ZORAM DAY

                                                                       ZORAM DAY 

1960s hun lai-in India in a gal lianpen Pakistan ahih kei leh China leitang ah bomb khiat ngam lo napi a gam mite teenna Northeast India ah khia hi. Tua khit ciangin Indian government in leitung bup khem a, Air Force jet fighters ten supplies bek khia hi ci-in gen hi.

Pakistan adingin a kihtakhuai (terror), China adingin launa ding a piangsak (threat) a gol leh a thahat Indian Government in March 5, 1966 in a Jet Fighters-te zangin cikmah in China leh Pakistan tungah a hih ngei loh North East state a Mizoram ah a gam mite tungah bomb khiat hi. Indian government in North East ah a bomb khiat pen tua hun adingin gal vanleng a gam sungah zangin a gam mite tungah bomb a khiat masakna hi.

Tua hun in Assam state sunga om Mizo district sungah kum 48 sim a kial tung Mautam (cyclic ecological phenomenon) 1959 kum a kipanin mun tuamtuam ah hong kizeel a, Assam Government in Mautam kial dona dingin a panlakna Mizote lungkim lo uh hi. Tua banah Assam govt. in Mizote dong sese loin official language dingin Assamese pau zat dingin hong bawl manin lungkim lohna leh lungphona hong kuangkhia hi.

Assam state a Mizo district sunga government offices leh security posts tuamtuam a suam khit nungun Mautam kialpi hun in dongtuakte huhna pia-in suahna deih in India government lehdo
Mizo National Front (MNF) ten 1 March 1966 in suahtakna hong tangkopih uh hi.

MNF kiphinna betdaihna dingin Indian government in Feb. 28 panin March 25, 1966 kikal counter-insurgency operation bawl hi. 4th March 1966 nitak lamin Indian Air Forces (IAF) jet fighters squadron honte Aizawl khuapi tungah va lengin bomb va khia uh a, inn tampi a kat banah mi a hunkhop in sihna tuak hi.

6 March in IAF fighter jets ten naikal bang zah hiam sung Dawrpui leh Chhinga veng kiim-ah bomb nasia takin a va khiat kik manin inn a tam zaw a kat banah mi za bang zah hiam in sihna tuak hi.

Local records in a genna IAF ten a gam mite bomb khiat masakna dingin Aizawl khuapi tunglam panin suamna dingin Hunter leh Toofani fighters zang hi ci-in gen hi. IAF ten gal vanleng zangin tunglam panin suamna a bawlna machine guns zang masa a, tua khit ciangin bombs zang uh hi. Gal vanleng zangin a ni nihna dingin IAF ten naikal nga kiim sung kap uh hi kici hi. IAF jet fighters-te pen Assam state sunga Tezpur a IAF air base panin hong kuan uh a, Aizawl khuapi banah Mizoram leilu-nisuahna lam-a om Tualbung leh Hnahlan khuate zong tunglam panin kap in bomb kikhiat hi.

IAF ten bomb khiat a khawlsan khit nungin Mizo district sunga khuatate leh neihsa vante (properties) ban halsak uh a, Mizote tul tampi kikepna mun concentration camps ah galtai in bu uh hi.

1) Hih bangin IAF galkapte ngongtat khit nungin a lamdang mahmah thu pen Indian government in official report a bawlna ah thakhat thu-in tunglam panin suamna (air raid) a kibawlna ah sihna leh liamna tuak kuamah om lo hi ci-in a gen banah Indian Air Force official website ah hih thu bangmah kituangsak lo hi.

Tua hun in Mizote sungah sitni (lawyers) leh human rights activists om lo a, Mizo district sung Armed Forces Special Powers Act, 1958 leh Assam Disturbed Areas Act, 1955 zangin galkap ten utpeuh mat theihna leh utna mun peuh buluh theihna dingin special armed forces power zangin uk khum hi. Tua banah thukizaktuahna (communication) dingin Telephone, Television leh Internet cihte mite ngaihsutna ah om kha nai lo hi.

2) March 9, 1966 in tua hun in Indian PM Indira Gandhi in Mizo district sunga thupiang tawh kisai foreign correspondent dotna a dawnna ah, "IAF galkapte mi leh huhna khia dinga kizang hi (deployed to drop men and supplies) hi,” a zuau genna dinpih in lenkip cinten hi.

Indira Gandhi' kianga dotna bawl foreign correspondent khatin Aizawl khuapi-a a bomb kikhia themte New Delhi ah khak a, Prime Minister Gandhi' kiangah, "Hih huhna (ration) tawh an bangci huan ding hiam? Hihte supplies ahih mawk leh hehpihna tawh hihte na bangci huan hiam cih hong hilh in," ci-in dot ding hi ci-in gen hi.

A gam mite a kisuamna dingin IAF galkapte kizatna vai tawh kisai MLA Hynniewta in khauh takin a mawhpaihna thu pulak a, IAF ten Aizawl khuapi suamna dingin bomb zang uh hi cih thuman tawh lahna dingin bomb puakkham lo maan kizaih khat leh bomb puakkham themte pawl khat lahna a neih hangin Government of India in khauh takin nial ngam veve zaw lai hi. Bang hangin Indian government in a gam mite suamna dingin IAF galkapte galkap hatna a khengval in zang a, gamnuaimi ngongtat mahmah Maoist leh Naxalites-te hatna mun kiimte ah bang hangin Armed Forces Special Powers Act (AFSPA) zang lo hiam cih tu dong a lungkim huai ding dawnna pia thei nai lo hi.

Indian Government in 25 March 1966 in MNF galkapte panmun khempeuh umcihsak in laksak uh a, tua khit kum zah hiam MNF kiphinna betdaihna dingin counter-insurgency operations bawl zom hi. 1986 in peace talks taktak hong piang thei hi.

MNF makai Laldenga in 15 Feb. 1985 in Indian Prime Minister Rajiv Gandhi kimuhpih a, GoI leh MNF in kihona dinga thu bullut dingte thukimna nei-in Mizoram Peace Accord (the official document entitled Mizoram Accord, 1986, Memorandum of Settlement) kici Mizo National Front leh Union Government of India in thukimna suai 30 June 1986 in kai uh hi. Thukimna suaikaite lakah MNF lam panin Pu Laldenga, GoI lam panin Union Home Secretary R.D. Pradhan leh Chief Secretary of Mizoram Lalkhama kihel uh a, February 20, 1987 nai 4:30 am IST in Mizoram federal state of India khat suak hi.

Mizo ten a deih uh ngahna dingin lungpho lahna, kiphinna leh lehdona zangin India government na do ngam uh a haksatna lianpi a tuah ngam khitun a nget uh ngah theihna ding lampi kihong ta hi cih a telcian khit ciang bek un Indian government tawh political talks leh peace talks neih na kipan pan uh hi. A movement kalsuanna uh leh a political demands uh ngah theihna dingin kihona neih hun ding ding a tel manun a deih uh leh hamphatna ngah dingun kilawm na ngah uh hi. En i movement koi ciang a tun khit nung leh bang tan i lehdo khit nungin government in i ngetna hong thusim theihna dingin political talks i pan hiam???

Source: Exposing India; Wikipedia
@ Thang Khan Lian #ZUNs