NGIAN LEH KHUAK ZAT KIDEMNA
Ni khat hankuang bawlpa (coffin maker) in a hankuang bawlte lak-a khat khual gam-a a order mite kiangah pia dingin a mawtaw tawh hong kuan hi. Hong paina ah zankim lai takin lampi kal ah a mawtaw kisia dihdih laizang hi. A hankuang bawlte a order-te' deih hun bangin piak lianlian ding leh nekzonna a maban ding a khualna tawh a zekai ding ut lo ahih manin a luzaang ah a hankuang pua-in a tun nopna a ngimna mun manawh in a khe tawh hong pai hi.
Lam kal ah palik (police) pawl khat ten a luzaang ah hankuang a puak a muh ciangun hankuang bawlpa tung panin zawhthawh thu tawh baihlam takin sum (golhguk sum) ngah theihna ding lampi na ngaihsun uh a, "Bang pua kineih valval a, koi lai zuat sawm na hi hiam?" ci-in na dong in, aw khauh tawh na vau lela uh hi.
Hankuang bawlpa in dam takin,
"Hong kivuina mun ah than a tam tawh, a uih tawh, a vot tawh cimtakhuai sa lua mahmah ta ka hih manin ka hankhuk a laih sawm pak hi bek ing," cihsan hithiat hi.
Palik ten golhguk sum aana tawh a nget theihna dingun paulap zonna dan thei zo nawn lo uh ahih manun ciihna ding thei lo luvai in tuk uh hi.
#Moral: Palik sumduh khengval lua ten ngian (trick) tuamtuam leh paulap tuamtuam tawh golhguk sum na piakna dingin hong vau lau uh a, hong liau sak sawm teitei ciangun na suahtak nop leh sumbuk ah zat loh khuak (virgin brain) a zuak sawm na hih kei buang leh na khuak zang in. I khuak pen sazuk in kimanna ding nei loin a luzaang ah a ki (horn) a puak balbal kawikawi bang bekin i luzaang ah mot puakpuak ding hilo a, a kisapna bangin zat dinga Pasian' hong bawlsak ahi hi.
"Tua ahih ciangin hoih lua kei in la, lah sia lua kei in. Bang hangin nang kisiasak tawm ding na hi hiam?... Khuapi a uk mihing sawm sangin pilna in mi khat hatsak zaw hi." (Thuhilhna 7:16,19)
@ Thang Khan Lian #ZUNs
