NA NGAIHTUAH KHA NGEI HIAM?

1. Pawlpi sum (budget) tam semsem napi biakinn lam zuan khangno tawm semsem hi. Bang hang ai tam?

2. Thugen siam (evangelists, speakers) tam semsem napi i gam ah na hoih lo sem leh bawlte suakta semsem uh hi. Bang hang ai tam?

3. I khuapi sungah biakinn gol leh thupi tam semsem napi gitlohna keh ngongtatna kibehlap;pung sem bang hang hi mawk ding?

4. A beisa hun lam-a (tuma a) dai khikhe leh lauthawng khiankhian kawm-a bazar kiim lak khawnga hih ten a kilangtang in hih ngam ziahziah ta.... bang hang ai tam?

5. Khua lakah a sia leh a hoih lo hih/bawl tam semsem napi "Kei tapa/nu hoih kei veh aw," a ci
innsung nu leh pa zak ding lah khat beek om lo hi. Bang hang ai tam?

6. Papi ten mipi lakah thu a gen ciangun a zite uh a phatna thu vive gen napi un tua nupi a phat a tanote, a mote leh a teekte khat beek om lo hi. Bang hang ai tam?

7. Nupite a holim ciangun a tate uh phat kim ciat ngeingai napi un numei zu kham, numei paktat (kizuak) lah tam semsem.... bang hang ai tam?

8. I biakinnte uh hoih semsem napi pawlpi sungah khami (spiritual) tawm semsem hi. Bang hang ai tam?

9. Lai Siangtho (Holy Bible) sin leh siam lah tam semsem napi Lai Siangtho' deih dan zui lah kitawm semsem hi.

10. Zato innte (hospitals) gol semsem in hoih semsem napi a hun lopipi-in mi si lah tam semsem hi. Bang hang ai tam?

A tunga nam sawm i gente banah gen beh leh behlap ding tampi na neih leh theih beh ding ka lamen hi. Mi khempeuh ihmut khit nung a daih dide hun in hih thute lim takin ngaihsun in la, bang hang hi ding hiam cih na ngaihsun sin dih ve. Ken bel i sep/hih/bawl ding lian bangin i i sep/hih/bawl loh man hi dingin ka um cinten hi.

I biakna' thubullet leh deihna "religious principles & doctrine" bang i zuih loh banah i biakna zuih dan leh i biakna saanzia a lampial khin kha ihih man leh i biakna Lai Siangtho' genna bangin i nuntak loh man hi peelmawh ding hi. I biakna leh i Lai Siangtho' deihna bang zui loin, i kalsuanpih loh banah i biakna leh i Lai Siangtho i kizuihsak sawm thapai man hi peelmawh ding hi. Lai Siangtho ah ciahkik ni.

WhatsApp ah Gangte pau a kikhahkhia Zolai tawh kong tei sawn, tawm kong puahphat leh behlap ahi hi. A gelhpa/nu' min kituangsak lo ahih manin ka thei kei a, ngaihsut tham ka sak manin kong hop sawn (share) ahi hi.

A tei sawn: Thang Khan Lian #ZUNs 

Photo: CBA Central Church, New Lamka (G), Thangho Street Churachandpur.
Photo credit: Lamka Post (photo pen a kilawmsakna dinga kizang pak hi)