TAI THEI TUAN KEI NI TEH NA KEEL LUPHUM HONG KILANG VEVE DING HI

TAI THEI TUAN KEI NI TEH NA KEEL LUPHUM HONG KILANG VEVE DING HI

Khau khat ah sum tawh a kiguai keelcing (goatherd) khah om hi. A keel cinna ah a keel khat mangsak a, a keelte tatna ngei kiim teng a zonzon hangin mu zo lo hi. Zon theih zon mawhna mun teng a zonzon khit ciangin a keel gum sunga kia mu hi. A keel a muh ciangin a zonzonna teng gim kisa lua in a heh thah suak lua a, a keel a kaihkhiat ma-in suang tawh deng hi. A suangin a keel' ki kha bak se ahih manin a keel ki kitan hi.

Keelcing pa zong a pu in a theih ding lau lua ahih manin a keel kiangah, "Inn i tun ciangin i pu kiangah suang tawh kong den lam hong gen kei ta peuh in. Hong thum ngetngut ing boihboih aw. Tu ban lim takin hong kem hong khawi in, na du nono le lono dawngte hong pia in, keel dang khempeuh sangin hong lim bawl zaw ding hi'ng," ci-in thum ngaungau in kamciamna nei hi. A keel in, "A hai keelcingpa aw, na gamtatna thusim na seel nop hangin na gamtatna ka ki mu leh ka i pu in na gamtatna teng teng thei khin ding hilo maw? Kei ka ut thu a gum sunga kia hong sa na hiam?" ci-in dawng hi.

Kumpi David in zi tampi nei napi in a galkap Hit mi Uriah' zi Bethsheba neihsun deih gawh in luppih hi. Bethsheba hong gai ciangin a sim in a gamtatna a seelna dingin gal kidona phual panin Uriah sam kik a, a zi tawh lumkhawm dingin hun a piak hangin Uriah in ka galkap pihte galdo in a om lai-in ken bang hangin ka zi tawh hun nuam zangkhawm ding ka hiam ci-in nolh in, a inn ah ciah kik nuam loin kumpipa huang sungah giak hi. A geelna khempeuh a lawhsap ciangin David in gal kidona madawk ah Uriah koih in gal ten hong neh ciangin na nung kiksan un ci-in a galkap mang Joab thupia in a sihna ding geelna nei hi. A thupiakna bangin Joab in gal madawk ah Uriah koih in, gal ten a nawk ciangin amau nung kik uh ahih manin gal ten Uriah that uh hi.

A gamtatna thusim sel zo a kisak hangin kamsang Nathan in David kiangah, "I gam sungah tuu hau mahmah mi khat in zin nei a, a zinpa gawh dingin tuuno khat bek a nei pa tuu suhsak in gawh hi," ci-in gam a va gen ciangin David in tua mihau ngongtat leh huaihampa kithat taktak ding hi a cih ciangin Nathan in tua pa nang na hi hi ci ci.

A sim in a gamtatna thusim teng hong kipholakkhiat ciangin David kisik kik pah a, Pasian kiangah maisakna ngen hi. Pasian in a mawhna a maisak hangin David inn sungah namsau hong leng a, Absolom kihta in galtai hi. Bethsheba tawh a lupkhawmna panin Bethsheba' naupaai zong Pasian in vatlupsak a, Absolom in sun tang lai-in mi khempeuh muh dingin David' zineute luppih hi.

Thuneihna khempeuh nei ing, gam uk hi'ng, kumpi na sem hi'ng, contactor hing, makai hi'ng hau ka hih manin ka utpeuh ka hih thei a, mi khat va that kha leng a luang man ding nei lua ing, zawl ka gai hangin a liau ding sum nei lel ing ci-in na ut bangbangin na gamtat a, a hoih lo a sim in na bawlnate na seel zawh hangin sawt na seel zo kei ding hi. Mihingte muhna a na seel zawh hangin Pasian mit muhna panin bangmah na seel zo ngei kei ding hi. A man loin na ngongtatna leh thuman loin na gamtatna gah khat vei teitei na lawh kik ni hong tung peelmawh ding hi. I gamtatnasate ki-en pha kik in, i mawhnate kipulak khia in, i Topa kihei kik in thumanna tawh gamta leng i inn sung, i khua leh tui, i gam leh minam hong cidam in thupha i ngah kik thei pan ding hi.

Tai thei tuan kei ni teh na keel luphum hong kilat ni om veve ding hi. A zekai luat ma-in a hun lai-in kipulakkhia zaw in.

🖋️Thang Khan Lian