A DANG BANG KISAM LAI???
Ni khat pasal kizang dawn muan, ke lo kua a kici tha hoih mawh lo khat zu sai (shop) ah hong lut vat a, "Beer can 3, zu thawl khat, sakankeu kuang nga leh soda thawl 5 manlang takin hong pia un. Nong piak kei uh leh na sai uh haltum ding hi'ng," ci-in hong awng baba hi.
Sai neipa in a deih teng phun lo, puam lo, pau loin manlang takin va pia pah saisai hi. A dawn ding leh a nek ding teng a kham khit ciangin lungdam ko se loin paisan hi. Tua mah bangin ni khat khit ni khat, kha khat khit kha khat tua sai ah hong lut in, "Beer can 3, zu thawl khat, sakankeu kuang nga leh soda thawl 5 manlang takin hong pia un. Nong piak kei uh leh na sai uh haltum ding hi'ng," ci-in awng baba den hi.
Tua leh ni khat tua sai mah a hong pai kik a, "Beer can 3, zu thawl khat, sakankeu kuang nga leh soda thawl 5 manlang takin hong pia un. Nong piak kei uh leh na sai uh haltum ding hi'ng," ci-in hong ot baba leh a kiu khat panin, "A dang na bang kisam lai? Na deih beh om lai hiam?" ci-in aw un khatin dam in na dawng hi.
Tua tangvalno in a et leh amah a balzan nuam bang lianga en gemgam thagol mahmah a zawh vet loh khat na tu liauluau hi. Tangvalno zong dai takin lukun suk in, "Dawn ding tui siangtho hai khat beek kong dawn thei diam?" ci-in aw nem takin dawng khial hi. "Hai khat bek dawn ken la, na duh zahzah dawn lel in," ci-in tua sai kiu a tu pa'n dawng hi. A dawn khit phet in tua tangvalno pusuak pah a, tua sai ah va dak ngam nawn lo hi.
Moral: Zawhthawh thu tawh thuman loin a gamtata thei i cihte pen a thuman lohna uh a gen ngam ding leh a pholakkhia ngam ding a om ngam loh man bek hi. A kiphatsakna uh leh a thuman lohna uh langpang leh lehdo ngam dingin thuman a gen ngam, thuman a dinpih ngam a om loh man bek ahi hi.
Thuman lo nasak khat na genkhiat ngam kei leh nang zong thuman lo a dinpih, thuman lote a kipawlpih, a gamtatna uh a thukimpih cihna na hi hi. A thuman zo den kuamah a om loh hangin thuman ding deih in, thuman ding i hanciam ciang bekin thuman nungta zo bek hi. Thuman lo pen thatang bek tawh do theih hilo in kamdam leh thuamanna tawh kido thei lua hi. Thuman lo dona dingin hangsanna leh thumanna pen galvan hoihpen ahi hi.
🖋️Thang Khan Lian
No comments:
Post a Comment