CHINA GAM-A NOBEL PRIZE NGAH LIU XIAOBO SI TA

CHINA GAM-A NOBEL PRIZE NGAH LIU XIAOBO SI TA

July 13, 2017: Lai a gelh ciangin selna lam pian vive tawh a gelh (literary critics), writer, human activist, democratic reform ding deih leh China gam-a Comminist Party bek om ding deih lo Liu Xiaobo (28 December 1955 – 13 July 2017) tu ni-in a sin-a carcer natna hangin dam zo loin si ta hi. China gamah human rights deih in thagum zang lo (non-violent) in kiphinna a neih manin 2010 Nobel Peace Prize na ngah a, China gammi lak panin Nobel Prize ngah masa leh amah beh a ngah hi lai hi. 1989 in Tiananmen Square ah democracy deih a lungphona nei ten kiphinna a nei lai un galkap ten lungphona neite a lom thah khit nung uh China kumpi gamtatna langpan hong kipan a, political reforms ding deih in a tangkopih manin kumpi leh state power langpang ci-in 23 December 2009 in thusitna kinei in, kum 11 thongkia dingin dan kipia a, a sin ah cancer a nasiat luat manin dam lohna hangin medical parole kici tawh 26 June 2017 in thonginn panin kikhahkhia hi.

Liu pen leitungah thongkia leh matna tuak a kikemcip (detention) lak panin Nobel Prize ngah mi thumte lakah kihel a, Liu pen matna tuakte lakah Nobel Prize ngah a nihna hi a, a masa pen Nazi-te concentration camp a si Germany mi Carl von Ossietzky (1935 kum a ngah) hi a, a thumna pen Burma mi Aung San Suu Kyi (1991 kum a ngah) ahi hi. A sin a cancer a thuaklah luat manin nung kha-in Shenyang khuapi a zato inn ah kikem dingin thonginn panin Liu kikhahkhia hi. Shenyang Bureau of Justice in zan a kipanin Liu in khuaphawk nawn loin, nak nawn lo hi ci-in pulak hi. Liu pen kum 61 mi hi pan a, a sih ma nangawn in China kumpi in democratic reforms a bawlna ding a lupna tung panin kunh ngaungau lai hi.

Liu in Norway gam-a Oslo khuapi ah Nobel prize pawi ah pahtawina a kipiak lai-in thongkia ahih manin ama tutna (chair) ah kuamah tu lo hi. Norwegian Nobel Committee makai Berit Reiss-Andersen in Liu sihna hang pen China kumpi bawlsiatna hang ahih manin hih bangin kum cing lopi in a sihna hangin China kumpi in a sihna ah tavuan lianpi pua hi ci hi. A dam lohna a nasiat luat ma-in kikepna ding zatui kicinna munah kumpi in puak lo ahih manin hih bangin hong sihsan vatna hangin nawngkaihuai (disturbing) kisa mahmah hi ci-in gen beh hi.

China gam-a ruling party Communist Party in Liu' laigelhte pen siatkaih, siat theihna ding lam (subversive) hi ci-in ngaihsutna nei ahih manin li vei tak thong sungah na khum hi. Nobel Prize a ngah in zong thukham palsat leh siat theihna ding vive laigelh hi ci-in zadah mahmah hi. Nung kal ni li ni (Thursday) in leitung gam tuamtuam in Liu' cancer natna gamdang zato inn ah kep dingin ngetna a bawl hang un China in nialsak a, a dam lohna thu kician updates a nget hang un zong bangmah hilh nuam lo hi.

Source: Al Jazeera and news agencies
@Thang Khan Lian #ZUNs