuam lai i bang ding hi. Ahih kei leh refugee kicih ding mah ut ngaungau lai-in gamdang pai theihna dingin refegee bek lametna leh paulap ding zong lailai i hiam cih zong a ngaihsut tham cing mahmah khat ka sa hi. Tua ahih kei leh refugee ngiat dinga piang a kisasa lai i hiam cih zong ngaihsuthuai ta hi. Rohingyate pen media lam ah a hat manun hih bang thukanna neih ding UN in thukimna nei thei ahih manin Zomi ten i simmawh hangin i phak loh hi zaw a, i etteh ding hi zaw lai hi.

Source: Al Jazeera and news agencies
A tei: Thang Khan Lian @ Laibu

DRONE GAME: RUSSIA IN US GALVAN BANGCI DAL THEIH DING HIAM?

DRONE GAME: RUSSIA IN US GALVAN BANGCI DAL THEIH DING HIAM?

March 25, 2017: Pithai (Tuesday) in Russian Defense Ministry in Russia leitaw lam ah air-defense drills kici huih lak-ah galvan tuamtuamte dalna ding galdo kisinna nasia takin kinei a, tua hun ah galkap 2,000 val kihel in, air-defense systems nam tuamtuam kizang a, tuate lakah portable anti-aircraft missile launchers kici long-range systems “S-300V4” cihte kizang hi ci hi. Hih galdo kisinna hun pen ni dang sangin tuam pian zaw a, galte tuithe vanleng [unmanned aerial vehicles (UAVs)/drone] kicingin a kapsiatna ding huih lak-a a neu tuamtuam ngimnate kizang hi ci hi. Tu nai diakin lei galkap leh galvan tuamtuam zang se loin tuithe vanleng zat pen tu lai-a galvan thak dingin kinak zat mahmah a, tuithe vanleng pen mailam hun a gal kidona a galvan (fure weapon) ding suak ding hi.

US galkap ten tuithe vanleng a nak zat diakte leh a hoih diakte pen RQ-4 Global Hawk reconnaissance drone leh MQ-9Reaper attack drone cihte hi a, hihte pen NASA leh gam tuamtuam ten zong nak zat mahmah ta hi. Hih tuithe vanlengte pen huih lakah naikal 24 sung om thei uh a, a leng khiatna panin km 1,000 dong leng zo uh hi. US ten MQ-9 leh MQ-9 a bawl ma un a zat uh MQ-1 Predator drone pen Afghanistan leh Iraq gamah US galkap ten nak zat mahmah uh hi. Pentagon in tuithe vanleng pen mailam hun a galdona a kinak zat mahmah ding galvan (future warfare) hi ci hi. Tuithe vanleng pen tu lai-a vanleng suakthakte tawh teh in a man tawm mahmah a, remote control tawh ki-uk ziau a, a operator-te training piakna dingin vanleng hawlte piakna a sum bei zah tawh teh in sum tawm bei mahmah hi.

Ahih hangin tuithe vanleng in thanemna (weaknesses) tampi nei hi. "Kidona taktak ah hih tuithe vanlengte pen Russian aerial defenses in su cimit thei in, a zatna ding tawm mahmah hi. Russiate S-300 leh S-400 air defense-te pen tuithe vanleng leh a ngim tuamtuamte gamlapi panin kap khia thei ziauziau hi," ci-in military expert Mikhail Khodarenok in ci hi. Gentehna dingin USte RQ-4 Global Hawk leh MQ-9Reaper dronete pen a taan'na/salhna mun lianpi (large reflection surface) nei ahih manin mun gamlapipi panin hong len' lam kitheikhol thei/man thei (detected) a, tua ban-ah a hatna (speed) pen ol lua-in a tuithe vanleng sungah onboard electronic warfare system kici tawm om lua ahih manin anti-aircraft missile adingin kap khiat baih mahmah hi ci-in gen beh hi.

Khodarenok in a gen behna ah galdona taktak a vanleng kizangte "conventional warplanes" kicite pen tuithe vanlengte sangin Russian air defense systems adingin nawngkaihuai zaw in, kihtakhuai zaw hi ci hi. Bang hang hiam cih leh galdona vanlengte manlang thei mahmah a, radio-electronic warfare kici galvante tawh kido theihna dingin thahatna nei uh hi ci hi. Tua bang hi napi-in tuithe vanlengte a thahat zaw sem ding kibawlpha den ahih manin mailam hun adingin air-defense system nam khat peuhpeuh adingin nawikaihuai mahmah ding hi ci-in gen beh hi.

"US ten tuithe vanleng hon "swarm of drones" kici bawlna lam nak hanciam mahmah uh hi. Hih bangin a bawlna uh pen nam tuamtuam ah thusim theithei ding "intelligent flying machines" kici neu nono bawl ding ngimna nei uh hi. Hih "swarm of drones" kicite pen US galkap ten mailam hun-a galdona ah nak zat pen ding sawm uh hi," ci-in Academy for Geopolitical Problems president Leonid Ivashov in ci hi.

National Interest military leh defense magazine in October kha-in Pentagon in galdona a zat ding leh air defense system nasepna nawngkaisakna dingin thusim kanna ding tuithe vanleng leh tuithe vanleng neu (swarms of surveillance and attack mini-drones) sitna nei ta uh hi ci-in suaksak uh hi. US in tuithe vanleng neu mini-drones "Perdix" kici pen F-16 leh F-18 jets-te panin sitna a neih ahi hi. Perdix tuithe vanleng neute pen zat tak in, niam cikcik in leng a, thusim kanna dinga zat dingin hoih mahmah hi ci-in Pentagon’s Strategic Capabilities Office (SCO) director William Roper in ci hi. Perdix tuithe vanleng neu honpite um/dal/hu (defender) pen a bawlna dingin sum tampi a bei ban-ah hun sawtpi la lai ding hi ci-in gen beh hi. Perdix drone frame pen 3D printing tawh kibawl ahih manin a bawl man tawm bei mahmah a, tampi a bawl khiat ding baih mahmah hi. Perdix ban-ah Perdix tawh kibang pian mah tuithe vanleng a kibawl laitak hi ci-in gen beh hi.

"Perdix leh tuithe vanlengte pen galvan a zat dingin muanhuai loin a zat ding kihtakhuai mahmah hi. Bang hang hiam cih leh hih bang tuithe vanleng ten: 1) reflection surface a neih uh neu mahmah a, 2. galvan gik pipi pua in niam len' mahmah uh a, 3. a honhon in leng uh ahih manun hih bangin tuithe vanleng hong leng khawmte missile bek tawh kap leng zong sek golpi khat tawh betang i sat bangin puak kham zua dinga, niam len' mahmah uh ahih manin kap khiat ding baih mahmah uh hi ci-in military expert Mikhail Khodarenok in ci hi.

Tuithe vanleng dalna ding galvan (Anti-Drone Weapons):

Khodarenok in tuithe vanlengte suksiatna dingin radio-electronic warfare systems kicite pen galvan hoihpen hi ci hi. Bang hang hiam cih leh tuithe vanleng khempeuh kap khiat zong kisam masa se loin radio-electronic warfare systems kizang leh tuithe vanleng a kizang control channel in nasem sak thei loin a len'na ding mun theihtheihna (navigation) nawngkaisak a, a kizatna bei hi ci hi. Russia in radio-electronic weapons kici galvante Russia galkap ten nak zat mahmah ta uh a, a zatte uh lakah Krasukha electronic warfare system kici kihel hi. Krasukha electronic warfare system in galte pan mun etsimna dinga kizang surveillance satellites-te khawlsak (jammed) sak thei a, lei pansan leh huih lak pan a kizang "ground-based and airborne (AWACS) radars" cihte nasepna a khawlsak theih ban-ah tuithe vanlengte nawngkaisakna dingin zong kizang thei hi. Krasukha-4 electronic warfare system pen km 300 gamla panin tuithe vanleng honpite dalna dingin kizang thei hi.

March 12 in Russiate galvan bawl Rostec CEO Sergei Chemezov in Russia in tuithe vanleng sunga van kizangte (equipment) suksiat theihna dingin galvan kibawl khin zo hi ci-in gen hi.
"Radio-Electronic Technology Concern (KRET) in tuithe vanleng controlna kiuhkhiat (knocking out) theihna in radio-electronic warfare system kibawl ta a, radio-electronic warfare system in tuithe vanleng uk zawh loh sik them bang sak thei ziau hi," ci-in gen hi.

#Behlapna: Pentagon in Electronic Warfare Aircraft bawlna dingin $679 Million pia khia ta hi. Russia leh US pen galvan kitaitehna lamah kidem thei mahmah a, ahih hangin US defenfe budget pen tam lua ahih manin Russia sangin galvan hauzaw hi. US in galvan thak hoih nono a bawlbawl hangin Russia in USte galvan thak bawlte a zatna bei dingin a dalna ding leh a suksiatna ding na bawl den kiau se a, USte nasepna pen dahpa lo kho suaksak den keei hi.

Source: Sputnik
Game of Drones: How Russia Can Respond to US Weapons of the Future
https://sputniknews.com/…/201703221051844810-us-russia-dr…/…
A tei: Thang Khan Lian @ Zomi United News

RUSSIA-CHINA IN BILATERAL DEFENSE RELATION THUKIMNA A NEIH MANIN US LUNGHIMAWHSAK HI CI

RUSSIA-CHINA IN BILATERAL DEFENSE RELATION THUKIMNA A NEIH MANIN US LUNGHIMAWHSAK HI CI

March 25, 2017: Russia leh China in gam nih kilal ah defense lamsang ah kitauna bawl hoihna ding thukimna "bilateral defense relationship" kici thum a neihte lak-ah - galdo sin khawmna neih ding, galkap leh galvan lamsang ah kipawl khawm (military-technical cooperation) ding leh galkap uliante khat leh khat thukizaksakna (high-level military-to-military contacts) neih ding ci-in thukimna a neih manun US na lunghimawh pian pah hi. Hih "bilateral defense relationship" thukimna thumte lak-ah Russia in China tungah galvan zuakna dingin thukimna "Arms deals" kici a neihna uh-ah Russia' bawl S-400 air defense systems leh Su-35 jets vanlengte zong zuak dingin thukimna nei uh ahih manin hih banga thukimna hangin US leh a pawlte adingin tona lianpi suaksak thei ding hi ci-in policy analyst Ethan Meick in ci hi.

"Russia in China tungah galvan a zuak ban-ah military-technical cooperation neih ding thukimna a neih manin US leh a pawlte leh mun tuamtuam a USte pawlte galvan neihte linglawngsak gawp thei dinga, USte liat penna (superiority) nawngkaina a pian'sak ban-ah nakpi in to-in buaisak zo ding hi," ci-in Ethan Meick in 2000 in US Congress in a bawl khiat US-China Economic and Security Review Commission ah zan diak in a report ah gen hi. Hih bangin Russia leh China in defense cooperation a neih uh pen US warning a piakna hi a, Russia leh China kitanauna mun sangna lam manawh to hi cih kimu thei hi ci-in gen hi.

Ethan Meick in a report sungah Russia leh China in defence lamsang kipawlna ding leh galkap-galvan lamsang kitanauna ding thukimna a neih lak pan un a thupi diak pen Russia in China tungah Sukhoi Su-35 multirole fighters leh S-400 Triumf air defense piak sawm hi ci hi. Russia in Sukhoi Su-35 multirole fighters pen China tungah zuak dingin November 2015 in thukimna na neihpih a, a masa pen dingin 2016 kum bei kuan in first batch pia khia ta hi.

Russia in China tungah S-35s vanlengte a piak manin China in USte huih lak-ah a thahatna uh dem thei ding uh a, China in next-generation aircraft a zat taktak ma-in vanleng hawl kisinna dingin zang thei ding uh hi ci-in Ethan Meick in ci hi. Russia in S-400 surface-to-air missile (SAM) defense systems pen China khut-ah 2018 ciang pia khia dingin kilamen hi. (Russia in S-400s pen India tungah zong piak dingin na ciam khin zo a, tu kum sungin pia khia dingin kilamen hi). Tuesday in Russian Federal Service for Military-Technical Cooperation spokeswoman Maria Vorobyeva in hih bang galvante piak khiatna ding vai-ah Russia in galvante zuak theihna dingin "terms and conditions" contract khauh mahmah omte Russia leh China in kizui kim hi ci hi.

Ethan Meick in a genna ah Russia leh China galdo sin khawmna neih dingin thukimna a neih un USte lunghimawhsak diak ding hi ci hi. Hih banga China galkap PLAte leh Russian Armed Forces galdo sin khawmna hangin sinna panin theihna (experience) manpha mahmah China pia ding a, defense lamsang a ngimna uh leh hanciamna tampi phattuampih ding uh hi ci-in a report ah tuangsak hi. Bang hang hiam cih leh Chinate PLA galkap ten hih bangin sinna panin theihna leh galdona panin sinna panin theihna (combat experience) nakpi takin kisam uh a, a kisapte uh Russian Armed Forces galkap ten tampi sinsak thei ding uh a, khangthak hun-a galdo ding dan tampi theih beh ding uh hi ci hi.

Source: Sputnik
A tei: Thang Khan Lian