NA DINMUN NA KITHUPISAKPIH LUA PAH KHA HIAM?

NA DINMUN NA KITHUPISAKPIH LUA PAH KHA HIAM?

Kongkhak pen inn tawh teh in nakpi takin neu zaw hi.
Tawhbu (lock) pen kong sangin nakpi takin neu zaw tham hi.
Hih teng lak panin tawhtang (key) pen a neupen hi napi kongkhak honna ding leh inn sung lutna dingin amah bek kizang thei sese hi.

A neu mahmah, ngaihsut siamna leh thukhual siamna tawh na hamsa vensakna (thoughtful solution) in buaina lianpi vengsak thei hi. Ngaihsutna hoih a neu mahmah in nuntakna bup leh leitung bup nangawn hunkhia zo thei hi.

Maban ah makai ding a hanciam a lunggulhna nei leh state, territorial council, self-determination etc, etc.. nget ding dong a tangko khia pawl khat ten, "Kuamah hong thulak loh ding thugen pen gimhuai lel hi," ci-in mipite ngaihsutna leh thugenna thusim vet lo om se uh hi. Minam adingin i deih leh hamphatna ding i ngetna ah i ngah theihna ding leh i minam mainawtna (movement) khatpeuh ah i kalsuanna ah i muibut theihna dingin mipite loin makaite bek hanciamna a mawknapi hi. Mipi a nungthuap ding nei lo makai pen a mawkna hi a, mipite ngaihsutna a neumuh makai khat vaang sawt kimang lo hi. Politics ah thahatna bul kipatna pen mipite hi zawsop hi.

Tui a khan ciangin tui in lei tuum ahih manin miksite pen ngasa ten ne-in a an dingin zang uh hi. Ahih hangin tui a kiam ciangin lei ah awkcip in lui sunga kipeek suk man lo ngasate miksi ten ne-in a an dingin nei uh hi.

I nuntak hun sungin nuntakna in mi khempeuh hunpha leh kaam (chance and opportunity) hong pia kim ciat hi. Na hunpha hong tun ciangin na hamphatna leh na vangliatna/thuneihna (power) a khengval in zang kha kei in. A neu pen a i ngaihsut tawhtang manphatna neumuh ngam huai pah het lo hi. I kimuan mahmah laitak i thanem pen hun na hi nuam zawsop hi. Ngaihsutna tuamtuam kaikhawm in a hoih teng tawh i kalsuan ciang bekin politics muibun zo pan hi. Ngaihsutna tuamtuam sungkhawm, kikumkhawm in, i kinialsak ciangin ngaihsutna hoih pen hong kitelkhia zo pan bek hi.

"Sepkhawm nuam, puakkhawm zang!"

✍️Thang Khan Lian