MAJORITY VS MINORITY

MAJORITY VS MINORITY

Guahzuk hun ciangin hawkguam a luang henhan tuinin pen hat mahmah in, a gin ngaih mahmah henhan hi. Tam mahmah napi-in nin lua ahih manin a kizatna ding leh kimanna ding om lo a, dawn ding nangawn in kizang thei lo hi. A dawn khasunte nangawn in sungpai natna leh natna nam tuamtuam ngah lawh thei lai uh hi. A gin ngaih mahmah, a tam mahmah leh a hat mahmah hawktui pen tuuk hun bekin muh theih a, khaici leh tampi nawksia in mihing nangawn sihna ding piangsak thei hi.

Zo dawn a om luita neu pen cihtham het lo a, neu mahmah in damdam in luangin a malmal in tak keukeuh napi lim mahmah a, khualzin mite, lo nasem dangtak mite adingin man nei lo nuntakna tuisik tawh kibang liang hi.

A tam mahmah tuipi pen tang het loin dai khikhe napi thuk (deep) mahmah a, tuipi a teng nuntakna nei nam tuamtuamte adingin teenna mun muanhuai suak thei hi. Tuipi pen ama thu-in thakhat thu a piang vat hilo a, tuita/luita tampi hong kigawmkhawm ciangin tui lian leh tuipi piangsak thei bek hi.

I majority hihna leh i minority hihna zat dan i siamna ding hanciam tek ni.

✍️Thang Khan Lian