MAKAITE LEH MIPITE KIKAL

MAKAITE LEH MIPITE KIKAL

v  Tu hun ciangin makai taktak tawmin makai nengneng tam hi.

v  Pasian nasem sia taktak tawmin, sia nengneng tam hi.

v  Kiniamkhiatna a gen nuam in, a nuntakpih ding haksa hi.

v  Panmun khat peuh na ngah ciangin na lawm na gual ten hong eng dingin ngaihsun pah ken! Nasep na siam kei leh na hai kilatna hi zaw ding hi.

v  Meesuai zawh thu tawh makai ngahte zahtak huai lo hi.

v  Pawlpi kimkhatte ah khawk uk makai nangawn kiphasak thei uh hi.

v  By law (thubul let) a bawl phapha, a zunzun pawlpi in Jesuh meel sun ngei lo uh hi.

v  “Pasian thu mang un cih sangin makaite thu mang un,” cih a tam zawkna pawlpite ah mipite nungtolh hi.

v  A khangmoi lua pawlpi makai a tamna mun-ah mipite khamuang zo lo uh hi.

v  Pawlpi kimkhatte ah upate in a muhdah pawlkhatte a gawina dingin mun dang pan sia khat peuh cialin khetphim dingin zang thei uh hi.

v  Mi pawlkhatte in a lawmte panmun deihsakin seh uh a, amah kiseh nuam lo hi. Ahih hangin aman a ngah ciangin a deihsak mite pia ngam tuan lo zel hi.

v  Jesuh lungsim a deih pawlpi in Jesuh lungsim bang nei kim tuan lo hi.

-Rev. Kim Khen Thang, NTBA, Tedim

MIPILTE KAMMAL

MIPILTE KAMMAL

*Nungsang thute mawhpaih ding hi loin mailam ading lampi banga i tot ding ahi hi. - John F. Kennedy
*Pilna nam nih om a - nuntakna ding bangci zon' ding cih hong hilh pilna leh bangci nuntak ding cih hong hilh pilna om hi. - Gean Gordon
*Tupna kician nei lopi-a khuasuakte sangin tupna kician nei-a a tangtun' zo lote hoihzaw lai hi. - Lyold Jones
*Naupangnote na cin' kawmin khanghamte hehpih in la, khitui luangte hehnep siamin tatkhialhnate maisak in. -Lyold Shrearer
*Nang na ginat loh kei buang leh kuamah in hong nengniam zolo ding hi -Anna Elanor Roosevelt
*Innkuan kim-ah nuntakzia kihilh leh khangno gamtat siatna bei phial ding hi. - J.Edgar Hoover
*Makai khatin a mite koi lamah paipih ding cih pen a laibu sim tungtawnin kikhensat thei hi. - Canon Yates
*Laibu thak sim ngei lo siavuanpa leh Lai Siangtho sim ngei mel lo piangthak makaipa kuan zui nuam ding hiam? - John Wesley
*Nawhsa tak-a laisimna in pilna tawmkhat leh kiphatsakna lianpi hong pia hi. - H.C. Spurgeon

Maan: Anna Eleanor Roosevelt

LAI SIMSIM LECIN.......

LAI SIMSIM LECIN.......

*Mipil na suak ding hi.
*Thu na theih tamin, na tel zong tam ding hi.
*Thu tam theih nai loh na hih lam na tel semsem dinga, na lungsim tawta lai hi cih na phawk ding hi.
*Upmawh thu na gen nawn kei dinga, na pheng paupau kei ding hi.
*Gam leh lei it-in, khua leh tui kep leh zuun zia na siam ding hi.
*Huk uk zia, makaih sep zia na siam ding hi.
*Thuhilh leh hanthot na siam ding hi.
*Hong kineumuh thei lo ding hi.
*Na dinmun na kithei tel ding hi.
* A sia, a pha na khentel thei ding hi.
*Mailam thu muhkhohna na nei ding hi.
*Nuntak khuasak zia na thei ding hi.
*Na khuak a tat hiam tawh na kibang ding hi.
*Laigelh zia, lai pai zia na siam ding hi.
*Gamtat, luhek zia leh kampau na kidawm zo ding hi.
*Pilna leh thu hoihte na phawk thei ding hi.
*A hoih leh a pil in na gamtat theihna ding lam hong hilh ding hi.
*Thu thuk ngaihsut theihna na ngah ding hi.
*Mi pilte' kampau leh thugente a deihna na theithei ding hi.
*Hong ciimsak semsem in, hong pilsak semsem ding hi.
*Mite maipha ngahin, pahtawina leh minthan'na hong pia ding hi.
*Tam sim semsem le cin na theihna kibehlap semsem dinga, lai tam sim lua kha ing ci'n na kisik ngei kei ding hi.

MILKY WAY PANIN HONG KIPAN PLANET KHAT IN I TEENNA LEITUNG DENG DINGIN HONG MANAWH

MILKY WAY PANIN HONG KIPAN PLANET KHAT IN I TEENNA LEITUNG DENG DINGIN HONG MANAWH

April 5, 2016: Aerospace Defence Forces (ADF) scientists ten planet (leitung namkhat) lamdang mahmah khat Milky Way (Aksi honpite/aksi behpite omna Galaxy kicihna sunga vuk lampi banga a kang phieupheuna mun) panin hong kipanin i teena leitung (earth) nawk/deng dingin hong manawh cih a genkholhna thu Russiate Presidentpa teenna Kremlin report in laidal 737 in a suahkhiasak hi. Aerospace Defence Forces scientists (mipilte) ten hih planet pen Planet X ( Nibiru zong a kicipak, a min kithei lo ahih manin Planet X kici ziau hi) mi pawlkhatin leitung deng dingin hong manawh hi cia January kha-in a muh leh a gen pen uh ahi hi.

Scientists ten leitung deng dinga a leitung hong manawh Planet X pen nidangin Milky Way galaxy laizang ah na om a, leitung manawhin hong pai/kikhin pen kum billion bang cing ta hi ci uh hi. I teenna leitung pen kum billion 4.54 bangin upa dingin kituat a, ahih hangin tua sangin million 50 bangin upa zaw hi kici hi. Galaxy (aksi behpi/honpi omna) sungah aksi 100,000,000,000 bang om ding hi ci'n scientist ten na gen uh hi.

Whatdoesitmean.com in a genna ah Kremlin report in 1999 kum bul-in Kennedy Space Center (KSC) computer programmer siam Lloyd Albright in Washington D.C Embassy dinga zang Federation kicite kiangah i teenna leitung manawh in Jupiter planet sunga om Comet Shoemaker–Levy 9 kici hong pai hi na ci hi. NASA ten hih Comet Shoemaker–Levy 9 leitung hong tun'na dingin kum 5 bang lut ding hi na ci hi. Lyold Albright gen pen in US space shuttles flights (space vanleng) 1999 kumin nawk kha lo a, ahih hangin tua Comet Shoemaker them (debris) leitungah 2002 bei kuan leh 2003 kum bul pawlin hong deng ding hi na ci hi. A genna bangin tua Comet them tawh leitung zuan kik dinga hong ciah USte space shuttle (vanleng) Columbia February 1,2003 in den'siatsak takpi hi.

Lyod Albright genna a lauhuaina pen NASA computer ten a tuat ciangun Mars leh Jupiter kikal-a om 'planet min theih loh' Asteroid Belt sunga om in leitung hong manawh hi cih mu uh hi ci'n Kremlin reports in gen hi. Kremlin reports in a genna ah Lyod Albright' genkholhna Federation ten a zak khit uh Aug. 1999 in Ohio state ah Albright kiman hi ci'n American news agencies in suaksak hi. Albright in hih meteor (aksi kitattuahte kitamkhamte them/debris) in leitung hong deng a, leitungah tsunami meter 60 (feet 200) a sang piang ding hi cih a lauhluat manin leikuahawm sungah bucip ahi hi. Albright in a muhkholhte a gen khempeuh ADF report sungah thusim (highly classified) ci'n ki-imcip a, Kremlin in hong pholhkhiat ahi hi.

Albright genkholhna leh upmawhnate (warnings/suspicions) 1999 in Federationte tungah a gen banah February 2, 2007 in US astronaut leh Navy Captain Lisa Nowak in Mexico City-a Federationte Embassy ah teleconference panin ADF scientistte kiangah interview na pia a, tua-ah Lisa Nowak in 4-17 July 2006 sungin Discovery space shuttle mission a paina ah a muhte na gen a, Pluto in leitung hong den dinga, ahih hangin Jupiter in leitung hong deng masa zaw ding hi ci'n na genkhol hi. Lisa Nowak in nidangin Lai Siangtho sungah aksite kia in, leitung hong den ding hi kici pen ka up loh hangin tu-in ka um ta hi ci'n na gen hi. Lisa Nowak in a lawm ngaihnu (neih kibang ki-it/lesbian) mat (kidnap) sawm hi cih ngawhna a tuah manin Mexico City panin US hong ciah in Florida ah kiman hi (a lawm ngaihnu zong US Air Force engineer mah hi a, a kimat khitin thah sawm hi ci'n kingawh kik hi). 2009 in thah ka sawm kei a, ka mat sawm mah hi ci'n kipulak ahih manin kum khat thongah kikhum hi. 2010 in US Navy Captain za kilak khiatsakin Commander za kilensak a, 2011 in US Navy panin kitawpsak in, ADF scientistte kiangah a thu gen teng 'highly classified' ci'n kiseelcip den hi.

Albright leh Captain Nowak in a thumuhkholhte uh Federation tungah a gente panun NASA in Solar system sungah planet thak om hi cih tel uh hi. Albright leh Captain Nowak thumuhna panin ADF scientist leh NASA kipawlin hih thu lim takin a kan ciangun Jupiter a planet min theih loh Planet X ( Nibiru zong a kici) a kici ziau phot pen 1994 kumin Comet Shoemaker–Levy 9 in denga, 2009, 2012 leh nung kalin zong deng kik hi cih thei khia uh hi. Tua bek hi loin Captain Nowak in 2007 in a genkholh bangin Jupiter pen planet lakah a kia masa pen ding hi cih ADF scientist ten hong theikhia uh hi.

Maangmuhna (Revelations) 8:10-12 ah " A nihna vangtung mi in a peengkul hong tum a, mual lianpi tawh a kibang mei in kangin a kuang zuazua khat, tuipi sungah kilawn suk hi. Tuipi sehthumsuahsehkhat sisan suakin, tuipi sunga om gangingte sehthumsuahsehkhat si a, teembaw sehthumsuahsehkhat a kisia hi. A thumna vangtung mi in a peengkul hong tum a, vantung panin aksi lian khat meikuang bangin hong kia sukin gunte leh tuinakte sehthumsuahsehkhat tungah a tu hi. Tua aksi a min in Gamsai hi a, tui sehthumsuahsehkhat gamsai tui suak a, tua tui kha sak ahih manin a dawm mi tampi tak a si uh hi. A lina vantung mi in a peengkul hong tum a, ni sehthumsuahsehkhat mah kisat khia-in, kha zong sehthumsuahsehkhat mah kisat khia a, aksite zong sehthumsuahsehkhat ciat a bei hi. Sun-in hun sehthumsuahsehkhat tang khuavak lo a, zan-in zong hun sehthumsuahsehkhat tang mah kha leh aksite taang lo hi" cih Johan' maangmuhna sunga thute tangtun'na ding ahi hi.

ADF scientists ten a a thukhupna uh-ah Piancilna (Genesis) Lai Siangtho tawh a kibang mahmah a kigelh, leitunga tangthu sau (epic) luipen - Babylonte' tangthu Enûma Eliš (Enuma Elish) kici sungah hih leitung dengsia ding planet (destroyer planet a kici) pen galaxy laizang-a om kua hawm vom gol mahmah (supermassive black hole) tawh a kipian'sak hun kibang a, hih leitung dengsia ding planet pen thukhen ni (final judgment day) ciangin Jupiter tawh hong kideng kha dinga, Jupiter hong kia ding hi ci uh hi. Hih mipilte gen pen Maangmuhna sunga kigen thute mah ahi hi. Ni khat ni ciang Topa' hoihna'n hong taisan dinga, ni leh khate vut leh vai suak lel ding hi. Tua ni ciangin kua na beel diam?

-Your News Wire/Wikipedia

CIA AGENT LUI KHATIN OBAMA IN SYRIA A SIM NUAM MANIN I.S. A PIAN'SAK HI CI

CIA AGENT LUI KHATIN OBAMA IN SYRIA A SIM NUAM MANIN I.S. A PIAN'SAK HI CI

April 5, 2016: USte secret agent Central Intelligence Agencies (CIA) agent sem ngei Doug Laux in US President Obama in Syria gam a im nuam man leh Syria President Bashar Al-Assad ukna a laih nuam manin IS a pian'khiatsak hi ci'n gen a, 2012 in CIA in Syria sim ding lim takin na geel khol a, hih geelna pen a tangtun' theihna dingin Obama in president veto power zang hi ci'n pulak hi. Doug Laux in NBC Newste kiangah a genna ah Syria sim ding geelna White House aa ulian tampi in dal a, ahih hangin Obama in a president veto thuneihna tawh a deih lote zo hi ci'n gen hi.

Activistpost.com in a genna ah Doug Laux laibu gelh "Left Of Boom: How a Young CIA Case Officer Penetrated the Taliban and Al-Qaeda" kici pen tuni in hon'na kinei a, tua laibu sungah Doug Laux in CIA ulian ten Syria a kisim theihna ding leh President Assad a kilaihkhiat theihna ding ngimna leh geelna tampi tak (multi-tiered plan) thu bawlin Assad paihkhiatna ding nasia takin vaihawm uh hi ci'n gen hi. Doug Laux in Obama leh CIAte thusim a pholakkhiat pen mi tampi mahin na ummawh den uh a, Syria sim ding leh Assad laih ding a deih lo CIA ulian min gen loh pawlkhatin zong NBCte kiangah na gen khin ngei uh hi.

NBC New in a genna ah CIA senior intelligence ulian pensen khinsate leh CIAte' Syrian task force kici ulian pawlkhat ten zong Doug Laux ngaihsutna bang na nei uh a, amau deihna pen Obama' in thudon vet lo hi ci hi. President in a langtang a do loh ding (sim do ding/covert action) thu na pia a, Syria a langtangin dona dingin bel 'green light' pia sam lo hi. [sim do/covert action i cih ciangin Syria kumpi lehdote (rebels) US in galvan, sum leh training tawh huhna pia in, Syria kumpi do dinga a tawsawmna uh genna hi] Doug Laux leh CIA ulian pawlkhatin bel ISte galkap i sawl kei leh kizo ngei lo ding hi cih geelna na nei uh hi.

Doug Laux thusim pholakkhiatna tawh kisai White House leh CIA in gen ding mel thei lo uh ahih manin dai dide phot uh hi. Doug Laux in Obama' vaihawmna (Obama's Administration) leh CIA agency ten a kipatcil a kipanin CIAte' Syrian task force kicite tavuan pen President Assad a zum panin paikhiat ding ngimna nei a, CIA in President Assad paikhiat ding dan geelna hoih 50 bang kinei a, ahih hangin polictics lamsang ulian ten (political leadership) hih geelnate a kisepkhiatna dingin (go-ahead to implement) geelna kineite lakah khat beek hong zangsak lo uh hi ci'n gen hi.

Doug Laux in ama geelna leh hoihsak “ops plan,” kici bang kizang leh ISte hong hat luatna ding, Europe gam sungah IS ten mun tampi a kisuamna ding leh nautang tampi a kithahna kipelh thei ding hi cih a up khit lian loh hangin Obama' vaihawmna in bangmah sepkhiat meel nei lo hi ci'n a lungkiat manin a sepna panin amah leh amah kitawp (resigned) hi ci'n Obama' geelna a langpang tampite lak-a kihel tu lian-a CIA Director David Petraeus in gen hi.

Obama in a geelna tangtung mel loin ISte uk zawh ding hi nawn lo hi cih hong phawk khiat ciangin a khuanung (Doug Laux kitawp khit zawh) in moderate Syrian rebels (Syria kumpi lehdote lak panin a ngongtat lua lote) - Free Syrian Army (FSA) kicite training leh galvan piak hong kipan hi. Ahih hangin hih FSA rebels tampi FSA panin a galvan uh tawh taikhia in, Syria gam-a al-Qaeda tawh kipawl Islamic ngongtate kipawlna tuamtuam leh IS ah kipia uh hi.

CIA director David Petraeus, Syria gam-a USte ambassador lui Robert Ford leh US Defense Secretary lui Leon Panetta in Doug Laux ngaihsutna bang thukimpih uh hi. Robert Ford in NBC News ten a interviewna ah Doug Laux ngaihsutna bangin US in 2012 in a geelna bangte zangpah hi leh IS ten Raqqa khuapi pen amau ukna - Islamic kumpi gam (caliphate) dingin a pulak khiat dinguh dal zo ding hi ci'n gen hi. Senator John Mc Cain in zong Obama in CIA director David Patraeus, US Secretary of state Hillary Clinton leh US Secretary of Defense Leon Panetta' thugen na ngai hen la, amau gen bangin na gamtang hi leh tu-a i muh Syria tawh kilamdang mahmah ding hi ci'n gen hi.

Ahih hangin Obama in ama ngaihsutna mah mit tawh sialkhau let bangin lencip den a, ISte do dingin galkap kisawl lo ahih manin Syria buaina ah i khut sungah si baang loin siang hi ci'n Atlantic ten a interviewna ah kisiamtan'sak mahmahna thu na gen hi.

USte foreign policy pen mipi deihna tawh a kiteel kumpi laih (regime changes), gam khat sim in, uk khum ding (occupations) leh Middle East gam sung nawkaisakna dinga vanzat (destabilization techniques in the Middle East) theih tuamtuam zat ding cih hi a, a deih pen uh ahih leh Middle East gamte datsi/namgim (gasoline) hi lel hi. Tua in ngongtatna tawh gamtanga dipkuatna (terrorism) khangsak in, terrorism a kibehlapna dingin mei kuang phasak semsem hi. Doug Laux’ laibu bawl pen tuni in honna kinei ta ahih manin USte keel luphum hon khat leh President Assad laihna ding a vaihawm zia uh leh a zuau bulom uh hon khat hong kilang nawn ding hi.

-Your News Wire