US IN KUM 14 SUNG GAL A DO KHIT NUNGIN GUALLEL DEN NAPI THU PHUAKTAWM IN ''KIGUALZO DEN HI'' CI
Aug. 16, 2016: Nung kalin US Congress report in Central Asia kihelin gam 20 sunga US galkapte galdona a encik Central Command (CENTCOM) ten US in ISte a dona vai ah US guallel den napi thuman tampi report a piak ciangun laih uh hi ci-in gen hi. Aug. 10 in zong US Army Lieutenant General Sean MacFarland in news briefing a neihna US leh a pawl ten a beisa kum nih sungin tung lam panin ISte 14,000 vei kikap ta a, ISte 45,000 val kithat hi ci-in a zuau bulom teng news reporterte kiangah gen hi. (A zuau hi cih a kilatna hong gen pak ning - ISte Iraq leh Syria ah mi bangzah pha ding hiam cih gam tuamtuamte upmawhna hi bang hi: Kurdish ten 2014 in 200,000 kiim, Russia galkap ten 2014 in 70,000 kiim, IS ten 2015 in 100,000 kiim, 2014 in USte' CIA ten 20,000 - 31,000 kiim, 2016 in CIA ten mi 20,000 - 25,000 kiim, 2016 in US ulian ten mi 2016 in 15,000 - 20,000 kiim hi ding hi ci uh hi. CIA leh US ulian ten IS galkap pen 2016 in 15,000 - 25,000 kiim val lo ding hi ci napi US Army Lieutenant General Sean MacFarland in a beisa kum nih sung bekin ISte 45,000 Iraq leh Syria ah kithat hi a cih pen a zuau hi cih kitel mahmah hi). ISte Iraq leh Syria gam pua-ah hih bangin om dingin ki-ummawh hi: Egypt ah 1,000, Libya ah 5,000–10,000 Algeria ah a om zah ding kithei lo, Jordan ah 4,200+ , Turkey ah 3,000, Afghanistan ah 3000+, Yemen ah 1,000, Europe ah 1,000–4,000, West Africa ah 7,000–10,00.
“United States in 2002 in tapongte dona "anti-terror campaigns" kici a kipat a kipanin guallelhna tuak mun mahmah uh a, Pentagon leh a diakin CENTCOM in hih banga a galdo uh a guaksak den ahih manin thuak zo loin thu phuaktawm in kigualzo den hi ci hi," ci-in University of Pittsburgh Professor of International Relations-a sem Michael Brenner in gen hi. US senior general a tamzaw ten US gualzo den hi cih a up hangin USte guallel mun mahmah uh a, minphatna, a nasepna uh a kitawpsak lohna ding uh leh a pensen khit ciangun a maban ding uh geelna hangin thu phuaktawm den uh hi ci-in gen beh hi.
US President Barack Obama leh Democratic presidential candidate Hillary Clinton in zong ISte dona ah US makaih in CENTCOMte report phuahtawm leh laihte um in thukimpih uh a, mipi lak leh politics vai-ah a misiatna dinguh a khualna uh hi bek hi ci-in Michael Brenner in gen hi. US mi pawl khat leh galkap ulian huaiham ten ISte dona leh US galdona thute a sit intelligence analysts kici tungah amau' tunga uliante deihna bangin report a piakna dingin tawholh in, nencip in, nawh den uh hi ci-in gen beh hi. US Army Major pensen Todd E. Pierce in Sputnik newste kiangah US galkapte leh intelligence agencieste tungah nawhna leh nencipna (pressures) sang lua ahih manin a siamna bangun ISte do thei loin a nasepna uh nawngkaisak den hi ci-in gen hi. US ah nekgukna nasia mahmah a, i lamet sangin nasia zaw napi gamdangte nekgukna seel siam sangin US a siam zawk man bek un kilang lo hi ci-in gen beh hi. US gam mite leh makai ten galkap leh intelligence agencies sungah thuman lo leh zuau thu tawh phuahtawm thute report a kipiak lam tel lo uh hi ci-in gen beh lai hi. Tood E. Pierce ni dang lai-a Chinese military strategist Sun Tzu' thugen, "Thu khempeuh neihna a nei gam (sovereign country) khatin amah leh amah a kitheih tel banah a galte zong a theih tel ding hi," a cih zangin US pen sovereign gam khat ahih hangin a gam mite leh makai dinga kiteel ten a gam uh bangci banga gamta hiam cih nangawn thei lo uh hi ci-in gen thuah hi. Todd E. Pierce pen tu-in US Army Judge Advocate General (JAG) Corps. ah sem hi. US Navy Commander Kyle Raines in Laizing (Thursday) in CENTCOM ulian ten CENCOM intelligence final report pen thukan ten uliante deihna bangin laih uh hi cih kikan pha ding hi ci-in Sputnik newste kiangah gen hi. USte pen a pil kim ding peuh i saksak khak leh a hai na tam mahmah uh hi zaw hi.
#US in Syria leh Iraq ah ISte a zawh nai loh uh leh a lelh niloh uh gen tak loh 2001 panin Afghanistan ah Talibante na do uh a, tu dong zo nai loin tu-in Afghanistan ah ISte hong hat dek panpan zawsop lai uh hi.
Source -War on the Rock/Sputnik/Fox News/Wikipedia
No comments:
Post a Comment