𝐓𝐄𝐑𝐑𝐎𝐑𝐈𝐒𝐓 𝐏𝐈𝐀𝐍'𝐍𝐀 𝐍𝐔 𝐇𝐈 𝐍𝐀𝐏𝐈-𝐈𝐍 𝐏𝐀𝐔𝐁𝐀𝐀𝐍'𝐍𝐀 𝐍𝐄𝐈 𝐋𝐎 𝐙𝐀𝐇𝐈𝐍 𝐀 𝐊𝐈𝐆𝐄𝐍 𝐆𝐀𝐌𝐓𝐄' 𝐓𝐇𝐔𝐏𝐇𝐀 𝐇𝐀𝐍𝐆𝐈𝐍 𝐔𝐊𝐑𝐀𝐈𝐍𝐄 𝐆𝐀𝐋
Russia in nuke (nuclear weapons) a zat teiteina dingun "mother of terrorism" US regime leh a ut bangbangin a pei gawp leh khemzawh gamte - American satellite or vassal states te'n tang nawh den uh bang zaw pian hi. Bang hang hiam cih leh, Ukraine War kipat zawh meikuang lakah thautui buak (adding fuel to the fire) beh uh a, peace talks or dialogues or negotiations ding limlim a hanciam leh panla om lo uh hi. Ukraine leitang leh gam sung a galvan luite uh a zuakna market thak leh a galvan thak pawl khatte uh test khiatna dingin zatna phualpi suaksak uh hi.
A gal kipat cilin NATO members 30 lakah gam 28 in Ukraine galvan supplied napi-in zo zo tuan lo uh hi. Nung kha-in Brussels ah gam 50 in air defence system kihelin art-of-state weapons supply dingin kamciam uh hi. US in amau NATO memberpih Turkey tung, a kihotheihpih mahmah veve India tungah galmuang hun nangawnin S-400 air defense system a zuak sih zakdakin Countering America's Adversaries Through Sanctions Act (CAATSA) a cih Russia, Iran leh North Korea galvan a leisak peuhmah sanctions koih khumna dingin a thukhun tawh vau denin, US interests bek tawh kituakin a foreign policy decisions a lakna dingun sal bangin kaih sawm hi.
US in leitung bup colonialism, imperialism hun lai bangin US colonial leh imperial state suahsak ding sawn den a, a do ngam lohte leh amau national interest sangin US interests a masa sak ding a nolh ngam masasa economic sanctions koih khum a, trade war tawh zawngkhalsak sawm hi. A kihtak loh gamte bel Russia in Ukraine a sim bangin a ut bangbangin gam khat khit khat - Latin American panin Europe panin Asia ah ban sim uh a, Galpi Nihna khit bekin amau piansak gal leh a bomb khiatna leh US military ngongtatna hangin 20-30 million sihna piangsak khin uh a, democratically elected governments 50 val a "regime change" policy uh zangin lawnthal khin zo uh hi. US in global democracy tangkopih hi, cih niloh pen naupang melmawl kikhemna hi. US tawh teh dingin Min Aung Hlaing cihte pawl a migi lua, a ngongtatna gen tham nai lo hi.
October 15, 2022 in NATO' headquarter Brussels ah US Secretary of Defense Lloyd J. Austin III' chairmanship nuai-ah Ukraine Defense Contact Group kicite in 3rd Meeting a neih hunin gam 50 panin a gam taangmite (representatives) paikhawm ngeingai uh a, kipumkhatin Russia do khawmin galvan kihtakhuai zaw sem leh tam zaw sem Ukraine tungah piak beh dingin kamciam uh hi.
Western media leh makaite in leitung buppi a bumhai sawmin Russia bek Ukraine gam a sim "illegal invader" ci-in beelmang vom nuh a sawm hangun gam 50 val kipawlin Russia a do khawm ngekngek hi zaw uh a, NATO kiphuankhiat April 4, 1949 panin tu dong a zo zo nai lo hi bek uh hi. Thuman tua hi a, Ukraine War pen gam tampi a kigolhna kidona "proxy war" suaksak uh hi. US in hih gal pian'na ding a geelna 1991 khit nung pek hi ta a, 2014 in na tangtunsak zo dektakin Feb. 24, 2022 in hong tangtungsak zo uh hi.
Ukraine ah tua bangin air defense missiles a supplies uh pen Cold war hun lai-in US leh Soviet in arms pacts or nuclear treaty a neihsa teng uh a vekpi-in palsatna hi. Tua hi napi-in amau uk zawh media zangin US makaih NATO in Russia in nuclear galvan zat dingin vauna bawlin leitung bup dipkuasak hi, ci-in tang ngawh den uh hi. Thukan tel lo leh thuman thei lo tengin um uh hi. A taktakin hih thu zuau bulomtang hi, nuclear gal a pat sawm den pen NATO na hi zaw hi. Bang hang hiam cih leh kum simin NATO nuclear deterrence military exercise kici nuclear galvan dalna dingin galdo kisinna a cih uh-ah nuclear capabilities military equipment vive a zang masa gam hi uh a, Russia phinna dingin Europe gam nitumna Russia gamgi tawh kinai theithei ah galdo va kisin thapai uh hi.
Ukraine War nasiat hun leh nuclear war pian' ding a lauhuai hunin hih bangin Russia hehna leh phin masakna galdo kisinna a neih uh a nasia zaw semin October 17 panin NATO nuclear deterrence military exercise a pat uh tu-in nei zom lai uh a, October 30, 2022 in khawlsan pan ding uh hi. Tu kum NATO nuclear deterrence military exercise hunah nuclear-capabilities aircrafts kihelin gal vanleng 60 kiim zang uh a, surveillance, tanker, leh fighter aircraft zangin gam 14 tak kihel uh hi.
Hih hunah nuclear-capable fourth-generation jets, fifth-generation fighter jets, surveillance aircraft leh tanker aircraft cihte banah kum sim NATO nuclear deterrence military exercise ah tu kumin a kihel masak sak uh US Air Force’s (USAF) B-52 Stratofortress bomber aircraft zong kihel hi. NATO gamte in nuclear galvan zangin galdo kisinna kum simin a neih den uh tu kum in Belgium in zindo hi. Belgium i cih Ukraine panin nai 25 hr (2,247.8 km) bek vanleng lampi hi.
USte bangin Russiate thusia, leiko leh gilo nuam masa hi zen le-uh nuclear gal piang khin zo ding hi. Bang hang? US regime in Soviet ally Cuba va simin ni li sung kidona ah a maizumhuai leh mindaihuai guallelhna BAY OF PIGS INVASION (April 17-20, 1961) ah na tuak hi. Gam neu mahmah leh revolutionary government thak maizumhuai takin a lelh khit a gitloh gamtatna uh khawlsan tuan loin Cuba ah anti-US regime Fidel Castro in a lotthal Cuban military dictatorship leh Cuban President lui Fulgencio Batista thuneihna tokhomn tungah tutsak kik sawm veve hi.
US regime in Cuba ah ruling government Fidel Castrol thah ding ahih kei leh a tutna panin lotkhiat ding ngimna tawh 1953 in Cuban Revolution hunin a junta dictatorship thuneihna panin a kilawnkhia Cuban military dictatorship leh Cuban President lui US-backed Fulgencio Batista thuneihna tutna tutsak sawm veve in Cuban politics ah US "regime change" foreign policy zat ding a thuk zaw semin hong hanciam zom toto hi.
Hih thu hangin Fidel Castro leh a government humbitna ding leh Cuban politics ah US in a "regime change" policy a khawlsanna ding ngimna tawh Soviet Union (tu-in Russia) in Cuba gamah US gam sunga state 48te "contiguous state of US" a kap ban kha ding zong ahih loh hangin US kipawlpihte (allies) leh US state of Alaska bek a kap ban ding medium and intermediate-range ballistic missiles (MRBMs and IRBMs) kicite May 1962 in hong koih hi. Tua hunin US in Soviet Union tawh kidona piang vat leh ci-in Italy leh Turkey gamte ah nuclear missiles na koih khin zo hi.
Soviet Union in Cuba gamah US gam Alaska state bek a kap ban zo ding leh mun gamla lua a kap ban zo lo medium and intermediate-range ballistic missiles (MRBMs and IRBMs) a koih ciangin Soviet muitumna dingin Tukey leh Italy gamah nuclear missiles koihin paubaanna a nei kiuhkeuh lo mi hoih a kineihkhem (hypocrisy) US regime in sih zakdahin zakdah leh patauh hong thuah pah hi.
Gam nihte kikal-ah kitelsiam lohna hong nasiat beh semsem ciangin nuclear galvan zangin kidona leitung tangthu ah a piangsak Cuban Missile Crisis a kici 16–29 October 1962 (Naval quarantine of Cuba ended on 20 November) kikal sung ni 15 leitung buppi nuclear war kihtakna hangin linglawngsak gawp hi. Tu hun dongin nuclear galvan lauhuaina kigen ciangin Galpi Nihna hunin US in Hiroshima leh Nagasaki, Japan ah atom bomb a khiatna thu leh Cuban Missile Crisis hunin nuclear war a pian' dektak thu gen belin kineinei lai hi.
US in leitung bup muhna a foreign policy uh guallel zaw leh ut lopipi-in kiniamkhiat suk (humbled) ahih lam a kiphollakkhiat ding a maizum seelna in Turkey leh Italy gamte ah American nuclear missiles a koihte mi ding lohin a simthamin hemkhia (not publicized removal) uh a, Soviet in leitung buppi theih dingin Cuba panin Soviet medium and intermediate-range ballistic missiles (MRBMs and IRBMs) a koihte lakhia (publicized removal) hi.
US in Soviet tungah, ka hehna dingun hong kiphin masak kei buang leh cikmah hunin Cuba ka sim ngei nawn kei ding (would never invade Cuba without direct provocation) uh hi, ci-in kamciamna leh thukimna nei hi. Tua banah gam nihte a tawntungin a kiho den theihna dingun "NUCLEAR HOTLINE" a kici hong bawl theih uh ciangin Cuban Missile Crisis buaina hong veng thei hi. A thukimnate i et ciangin US interests in deekna leh lemlawhsakpihna (compromised) tam zaw suplawh ahih manin guallelhna mah suak hi.
US in Cold War hunin US interests ultungsakna dingin a foreign policy zat Soviet President Mikhail Gorbachev hunin tangtungin, 1991 kum in Soviet gam 15 in a kitapkhapin hong gualzo leh lawhcing hi. Tu dongin Russian nationalists te'n Gobachev pen US tungah Soviet gam a zuak gam lehpeipa (traitor) hi, ci-in ciamteh den uh hi. Soviet Union gam 15 in a kitapkhap khit nungin Russian President Vladimir Putin in Russia gam a tukna panin hong phawng kik hi. Nitumna gamte a linglawngsak den gam a suahsak banah a kihtak mipa uh suak ahih manin US leh a kaih za tam gamte in ling bangin a do den Putin pen dawi gilo zahin leitungin a muh theihna dingin meihal biakna dingin zang nuam den uh hi.
Ukraine buaina pen 1991 in gam 15 in a kitamkham sung panin a thahat pen Russia gam Soviet Union bangin balkhap behna ding, US leh nitumna gamte khut nuai leh khe nuai-ah tuatcil den ding cih US in a foreign policy lian pente lakah "US hegemony & dominion" kici a masa in koih hi. Tua policy paipihin US leh nitumna gamte tawholhna tawh lungphona lianpi tak Ukraine gamah November 2013 in hong piang a, Euromaidan revolution or movement kici hi.
US leh nitumna gamte in Euromaidan hong phungvuh uh a, funding a piak ban uh-ah Ukraine nisuahna lamah war crimes, genocide a piangsak leh human rights nasia takin palsat uh hi, cih ngawhna a tuak Russia kampau tamna regions sungah 2014 panin tu ni dong nautang 40,000 sihna a piangsak Nazi militia Anzov Battalion or Regiment kicite CIA in a simthamin training leh galvan pia uh hi. (tu-in Ukraine government in Nazi group Anzov-te a regular army sungah a khum lut hangin autonomous or independent group in gamtang uh a, Russia galkapte war crimes gamtatna hi, cih ngawhnate a tam zaw amau gamtatna hi zaw hi, kici hi)
US makaih nitumna gamte Ukraine politics ah a thuk zaw semsemin hong kigolh khit nung uh Euromaidan nungzuihin January leh February 2015 in lungphona nasia takin piang kik a, ngongtatna, sisan naisan luanna kizeel kawikawi a, kumpi neihsate buluhin kihal kawikawi hi. February 13-14, 2015 in "Revolution of Dignity" kici hong piang hi. Hih hunin Ukraine capital Kyiv khuapi-a lungphona neite leh Berkut special riot police kinawktuahna ah lungphona neite 108 a sih banah police 13 si uh hi.
Revolution of Dignity hunin a kithatte leh government buildings halna ah Nazi pawl Anzov Battalion members kigolh kawikawi uh cih documentary teci leh footage tawh lah ding tampi om hi. Hih revolution hunin ukna buluhin zawhthawh thu tawh European Union leh NATO member in lut loin independent foreign policy nei-in kalsuan ding a deih Moscow-backed President Viktor Yanukovych a presidential office panin kilawnkhia a, 2004 amendments to the Constitution of Ukraine kizang kik hi.
Euromaidan leh Revolution of Dignity hunin a laithuak leh Ukraine nisuahna lam Russia kampau tamna regions sunga tenga tungah war crimes, genocide leh human rights palsatin a phengtat Anzov Regiment-te a thuaklah leh suahtakna deihin Ukraine government a lehdo Luhanks leh Donetsk regions ah rebels Revolution of Dignity a pian' khit nungin Donetsk People's Republic (DPR) leh Luhansk People's Republic (LPR) leh Republic of Crimea (including Sevastopol) in suahtakna gam a neihna uh hong tangkokhia uh hi.
Crimea Peninsula sunga tengte in Russia beelin kigawmkikna (unified) dingin mipi a tam zawte deihna la-in vote khiatna tawh khensatna (referendum) March 16, 2014 in hong nei uh a, A Crimea status referendum ah Autonomous Republic of Crimea leh local government of Sevastopol cihte mipi a tam zawte in thukim uh hi. March 16 in Crimea status referendum hunin Autonomous Republic of Crimea ah vote khia 83% sung panin Russia tawh pumkhat suahkik ding a deih 97%, local government of Sevastopol sungah vote khia 89% sung panin 97% in Russia tawh pumkhat suah dingin a kipsakna vote khia uh hi.
Ukraine government in Crimea status of referendum vai mipi a tam zaw 97% deihna bangin amau deih bangin ki-ukna (self-determination) right zangin Russia tawh pumkhat suah ding a teelna uh military hatna zangin betdaih sawmin Donbass region sungah 2014 panin "military operations" hong pan uh hi.
Russia in Ukraine govt. in Crimea status on referendum zahtaksak loin military thahatna tawh mipite democratic referendum khensatna betdaihna dingin ngongtatna zat a khawlsan loh ciangin Crimea mite lunggulhna leh deihteelna bangin Russia tawh kigawmkikna dinga thukimna paulapin 18 March 2014 in Russian President Putin in Crime tuikulh gam makaite tawh a thukimna letmat a thuh uh "treaty of accession (annexation)" kici zangin Crimea la ziau hi.
Ukraine government in eastern Europe ah military operations bawlna ah a ngongtatna hangun a minthan'lawh Nazi group Anzov Battalion lim zat mahmah hi. US Congress in 2018 kum in Anzov Batallion-te Foreign Terrorist Organizations (FTO) lists sungah a ciamteh hangin tu-in Nazi group terrorist ci-in a ciamtehte "freedom fighters" ci-in a beisa hun 1980s in Afghanistan ah Russia dona ah CIA in training, funding leh galvan a piak a "freedom fighters" mujahideens kicite tu-in Taliban leh al-Qaeda groups cihte "terrorists" hi, ci-in FTO lists sungah a ciamteh dan tawh a policy zuih kibang pian hi.
Donbass region sunga kidona ah mi 40,000 val si khinin, right groups tuamtuamte in Donbass region sunga Russia kampau zangte thah cimitna (genocide), gal kidona ah thukham palsatna (war crimes), mi kilom thahna (mass killings) piang a, a kithatte kilom vuina khuk (mass burial sites) a kimuh banah Anzov members te'n a hingtangin Russia kampau minority Russian speakers tampi hal uh hi, ci-in a teci (evidence) tawh lakin ngawh uh hi. Hih bangin eastern Ukraine ah Russia kampau zangte kibawlsiatna leh gal kidona khawlsanna dinga thukimna a pian theihna dingin Russia, France leh Germany' kilemna palai pan'na tawh Minsk Agreement kici ah Ukraine government in a palsatna vai Russia in warning pia mun mahmah hi.
Putin' Russia in Ukraine in Minsk Agreement palsatin a gamtatna leh Ukraine President Jelensky in NATO ah lut ding a sawmna a khawlsanna dingin a warning pia-in a thudon kei leh action kila ding hi, ci hi. Jelensky in thudon loin Donbass region ah military operations leh Ukraine in NATO member a ngetna zadahin February 24, 2022 panin Ukraine gal do hong kipanin "Special Military Operations" hi, ci hi. Tua khit nung Russia in Ukraine gam-a Kherson Region (tu lai takin Ukraine in lakkik sawmin gal kidona a nasiatna) a lak banah Ukraine leitang seh li suah seh khat a lak khit hangin mun tampi panin kinungkik a, Russia kampau zang a tamna kuam a ngimna oblasts (regions) li teng humbit ding sawm hi.
March 16, 2016 in Crimea status on referendum ettehin Ukraine gam leitang 15% or 90,000 square kilometers) Ukrainian oblasts li – Luhansk, Donetsk, Zaporizhzhia leh Kherson in September 30, 2022 in referendum a neihna uh-ah Russian Federation tawh pumkhat na suak uh hi. 20 September in Donetsk People's Republic, Luhansk People's Republic, leh Russian forces in ukkhumin a vaihawmna (occupation administrations) Kherson Oblast leh Zaporizhzhia Oblast sunga thuneite (authorities) in Russia tawh kigawmkik ding mipite deihna 23–27 September kikal sungin vote khiatna (referendum) kinei ding hi, cih a tangkona bangin vote khia uh hi.
Tua tawh kizui-in 27 September in Russian uliante (officials) in Europe ah nuclear reactor lianpen a omna Zaporizhzhia Oblast sungah Russian Federation gam tawh pumkhat suahkikna dinga thukimna accession "referendum" ah 93.11% vote khiate in Russian Federation belh ding deihin vote khia uh hi, ci-in a results pulak uh hi.
29 September in Kherson leh Zaporizhzhia regions sung "independent countries" hi, ci-in Putin a thukimna leh san'na thu a kipsakna (recognizing decrees) letmah thuh hi. Tua khit September 30 in hih suahtakna a ngah gam hi ci-in Russia in a ciamtehna leh a san'na a piaksa oblasts or regions lite Kherson, Zaporizhzhia, Luhansk leh Donesk sung panin a makaite tawh Putin in Russian Federation tawh pumkhat suahna thukimna (accession treaties) letmat na thuh uh hi.
US, UK, France, Germany kihelin nitumna gamte leh gam tuamtuamte in Sept. 30 ni-in Putin in Kherson, Zaporizhzhia, Luhansk leh Donesk regions panin pro-Russian makaite tawh "accession treaty" letmat a thuh uh cikmah hunin international community in theihpihna leh san'pihna (recognition) pia ngei lo ding hi, ci-in Ukraine oblasts or regions nga panin mipi a tam zawte khensatna leh thukimna (referendum) ciamnuih/a tuh/a khemkhem "sham referendum" hi, ci uh hi.
Ukraine president Jelensky in a panmun a khahsuah lohna dingin hih oblasts li teng nitumna gamte funding, training leh galvan tam zaw sem piak beh ding lametna tawh kamciamna nei lanlanin, nisim phialin gualzawhna tangkopih den hi. Kilemna dingin kihona vai peace talks or negotiations a pian' theihna ding sangin gualzawhna kingah hi, ci-in nisimin Jelensky a otot pong hangin nitumna gamte tung panin galvan kihtakhuai leh hoih nono a tam zaw sem ngenin khutdawh bangin tai kawikawi a, Russia galkap si a tul a then a phaksak banah Russia' galvan a tul a then kisuksiatsakin gal do zo nawn lo ding zahin western media tawh kigullukin gen belin nei uh hi.
Ahih hangin a ground zero thupiang i et ciangin Ukraine gal hangin a gam milip 43 millions kiim sung panin 12 millions i.e. seh li suah seh khat gam sung leh gam pualamah galtai khin; Ukraine khuapi etlawm a tam zaw a kisia mang khin; Ukrainian energy infrastructure 30% val kisia khin; Office of the UN High Commissioner for Human Rights (OHCHR) in Feb. 24 panin Oct. 2, 2022 kikal sungin Ukraine gal hangin Ukraine gamah nautang a thuakkha (civilian casualties) 15,246; a si = 6,114, a liam = 9,132; Donetsk leh Luhansk regions ah: 8,527 casualties ( a si = 3,644; a liam = 4,883); Ukraine Government ukna leitang sungah: 6,768 casualties (a si = 3,254, a liam = 3,514); Russia galkapte leh a kipawlpih armed groups dangte ukna sungah: 1,759 casualties (a si = 390, a liam =1,369); leh Ukraine regions dangte (the city of Kyiv, leh Cherkasy, Chernihiv, Ivano-Frankivsk, Kharkiv, Kherson, Kirovohrad, Kyiv, Mykolaiv, Odesa, Sumy, Zaporizhzhia, Dnipropetrovsk, Khmelnytskyi, Poltava, Rivne, Ternopil, Vinnytsia, Volyn, leh Zhytomyr regions) sunga Ukraine Government ukna nuai-ah 6,719 casualties (a si = 2,470, a liam = 4,249 injured) pha khin zo hi, ci hi.
Ukraine War pen US leh a kipawlpih Europe gamah Russophobia cih Russia launa a cihna a tangkopih den makaite geelna a tangtunna hi. Russia' economy leh military thanemsak dikdek ding ngimna hi. A ngimna uh a tangtun a bat hangin kipumkhatin Russian oil leh gas tungah western sanctions a koih uh lamet bang loin Europe in zong nak thuak mahmah hi. Global crude oil man nakpi takin a khan'sak banah global economy a siatsakna panin a suakta kuamah om tuan lo hi. Russia in a oil leh gas gamdang, a diakin China leh India tungah oil exports khan' beh ahih manin gal kipat ma sangin oil products panin billion dollars tam luakkhia zawsop hi. Thuneihna kituhna hangin Ukraine ah gal piang a, paubaana nei lo leh a mawh lo kuamah om lo uh hi.
