Ciapteh tak Thai Gam Kumpi Bhumibol Adulyadej' Kammal Pawl Khat
Thai kumpipa Bhumibol Adulyadej kammal ciaptehhuai pawl khat sim dih ni.
1. Mimtang, taangtang khat tuisik tak khat bek ahi phial zongin nek-le-dawn ding a om simin lungdam tawntung in.
2. Pasian tungah thu na nget simin neih-le-lam hauhna ngen masa kha kei zaw in la, pilna leh hanciam zawhna tha bek ngen zaw in.
3. Lawm thak na neih pen letsong hoih khat hi. Tua mah bangin na lawm luite zong a kipai thei lo, a manpha ahih lam phawk den in.
4. Biakna tawh kisai Pasian thu kigelhna laibu kum simin khat ta beek sim sawm hamtang in.
5. Nang mahmah mi hoih na suah theihna dingin mi dangte hoihna ding va huh limlim sin dih in.
6. "Lungdam ing" cih kammal ciil bawl ken la, tampipi zat sawm zaw in.
7. Na lawm leh gualte hong kuppih thusim, a thuak khak uh khasiatna hong kuppihte hoih takin ngaih sak in la, kepcing sak in. Mi dang tungah thanggen sak ken in.
8. Mawh maisak nopna lungtang neih sawm den in.
9. Thu gen ding sangin, thu ngaih zawh ding lam hanciam zaw in.
10. Na khialh khak a om leh khial kha ing ci ngam in.
11. Na kiat leh, na tuk leh, thokik, din kik sawm pah in. Lau kei in.
12. Haksatna tuak semsem gualzawhna ding limci semsem cihna hi.
13. Evaluator sungah nasep vai thu kisel kha kei in. (Kikhut khial thei cihna ahi diam maw?)
14. Na credit card a valin zang ngei kei in. (A batin van na deih peuh lei gawp kha kei in cihna hi)
15. Mi tungah na khialhna thum kik ding haksa sa kei in.
16. Na theih loh thute thei keng ci ngam in. Na theih loh zumpih kei in.
17. Tai tampi a gamla khualzinna pen nop takin tung ding cih bang om thei lo hi.
18. A suah phetin a tai zanzan thei kua mah om lo hi. Damtakin kipan in.
19. Nuntakna nopsa in, i gualzawhna ding ciil pian sim zek kul hi. Nanglenang ki-it theih masak kul hi.
20. Sum a kem siam lote pen a kikhual lo, khantoh ding a sawm lo mite hi.
21. Mi kitawng nih ah a khawl masa, a dai masa pen mipil zaw ahi hi.
22. Khantawn nisim nasem cih bang hilo zaw a, nisim tawlnga kawm a nasem hizaw hi hang.
23. Lungsim khauhsak ding kisap hun om a, lungsim nemsak ding hun om hi.
24. A tel lo mite a tel dongin hilh zawh sawm in.
25. Sum dangka nangawn in maitang lang nih nei hi ven, nuntakna zong gualzawh hun, guallelh hun a om khawm zel ding mah hi.
26. Na lungsim deihna bangin mawk gamtat pahpah kha kei in.
27. Na ha bang hangin kitan thei? (a khauh luat man hi) Tua leh na leii ee leh a kitan hia?
28. Singkung no a gol mengmeng ding deihin, a dawn pan kai gawm kei in. Kizung lotin si ding hi.
29. Nisim in nang leh nang thum vei ta a si thei na hih lam phawk sawm in, tua hi leh a hoih penin kiging thei den ding hi teh.
30. Puan angkilh pen a masa khat kilh khial kha lecin a vekpi a khial na hi pah hi.
31. Nasep khat peuhpeuh tua hun, tua ni teitei-in zo siang ding cih ciangtan nei hamtang in.
32. Tui hai sungah tui a lang bek a om bangin kingaihsun den in.
33. Khapi leh aksite pen sang lua deuh sam hi ven, na bat zawh ding ciang bat sawm masa phot in.
34. Nuntakna ah nasep nop tampi tak om hi ven, a thupite sep masak theih sawm in.
35. Laibu pen leitungah a manpha pen pilna, thu theihna phualpi bang hi, kha sim bu khat ta bang sim zawh sawm in.
36. Na khempeuh mun, zia leh tong, dante nei sak in. Van khat pepeuh na lakna munah koihkik pahpah in. Mihing manphatna pen cihtakna leh kiciatna, thumanna cihte tawh kiteh hi.
Hih Thai kumpipa pen Thai gam tangthu ah kumpi za sawt vei a len zo pen, a vangnei mahmah kumpi khat ahi hi. A Pa Prince Mahidol in Public Health certificate Harvard University ah a sin laitak December 05, 1927 ni in Cambridge, Massachusetts hospital ah suak hi. June 09, 1946 in a upa kumpi inn sungah thau tawh kikap lum a, tua a kipanin a mah kumpi za tu ni dong hong ngah to suak hi. A upa sihna hang pen tu ni dong kithei khia zo lo hi. Bangbang ahi zongin hih bangin gam khat kumpi sawtpi a sem Bhumibol Adulyadej pen mi mawkmawk het lo, mipil mahmah khat na himawk hi.
~ En Khat Thang
"Hih Thute Manpha Sa Lua Ni Teh" Laibu pan...
Credit: Laibu Saal
Source : Facebook
http://en.wikipedia.org/wiki/Bhumibol_Adulyadej
