TU HUN-A POLITICAL SOCIETY AH.....
Political societies omna peuh leh democracy tawh ki-ukna gam khempeuh ah milip tamna zah tawh kituakin political voice kinei zo bek hi. "Numbers counts" kici ahih manin a tam pente deihna mah zuih leh lak loh phamawh hi. Milip i tam miaimuai pong hangin i kipumkhat kei a, khat leh khat kikangtuah den in i kitawlem tuah thapi den keei leh cross-votings hangin i number a tam pong hangin huih letkhiat ansi tawh kibang veve hi.
Million khat leh nih nangawn pha zo nai napi hangin i teenna mun peuh ah tam kisa pen (majority) kisa pahpah in i kizang dawn muan luat khak pahpah pong hangin lawi khekhap sunga tui vunna sung bek leitung sasa a ham leekleek uiphuk tawh i kilamdang kei a, akno tuikia mah i kibang likliak den hi.
I tam penna mun ah kithuneisak nuam pah pong in, i ut teng gen in kuku pong in, i deih teng i ban nget/kalh (demands;political claims) in, i deih leh i hamphatna i ngahna ding leh i laihkhiat theihna dingin i ui cithak vei bangin i kipeekpeek keei hangin akno tuikia khat kipummuanna hang bek tawh democratic gam ziinliing bangin liingsak zo sam pah lo ai maw guai....
Tua ahih manin midangte tawh kipumkhatna ding, kihotheihna ding, kituah kilemna ding leh i biakna kibatpih, i ngeina kinaihpih leh i deihna kibatpihte huai siam masakna pen meethuai zaw in, pilhuai leh picinhuai zaw hi. Tuimal neuneu kigawm in tuipi lianpi bawl hi.
I political voice hong kizasak ding deih luat manin lawng tampi in i tuam gingin' sangin lawng khatin gingkhawm zaw in, singkung si khinsa a tuam din' geugau bangin i tol din' gelgal sangin midangte tawh liangko kikim in dingkhawm zaw in, tui taak khat bekin taak kauhkauh den keei sangin a lom in taak khawm leng i gin ngaih zaw a, i din'na kip in kho zaw a, dim baih zaw hi.
I kimuan' luat laitak pen i thanem pen laitak hun na hi zawsop thei a, i hat pai nop luat ciangin i tuk ding na baihlam mahmah kha thei zawsop hi. Buddha in, "Leitung ah thu nam thum bek kiseelcip thei lo hi. Tuate in: ni, kha leh thuman hi," na ci hi.
Tu hun lian bel pangpalek bangin tungnun kituh hun leh kithumansak kim hun ahih manin kua man zaw hiam cih kitel zo lo phot hi. Ahih hangin zuaukungpu kua hiam cih damdam in hun in hong tawlem veve lel ding hi. Thusim leh thuman lo sawt kiseel zo lo a, a mun ding zai awng loin toi lua ahih manin a kilatkhiat peelmawh hun om veve hi. Khuamialna mun nangawn ah khuavak leh meivak a kiseel theih loh bangin thuman kideihna mun ah thuman lo kiseel zo lo hi.
Photos: Khatguak in ihih theihna leh pankhawm manin ihih theih
No comments:
Post a Comment