A BEISA HUN LEH TU HUN-A MINAM MOVEMENT KALSUANZIA
Mid-1960s lai-in pu Tun Khaw Pum Baite' makaih Chin Liberation Army (CLA) ten armed revolutionary movement a pat lai un Meitei gamnuaimite makai khatin kipawlkhawm ni in, ko galkap 10, 000 volunteers bang hong pia nung, ci in na zol napi Meiteite muan ngamhuai lo hi cih na tel lua ahih manin na ut lo hi, kici hi. Pakistan military headquarters Rawalpindi nangawn ah va hawh ngei hi.
Tua hun lai-in CLA cadres dingin Sugnu lam, Chandel lam khawnga unau Thahdo pau zang ama behte Baite sungah political mobization a bawl zawh manin CLA cadres lakah sanggam Thahdo (Thadou Kuki) a hunkhop om hi kici hi. Sanggam Thahdou kampau zangte in tua hangin tua hun in Chin leh Chin movement cih na pom mahmah lel uh a, tua khit nungin a la phuahte uhah Zogam ngaihla khawng tampi phuak uh a,, "Chunu Zogam lei pupa lenna gam, ka ngaisang pen je, gamdang josie sang; Enchim pong ka te Zogam khan'na ho..." a cih bang neu lai-in thang vangvang lai hi. hi.
Makai siam i ih pen mi huai siam, thugen leh gamtat luisei siam; a thugen tawh mi tampi hup zo-in a tha a lawpsak thei mi (charismatic) i cihte hih dan hi. A behte Baite tamna sungah political mobilization a va bawl masak hun (CLA a phuankhiat ma) in Nagate minam pa AZ Phizo zong kimuhpih kha a, tua hun lai-in Naga armed revolutionary movement kalsuanzia a muhna panin CLA phuankhiat ding ngaihsutna hong nei hi, kici hi.
CLA movement hun lai-in a cadres-te i Zo an leh Zo meh vive ne-in a khangkhia ahih manun India galkapte in a mat uh a, thonginn ah a khum ciangun besan (dailuah) meh, mehkan khawng meh kha ahih manun thongkiat pen nuamsa mahmah lel uh hih tuak uh hi. Tu hun in bel i nek zong lim pian ta ahih manin gam leh minam adingin nasepna hangin thongkhia ngam ding kuamah om nawn vet lo hi (sih ngam ding cih thadah). Minam movement a hatna theihna dingin a min a poimawh pen leh buaipih masak pen ding ahih lohna i minam armed movement CLA hat lai-in a tangthu panin kitel a, makai lungsim picing nei leh minam dangte nangawn a huai zo ding, a pawl bawl siam leh a lungsim uh zawh zo ding kisam zaw hi, cih kitel mahmah hi.
Tu hun-a i minam leh gam makaite bel a min bek tawh buai masa phot pah zawzen, thuneihna tokhom khahsuah ding bek lauthawng in patauhpihpi pen in nei, i lehdo government nawk ding leh i deih i politial demands neihte ngah theihna dingin nawh ngei lopi-in i teen'na gam-a majority minamte in ei deihnate leh lunggulhnate hong thudonsak leh lunghimawhpih masa den keei ding leh ei thuthu hong mang ding peuhin lamen hithiat, amau sangin a thahat, a ngalhat zaw khangthak leh a tei zawte in amau panmun a luah khak ding peuh patau den in tutna ot sawm ngei vet loin thuneihna tokhom tungah tu belbal in makai za len ngeungau pong. Tawsip leh tawpol leh dulh madong makai tokhom tungah sih dong tut sawm belbal pong. Khangthak makai ding lah pattah leh sinsakna piang sawm loin na nuntak lai-in makai thak ding tampi na pattah kei leh si vat lecin minam movement zong a sih vat a deih hi teh cihna hi. Pha hang ei leh.
American writer minthang Mark Twain in bel, "Naungekte zun leh ek dalna tawdap (diaper) leh politician pen laih den kisam hi. A nih tuakin a hang kibang nei ahih manin laih den kisam hi," na ci hi. American writer Patrick James Rothfuss in, “Power is okay, and stupidity is usually harmless. Power and stupidity together are dangerous," a cih mah bangin thuneihna ahih kei leh vangliatna neih pen phamawh loin kingah lel a, hai milmel pen kihtakhuai lo hi. Ahi zongin vangliatna neih leh hai melmal thuahkhawm pen kihtakhuai mahmah hi.
Hazatna tawh gam makaih in, thuneihna tokhom khahsuah khak ding bek lauhtawngna tawh minam makaih le'ng koi ciang i tunpih zo tam tam??? Kipawna a min khawng i buaipih masak lai teng i minam movement kalsuanna koi ciang i mainawtpih zo zen tam? China gam makaipi Chairman Mao Zedong a sih khitin a zalaih leh 1978 panin November 1989 in a kitawp (resigned) dong People's Republic of China gam a makaih Deng Xiaoping in, "Zusa pen a vom ahih kei leh a ngo ahih ding kisam masa loin zusa a mattheih ding poimawh (thupi) zaw hi," a cih ngaihsut tham kik huai mahmah leh kilawm hi.
@ Thang Khan Lian #ZUNs reports
