IRAN IN RUSSIA TAWH TUIPI AH KIPAWLKHAWM DING LUNGGULH

IRAN IN RUSSIA TAWH TUIPI AH KIPAWLKHAWM DING LUNGGULH

March 14, 2017: Iran in tuipi thukte munte (high seas) ah Russia tawh kipawlkhawmna hoih mahmah neih ding kilunggulh hi ci-in Russiate' Caspian Tuipi-a teembaw khawlna mun Makhachkala ah Iran Navyte' teembaw honte (flotilla) tawh kilawmtatna lahna dingin nung diakin "friendly visit" a makaih Iran Navy Commander Mohsen Sheidayee in Sputnik ten a interview na-ah gen hi.

"Nitumna gam ten ko tungah khalna hong koih khum hangun kilemna a om theihna dingin Russia tawh kitanauna hoih sem neih ding kilunggulh hi," ci-in Captain Sheidayee in Sputnik Persian newste kiangah ci hi.

Sputnik in Russian military expert leh Iranian military experts-te a interview na-ah Caspian Sea pen Russia leh Iran in Navy lamsang ah a kipawlkhopna mun lianpen (main area) hi ding hi cih thukim uh hi. Zavtra newspaper Deputy editor-in-chief Vladislav Shurygin in gam nihte kipawlkhopna ding vai pen Navy ten galdo ding zia Caspian Sea leh mun dangdang ah nei ding uh a, Caspean Sea pen kuamah in ko gam hi ci loin buaina om lohna mun "no conflict zones" hi ci-in Russia leh Iran in thukim ahih manin Caspean Sea ah mai lam hunah muanna leh bitna a om theih denna ding ngimna nei uh hi ci hi. Tua loin Caspean Sea ah leisung sumpiangte (natural resources) humbitna ding leh dongtuakte huhna dingin kithuzakna a om theihna dingin Russia leh Iran Navy ten galdo kisin khawmna hih munah nei kha thei uh hi ci hi.

Iran Navy ten 2013 panin Russia navyte galphual (naval bases) thum vei a hawhna uh hi ta a, June 2013 leh October 2015 in Astrakhan a Russian naval base ah Iran navyte teembaw va hawh ngei hi.

Iran in 2015 in US, Russia, China, France, Britain + Germany (P+5 a kici)-te tawh Nuclear Deal kici thukimna nei-in nuclear bawl ding khawlsanna dingin thukimna a neih manin Iran leh Russia in galkap lamsang ah kipawlkhawmna neih hong kipan uh hi. Nuclear Deal thukimna a kineih theih manin Iran tungah UN in galvan zuak theih lohna dingin a dalna "UN arms embargo" kici pawl khat kiphiat in kila khia a, US in lak khiat ding a om laite bangbang hiam ci-in en phapha lai hi.

Source: Sputnik
A tei: Thang Khan Lian

TURKEY PRESIDENT IN NETHERLANDS GAM PEN NAZI BANGIN GAMTA HI CI-IN A NGAWH MANIN EU IN WARNING PIA

TURKEY PRESIDENT IN NETHERLANDS GAM PEN NAZI BANGIN GAMTA HI CI-IN A NGAWH MANIN EU IN WARNING PIA

March 13, 2017: Turkey President Recep Tayyip Erdogan in a president thuneihna a keek behna dingin Turkey upadi puahphatna "constitutional reform" kici bawl sawm a, tua dingin Germany gam-a Turkey gammi omte kiangah vote zongin Tukey mininsterte mipi kikaihkhawmna munte (rallies) ah thugen dingin a sawl hangin German municipal thunei ten phalna na pia lo ahih manin gam nih kikal ah kitanauna nakpi takin siasak hi. Germany gamah Turkey mi vote nei bek mi 1.4 million om hi. Vote zong ding ministerte thugen a kiphal loh manin Erdogan in Germany pen Nazite' gamtat bangin gamta hi ci-in ngawh hi.

Turkey in Netherlands gamah zong rally neih sawm in, a ministerte sawl sawm napi Nipini in Rotterham khuapi-a Turkey consulate kongah lungphona lahna mipi in neihsan hi. Police ten lungphona neite hawl khiatna dingin tui thau (water cannon) tawh lungphona neite kap gawp in sakolte tawh a nawk manin Netherlands in Turkey Minister a gam panin a hawl khiat manin gam nihte kikal ah gam khat leh gam khat kikal (diplomatic) ah kiselna leh kitelkhialhna lianpi piang hi. Police ten lungphona nei mi 1,000 betdaihna ding tui tawh a kap bek hilo a uk zawhna dingun ui nangawn zang uh a, kitualvatgawpna piangsakte dal ding riot police kicite lungphona nei ten suang tawh na deng gawp uh a, car za lom tampi mainawt thei lo nungtawn thei lo (jammed) sak hi.

Netherlands in zing ciangin gam bup kiteelna nei dek ahih manin Rotterdam khuapi ah Turkish Foreign Minister Mevlut Cavusoglu in rally a neih ding kimuak lo hi ci-in tampi vei na zasak ahih manin Turkey in April kha ciangin Constitutional reform neihna vai vote khiatna (referendum) adingin vote zong dinga pai sak sawm Mevlut Cavusoglu' tuanna vanleng bawh ding Netherlands in na phal lo hi. Hih thu hangin President Erdogan heh mahmah a, Netherlands gam pen Nazi bangin gamta in, Nazi ten a uk khum gam banga, Netherlands pen Nazite ukna gam hi ci hi. Hih bangin Erdogan in mipi up theih ding thu (rhetoric) a gen manin EU in na pau na kidawm mahmah in ci-in thu zasak hi.

Netherlands gam bek hilo in Germany leh EU gam tuamtuam ten Turkish Foreign Minister Cavusoglu in vote zon'na a neih ding a dal manin NATO member vive ahi Turkey leh EU gam tuamtuamte kitanauna nakpi takin siatsak lawh zo hi. Erdogan in, "Ka Foreign Minister uh tuan'na vanleng bawh ding na gam uh-ah na phal loh mah bangun no vanlengte zong Turkey gam ah hong bangci bawh hiam en ni ei," cihsan hi.

Hih bang teng a pian' khit nungin Turkey-te' Family Minister Fatma Betul Sayan Kaya kici Germany panin Netherlands gam ah a tun' in police ten a tuan'na car Turkey consulate kongah na khawlsak uh a, tua khit a sawt loin police ten Germany gamgi dong va cingin sawl khia kik uh hi. Ms. Kaya pen Netherlands in muak loin a hawl khiat manin Rotterham panin hong kipatna Germany ah lut kik hi ci-in mayor Ahmed Aboutaleb in reporters-te kiangah gen hi. Ms. Kaya leh Netherlands gam-a Rotterham policete kinail laitak uh Dutch NOS television in suaksak hi. "Rotterham ah naikal tampi ka om hangin dawn ding tui nangawn hong pia lo uh a, a gam uh nusiatsan in la, a manlang thei pen in Germany ah ka ciah kik in hong ci uh hi," ci-in NTV televisionte kiang ah Ms. Kaya in ci hi.

Cavusoglu bel France ah leng suk a, Nipini ciangin Metz khua-ah rally a neih theihna dingin French ulian ten phalna pia uh hi. Netherlands gammite (Dutch) Prime Minister Mark Rutte in Turkey a thangpaih leh bel ka theisiam a, ahih hangin Nazite' uk khumna gam tawh hong tehkak in President Erdogan in hong gensiatna pen thukhenna man lo leh a gi kigitna ciangtan kikoihna mun kheng hi ci hi.

Hih bangin gam nihte kikal ah kinialna nasia tak a om lai-in Turkish Foreign Ministry in Turkey khuapi Ankara a Dutch d’affaires za len kisam a, Turkey gam-a Dutch ambassador (tu lai takin holiday/khuan zanga om) tawl khat Turkey ah hong ciah kiksak kei un ci hi. Netherlands gam ah Turkey mi 400,000 kiim om a, tua loin Europe gam ah zong Turkey mi om kawikawi ahih manin April 16 referendum ciangin executive presidency bawlna ding vote zong Turkey uliante buai mahmah uh hi.

Source: The Hindu
A tei: Thang Khan Lian

SCOTLAND IN UK PANIN SUAHTAKNA NGET SAWM AHIH MANIN UK ADINGIN LAUHUAI THEI DING

SCOTLAND IN UK PANIN SUAHTAKNA NGET SAWM AHIH MANIN UK ADINGIN LAUHUAI THEI DING

March 14, 2017: Scotland in 2014 in UK panin suahtakna na ngen ngei a, mipi tamzaw deihna tawh suahtakna deih leh deih lo ten vote khiatna "independence referendum" kici nei uh a, Scotland gammi 55.3% in UK mah tawh om khawm lai ni ci uh ahih manin suahtakna deih pawl pro-independence (Yes campaign zong a kici) kicite guallel uh hi. Ahih hangin tu-in suahtakna deih pawl mi 50% bang pha ta uh ahih manin Scotland First Minister Pi Nicola Sturgeon in Scotland in suahtakna a ngah theihna dingun "new referendum on Scotland's independence" kici siksiau hun/phalbi tun ma deuh (autumn) 2018 leh tuk hun (spring) 2019 ciangin rerendum thak kinei kik ding hi cih geelna nei hi. Bang hang hiam cih leh UK in Brexit kici tawh EU nusiatsanna ding vaihawm in Scotland gam phattuamna ding hong thudon lo hi ci hi.

Director of the pro-independence Commonwealth think tank Robin McAlpine in Radio Sputnik newste kiang hih thu pen UK Prime Minister Theresa May adingin thu haksa mahmah hi ding hi ci hi. Bang hang hiam cih leh referendum thak a kineih kei leh zong upadi buaina (constitutional crisis) om dinga, Scotland gammi a tamzaw in referendum thak neih ding deih uh a, tua vai ding Scottish Green Party [SDP] in gum ding ahih manin Scotland gamte adingin referendum thak neih ding pen official policy suak ding ahih manin UK in phalna ahih kei leh dalna khat zawzaw a bawl loh phamawh ding hi ci hi.

Zan in referendum thak neih theihna dingin UK in Scotland tungah "section 30 of the Scotland Act" om bangin vote khiat theihna dingin phalna hong piakna dingin ka ngen ding hi ci-in gen hi ci-in Pi Nicola Sturgeon in pulak hi. UK in phalna hong piak leh referendum pen 2018 phalbi ma ahih kei leh 2019 tuk hun ma-in kinei ding hi ci-in Robin McAlpine in ci a, UK in phalna a piak kei leh mipi hon in thumang lohna lahna (civil disobedience) May kha ciang Scotland in a neih leh neih loh ding dotna pen Alpine in kinei lo ding ka ci ngam kei hi ci hi. McAlpine in Scotland in suahtakna ding mipi tamzaw deihna tawh vote khiatna (referendum) vai pen democracy pai zia hi a, UK in Scotland pen UK tawh pumkhat a om ding a deih leh a do (fight) a, referendum a zawh ding (democracy ngeina bangin) kisam hi ci hi.

McAlpine in gam khat adingin gam bup dotna buaina ven'sakna dingin referendum zat pen mawtaw hoih pen ahih loh (imperfect vehicle) hangin referendum lo Scotland in teel ding dang nei lo hi ci hi. Scotland in UK panin suahtakna a ngah theihna dingin "independence referendum" kici a masa pen September 18, 2014 in na nei a, suahtakna ding a deih lo pawl "No campaign" kici ten vote 55.3 percent a ngah manun a deih pawlte guallel hi. Ahih hangin tu-in a deih leh deih lo kikim (50-50) ahih manin "Yes campaign" pawlin gualzawhna a ngah theihna ding uh hunhoih/kaam (chance) lianpi om hi ci-in McAlpine in ci a, leitung bup ah khantohna ding ngaihsutna neite etna panin UK pen thanem mahmah ahih manin thu thanem zaw (weaker case) pen thu hatzaw tawh kido ahih manin referendum kinei leh gualzawhna kingah dingin ka um hi ci hi.

#Behlapna: Leitunga gam khempeuh in referendum neih theihna ding upadi nei lo hi. Referendum neih thei gam ten a president-te nangawn uh a muan zawh nawn kei uh uh leh mipi tamzaw vote khiatna bangin paai khia thei uh a, gamvai thulian khat peuhpeuh zong kumpi thukimsa nangawn dal thei uh hi.

Source: Sputnik

Photo: Edinburgh khuapi leh Scotland First Minister Pi Nicola Sturgeon

A tei: Thang Khan Lian