JERUSALEM VAI TRUMP' THUKHENSATNA UNGA AH MAJORITY VOTE TAWH NUAM TAKIN KINIAL ZO TA

JERUSALEM VAI TRUMP' THUKHENSATNA UNGA AH MAJORITY VOTE TAWH NUAM TAKIN KINIAL ZO TA

Dec. 22, 2017: US President in ama thuneihna leh deihna bang bek tawh (dictate) UNSC resolution palsat in Israel khuapi dingin Jerusalem a pulakkhiat khitin Egypt sponsored UN draft resolution in UNSC resolution palsat in kuamah in Jerusalem khuapi amau khuapi dingin pulak thei lo ding a, a diplomatic missions uh Tel Aviv panin Jerusalem ah laih theih lo ding hi cih luikhia hi. US in a veto power zangin UN draft resolution a dal hangin UNSC a member dang 14 ten US thukhensatna a dal manun zan in UN General Assembly (UNGA) a draft resolution vote khiatna kinei hi.

UNGA resolution vote khiat ma-in Trump leh UN a US ambassador in US langpang a vote khiate min kila in kiciamteh ding a, huhna sum piak kikhiam ding hi ci-in vauna a hangun UNGA resolution non-binding measure vote 128 in thukimna vote khia uh a, gam 9 in a langpangin vote uh a, gam 35 in vote khia lo uh ahih manin US vauna leh dictatorship style politics pen majority vote tawh UNGA resolution vote ah democracy deih tengin gualzawhna ngah uh hi. 2012 in Palestine tungah UN non-permanent status piak ding US leh Israel makaihna tawh vote 9 bekin a langpang mah bangun US leh Israel guallelhna suak kik hi.

Zan in Trump in, "Amau ten ei tung panin dollars million, billion dollars val hi zaw lai hong laksak uh a, ahih hangin ei hong langpang in (UNSC ah) vote khia uh hi. Pha hi, tu-in tua vote khiate ki-en hi. A ut uh leh hong langpangin vote khia uh hen. Sum tampi zat loh kinei lai hi. Phamawh ka sa kei hi," ci-in White House ah news reporters-te kiangah gen hi. Tua khitin US ambassador to UN Nikki Haley in, "Hong langpang a vote khiate (UNGA ah) min kila ding hi," ci-in gam tuamtuam vauna bawl khum kik leuleu hi.

Zan a 193 body UNGA session ah resolution vote khiatna ding vai pen Arab leh Muslim gam ten Pizing (Monday) in UNSC ah US in draft resolution veto a zat manin UNGA ah vote khiat ding nawhna a neih manun vote kikhia ahi hi. UNSC ah permanent member nga - US, Britain, France, China leh Russia om a, veto power nei ciat uh a, non-permanent 10 om hi. Ahih hangin UNGA ah veto power nei kuamah om lo hi. (*Theih ding: Leitung gam buaina leh bitna ding UNSC in a tavuan a zawh loh ciangin UNGA in tavuan la pan hi).

Al Jazeera' senior political analyst Marwan Bishara in, "UNGA vote result pen US 'mualphona lianpi' hi. UN member state a tamzaw in Egypt-sponsored draft resolution gum uh a, amau ten Palestine a gup teitei loh hangun leitung bup thukham "international legality" gum uh hi. US thukhensatna in international law palsat bangin mu uh ahih manin US thukhensatna langpangin a vote uh khia uh hi. UNGA resolution kipat cil in UN Security Council resolutions pawlkhatte simkhiat masakna kinei a, US in a vote a khit ding or khiat loh ding, Israel in East Jerusalem la-in luahkhum thei lo ding, Israel in East Jerusalem ah teenna ding lam (settlement building) zom thei lo ding cihte kisimkhia masa hi. Gam 128 in international law deih in a vote uh khia uh hi," ci-in gen hi.

Embassy laih ding vai:
Trump in Israel khuapi dingin Jerusalem a ciamtehna a pulakkhiat bek hilo in Tel Aviv panin US embassy Jerusalem a laih suk dingin pulak a, tua-in UN resolution palsat hi. Tu nai-in Jerusalem ah a embassy uh lai gam kuamah om lo a, Jerusalem khuapi pen Muslims, Christians leh Judahte adingin khuapi siangtho leh mun siangtho omna ahi hi. US thukhensatna hangin Israel ukkhumna Palestine leitangte, leitunga major international khuapite - Jakarta panin Istanbul, tua panin Rabat dongah lungphona piang a, luang bang zah hiam hiam kham khin in, mi za bang zah hiam in liamna tuak khin zo hi.

Zan in UNGA resolution vote khiat ma-in Israel Prime Minister Benjamin Netanyahu hin UN "zuau gente inn hi" ci a, "Israel in hih vote tang takin a ki-passed ma-in kinial hi," ci-in Israel leitaw lam ah hospital honna a neihna ah gen hi. "Leitung gam tampi in Israel tunga hong gamtatna uh UN baang pua-ah kilaih a, UN ah zong kikhiitsiang (filter) ding hi. UN pen zuau gente inn hi," ci hi.

Jerusalem status pen mi' lungsim lawng kha mahmah thu (sensitive topic) leh Israel-Palestine buaina adingin a laizanga om thu ahi hi. Israel in 1967 Six Days War khitin Jordan ukna panin East Jerusalem laksak in ukkhum a, 1980 in Israel Parliament in Jerusalem Law kici tawh Jerusalem khuapi bup (East leh West) 'a kikhen lo', 'tawntung' khuapi hi ci-in UN resolution palsat in pulak hi. Ahih hangin Israel ukkhumna West Bank a Palestine makai ten mailam hun adingin Palestine state khuapi dingin East Jerusalem bawl dingin hanciam in lametna lianpi nei uh hi. Jerusalem tu lian dinmun (status-quo) a kilaih leh gam nih tawh thubuai vensakna (two-state solution) bulphuh peace process beina hi ci-in vauna bawl uh hi.

Trump in Jerusalem vai a thukhensatna bawl khitin Palestine a arms political movement Hamas ten US in official in peace process bei hi ci-in a pulakna hi ci-in a thum veina kiphinna (third intifada) kipan hi ci-in pulak uh hi. Zan a UNGA ah UN member gam 128 in majority vote resolution a passed uh pen 2012 in Palestine state in UN non-permanent observer status a ngah theihna dingin US makaih Israel leh gam tawm khat ten a dal zawh lohna uh thupiang khinsa phawk kikna (reminiscent) suak kik leuleu hi. Tua vai-ah vote 138 in upgrade dingin gum uh a, gam kua - US, Israel, Canada leh South Pacific gam pawlkhat ten a deih lohna vote khia uh hi.

#Bottom line: Hauhna kimuanpih a internatioalaw palsat a thukhensat a pheng gamtat mawk pen khuabu pal khak bang bak hi cih hilhna hoih mahmah khat suak hi. Thukham baan pen sau mahmah a, a hau a zawng, a hat leh a thanem deidantuam nei loin tawi tehna man lo zang lo hi cih sinna ding hi pah hi.

Source: Al Jazeera
@Thang Khan Lian #ZUNs

Show More Reactions

ERDOGAN: MR. TRUMP AW, DEMOCRACY I CIH SUM TAWH KIZUAK HILO HI

ERDOGAN: MR. TRUMP AW, DEMOCRACY I CIH SUM TAWH KIZUAK HILO HI

Dec. 21, 2017: Turkish President Recep Tayyip Erdogan in leitungmi kipawlkhawm (international community) ten US "hilhna hoih" a piakna dingin US in Israel khuapi dingin Jerusalem a ciamna hangin tu ni-in UN General Assembly (UNGA) vote khiat ma-in kunh hi. UN a US ambassador Nikki Haley in zan in Donald Trump' thukhensatna langpangin tu ni-a UNGA a vote khiate min kila ding hi ci-in vauna a bawl khit leh tua ma-in Trump in US thukhensatna langpang a vote khiate tungah huhna kikhiam (cut off aid) ding hi ci-in vauna a bawl khitin Erdogan in hih bangin hong paukhia hi.

UNGA a tu ni-a vote khiatna pen zuih teitei ding (non-binding) ahih loh hangin UN body a member gam 193 om ten resolution nuam takin US langpangin pass zo ding uh hi.
"Mr Trump aw, Turkey' democratic na dollars uh tawh na lei thei/zo kei uh hi. Ko thukhensatna kician hi. Leitung bup kiangah: Democracy tawh ki-ukna dingin na gal dona uh zuak kei un. Na zuak uh leh dollars tawm kha bekin hong kileisak ding hi cih kong zasak a, kong ngen hi," ci-in tu ni-in Erdogan in Ankara khuapi-a cultural awards ceremony ah gen hi. "US in a lamet bangin UN ah result ngah lo dingin ka um a, leitungin US hilhna hoih pia ding hi," ci-in gen beh hi.

UN Security Council in US kum sawm tampi US in Israel-Palestine buaina peace talks tawh kilemna bawl ding a policy laihin Dec. 6 ni-a Trump in Israel khuapi dingin Jerusalem a ciamtehna a pulakkhiatna tawi tehna leh tawi khaina UN resolution tawh kituak hiam cih teh ding hi. Pithai (Tuesday) in
UNSC ah Egyptian-sponsored UN Security Council resolution ah kuamah in Jerusalem khuapi-ah a diplomatic missions (embassies) a tuah suk lohna ding uh leh Jerusalem status, hihna leh khuamite, minamte laihna dingin UN resolution omsa a palsat loh ding cih luikhia a, US in a veto tawh a dal hangin UNSC a member gam 14 dang ten US thukhensatna gum loin nang uh hi.

US thukhensat deih lote lakah Turkey pen a nak pau pen hi a, nung kalin amau khuapi Istanbul ah Organisation of Islamic Conference (IOC) khawmpi zindo uh a, tua-a kihel pan-Islamic gam 50 ten Palestine khuapi dingin East Jerusalem pulak uh a, leitung bup in official thukimna a piakna dingun ngetna bawl uh hi. Turkey ruling party MP leh chair of the Turkish parliament's foreign affairs commission Taha Ozhan in, "Trump' thukhensatna langpang dingin Turkey in a gam kiim leh kiangte (regional countries) a paukhiatna dingun nawhna kinei hi. Turkey in hih bang thau keek a, regional actors teng hong gamtang ta uh hi. UN General Assembly ah vote kikhia kik leh a beisa kum tam loin UN ah Palestine gam non-member observer state status piak ding vote a kikhiat lai-in US, Israel leh gam tam loin hong langpangna napi un gamdang ten a kizawhna hong phawk kiksak ding hi," ci-in UNGA ah vote khiat ma-in gen hi.

2012 in UN General Assembly ah Palestine-te UN ah non-member observer status piakna dingin vote a kikhiat lai-in US makaih in Israel leh gam tam loin a langpan' hangun vote 138 kikhia a, vote kua bekin thukimpih lo ahih manin Palestine-te non-permanent observer status in piak dingresolution kibawl ahih manin kipia vive hi. Nung kal bei kuanin Turkey gammi tul tampi in anti-US leh anti-Israel signs tawi-in deih thu tangkona (slogans) tawh US leh Israel ot khum uh hi.

Bottom line: Democracy, international law leh sovereign rights a kampi bek tawh kam beem a otpih in US in UN resolution palsatin dictator bangin thukhensatna bawl in, UNSC ah a veto a zat hangin 2012 in Palestine-te UN non-permanent observer status kipiak ding a dal a guallelh bangin tu tung UNGA vote khiatna ah zong dictator tungah democracy gualzawh kik peelmawh zel ding bang hi. Democracy pen sum tawh kilei thei lo hi cih Trump adingin sinna hoih mahmah leh US vauna kihta om lo hi cih a bil puak lekna suak ding hih tuak hi. USte sum hat manin UN ah democracy pen demon-crazy suak zawh tuak nai lo hi.

Source: Al Jazeera
@Thang Khan Lian #ZUNs