MI THAHAT PU TAWK THANG

MI THAHAT TAWK THANG

Pu Tawk Thang, Pu Thang Sut (Zilom) leh Pi Hial Vung-te’ tapa hi a, 1860 in Tungtuang ah suak hi. A zi pi Ot Ning (Lethil) hi a, tapa nei lo uh hi. Pu Tawk Thang 1901 in si hi.

Ama’ hatnate:

1] Pu Hau Cin Khup in a tuangdung pek pua dingin cial hi. “Zawl aw, na tuangdung lah hong  puakpih mah ningin nang zong an nek khat akpi khat ta tawh hong mehsak in,” ci hi. Tua ciangin Lam Thangte gam tuipa tung vaphual mual a dol tuangdung a sauna pi 36, a pek pi 2 leh a lang a sahna khutpi 2 a pha pua dingin kuan uh hi.

2] Tonzang ukpi gamsunga pasal hatte in mualdungah lampi sattawmin miksi sazawn a kizawng ahi hi. Khatvei lui sung khatah khahsuahin tolhsak kha uh a, thukpitak tum hi. A dawhdawh uh hangin mipi in dokkhia zo lo uh hi. Tua ciangin Tawk Thang in “Liangdap khat ong pia dih ua,” ci-in a mongah liangdap dapin pua hi.  Puakhia zo a, a mongah pua a a khukdinna kuak pen sial khekhap tawh kibang hi ci uh hi.

3] Tungtuang ah Pu Awn Khaw Paute’ innka laizang a songka ka kua a pha pen gamlai gam a kisui ahi hi. A sui pasal hatte in zawng uh a, tuithu ngah munah galkahpih uh hi. Tonzang lam galah singkung lakah a puakzia ding uh thei lo uh a, Tuithu gal Vialcian lamah nusia uh hi. Tua thu Tawk Thang in a theih ciangin amah guak zan kuanin singlak ah a tung lamin tawi zeuzeu-in Tungtuang khuanawl ah nga hi. Khuasung pasalte in a muh uh ciangin lamdangsa uh a, a kan uh ciangin Tawk Thang’ puak ahih lam phawk uh hi.

4] Hau Cin Khup in sial 50 tawh a ton lai-in a ngeina bangin pansik (ton kipat ni) ni-in song suite kivak hi. Zingsang khuavak ciangin tangvalte in sialte mawlpih dingin sial kongah khau in khih uh hi. Tawk Thang in ki-in man a, a ngawngah hekin a mitte khelkhia a, song phung denna mengmeng hi. Tua pen mi tampi muhna ah a hih hi a, mipite awng ziahziah hi kici hi.

5] A khuapihte Lam Suan leh a lawmte in zunun nikhat vuak sawm uh hi. Zunun khekleh ni-in zu khamtehin phin uh hi. Kilai uh a, Tawk Thang in huansak ah khat, phungtungah nih, inn nuaiah khat lawn mengmeng in zo ziau hi.

6] Phaitu ah a zawlpa in a  innka zawl a sauna pi 24, tang 4, tang 2 sah mal 4 a vekin na puak zawh leh tang in ci hi. Ama’n lomhenin pua-a tang hi.

7] Tungtuang hausa upate in zu leh sa a nek ni khatun va to uh a, kilai uh hi. Tawk Thang in zo hi. Tua ciangin hausapa Phut Vum in, “Tawk Thang pen sing leh suang zong bang kei, sik tawh kibang” ci hi.

8] Poding kici lopa bawhhak mahmah nam khat Tawk Thang in a tawbo ah tepin bot zo hi. Tu dongin Tonzang khuakimte in “Tawk Thang’ lo” ci lai uh hi. A taw ip a, tangvalte in phen sak uh a, phen zo lo uh hi.

9] Guapum nal tungah kah kidemna ah kuamah dang a kah zo om lo hi. “Pu Tawk Thang, nang bang ci kah na hia?” ci-a a kidot ciangin, “Guapum a (ki)tam lo deuh in mekin kah leng haksa lo pi” ci hi.

10] Mizo gamah a sanggamte Tawng Vial leh Thawn Pau tawh an taw uh hi. Zawlbuk ah tangvalte in phinphin uh a, kilai uh hi. Tawk Thang in a khup a thalin a lomlomin a lot khit ciangin amau lakah a hat pen pa leilak a denna leh a siakmit kitam hi.

11]  A sungte in a lo uah ann simsak uh hi. A ciah uh ciangin vaimim bawk 80 puak khatin pua hi. A sungnu in, “Ahi ci hat na sem le cin hoih ding hi ven” ci hi. Maipum 100 zong pua zo hi.

12] Tungtuang tangvalte in sial gawh ding a mawlpih uh leh khahsuah uh hi. Tawk Thang kisil a om kimlai va ko uh a, Tawk Thang in a khut lang khatin a kal humin a khut langkhatin sial a mei ah manin khawlsak ziau hi.

                    Tawk Thang a sih ciangin ciangin a guh a et uh leh bing hi, ci uh hi. A suan a khakte Suangsang khua ah om lai uh hi. A pu mah bangin mi dang sangin hatzaw uh a, ahih hangin Tawk Thang zah a hat om lo uh hi.

                              Source -Vung Cin Kham [Tedim BEHS No.1 Sangpi Golden Jubilee Magazing 1998]