MI GOL, MI THAHAT PU ENG SEEP

MI GOL, MI THAHAT PU ENG SEEP

Phuaitu khua, Mantuang beh Pu Lang Let tapa pu Eng Seep ahi hi. A suah kum pen 1820 pawl hih tuak hi.  Eng Seep’ ta Let Neng, Let Neng’ ta Khup Cin Thang, Khup Cin Thang’ ta Seep Kap Thang ahi hi. Seep Kap Thang in thudot ni 29-7-1996 in in zi nei nai lo a, 1973 in suak hi.

Eng Seep tupa Khup Cin Thang pen a pu mah sun lai-in Phaitu khua-ah migol pen ahi hi.

Eng Seep pen gol mahmah ci uh hi. Tua hunin tehnate kithei nai lo ahih manin a tun sanna kigen thei lian lo hi. A lutang pen bei beel suan cia pha ci uh a, a ngawng pen (a khep loh) pasal tuk guk pha hi. A lutang leh a ngawng gol zia tawh kituakin a tun sanna pen pi kua kim pha leh kilawm hi.

Tonzang khuakhung Zopigam gal, Boltu gamah lokho in a lo hong zel hi. Vom tam mahmah, Vom a thah ciangin a temta tawh dawt, guatak mahmah a langtuak hiam zumin a vom kamkat laitak a kam sungah khumin kam kicih sak nawn lo ding a kikalh sak hi; teipi tawh sun lum cih bangin man se hi. Thau zang lo hi. Khatvei vompi a mat leh a vompi in a khe petsak a, a dam the ama puawnsia gawp ahih manin, a pawnsia kawmah namsia teng zo hel ci hi. Vom a mat sialin gol leh neu leh gilkhuah lohin a inn-ah pumpuak ziaiziau hi. A sih hun a kitheih nawn loh hangin khangham khin mahin si hi.

[Hih Pu Eng Seep tangthu pen keimah T. Suan Khan Mang in Phaitu ah a khangham pen Rev. Thang Khaw Cin (kum 85 a pha) kiangah 29-7-1996, Monday zingsang nai 7:00 am a ka dot ahi hi. Hong zakpih pen Pu Sing Cin Thang, B.A., Dip.Ed., ATEO, Tedim ahi hi.]

Source: -Siapi T. Sian Kan Mang @Tedim BEHS NO.1 Sangpi, GOLDEN JUBILEE MAGAZINE, 1998