THEIH HAU NAPI-IN TELCIAN NEI MEL LOIN HU HAMHAM PHENG PAUPAU NAWN KEI NI

 THEIH HAU NAPI-IN TELCIAN NEI MEL LOIN HU HAMHAM PHENG PAUPAU NAWN KEI NI

US Supreme Court in Republican presidents thumte guan Conservative Justices nga in thukhen za a sep hun (US Supreme Court ah thukhen kua om) uh June 26, 2015 in Obergefell v. Hodges, 576 U.S. 644 (2015) case vai a thukhenna ah US Constitution sunga 14th Amendment upadi ah kiteen' theihna "right to marriage" cih kiteen' theihna dingin hamphatna ahih kei leh suahtakna a cih na om se ahih manin tua bulphuh in neih kibang kiteen' theihna dingin 5-4 votes tawh same-sex marriage phalna na pia hi. Conservative Justice khatin a langlam na gum deidai sese kei leh same-sex or gay marriage kici Obama administration hun in gam bup ah US ah phalna na om lo ding hi. Hih thukhenna tawh na Uburma uh kisai kha laizang lo hi.

Nauphiatna phalna a kipiak hun zong Republican President Richard Nixon hun in Supreme Court in January 22, 1973 in Roe v. Wade, 410 U.S. 113 (1973) case vai a thukhenna ah US Constitution sunga 14th Amendment upadi bulphuh in naupaaite in liberty (suahtakna) a neihna uh-ah "right to privacy" kici na om sese ahih nauphiat leh phiat lohna ding amau thuneihna nei uh ci-in 7-2 votes tawh phalna na mawk hi.

US gam Lai Siangtho bulphuh in kiphuankhia hi cih pen Phuahtawm 1:1na hi cih kilang khin zo a, distorted history or myths paulap hi bek a, a tualsuak mite American Holocaust ah Red Indians minamte 100mn bang siansuahna dingin lom thahna (human history ah genocide nasia pen) leh mivomte kum 246 sung piikpeek sila in bawlsiatna leh nengniamna 1619-1865 kikal sung Slavery Systems zangin a kilam leh phuankhia gam hi zaw bek hi.

Hih neih kibang kiteen'na leh nauphiatna pen US ah executive lutang a len President in a phalna a piak theih hilo a, President in Supreme Court ah thukhen dingin mi a guan' House of Representatives leh Senate in kipsakna a piak judiciary lamsang tavuan len thukhente in US Constitution tawh kituakin a thukhenna uh-ah phalna a piak theih pan uh hi bek hi.

Phalna a pia taktak pen US Constitution leh a sangpen thukhenna uh Supreme Court of the United States (SCOTUS) hi zaw bek hi. Thukhenna vai judiciary ah executive makai president leh government (administration) in thuneihna neih khum thei lo uh hi. Democracy gamte ah executive, legislative leh judiciary pen independent body in kikhen diudeu ahih manin "systems of balances and checks" kici hi. America gam pen systems of balances and checks a bullet pha diak ci-in a kisialhpih mahmah gam ahi hi.

Democracy gam khempeuh ah hih nam thum teng a kingakna khuampi (pillars) thumte- executive (US administration lente), legislature (Congress) leh judiciary (court) hi a, a lina pen media hi. Hih khuampi lite suakta takin a om theih kei uh leh democracy gam pen dictatorship gam suah pah lianlian hi. US 45th President in media amah a pum gup leh pum phat lo teng FAKE NEWS hi ci-in gal a pulak khum zong a lamdang hi loin Fascism or Communism tawh America gam ama ut bangbangin a ukcip nopna hang hi zaw hi. Democracy gam-ah thu paizia tel lopi-in upmawh thu mot gengen ding hilo hi. Upmawh leh deihkaih leh zuau genna leh mi dangte (party muhdah khat) pum ngawh pong hangin zuauthu thuman suak zo ngei lo hi.

US president in neih kibang kiteen'na leh nauphiatna ama thu tawh phiat thei ziau hileh neih kibang kiteen'na leh nauphiatna ka phiat ding hi ci-in 2016 presidential campaigns pek panin ku laulau in kamciam Donald Trump kicipa in ama hun sung kum li bekin SCOTUS ah conservative judges thum tak guang beh hi. A phiat mah hiam? President a let sungin a phiatna dingin bangci bangin pan a la a? A phiatna dingin conservative Justices thum a guan' behte in Row Vs Wade case leh Obergefell Vs Hodges case lumletna (overturn) dingin Supreme Court ah appeals case cik in a khia uh a? Hak gega kawmpipi in kikhemkhem kei ni. Mi khempeuh ngaihsutna khuak zang loin sazuk bangin luzaang ah khuak a mot puak belbal kihi lo hi.

Conservative Justices omte election results ah a guallelh khit nungin a kidempih pa gualzawhna lumletsakin a guksakna dingin US presidential tangthu ah a masa pen kua hi hiam? Georgia state sung bekah state elections results ah a guallelh lumletna dingin Georgia State Secretary Brat Raffenserger nai khat sung a phone call ah 11,780 votes a guksakna dingin nawh leh vau a thuah kua hiam? Lawsuits 60+ val leh Electoral College meeting leh Congress ah election results kipsakna ding dal sawm kua hiam? Donald Trump a kicipa leh a nung a mot zuihte bek hi. Democrats lamte upmawh, phuahtawm leh zuau bulomtang tawh na tang ngawh niloh pong uh pen na zuau bulomtang uh leh thu paizia na tel leh kantel vet loh hang bek uh hi.

US president in thu khempeuh nei hi zen leh 2020 presidential elections ah a guallelpa in a guallelh sang nuam loin election results ah mipite thukhenna lumletsakna dingin election thuman lopi-in gu in gualzawhna ngah ding a hanciamna tawh legal lawsuits 60+ filed a, a nungzuite in US Capitol buildings buluh in mi nga a sih ban a, Capitol buildings sunga thukham bawlte (legislators) laptop nih guksak uh a, Capitol buildings hallways mun pawl khatte ah a ek uh ui leh zawhngeu gina lote bangin va pheng thak lai uh hi.

America gam mi khat deihna bek tawh gam ki-ukna piang ziauziau thei hileh a sih dongin kiteelna ah a guallelhna a ngah pa (2016 kiteelna ah a tam zaw in deih loin million 3 dektak in Hillary Clinton lel napi-in Electoral College votes hangin a cing hi bek hi) in president len den ding a, democracy gam kici loin dictatorship gam or Taliban or ISIS ukna gam kici ding a, Talibanisation or Islamisation tawh ki-ukna gamte bang ding hi. 2020 presidential elections ah a kidempih Joe Biden 7 millions votes val leh Electoral College 306-232 votes tawh a lelh khit nung nangawnin a thuneihna a khahsuah nuam lo, apkhia nuam loin vompi halung vei bangin kitomtom in zuau bulomtang a mutmut Sia nengnengte leh kamsang kineihkhem teng leh conspiracy theories leh fake news a mutmut conservative media suuksia diakte teelcingpa leh thau nilhpa bekin a sih dong president len suak ngaungau den ding hi.

Sangpen thukhenna in neih kibang kiteng nuamte leh nauphiat nuamte phalna a piak zenzen hangin ei a deih lote tua bangin i gamtatna dingin kuamah cikmah hun in hong nawh dihdih laizang lo hi. Na zuau bulomtang suakta takin na mutmut theihna dingin US Constitution sunga First Amendment in freedom of speech and expression hamphatna hong piak bangin neih kibang ki-it kingaite, kiteng nuamte leh nauphiat nuamte amau hamphatna a piak hi bek a, nang leh kei in i deih kei leh hong tah dihdih lo hi.

I deih loh hamphatna leh suahtakna zui leh zang teitei dingin US Constitution leh Supreme Court in i khe leh khut ah kol bulh theihna ding leh i nak hong pheh theihna dingin judicial powers nei laizang lo ahih manin kuama'n hong nawh theihna dingin aana nei lo hi. US administration leh president a kilaih hangin US Constitution phuahphatna (amendment) a bawl mateng uh kilaih lo ding a, SCOTUS in a thukhenna tona (legal challenge) va bawl a om kei leh a thukhen khitsa uh khuttung lumlet bangin laih themthum lo ding hi. Burma/Myanmar in a gam upadi Constition suahtakna a ngah khit thum vei tak a laih themthum bangin US in suklaih tolaih loin hoih a sak lohte bek amendments bawl bek hi. India leh democractic gam kiciante ah zong tua dan mah hi.

Leitung gamte ki-ukna pen vantung gam ki-ukna zia tawh kibang lo a, Kingdom of Man pen Kingdom of Heaven hilo hi. Religious extremist dogma pen political ideologies leh theories hi ngei lo hi. Thu um mi, Lai Siangtho thu zui mi na kicih leh democracy gam khempeuh ah na biakna upna (religious faith) suakta takin na zuih theihna dingin "freedom of religion" hamphatna leh suahtakna hong piak hun lua khin zo hi. Na upna tawh kituak lo a nei leh zuite rights na va suamsak leh do niloh pen gitlohna leh mi deidantuamna lianpi khat mah hi. "Ahi zongin mi na deidan uh leh note a khial na hi uh a, Thukham a palsat na hi veve uh hi. Mi khatpeuh in thukham dang khempeuh a zuih hangin khat a khialh nak leh a vekpi-in a khial mah ahi hi," ci-in James 2:9-10 kikal sungah na gen hi. Tua ciangin thuman na thei ding uh a, tua thuman in note hong suaktasak ding hi. (Johan 8:32)

Ngaihsutna khuak nei napi-in tawh tawh a kalhcip tengin thuman za-in na suahtakna dingun na khuak uh a key kalhna tawhtang tawh na hong ta un. Na ngaihsutna kol kibulhna a suaktasak theih a tawhtang kem nang bek na hi a, a tawhtang na khut sungah om hi. Zakna ding bil a nei khempeuh in na za ta un. Ngaihsutna ding khuak a nei khempeuh in na ciamteh ta un.

 Thang Khan Lian #ZUNs