US IN OSAMA BIN LADEN' TAPA TERROR BLACKLIST AH KOIH

US IN OSAMA BIN LADEN' TAPA TERROR BLACKLIST AH KOIH

Jan. 7, 2017: US State Department in Osama bin Laden’ tapa Hamza bin Laden zanhal in US terrorist blacklist ah koih in, ciamteh ta hi. State Department in Hamza pen al-Qaeda sungah makai dingin a za khangkhang ahih manin koihmah ah a pai theih lohna ding leh a sum nak khakna ding leh daang koih theihna dingin (economically and geographically isolate) khalna (sanctions) kikoih khum hi ci hi.

Hamza pen tu lianin kum 20 kiim a upa ahi hi. NBC News counterterrorism analyst of Flashpoint Laith Alkhouri in Hamza pen al-Qaeda’s central leadership sungah mi poimawh khat hi ci hi. State Department in Hamza tungah khalna a koih banah “Specially Designated Global Terrorist” ci-in ciamteh a, a omna mun bel gen lo hi. Alkhouri in Hamza pen al-Qaeda sungah makai lian (high-ranking position) za len ta hi kici hi.

US Navy Seals ten 2011 in Pakistan gam-a Abbottabad ah Osama bin Laden leh a sanggampa Khalid bin Laden a thah lai un Hamza om lo hi. Osama bin Laden a sih khit nungin a zalaih Ayman al Zawahiri in Aug. 2015 in nitumna gamte tungah ngongtat khumna ding audio message ah a genna ah Hamza pen al-Qaedate member hi ci-in lahna (introduced) nei hi. Leitung bupin ISte bek do belin a neih manun al-Qaeda ten thalak kikna ding kigawm kikna ding hunlem ngah uh hi kici hi.

Source : News 2

Photo : Qatari-based satellite television station Al-Jazeera in Nov. 7, 2001 in Hamza bin Laden maan Nov. 5, 2001 in a kizaihna a lahna (Hamza pen a veilam pang a tu pen hi).

CHINA IN MAILAM HUNAH A SAWT LOIN VANGLENG PUAKNA TEEMBAW THUM NEI DING

CHINA IN MAILAM HUNAH A SAWT LOIN VANGLENG PUAKNA TEEMBAW THUM NEI DING

Jan. 7, 2017 : China in mailam hunah a sawt loin vanleng puakna teembaw "aircraft carrier" kici nei ta ding hi ci-in naval expert in gen hi ci-in Communist Party of China (CPC) in pulak hi. Military expert Liang Fang in China galkap ten a beisa kum sawm lai sangin galdo theihna ding nakpi takin neih beh ta hi ci hi. China in tu lianin aircraft carrier khat bek nei pan a, tua zong Ukraine gamte aa Varyag kici a lei uh hi a, Liaoning ci-in a min laih uh ahi hi. China in tu lai takin aircraft carrier a nihna ding nasia takin a bawl laitak hi a, a sawt loin mai hun ciangin Chinese Navy ten aircraft carrier a thumna nei ta ding hi ci-in People’s Liberation Army (PLA) tawh kizopna a nei website in pulak hi.

Mr. Liang in tu lianin China in a neih Liaoning aircraft carrier pen USte neihte bangin vangik a puak zawh zah nakpi takin a kikhiat hangin muanhuai mahmah veve a, US in a neihte (US in leitungah haupen a, 67 tak nei hi) pen US Navy Super Hornet, F-35C leh carrier-borne fighters kici vanlengte a bawh ciangin haksatna tampi tuak den in, thakhauhna (stamina) nei lo uh hi ci hi.

China in aircraft carrier Liaoning pen USte dalna dingin South China Sea (SCS) ah koih a, US in zong nuclear-powered USS Carl Vinson aircraft carrier pen San Diego, California panin Western Pacific kiim-ah koih sawm hi. China in tu lai takin a bawl aircraft carrier CV-17 pen China leilu-nisuahna lam-a om Dalian Shipbuilding kicihna ah a bawl ahi hi. India in aircraft carrier nga - INS Vikramaditya (45,000 tonnes), INS Vikrant (44,000 tones), INS Vishal (65,000 tons), INS Vikrant (19,500 tons), INS Viraat (28,700 tons) nei a, khat a bawl beh laitak ahi hi. China in tu lianin a neih Liaoning in vangik a tam pen 58,600 – 67,500 tonnes kikal pua zo hi.

Gam tuamtuamte neih zah na theih nop leh hih a nuai-a link na mek ve 
https://en.wikipedia.org/wiki/List_of_aircraft_carriers_by_country 

Source : The Hindu and Wikipedia 

BRAZIL THONGINN AH THONGKIATE KILAI, MI 33 SIH BEH

BRAZIL THONGINN AH THONGKIATE KILAI, MI 33 SIH BEH

Jan. 6, 2017: Nipi ni-in Brazil gama-a Amazonas state sunga thonginn ah mi gilo kipawlkhawm (gangs) pawl nih kitual vatin mi 56-60 kiim kithat in, pawl khat a ngawng uh a kitansak khit nungun Romaira state sunga om Monte Cristo sunga om Manaus khua-a Agriculture Penitentiary thonginn ah thongkiate kitualvatna (riots) piang kik leuleu a, mi 33 in sihna tuak hi ci-in Monte Cristo Agriculture Penitentiary justice secretary in pulak kik leuleu hi ci-in local government spokeswoman in Agence France-Presse news agencyte kiangah gen hi.

Hih Romaira state sunga thonginn kia kithatte pen tem tawh kithat uh a, tu dong thonginn ah thau kimu nai lo hi. Brazil ulian ten thonginn ah buaina veng ta a, thau hoih pipi tawi riot police squad kicite thonginn ah kisawl ta hi ci uh hi.

1992 in zong Brazil thonginn khatah thongkiate kitualvat in, mi 56 ngawng kitansak a, tua loin thonginn dangah kitualvatna hangin mi 6 in sihna tuak hi. Nipini in Amazonas state sunga ah thonginn kitualvat a pian lai takin thongkiate mi 184 tai khia uh a, mi 65 bek kiman kik zo pan hi. Amazonas thonginn pen Brazil gam-a gang kipawlna lian pen North gang a zong kici Sao Paulo pansan First Command-te suamna hangin kitualvatna a piang ahi hi. Thongkia gangte pen Brazil leilu lam-a om Colombia, Venezuela, Peru leh Guianas ah guihthei zuakna lampi uk ding leh thonginn ah thuneih ding kituh a kitualvat ahi uh hi.

Brazil pen leitungah thongkia a tamna pen lina hi a, United States, China leh Russia khit ahi hi. Brazil gam-a thonginnte ah drug gang maikaihna hangin kitualvatna piang mun mahmah hi. Nung kum October kha in zong Monte Cristo sunga om Agricultural Penitentiary thonginn ah kitualvatna na piang ngei a, mi 18 in sihna na tuak hi.

Source: Al Jazeera News