CORONA GO!! GO AWAY CORONA!!?

Pro Pastor TN Muan Thang

Hindute in, "Corona Go, Go Away Corona," ci in virus na hawl uh hi. A dalna dingin bawng ek peuh bawngzun peuh zang uh hi. (Nuihzakhuai maw?)

Ei lakah zong, "Corona Virus paikhia in, kong nial uh hi. Kha Siangtho dai ka kai hi," ci in a phuisam bang om hi. (muhdan tuamtuam hi) Adang khat lai, LST sungah samzang na muh leh tuikhup in la dawn in! Khausan tawh na khut khih in! peuh ci-in upmawh thuteng hih gawpgawp uh hi. (Nuihzakhuai maw?)😀

A hoih lo khempeuh Satan nasep peuh sa ihi diam? Leitung bup linglong sak liang dingin SATAN vanglian takpi mah hiam?

I. A SIA KHEMPEUH SATAN NASEP HILO HI. SATAN TUA ZAH IN VANGLIAN LO HI.

I. Noah hun lai-in Leitung mite ngongtat in, a sia in gamta khin uh ahih manin, Pasian in tuiciin tungsak hi.

1. Sodom leh Gomorrah ah khialhna nasia lua ahih manin Pasian in kat leh meikuang zusak hi.

2. Faro in a lungtang khauhsak den ahih manin, Pasian in Izipt gam-ah gimna 10 tungsak hi.

3. Sinai mual ah Moses in thukhamte a lak lai takin, Israelte in milim bia uh ahih manin Pasian' thangpaihna tungin mi 3000 si hi. Tu hun leitung i et leh mihingte -ngongtat, gamtatsia, lungtang khauh, milim bia vive ki hi ta ahih manin Pasian' thangpaihna a tuak ihi kei tam a ci ka hi hi.

II. PASIAN' THANGPAIHNA AHIH LEH KUA SUAKTA ZO DING?

I suahtakna dingin a tuamtuam kisam lo hi. Upmawh thu teng sep hun hilo hi. Tua siatna/natna daldal kisam lo hi. Pasian' piansak ahih manin, amah bekin suaktakna lampi hong lak thei hi. Tu hun pen Pasian' deihna kan hun hi zaw hi.

#THUMANG IN: Noah leh a innkuante bangin siatna pelh in la, Pasian' thu man ding kisinpha in. NOAH IN TUICIIN GO!! KA NIAL HI!! ci lo hi. Pasian' thu mang ahih manin Pasian in Teembaw kongpi khaknelh a, pualam siatna in amaute susia zo lo hi.(Pian.7:16)

#NUSIA IN: Topa' vangtung mi in Sodom leh Gomorrah nusia ding leh taisan dingin Lot leh a innkuante sawl hi. A khankhiatna, a lawm a gualte uh omna hi. Khiatlahhuai kha ding hi. Ahi zongin nusia ngam uh a, taikhia uh hi. A taisuak teng suakta uh a, a nunghei pen ci khuam suak hi.(Pian. 19:17-26)

#LUNGKHAUH NAWN KE'N: Faro lungkhauhna hangin a mite in thuak uh a, a tapa in sihlawh hi. (Pai. 7-13) Ahi zongin Pasian' teel mite kongbiang ah Tunno sisan kitat ahih manin suakta uh hi. Nang leh na innkuante' suaktakna taktak ding pen Jesu Khris sisan bek ahi hi. Leitung luah ding kuamah om lo hi hang.

#NA MILIMTE KOIHKHIA IN: Pasian sangin thupi na sak zawkte na milim biakna ahi hi. Tuate koih khia in. Na Pasian dik tak biak ding kisinpha in.🙏