NGAIHSUTNA LEH LUNGSIM PUAKZIA MAN (RIGHT ATTITUDE) A MANPHATNA
"Ngaihsutzia man leh lungsim puak dan man (right attitude) tawh mihing ten mual nangawn khin zo uh hi. Ngaihsutna man lo leh lungsim puakzia man lo tawh sehnel mal neupen nangawn in mihingte deng zan zo hi," ci-in Jim Rohn in na ci hi.
Hih bangin a genna pen mual khat khin zo ding hi teh.. sehnel mal neupen nangawn in hong denglum zo ding hi a cihna hi pah lo a, a thugen a tel gen nopna leh a deihna thuk in a gen (emphasized) nop man hi zaw hi. Mual na va khin sawm pong leh na khin zo ngei kei ding hi. Ahih hangin kumpi pil khat in a kumpi ukna mual tampi keek beh zo in, khin zo a, mipil khat ngaihsutna in leitung mual za tampi zeel zo hi cihna hi zaw hi. Greek mipil Plato in , "Zawhna lianpen leh a thupi pen in ei leh ei kizawhna (self conquered) hi," na ci hi. Nang leh nang na kizawh (conquered) ciang bekin ngaihsutna man na nei thei pan ding hi. Edmund Lee in, "Sunmang a neite (dreamers) leh a gen bek a sik hilo in a semkhiate (doers) tawh kikhawl in, upna kician neite leh thu ngaihsun theite tawh kikhawl in. Tua loin a poimawh pen in na sepkhiatsate nang na muh theih loh hun lai nangawn in na sunga thupitna hong mu theite tawh kikhawl in" na ci hi. Sunmang nei leh a semkhia mite tawh kikholh bek hun lo a, nang hong nawknawk leh hong susute hilo in, na sepkhiatsate na muh loh laitak nangawn na sunga thupitna leh manphatna hong mu thei leh tha hong pia theite kikhawlpih lecin ngaihsutna man na neihte na lecip zo pan ding hi.
Tom khat sung na maitangna ding, na meet pakna ding leh tawm vei sung bek na hamphatpih pakna dingin ngaihsutna man lo, thuman lo, ngaihsutna man lo zang kha kei in. Pasian leh Kha Siangtho min peuh paulap in na meetna ding leh gualtungtuanna dingin zang kha kei in. Pasian leh Kha Siangtho min a man loin paulap leh zat khak val a kihtakhuai om lo a, hong vat ni hong tung peelmawh ding hi. Hong vat pah loh hangin hong vat khak ciangin na thawhzawh loh zah dongin hong vat tuk khak ding kidawm in.
Leitung ah thuman gum ngam in, ngaihsutna man na letcip ngam leh hong mudah, hong el tam mahmah ding a, pawl ding leh kikholpih ding tam na ngah zo kei ding hi. Ahih hangin lungkia pah kei in. Thuman lo a tul a then tawh kipawl a, kikholkhawm sangin nang bekin na ngaihsutna man din'pih ngam lecin hong kimu baih zaw ding a, thuman lo leh ngaihsut man man lo a tul a thente otna sangin kam dam a na pau khiat hiat pen ngaihzaw den ding hi cih mangngilh kei in.
Koimah ciang na tun nop leh kei leh kongzing a mi mihonpite (crowd) mot zuih lel in la, na ngimna leh na tun nopna mun na tun nop leh ngaihsutna man nei mi zong masa in la, a nung va zui pan zaw in. Leitungah mi thuman lo tampi lakah mi thuman zong tampi mah na om veve hi. Mi thuman na muh zawh kei leh thuman hih ding nang hanciam pah lel in. Na thuman zawh loh manin thanem pah in, thuman ding hanciam loin khawlsan ken la, na thuman zawh loh man leh na ngaihsutna man zawh loh manin thuman ding leh ngaihsutna man neihna ding hanciam zaw in. Na hanciam bek tawh hunsak ken la, tai in la, delh in. Na thuman lohna leh ngaihsutna man lote paikhia masa loin thuman ding leh ngaihsutna man neih ding na lunggulh a, na hanciam pah pong khak leh huihpi nung delh pa na bang den ding hi.
Ngaihsutna man neih ding na hanciamna pen zan khat thu in na zo pah kei ding hi. Erin Andrews in, "Lawhcinna i cih pen zan khat thu in hong piang vat hilo hi. Na thaman ding na mit tawh gal et in, mitsuan in la, na nung lam en kei in," a cih phawk in. Nelson Mandela in, "Gualzawhna lianpen i cih pen lawhsap nei lo, tuk ngei lohna hilo a, i tuk sim leh i lawhsap sim in thawh kikna pen gualzawhna lianpen leh vangliatna lianpen kici zaw hi," a cih mangngilh kha kei in. Ngaihsut man leh lungsim puak dan man na neih leh kihtakna ding, dipkuatna ding leh launa ding na nei kei ding a, na ngaihsutna man leh lungsim puak dan manna hangin suaktahna ngah thei in, na mai sun nitaang bang den ding a, mipi maipha na ngah den kei zongin Pasian' maipha na ngah den ding hi.
🖋️Thang Khan Lian
No comments:
Post a Comment