LEITUNGAH CHRISTIAN GAM LEH ISLAMIC REPUBLIC A KICI KUA TENG?
Leitung mun khempeuh ah Christian om lohna gam a om lo napi Christian gam (Christian state) i cih sese gamte Christian biakna pen amau gam ten "official religion" ahih kei leh "state church" ci-in kipsak in, Christian biakna in kumpi (government) gum in, government in Christian biakna a gupna gamte bek Christian gam (Christian) state ci-in kiciamteh thei bek hi.
History panin en leng Armenia, Aksum, Georgia gamte leh Roman Empire leh Byzantine Empire in amau ukna gamte Christian state ci-in na pulak uh hi. Tu hun adingin leitungah Christianity biakna zui ahih kei leh Christian biakna state religion ci-a kiciamteh gam 15 bek om a, tuate pen: Argentina (Catholic Church), Armenia (Armenian Apostolic Church), Tuvalu (Church of Tuvalu), Tonga (Free Wesleyan Church of Tonga), Costa Rica (Catholic Church), Kingdom of Denmark (Danish National Church), England (Church of England), Greece (Eastern Orthodox Church), Georgia (Eastern Orthodox Church), Iceland (Church of Iceland), Liechtenstein (Catholic Church), Malta (Catholic Church), Monaco (Catholic Church), Vatican City (Catholic Church) leh Zambia cihte hi.
Christian state i cih pen biakna leh gamvai (politics) kikhenna gam (secular state), Pasian limlim om hi ci-a um lo gam (atheist state) leh biakna dangte zui gam (another religious state), Jewish state ahih kei leh Islamic state cihte tawh kibang loin tuam ngiata, sanginn khawngah Christian thu kisin sak thei hi. Secular gam i cihte ah zum thu tawh kipaikan (official), ngeina leh gamtatzia dingte pian'khiatna; siam sinna (institution) vai limlim ah biakna hel loh ding cih a upadi (constitution) ah tuang hi. Leitung bup ah Christian tamna pen hi ci-a kiciamteh US gam bang Christian state hilo a, Secular state ahi hi. "Separation of church and state" cih US Founding Fathers kicite lak-a kihel, US Constitution gelh leh US President (1801-1809) 3na Thomas Jefferson' kammal zat pen US Constitution ah Establishment Clause and Free Exercise Clause of the First Amendment to the Constitution of the United States ah "Congress in biakna bulphuhin thukham (law) bangmah bawl lo ding a, deih teel theihna leh gamtat theihna ding (free exercise) bangmah dal lo ding hi," cih tuang hi.
US Constitution Article Six ah "US ah zum leh mipite muanna (Office and Public Trust) let/ngah theihna dingin 'biakna tawh kisai test kisam a, citna/siamna' (qualification; degree) kisam lo hi," cih tuang hi. Jefferson in biakna leh state (government) kikhenna ding a nak genna (metaphor) baang pen US Supreme Court in of the United States in gen belin nei hi (Hih thute hangin Trump' Muslim 'travel ban' policy bang court tuamtuam in hek a, Supreme court ah kidiah hi. White House sung khawngah Trump administration in thungetna leh biakna hun a zat zelte uh US Constitution First Amendment palsat hi zaw hi. Tua loin Article 6 ah US President ten LST leh Pasian min tawh a kiciam nop kei uh leh Constitution palsat lo uh hi).
*Kum zalom 21 ah leitung milip 7.2 billion kiim pha a, tua lak panin Christian biakna zui 2.4 billion val pha hi ci-in kiciamteh hi. PWE 2010 report in leitung milip 6.9 billion lak panin Christian biakna zui tam pen a, Christian 2.2 billion (31%) om a, a nihna dingin Islam biakna zui 1.6 billion (23%) pha hi ci hi. Christian biakna zui lak panin a tampen thumte pen Catholic Church, Protestantism leh Eastern Orthodox Church ahi hi. Catholic Church biakna zui mi 1.09 billion bang pha hi.
Christianity biakna zui Europe, Russia, North America, South America, Philippines, East Timor, Southern Africa, Central Africa, East Africa leh Oceania cihte ah zong tam mahmah a, Indonesia, Central Asia leh Middle East ah Christianity pen Islam biakna zuite khit mi tamna pen hi. Leitungah Christian kici US ah tam pen a, 230,000,000 (71%) pha hi ci-in kiciamteh a, tua khitin Brazil ah 175, 700,000 (91.4%), Russia ah 117, 640, 000 (83.6%), Mexico ah 113, 500,000 (93%) hi. A percentage (%) a et in US sangin Mexico, Russia leh Brazil gamte ah Christian tamzaw hi. A percentage a et in Christian tam penna gam hih bang hi: Vatican City ah mi 800 (100%), Romania ah mi 21, 490,000 (99%), Papua Guinea ah 6,860,000 (99%), Greece ah 11,000,000 (98%) om hi. A kicingin na et nop leh a nuai-a link na mek lecin UN member gam-a Christian milip om zah leh biakna pawlpi percentage zah et theih hi.
https://en.wikipedia.org/wiki/Christianity_by_country
*Christian Tangthu (history):
AD 301 in Kingdom of Armenia gam pen leitung bup adingin Armenia gam uk kumpi "Royal House of the Arsacids" Christian a suah khitun Christianity biakna official religion dinga pulakkhia masa pen gam suak hi. Leitung adingin national church upa pen Armenian Apostolic Church ahi hi. Tua khit AD 380 in Edict of Thessalonica (Cunctos populos) kici in thupalakna/thupiakna bawl a, Roman Empire khempeuh Christian state ci-in pulakkhia a, State Church dingin Nicene Christianity official religion hi ci-in zang hi.
Roman Empire hong tuk khitin Byzantine Empire (Roman Empire khit a piang Eastern Roman Empire zong a kici) kumpi Justinian the Great (527-565) hun in Byzantine Empire ukna Christian state golpen, Roman thukham (law), Greek ngeina (culture) leh Greek pau bulphuh uh a, a biakinn lamnate uh, biakinn pawite, biakinn zepnate, a lim suaihte uh-ah Jesuh bulphuh in hong nak zat mahmah uh hi.
Roman Empire leh Byzantine Empite hun bang nawn loin pawlpi (Chruch) tangthu hong kipan thak kik a, khuaimite leh gam mite in aanna hilo in upna tawh Christian biakna hong saan' ciangun Chistian tangthu thak hong piang hi. Hih bangin hong pian' theihna dingin Constantine Christian hong suahna hang leh Christian Empire hong piankhiatna hang hi. Ahih hangin Byzantine Kumpipa pen a ukna nuai-a om mite Christian a suahna dingun a mipi makaih masa hilo a, ahi zongin Christian state masa pen bawlkhia masa pa ahi hi (tua bang in Armenia church zahtakna tawh kizom ahi hi). *Armenia kumpite, kumpipa' uliante leh a mite Christian hong suah khitun Armenia gam Christian state hong suak masa pen hi. * AD 337 in Georgia (county of Georgia) ah Mirian leh Nana-te Christian hong suah khitun Christian state suak hi. *AD kum zalom 4 hun lai-in Ezana Christian hong suah khitin Kingdom of Aksum Christian state hong suak hi.
*Modern Age hunah Costa Rica Christian state hong suah khitin AD 11 in Lutheran World Federation a member Church of Denmark makaihna tawh Denmark gam Christian state suak hi. Tua khitin 1701 Act of Establishment tawh Church of England pen England' official state church hong suak hi. *Faroe Islands ah Church of the Faroe Islands state church suak hi. [Church of the Faroe Island pen 2007 in suahtakna (independent) ngah pan hi]. *Greek Orthodox Church makaihna tawh Greece gam Christian state suak hi. *Greenland gam pen Kingdom of Denmark sunga autonomous constituent gam ahih manin Denmark Constitution bangin Greenland gam ah Church of Denmark pen church of Greenland hong suak hi. *AD 1000 kiim pawl in Iceland gam
Christian state suak a, public schools khempeuh ah Christianity siamsinna lam pattah teitei a, kihelsak teitei ding cih phalna Minister of Education in pia hi. *Liechtenstein' constitution Catholic Church a gam adingin state Church in ciamteh a, public shools ah biakna lam sinna tawh kisai pawlpi thuneite piak ding hi cih article 16 of the Constitution of Liechtenstein ah tuang hi.
*Malta gam ah Section Two of the Constitution of Malta state's religion dingin Roman Catholic Apostolic Religion hi cih tuangsak hi. Roman Catholic Apostolic Church thunei ten state schools khempeuh ah a man leh man lo, Roman Catholic Apostolic upna hilh teitei dingin mawhpuakna nei uh hi. * Monaco gamte Article 9 of the Constitution in Roman Catholic upna state religion ding hi cih tuangsak hi. *2012 dong Norway ah tangpi tangta biakna (public religion) cih bang om lo a, 1 January 2017 in Church of Norway pen independent hong suak hi. Norway Constitution Article 16 in Church of Norway (Evangelical-Lutheran church) pen Established Church of Norway in om den ding a, state/government in gum in huh ding cih tuangsak hi. Norwegian kammal in Article 16 "folkekirke" (mipite pawlpi a cihna) ci napi a kammal khiatna taktak pen buaina; kituhna (contested) hi lai hi. *2017 in Samoa gam Christian state suak a, Samoan Constitution Article 1 ah, “Samoa gam pen Pa, Tapa leh Kha Siangtho' phuankhiat Christian gam hi," cih tuang hi. * Kum zalom 18 hun lai-in World Methodist Council a member Free Wesley Church makaihna nuai-ah kumpi George Tupu I hun in Tonga gam Christian state suak hi.
*Reformed Church in the Congregationalist ngeina zui-in Church of Tuvalu makaihna tawh 1991 in Tuvalu gam in
Church of Tuvalu state church dingin kipsak uh a, a Constitution uh-ah Tiuvalu pen "independent State hi a, Christian ngeina bulphuh hi," cih tuang hi.*Vatican City pen Christian state hi a, "Pope pen ex officio, Roman Catholic Church makaipi, Vatican City' Head of State leh Head of the Government ahih banah legislative, executive leh judicial branches khempeuh ah thuneihna sangpen (de jure absolute authority) len hi. *Zambia gam official Christian state hi a, ahih hangin thukham lamsang kizuihna leh zatnate leh kahiangte (legal ramifications) Christian state cih tuang lo hi. Upadi tomkim a genna "Preamble of the Constitution" ah Zambia gam pen "Christian state" hi cih tuang napi bang pawlpi a state church hiam cih tuang lo a, "We, the people of Zambia...declare the Republic a Christian nation..." cih teng tawh kipan hi. Zambia Government in Zambian Council of Churches tawh kizopna nei a, public scholl ah Christianity pen school curriculum (syllabus) in kihel hi. 1991 in Zambia in "Christian gam" hi ung ci-in a pulakkhiat khitin Zambia vice president in gammi khempeuhin Christian ngeina lamtuamtuam, pilna siamna leh levels khempeuh ah zuih dingin kunh hi.
*Muslim gam lak panin Islamic republic gam ci-a kiciatehte: Afghanistan, Iran, Pakistan, Mauritania cihte bek ahi hi. Tua ma-in East Turkestan in 1933 in independent Islamic republic hi ung ci-in tangko uh hi. 1934 in China in Chinese Muslim 36th Division(National Revolutionary Army) in Turkestan sim a, Battles of Kashgar, Yangi Hissar leh Yarkand kidona ah Turkmestan galkapte zo hi. Tua khitin Chinese Muslim General Ma Zhongying kici Kashgar a Id Kah Mosque sungah lut a,Turkic Muslims pen Chinese Central Government khut nuai-a om hi ci hi. *December 2015 in Gambia President Yahya Jammeh in Gambia pen Islamic republic hi ding hi ci-in tangko napi 2017 in kipiakhia a, ama zalaih President Adama Barrow in Gambia pen republic khi kik hi ci-in Islamic republic cih teng phiat hi. *Chechen Republic of Ichkeria gam in 1996 - 2000 kikal Islamic republic government system cih na zang hi.
*Islamic Republic a suah hun uh:
Islamic Republic of Afghanistan: December 7, 2004
Islamic Republic of Iran: April 1, 1979
Islamic Republic of Mauritania: November 28, 1960
Islamic Republic of Pakistan: March 23, 1956.
A dang Muslim gamte pen kumpi ukna tawh ki-ukna (monarchy) leh secular state vive pian ahi hi.
Ref: Wikipedia https://en.wikipedia.org/wiki/Christianity_by_country
https://en.wikipedia.org/wiki/Christian_state
https://en.wikipedia.org/wiki/Separation_of_church_and_state_in_the_United_States
https://en.wikipedia.org/wiki/Islamic_republic
A kaikhawm: Thang Khan Lian
NB: Gam lim ah a dumna (blue) a kiciamtehna teng bek Christian state hi.A hing;eng (green) sung Christian tamna gamte hi.
