COVER STORY: COLOMBIA AH KILEMNA DINGIN VOTE KIKHIA, KILEMNA DING DEIH LO TEN ZO

COVER STORY:

COLOMBIA AH KILEMNA DINGIN VOTE KIKHIA, KILEMNA DING DEIH LO TEN ZO

Oct. 3, 2016: Zan in kum 52 sung kilaihgawpna (revolution) deih in Colombia kumpi lehdo Marxist rebels - Revolutionary Armed Forces of Colombia (FARC - Fuerzas Armadas Revolucionarias de Colombia) kicite leh Colombia kumpi in kilemna neih ding vai thukimna suai a kaih uh a tangtun theihna ding leh thukimna a pian' theihna dingin Colombia gammi ten mipi tamzaw deihna tawh vote (mee) khiatna (plebiscite/referendum) nei uh hi. Colombia gamah vote nei million 13 om a, 40% sanga tawmzaw bekin vote khiatna nei uh hi. Vote kikhia 99% kisim khin ta a, tua lak panin kilemna ding thukimna (peace accord) deih lo 50.2% pha a, a deih 49.8% pha ahih manin kilemna ding deih lo ten vote 60,000 in zo uh ahih manin kilemna taktak deih lo ten mee tam ngah zaw uh ahih manin kilemna piang thei lo ding cihna suak hi.

Al Jazeera-te' Latin America Editor Lucia Newman in kilemna ding deih pawl tamzaw hi napi hih bangin a deih lo ten gualzawhna a ngah uh pen lamdang mahmah hi ci-in Colombiate' khuapi Bogota panin gen hi. Kilemna ding deih President Juan Manuel Santos in FARC ten zong kilemna ding deih uh ahih manin ceasefire thukimna pen kizangto lai veve lai ding a, zing ciangin kilemna ding genna a kihel palaite, opposition party makaite leh FARC uliante Cuba gamah ka kimuhpih ding a, kilemna a pian' theihna ding ka hanciamna ka khawlsan kei ding hi ci-in zan in gen hi.

FARC makaipipa Rodrigo Londono (nom de guerre Timochenko a kicizaw) in FARC in kilemna ding a pian' theihna ding kilunggulh a, kilemna ding deih lo a tam zawk hangin kilemna pian' theihna ding kilunggulh veve lai hi ci hi. FARC ten thu leh kam bek galvan in kizang ta ding a, Colombia ah kilemna ding sunmang in a nei ten hong ze-et un, kilemna in gualzo ngah veve ding hi ci-in gen hi.

Hih kilemna ding hong gin' khiat theihna dingin FARC leh Colombia kumpi kum li sung tam veipi kikona nei uh a, nung diak in "final peace accord" kici kilemna taktak hong nei thei uh hi. FARC leh kumpi' kilemna suaikaihna pen mipi a tamzaw in nialsak ahih manin kilemna ding deihte' phualpi (headquar) a om pawl khatte thangpai mahmah uh a, pawl khat khitui naptui tawh kidim in, "Kilemna ding deih ung," ci-in awng uh hi.

Colombia President Santos in kum 52 sung kidona beisak hun ta a, kilemna bekin khangsawmte leh gam adingin maban limci hong pia thei ding hi ci hi. FARC ten ni dangin galkap 7,000-10,000 kiim bang nei a, US in Columbia kumpi huh in FARCte a dopihna hangin nung kum diakin FARC galkapte a kim khat khawng bek om lai dingin ki-ummawh a, galvan koih khia in meetang bawm (ballot box) zangin a deihna uh ngah theihna ding un a lungsim uh hong laih uh hi.

Kilemna ding deih lote a makaih President lui Alvaro Uribe in FARC ten a thukham palsatna hangun thonginn ah khumna a thuak ding uh hi a, congress ah tutna kipia lo ding hi ci hi. Kilemna ding deih lo leh vote khiatna a kihel kum 35 mi Alejandro Jaramillo in kilemna om leh FARCte a tamzaw thong kia loin peng ding uh a, ka tate tungah na khempeuh kimaisak thei lo cih lahna dingin kilemna ding ka deih lohna vote ka pia hi ci hi. FARCte politics ah hong kigolh le uh na khempeuh tangpite ading suahsakna dinga ki-ukna (socialism) a nget uh paai khia tuan lo ding uh hi cih ngaihsutna nei leh President Santos' tunga lungkim lo leh a deih lo mi tamzaw ahih manin kilemna ding deih lote gualzo hi kici hi.

FARC pen May 27, 1964 in Marxism–Leninism, Bolivarianism, Revolutionary socialism, Left-wing nationalism leh Foco theory thu bullet in kiphuan khia a, a makaite uh min a nuai-a bang ahi hi: (min nunga singlamteh lim tuangte pen a si khin cihna hi)
Timochenko
Iván Márquez
Pastor Alape
Joaquín Gómez
Pablo Catatumbo
Mauricio Jaramillo
Alfonso Cano †
Manuel Marulanda †
Jacobo Arenas †
Raúl Reyes †
Iván Ríos †
Mono Jojoy †

FACR ten kilaihgawpna (revolution) leh na khempeuh taangpite aa suahsakna lam ki-ukna (socialism) deihin kum 52 sung kiphinna a neihna hangun sihna leh liamna tuak mi 218,094, nautang 177,307 si in, mi 27,023 kipimang (abducted) hi.

Source: Al Jazeera News And Agencies/Wikipedia