FACEBOOK AH NA LAWMTE MIZIA NAM TUAMTUAM

FACEBOOK AH NA LAWMTE MIZIA NAM TUAMTUAM

Na fb friends sung panin na FB friends-te mizia nam tuamtuam om hi.

1. HUMPINELKAI BANGIN HONG ENCIK DEN
Na fb status na update leh na thu postte like leh comments hong pia ngei lo napi ama lungsim tawh kituak lo leh kituak a sak omte na ciamteh cinten in na kimuh khak uh ciangin mipi lakah hong genkhia bak ding uh hi.

2. NGIA A BANG DEN
Na fb status leh thu postte comment pia lo napi LOL, OMG, WHF, LMAO, Great, Fake News, cih teng peuh hong gen ding uh hi.

3. "Mr/Ms POPULAR (FB AH MINTHANG)"
A thu leh la, a hang bang mah om lopi-in lawm 4000+ val nei uh hi.

4."GAMER"
Fb lawm teng tawh Candy Crush peuh ki-invite tuah, a point muh zaw peuh uh kisialpih in, Mafia War leh gam nam tuamtuam sun nitum in kimawl thapai uh hi.

5. KAMSANG ("Prophet")
Thu leh la khat peuh post leh Pasian leh Jesuh min loin, LST thu vive post uh a, message mi tua zah tua zah tungah na khak sawn leh thupha na ngah ding a, na khak kei leh thupha na ngah kei ding hi peuh hong ci zanzan uh hi.

6. GUTA ("Thief")
Na fb status update leh thu post peuh nang credit (min tuangsak lo) in na copy paste ziau (gu sawn) in amau gelh bangin na post ding uh hi. Hih zong na post zaw lai ding uh hi.

7. A KINEU NGAIHSUT LEH A KSUNGSIAT ("Cynic")
Amau nuntakna nangawn cimtak in, na khempeuh a hoih lo lam vive in ngaihsun in, a thu post leh status update khempeuh uh a dahna thu uh, a lungkim lohna uh khasiatna thu vive post uh hi.

8. SIAHDONGTE ("Collectors")
Thu leh la bangmah post ngei vet lopi group khempeuh ah kihel kawikawi uh a, thu gina lo leh thu mawkmawk teng pakta in deih uh (random stuff fans) hi.

9. THUKHAM HILH SIATE (SADDUCEES)
Kha sum kipia beek hilo napi thu leh la na post khempeuh leh na fb status update nangawn, "Tua ci lua, hi ci lua teh, tua bang postte pawl hong kidam zaw deuh ta in," ci-in hong tai bawl den in, hong hilh khop den uh hi.

10. A LAAMTO PAWLTE ("Promoter")
Na delete khop den ding leh na lunglut vet loh thu teng leh group teng peuh ah kihel dingin cialna (invitation) hong bawl den ding uh a, nolh den in, na delete thapai den ding hi. Dahpa lo kho hong suaksak den uh hi.

11. A DEIH A PANG PAWL( "Liker")
Comments bangmah hong pia ngei lo napi un na thu post khempeuh leh na status update khempeuh sim mel lopi-in 'Like" button sim na mekmek ding uh hi. Sum om ta ci-a a tuah teng susu dente ahi uh hi.

12. MUDAH HAU PAWL ("Hater")
Na status update leh thu post khempeuh na lehlak den in, hong nialna ding bekbek na leitang zon den keei uh a, mi dang ten hong mudah hi, hong el hi peuh ci-in numei thusia bangin hong hek daidai den ding uh a, na minsiatna ding thu phuaktawm in kamtai na bang kawikawi ding uh hi.

13. ZAN TAT PAWL:
Zan kim zan khang khit ciang hong kipan in, hong tag themthum ding uh a, nang tawh kisai lopi leh nang lungsim tawh kituak lo thu teng peuh na post in zinsang na thawh ciangin na muh ding breakfast hong taih den ding uh hi.

14. GULHIK CILGEH ("Anti-Proofreader")
Amau a khial ngei lo bang keek in na lai post khempeuh laimal na gelhkhialh (typing error) bekbek sa tangpangpa bangin na ngak den ding uh a, "Tua mun, hih mun khial teh, khial mun tei sam ciai lawm, a ni leh kum nangawn dik lo, kituak lo hilo maw?" hong ci thapai den den ding uh hi.

15. DRAMA KUMPINU/KUMPIPA ("Drama Queen/King")
Hih bang mi ten kuamah lah thu hilh lo, i telcian theih dingin lah thu leh la post ngei lo napi a post khempeuh uh bel, "Vaisah sam e... Lungkhamhuai tak e... Dah si'ng.... Um zo kei si'ng.... Na tak ei kibawl dante bel.... Um zo kei si'ng..." cih teng thu gual khat bek post ding uh a, a thu telcian nuam in hong hilh ding uh lametna tawh na dot hangin hong hilh nuam vet lo se uh hi.

16. GUA KIHAL BANG PAWL ("Womp Womp")
Hih dante pawl pen thu leh la, maan leh status post mun mahmah in nisim in post den, laih den uh thapai uh hi. Ciamuih thu leh a nuihzak thei ding post den napi un lah a nuihzakhuai ding bangmah om lo hi. A status update uh leh a thu postte uh zong a gina om ngei beek lo hi.

17. THUTHAK PUAK PAWL (The "News" men/women)
Hih dante pawl in na sep/hih teng leh amau hih leh a tuah teng uh post dinga kilawm maw, kilawm lo cih zong khen se loin a lawp bang leh a lungsim uh-a thu om teng hong post khia den ding uh hi.

18. AKLUITAL ("Rooster")
Hih dante pawl in zingsang sim in Facebook ah "Zingpha" ("Good
Morning") nisim in cih ding a mawhpuakna tavuan uh sa-in Zingpha cih nisim in post den ding uh hi.

19. KUTDAWH A BANG PAWL
Hih dante pawl in a fb friends ten like leh comments a piak ding uh lametna tawh a maan uh post den keei uh a, "Hoih kei ta leng zong post pong zel dih ni.... Post khemkhem zel ni..." cih peh caption dingin zang se uh a, a group kihelna uh leh a Fb Page Like-te na kihelna dingin hong cial thapai den ding uh a, cialpi bawl bang den uh hi.

20. TUALTHAT KUMPINU (Slay Queens)
Hih bangte numeite pawl in ni khat in a maan uh khatvei post khin napi un, a maan post sa uh edit kik in post pha kik uh a, a Fb Profile Picture laih themthum den uh hi.

21. UBB PAWL
Hi dante pawl in a lawp bangbang un biakna thu, amau thu, minam thu tawh kisai, maan leh la adng dng a ut bangbang uh post ziahziah den lel uh hi.

Hih nam 20 sung panin na kihel kha peelmawh ding hi. Nang a ko dante pawl? Zuau gen kul se lo hi. 😝

🖋️Thang Khan Lian

EXPERTS IN HIROSHIMA, NAGASAKI KHUAPITE ATOMIC BOMB KIKHIAT A KUM 73 CIN'NI A UP UPTHEIH DINGA THU KIPHUAKTAWM TANGTHU NIAL

EXPERTS IN HIROSHIMA, NAGASAKI KHUAPITE ATOMIC BOMB KIKHIAT A KUM 73 CIN'NI A UP UPTHEIH DINGA THU KIPHUAKTAWM TANGTHU NIAL

Aug. 9: Hiroshima leh Nagasaki khuapi-ah mihingte tangthu adingin atomic bomb kikhiat a kum 73 cin' kum in misiam (experts) ten hih uptheih dinga kiphuaktawm tangthu zuau (myth) nial uh hi. A beisa khitsa ni nih in US Air Force ten Japan gam-a Hiroshima ah atomic bomb kikhiat a kum 73 cin'na phawkna kinei a, Nagasaki ah atomic bomb kikhiat a kum 73 cin'na phawkna pawi tu ni-in kinei ding hi.

August 6, 1945 in US B-29 bomber Enola Gay in 20-kiloton atomic bomb a gik "Little Boy" kici Hiroshima khuapi-ah a khiat manin mi 140,000 in in sihna tuak hi. Tua khit nung August 9, 1945 in US bomber dang khat in 21-kiloton atomic bomb a gik "Fat Man" kici Nagasaki ah a khiat manin mi 70,000 a sih banah mi tul tampi in liamna tuak uh hi. A bomb in a ngimna mun lian (original target) khuahun siat manin deng kha lo hi kei leh sihna leh liamna tuak tamzaw ding hi kici hi.

​Organization Beyond Nuclear a Radioactive Waste Specialist
sem Kevin Kamps in Radio Sputnik's Loud & Clear kiangah zan in hih kum 73 atomic bomb kikhat cin'na thupiang poimawhte genna nei hi.

"Mi 36,000 teenna Hiroshima khuapi-ah atomic bomb kikhiat manin mi 140,000 si leh tul tampi in liam cih pen ngaihsut dingin uang lua in lamdang (mind-boggling) hi. Nagasaki khuapi-ah atomic bomb kikhiat dingin meii in a ngimna dal-in mi 70,000 in sihna tuak hi. Atomic age hun ah hih bang pulakkhiat bang hi deihna hiam?" ci-in cih Sputnik's Loud & Clear hosts John Kiriakou leh Brian Becker' kiangah Kamps in ci hi.

"Bomb a khiat khit un American mite in gal bei ta hi ci-in Nagasaki ah bomb a kikhiat khit inungin lungnopna leh lungsim noptuamna tawh kidim uh hi. Ahih hangin a laibu gelh 'By The Bomb's Early Light' ah Paul Boyer in a lungnopna uh pen launa in kilaih a, American mite in midang khat tungah hih bangin i gamtat theih leh ei zong kua hiam khat i gamtat bangin ei tungah hong gamtang ding uh hi cih hong phawkkhia uh hi. A launa bangun kum li khit nungin Russia ten tua bang bomb hong nei takpi uh hi," ci hi.

Kamps in a genna ah bomb kikhiat ma-in Japan leitang American ten a suam masak kha bek un American galkap sihna tuak pen 50,000 kiim dingin kituat a, galkap 1 million si lo hi ci hi. "Americans mi million nungtakna pen Japan ah atomic bomb nih kikhiat man kihumbit hi cih tangthu phuahtawm (myth) piang pen man lo hi. American ten Japan panin Soviet Union a kihepkhiatna ding a deih manun bomb a khiat uh cih pen thuman hi zaw hi. 1945 in atomic project ah atomic bawlna ding billions dollars kibeisak a, lim takin sinna panin theihtelna (experiment) dingin a bomb a kikhia zong hi a, investment a kici a sum kizangte ngahkikna ding hi. Tua billions dollars atomic project a kizangte gal dona teembawte, tanks, leh thau adingin atomic bombs ding sangin US military in zang zaw leh Galpi Nihna bei baih zaw ding hi," ci hi.

Thudang tangthu kiphuaktawmna ah atomic bombs hangin Galpi Nihna bei hi cih pen zuau hi ci-in Kamps in ci hi. "Hih uptheih ding tangthu kiphuaktawm pen dik lo hi. Soviet military ten a gal simna leh gam simna (invasion) uh launa leh kihtakna a pian'sakna (threats) hangin Galpi Nihna bei hi zaw hi. Atomic bombs US in a khiat ma-in US ten Japante firebomb kha bang zah sung hiam na khiat khumzo uh hi. Hih thu hangin atomic bombs kikhiat manin America ten khuapi tampi hunkhia uh hi theory hong piangkhia tawm a, Americans ten atomic bomb a kikhiat manin a khuanungin a pian'sak (effects) a kim in mu nuam uh hi. Tua dingin Hiroshima ah atomic khiat dingin na kembit uh hi," ci hi.

Kamps in "A kigenna tawh kituak lo a lamdang thu pen Nagasaki khuapi in Japan gam ading Khristian khuapi masa hi a, Nagasaki ah Khristian ten mission a neihna uh sawtpi pen hi ta hi. Nagasaki a biakinn (cathedral) zong om hi. A bomb khia boxcar plane leh a hawlte leh nasemte (crew) leh a bomb khiat ma un Khistian siampi (priest) in thupha pia hi zen lai hi," ci hi.

Monday in atomic bomb kikhiat a kum 73na phawkna pawi hun pen Hiroshima Peace Memorial Park ah kinei a, tua hun-ah Japanese Prime Minister Shinzo Abe in thugenna nei a, atomic bomb khiat tuak kha khin ei gam bek ah manin leitung bup-ah nuclear galvante khiamna dingin kitaangko ding hi ci hi. "I gam in non-nuclear weapons principles i letkip lai takin nuclear states leh non-nuclear states kikap ah kizopna a pian' theihna dingin thuakzawhna tawh na kisem ding a, international community in a nuclear weapons a khiamna dingin a hanciamna ah kimakaih ding hi," ci-in Abe in gen hi.

Hiroshima mayoy Kazumi Matsui in nuclear states ten a beisa hun-a hih khialna a bawl khitsa bangin a gamtat kik lohna dingin zasak a, leitung gam khempeuh UN Treaty on the Prohibition of Nuclear Weapons kipawlna ah a kihelna dingun ngetna Hiroshima Peace Memorial Park ah nei hi.

Atomic bomb kikhiat lai takin a suaktate zong a khuanung in peng tuam lo uh a, radiation hangin mi 200,000 kiimte in a nuntak hun sungin radiation hanga natna piangsak natna tuamtuamte ngah uh ahih manin mi million kimkhat bang radiation hangin a khuanung in sihlawh veve uh hi ci-in kituat hi ci-in Monday in Sputnik report in gen hi.

Source: Sputnik
@Thang Khan Lian #ZUNs