NA HOIH SEP DING I TAVUAN HI

NA HOIH SEP DING I TAVUAN HI

Argentina state capital Buenos Aires khuapi-ah zoto inn ah neklim nek zawh loh manin gilkial a kap naungek pasal khat zato inn a nasemte buai lua-in a don man om lo hi. Tua naungek kap a muh ciangin omkhong thei loin police officer numei khatin kei mawhpuakna/tavuan hi kei, kei tapa hi kei ci sese loin nawi va pia ahih manin ngalliam hi ci-in kiciamteh hi.

Khristian ka hi, billionaires ka hi ci-in i hihna kisialhpih in awng lanlan napi-in cimawhte, galtaite, gilkial dangtakte, gal in a nawk manin inn leh lo kisiate, gam zawngte tungah huhna piak ding ngaihsut leh hanciam malak sangin huhna piak dinga kamciamna bawl khitsa teng khat khit khat ban khaktan sakin, a gawt behna dingin vive ngaihsun in, aana zangin gawtna leh khalna (sanctions) khat khit khat tungah ban koih khum mite, gamte gamtatna Khristian ngeina ahi zen tam? Gamdang leh minam dangte tungah thupha bawl sangin khat khit khat ban gal bawlin amau tungah gakna leh khalna ban bawl thapai leng Pasian' deihna tawh a kituak zen tam maw? Thupha ngahna ding leh gam liatkik sakna dingin policy hoihpen ahi tam? Gitlohna tawh gualzawh sawm den leng Pasian' deihna bang leh Khristian ngeina tawh kituak-a gamtatna tawh kituak a kici ngei tam?

Jesuh in.....

“No hong itte bek it le-uh cin bang hangin thupha ngah ding na hi uh hiam? Mawhnei mite nangawn in amau a itte a it uh hi. No tungah a hoihin a hong gamtate tung bekah a hoihin gamta le-uh cin bang hangin thupha ngah ding na hi uh hiam? Mawhneite nangawn tua bangmah in gamta uh hi. Ngahkik ding na lametna uh mite tung bekah leitawi na piak uh leh bang hangin thupha ngah ding na hi uh hiam? Mawhneite nangawn in zong a piak zah mah uh a ngahkik dingin khat leh khat kileitawi uh hi. Tua bang lelin note na gamta kei ding uh hi. Na galte uh it in amaute tungah thupha bawl un la, lohkik ding lamen loin leitawi pia un. Tua hileh na thaman uh lian ding a, a Lianpen Pasian’ tate na hi ding uh hi. Bang hang hiam cih leh lungdamna mel a thei thei lo mite leh a huaiham mite tungah amah migi hi. Tua ahih manin na Pa un hehpihna a neih bangin note in zong hehpihna lungsim nei ta un," ci-in Luka 6:32-36 sungah na ci hi.

Khristian i kicih leh i gamtatna, i kampauna leh i ngaihsutnate Lai Siangtho deihna, Jesuh' hong thuhilhna tawh a kituak hiam cih lungngaih phat kik huai mahmah kha ding hi. Bang hang hiam cih leh Jesuh in,

“Kei kiangah, ‘Topa, Topa aw,’ hong ci mi khempeuh, vantung ki-ukna sungah lutthei kim lo ding uh a, vantungah a om ka Pa’ deihna bangin a gamta teng bek lutthei ding uh hi. Tua ni ciangin mi tampi in kei kiangah, ‘Topa, Topa aw, nangma min tawh thu hilh in, nangma min tawh dawite hawlkhia-in, nangma min tawh na lamdang lian tampi bawl hilo ka hi uh hiam?’ hong ci ding uh hi. Tua ciangin keimah in amaute kiangah, ‘Note ka hong thei ngei kei hi. Siatna a gamta mite aw, kei kiang panin kihemkhia un,’ ka ci ding hi," ci-in Matthai 7:21-23 ah na gen hi.

Jesuh in, "A dang khat hong gen leuleu ning: Pasian ukna sungah mihau khat a lut ding sangin phim bilvang sungah kalaoh khat a lut ding baihzaw lai hi,” a ci hi. (Matthai 19:24).

“Biakna tawh kizomin na hoih khat peuhpeuh na sep uh ciangin mite’ phat ding deihna tawh a kilang theithei dingin na sepkhak lohna dingun na kingaihsun un. Tua bangin gamta le-uhcin, vantungah a om na Pa uh kiang panin thaman na ngah kei ding uh hi. “Tua ahih manin mi cimawhte tungah huhna na piak uh ciangin, mite in a phat ding uh a deihna tawh a kineihkhem mite in kikhopna innsung leh kongzing lakah a kilang theithei-in a hih uh bangin na hih kei un. Tua bangin a hih mite in thaman a ngah khinta ahihna thu limtakin na phawk un. Ahi zongin note in mi cimawhte citna tawh na huh uh ciangin na lawm naihuai pente uh nangawn in hong theih lohna dingun pia unla, kuamah theisak kei un. Tua hileh kuama muh lohin na gamtatna uh a mu na Pa un note tungah thaman hong pia ding hi. (Matthai 6:1-4)

Kampi bek tawh Kristian kici lanlan zawh man, innsung leh zum sungah LST, Khristian laibu leh milim suang liapluap zawh man, Khristian pawi zat man, gambup thungetna neih ding sawm man, thunget hahkat man, pastor-te thu ngetsak dingin zum ah cial manin Khristian suah ding cihna hi tuam lo a, Khristian etteh tham cing mi kisuak tuam zo lo ding hi. Nasepna hoih tawh kithuah lo upna pen hi sang lo mi bangin a si ahi hi. Pasian khem zawh ding hilo a, a puatham en loin a sungtawng dong hong encik den pa ahi hi.

Mite’ nasem bangin kingaihsun loin, Pasian’ nasem bangin kingaihsun un la, na sep peuhpeuh uh lungsim takpi tawh lawpin sem un. Topa in note tungah thaman a hong piak ding lamtak phawk gige un. Tua bangin na sepna uh-ah Khrih Topa’ na a semsem na hi uh hi. (Kolose 3:23-24).

Pasian a kikhem zo dingin ngaihsun kha kei un. Mi khempeuh in ama vawh nam khaici mah ngahkik ding hi. Mi khatpeuh in ama leitung pumpi deihna khaici a vawh leh sihna ngah ding a, Kha Siangtho deihna khaici a vawh leh Kha Siangtho tung panin nuntak tawntungna ngah ding hi. Tua ahih manin na hoih sep ding cimtak kei ni. Lungkia loin i sep nakleh a hun ciangin thaman i ngah ding hi. Tua ahih ciangin hunhoih i ngah simin midangte tungah a hoihin i gamta ding a, a diakdiakin thu upna sungah i innkuanpihte khempeuh tungah i hoih gamtat ding i phawk ding hi. (Galati 6:7-10)

Thuhoih a hanciamte in pahtakna ngah a, siatna a hanciamte in siatna mah ngah hi. (Paunak 11:27)

✍️ Thang Khan Lian