US IN CAMBODIA TUNG PANIN LEIBAT A SIKSIK HANGIN CAMBODIA IN PIA NUAM LO

US IN CAMBODIA TUNG PANIN LEIBAT A SIKSIK HANGIN CAMBODIA IN PIA NUAM LO

March 23, 2017: US President Trump in US defence budget 10% in a khan'sak hukbin' tuamna dingin tu-in US in Cambodia tung panin $500 million leibat a siksik hangin Cambodia politiciante leh gammi ten tua bang leibat pen "leibat thanghuai/nin" leh "sisan tawh sam ek a kai leibat" hi ci-in pia nuam lo hi. US in Indo-China ah a galdona Cambodia gam mite a phawkkik thaksakna hang mahmah in zong Cambodia in a leibat loh ding ding thasial mahmah hi.

Cambodian Prime Minister Hun Sen in tu kha bul in, "Trump panin leibat hong phiatna ding official letter ka mu nai kei hi. US in Cambodia ah bomb hong pua lut in, Canbodia hong khiat khum uh a, tu-in tua bomb mante loh kikna dingin gam mite tung panin leibat hong sik kik hi," ci-in gen hi. Leibat loh kik leh kimaisak cih pen a nawngkaihuaipi hi a, ahih hangin gam khat leh gam khat kikal ah leibat kimaisakna dingin gam nih in kihona nei uh a, 1956 kum-a kiphuankhia Paris Club agreements kici ah thukham zuih ding pawl khat om in, tua bangin leibat kimaisakna tampi piang thei hi.

Gal hangin leibat tampi a neih lawh Cambodia, France, Germany, Italy leh Japan lak panin 1995 in Cambodia bekin US tungah a leibat pia kik nuam lo hi. Bang hang hiam cih US in a leibat dinga kilawm zah sangin tam ngen zaw hi. Ama deihna bang bek a Cambodia gam 1972-1975 kikal Lol Nol in a uk lai-in a ukna deih loin Cambodia gam mi ten na kiphin uh a, tualgal nasia mahmah piang hi. Tu lai-a USte gamtat ngeina bangin US in kumpi gilo Lol Nol gum a, Lol Nol' kumpi' galkapte nek ding leh galvante tawh huhna a piak manin Cambodia kumpi in US tungah leibat $276 million nei hi. Lol Nol in Cambodia Kumpipa' tapa Prince Norodom Sihanouk' ukna zawhthawh thu leh thagum/galkap thahatna zangin
 (coup d'etat) na laih hi. Hih bang hong pian' theihna pen US huhna hang hi ci-in Cambodia ten tu dong ummawh in, US ngawh uh hi. Ahih hangin US in aana tawh kumpi laihna dingin huh ung cih thuman (evidence) tawh lahna ding om lo hi ci-in nial keeikai uh hi.

Tua loin Indo-China gal lai 1965-73 kikal in US in Galpi Nihna hun lai-in US in Japan khuapi nih ah bomb a khiat sangin million tonne a gikzaw 2.7 million tonne a gik bomb Cambodia ah khia hi. US in a bomb khiatna hangin nautang, numei leh naupang sim in tul za tampi a sih ban-ah a bomb puak lo tampite tu dong khuanung puak kik thei zel a, mi sih behbeh lai hi. US in Lol Nol' kumpi ukna gum in, bomb nak khit lua ahih manin Lol Nol' galkapte a lehdo Khmer Rouge galkapte ukna khamtung gam beel in galtai tam mahmah a, galtaite pen Khmer Rouge galkapte hong suak uh hi. Historian pawl khat ten Khmer Rouge hong pian' khiatna US ten Nol Pol' ukna a gup man uh hi a, Nol Pol' uk hun 1975-79 kikal in mi million 1.7 sihna pen US hang hi ci uh hi.

Khmer Rouge galkapte zong ngongtat mahmah napi un US in a makaite un war crimes gamta hi ci-in ngawh se loin bangmah cih lo uh hi. Khmer Rouge galkap ten USte' huhna tawh tawl khat a uk hangun 1979 in Vietnam' hanciamna tawh gam mite deih Communist ukna Phnom Penh government hong ding khia a, tua zong US in thukimpih loin sang nuam lo sawnsawn hi. US in hih Communist ukna hangin Southeast Asia ah "domino effect" hong piang ding hi cih a lauhman hi bek hi. US leh a pawlte a guallelh dipdep hangun gam mite deih Phnom Penh goverment a saan' loh uh pen US in a hilh khialnte panin na bangmah sin kik sawm loin international responsibility (tavuan) lianpi a neih uh gamta lo uh hi cih kitel a, history ciamtehna ah a mawhna uh mang ngei lo ding hi.

Gal hong bei zawh kum sawmnga khit nungin US leh Cambodia in a beisa hun-a a kitelsiam lohna khempeuh uh kimaisak in gam nih kikal ah kitauna hoih hong piang a, tu-in US pen Cambodiate puan (cloth) bawlte a tam leisak pen suak hi. Ahih hangin Cambodia politics ah US a kigolh nuam teitei lai manin gammi ten USte ngaihsutna pen man lo cih a pawkkhia kibehlap tektek a, tu-in US in kumpi gilo khat a gupna leibat a sik kik manin kitelsiam lohna hong piang kik ding bang hi. US in tu lianin Cambodia gam uk Hun Sen in political reform a bawl ding a deih manin leibat sik kikkik hi dingin ki-ummawh hi. Tua loin US in amau tunga leibat tampi a nei Vietnamte' leibat 1997 in, Bosnia-Herzegovina-te' leibat 1999 in, Yugoslavia-te' leibat 2002 in, Iraqte' leibat 2004 in maisak napi Cambodia-te' leibat a maisak nuam loh pen Cambodia politics ah kigolh nuam hi cih kitel hi.

US in Cambodia in a leibat a loh kikna dingin International Monetary Fund in Cambodia' in leibat a ngah theihna ding leh international capital (sumpi) a dalna ding IMF tungah ngen veve in nawknawk lai veve ding hi. Cambodia gam-a US ambassador William Heidt in nung kha in USte leibat hong loh kikna dingin IMF in leibat neite a sawl kei leh US leh IMF kitanauna nakpi takin sia ding hi ci hi.

# Hih laipaih pen Japan gam-a Nippon Foundation a Consultant Vannarith Chheang in a gelh hi a, ama; ngaihsutna hi a, kei ngaihsutna leh news source Al Jazeera ngaihsutna hilo hi.

Source: Al Jazeera
A tei: Thang Khan Lian @ Zomi United News (ZUNs)

NORTH KOREA IN HUN KHAT PEUH CIANGIN ICBM TEST DING

March 23, 2017: UN-a North Korean deputy ambassador Choe Myong Nam in US President Trump in khalna (sanctions) bawl beh dingin hong vau hangin North Korea in missile leh nuclear bawl beh ding a kihanciamna hong khawlsak zo tuam lo dinga, hun khat peuhpeuh ciangin continent khat panin continent dang khat kap khakna ding "intercontinental ballistic missile (ICBM)" makai lianpen Kim Jong-un in lawn (launched) pah ding hi ci-in gen hi. Choe Myong Nam in hih bang a gen pen zan in North Korea in US kap khakna ding ICBM sitna a neih hangin a lawhsap khit nunga a gen ahi hi.

Trump in zong Dember kha-in North Korea a vauna in US in a thahat sem theihna ding leitung in nuclear kihtakhuai hi cih a phawk khiat ma dong nuclear a bawl beh ding kisam hi ci-in a Twitter ah na post hi. Ahih hangin North Korea in nuclear guk vei sitna nei ta a, 20 kiim bang nei ta dingin nung kum in ki-ummawh hi napi in nuclear a bawl beh ding uh US in zadah mahmah se a, Trump in Pizing (Monday) in, "Kim Jong-un' gamtatna pen nak siat lua mahmah hi," ci hi.

US Pacific Command in zan-a North ten ICBM a sit uh lawhsam a, a kilot khiat khit second tam loin puakkham hi ci hi. South Korean Ministry of Defense in statement a suaksakna ah, "South Korea leh US in North Koreate missile lot khiat lam kithei a, lawhcing lo hi cih kitel hi," ci-in gen hi. DPRK (Democratic People’s Republic of Korea) in Trump' President let khit nung missile nga vei lawn khia ta a, Japan Prime Minister Shinzo Abe in Florida ah Trump ah kimuhpih lai-in khat in Sea of Japan deng kha hi.

Reuters ten Choe Myong Nam a interview na-ah Choe in US Secretary of State Rex Tillerson in Japan, South Korea leh China gamte ah a va zinna ah ka nuclear bawlna uh khawlsakna vai leh vauna kamte a zat hangin kikihta lo hi ci-in gen hi. Reuters ten US in North Korea in hong kap ma-in hong kap ding uh dalna in a theih kholh loh kal un kap (pre-emtive strikes) ding ci-a vauna vai dotna Choe in a dawn'na ah, "North Korea lamah thautang khat bek US in hong kap leh zong US vut (ashes) suaksakna dingin kithawi khin zo hi ung," ci-in dawng hi.

Choe in South Korea, Japan leh US ten gam thum kipawl in galdo kisinna "trilateral military exercises" nei den uh ahih manin communist gam DPRK gam in hong kikap ma-in hong kap dingte dalna in theih kholh loh kal-a kap theihna ding "pre-emptive first strike capability" ka neih uh kisam a, North Korea tungah khalna tuamtuam - UN leh gam tuamtuam ten hong bawl khum uh pen thukham palsatna leh mihing ngeina hilo hi ci hi. Hih bangin ko huat man leh ngimna tawh galkap lamsang thahat thum kipawlkhawm in galdo kisinna nei den uh ahih manin nuclear galvan ka bawl beh loh uh phamawh a, a sawt loin hun khat peuhpeuh ciangin DPRK in ICBM sitna kinei pah dinga, a hun ding pen makai lianpen (Supreme Leader) Kim Jong-un in khensatna la ding hi ci hi.

Source: Sputnik

ENGLAND GAM-A WESTMINSTER KISUAM, MI NGA SI

ENGLAND GAM-A WESTMINSTER KISUAM, MI NGA SI

March 23, 2017: London police ten British parliament kiangah car khat in lampaite (pedestrians) taihsak gawp in, tua khit in pasal khatin tua kiim-ah tem tawh mi a dawt gawp (stabbing spree) a, tem tawh mi dawtpa kikaplum a, amah tawh sim in sihna tuak mi 5 pha ta hi ci-in pulak uh hi. London Metropolitan Police Commissioner Mark Rowley in hih thupiang kan ten Islamic tawh kizopna nei terrorist-te gamtatna hi dingin ummawh uh hi ci-in gen hi. Police ten tem tawh mi dawtpa ahihna thei dingun ka ummawh a, ahih hangin pulakkhia nai lo uh hi ci-in journalist-te kiangah gen beh hi.

Mark Rowley in liam sakna/ngongtatna (violence) pen Westminster Bridge ah car khat in lampai lai nautang tampi a taih liam ban-ah police thum a taih liam khit nungin hong piang hi ci hi (policete pen commendation ceremony a kihel a ciah kik lam uh ahi hi). Tua khit in tua car British parliament kiangah tuahsia (crashed) hi. Tua khit nungin tem tawi pasal khat in mi ban dawt gawp in, building sungah lut sawm a, police khat a dawt lup khit nungin kikaplum hi ci-in gen hi.

Sihna tuak mi dang thumte pen Westminster Lei ah car in a phuk lup hi a, tua khit in a car parliament pua lam-ah tuahsia in tai thei nawn lo hi. Car in mi tam taih liam mahmah a, si leh nai luang leh khuaphawk loin lampi ah mi tampi lum phengphang uh hi kici hi. Prime Minister Theresa May in Westminster kisuamna a mawhpaihna thu pulak hi. "Suamna mun a pian'na pen tuahsiatna (accident) hang hilo hi," ci-in a zum Downing Street pua panin zan nitak lam in pulak hi. "Terrorist ten i khuapi laizang, minam tuamtuam, biakna tuamtuam zuite leh ngeina tuamtuam zuite teen khawmna mun-a suahtakna, democracy leh suakta tak-a paukhiat theihna mun hong suam uh hi," ci-in gen hi.

Liamna tuak pawl khatte nak liam mahmah a, khat bang car in Westminster Lei panin nawk khia a, Thames lui panin kihunkhia hi. Hih suamna thupiang mit tawh mu ten parliament kong lak mun tampi kisuam (attacks) hi ci uh hi. Khualzinmi Babi Nagy in car vom khat full speed in hong tai a, mi tampi phu tuk gawp ahih manin hih pen terrorist-te gamtatna hi cih ngaihsutna ka nei pah hi ci-in Al Jazeera newte kiangah gen hi. Poland politician leh journalist zong ahi Radoslaw Sikorski in Twitter ah hih thupiang khit nunga thupiangte video ah post a, Westminster Bridge ah car in mi nga kiim phu tuk hi cih suang hi.

July 2005 in zong London khuapi a public transportation system ngimna in bomb kipuaksak ngei a, mi 52 a sih ban-ah mi 700 val in liamna na tuak uh hi. London Mayor Sadiq Khan in, "Hih thupiang manlang takin kikan ding hi. Ka ngaihsutna leh ka thuakpihna khempeuh sihna leh liamna tuakte leh a innkuanpihte kiangah om hi," ci-in a Twitter ah post hi. German Chancellor Angela Merkel in hih bangin Britain a kisuamna thu a suamte a kitel lian nai loh hangin hih bang hun in Germany in Britain din'pih hi ci hi. US President Donald Trump in US in hih thupiang kanna ah Britain PM May kipawlpih ding a, hih bang suamna thuk kikna ah May huh ding hi ci hi ci-in White House statement in pulak hi. Westminster suamna ah French sangnaupang London kha zinte thum in zong liamna tuak a, France in liamna leh sihna tuakte a dahpihna lahna in Eiffel Tower mei khempeuh mitsak hi.

Source: Al Jazeera and news agencies
A tei: Thang Khan Lian @ Zomi United News (ZUNs)