SINGKUNG LEH NAUPANGNO' TANGTHU

SINGKUNG LEH NAUPANGNO' TANGTHU

Nidang lai pekpek in mun khat ah sang cih takin a sang, gol cihtak in a gol singkung khat om hi. Naupangno khat nisim in tua singkung nuai-ah hong pai-in singliim ah hong kimawl in a gim ciangin hong ihmu zel hi. A tungah kahto in a gahte hong lo, cih bang danin om-a, singkung tawh kilawmta-in nuam hong sa mahmah hi. Singkung in zong amah ngai-in, ama'n zong tua singkung pen hong ngai mahmah hi.

Naupang hong gol zawk deuh ciangin singkung kiangah nisim in hongpai pai nawn lo hi. Nikhat hong pai-in a mai khing in a lung hong khamtuak mahmah hi. Singkung in, “Hong pai in, kimawl kik ni,” ci-in hong zawt leh, “Ut keng. Ka games deihte ka leina dingin sum nong piak leh bek hong kimawlpih ning. Tua lo kei naupang hi nawn keng.” hong ci hi.

Singkung in, “Ke’n zong sum nei lo sese. Ahih hangin ka gahte lo in, zuak lecin sum na ngah ding a, tua hileh na deih kimawlnate lei thei ding hive cin,” hong ci hi. Pasalno zong hong maitai pah in, a gah om khempeuh hong lo gai-in tua teng tawh hong ciah hi. Tua zawh hun sawtpi tak hong pai kik nawn lo ahih manin singkung zong amah guak lungleng in hong om hi.

Tua bang teng tawh lamet loh pi-in ni khat pasalno hong pai kik in, singkung zong nuam cihtak in hong nuam hi. “Hong pai ou, kimawl ni,” hong ci leh, “Kei man nawn lo. Kimawl hun ka ngah ding hamsa mahmah ta. Innkuanpihte teng vai tawh nisim in manlah den hi ing. Tua leh ka omna ding uh inn khat kisam ung-a, nang nong huh zo tam a ci?” hong ci hi. Singkung in, “Ke’n zong inn neilo pi ing e...Hmm…ahi zongin ka hiang teng sat tan in zang lecin innno khat ding cing sam lo ding a?” hong ci leh pasalno zong a singhiang teng inn sing dingin hong sat tan ngai hi. A inn ding uh hong lam zong pah hi. Pasalno a lungdam’ amuh ciangin singkung zong a lung hong dam mahmah hi.

A inn ding a ngah khit ciangin a ngei mah bangin hun sawtpi tak mah hong pai nawn lo leuleu hi.

Tua bangteng tawh singkung zong pasalno a ngaihna hangin lungleng lua-in khakham hong veilawh liang hi. Tua leh khua hong khal ni khat ciangin pasalno hong pai kik seisai hi. Singkung zong nuam cihtak mah in hong nuam in, “Hong pai, kimawl ni,” hong cih leh pasalno in, “Tu laitak ka lungzing lua-in kimawl dihdih kei ni. Hua tuipi tungah gunkuang khat tawh zin leng ka lungkhamna teng veng tuam in um ing! Nang, kei adingin gunkuang khat hong bawlsak zo lo ding maw?” hong ci hi.

Singkung in, “Kei hong phuk in la, teembaw gol mahmah khat bawl lecin hoih in teh. Tua hi kei leh gunkuang bek tawh tuipi tung na pai ding pen nang adingin lauhuai lua sa ing,” ci hi. Pasalno in zong singkung hong phuk in tua tawh teembaw gol mahmah khat hong bawl hi. A deih teembaw hong neih khit ciangin a ngei mah bangin hong kawdawk nawn lo hi. Ahi zong singkung hong maitai zo veve hi. A nuam lua bel hisam lo-in, a it mahmah pasalno’ adingin a pumpi a piak hang hi zaw hi.

Tua zawh kum tampi khit ciangin pasalno hong pai kik pan hi.

Singkung in, “Sorry maw, Boih! Ken kong piak theih ding bangmah na nei nawn lo! “Ka gahte kong pia nuam zongin ka teh leh ka hiangte om nawn lo hi ven. Kingah lua ei, ken zong ka pehna ding hatang nei nawn kei ing. Tua bek hilo lai, na kimawl nuam zongin ka pumpi zong om nawn lo hi ven. Bang hong pia ding ka hia?”

“Hmm…Kei zong teekta ing. Ka thakiam in ni dang bangin kahto zo nawn kei ning” ci-in mipa in dawng hi.

“Aw…aw..hi maw!Tu-in kong piak theih ding dang bangmah nei nawn keng. Na kisap leh hih si-in a keu gai khin ta ka zungte to in, la lecin...Kong piak theih ding tua bek nei lai-ing” ci-in khitui luang kawm sa-in singkung in hong gen hi.

Mipa in zong, “Kei zong tu-in teek in gimlua khin ta ing. Bangmah dang deih nawn keng. Ka belh theih ding, mun neu khat om peuh leh kei adingin kicing khin ta,” hong ci hi.

“Ka bul ah tu in hong tawlnga hithiat in. Kei zong nang tawh kamkum khawm nuam lai ing," ci-in singkung in hong gen hi.

Mipa zong singphung ah hong tawlnga hi. Singkung zong lungdam lua in a cihna ding thei loin a khitui taakte pasalno theih loh dingin hong nulsimsim hi. Banghang hiam cih leh pasalno in singkung adingin a hun hong pia kikzo pan hi.

Singkung tawh a kibang i nu leh i pa’ hong kipiak khiatnate leh hong lunggulhnate phawk loin om kei ni.

By: Dimno’pa

December 9, 2016

PASIAN TUNG PANIN THEIH DING SINNA (LESSONS)

PASIAN TUNG PANIN THEIH DING SINNA (LESSONS) 

Ni khat numei khatin Pasian hopih a, Pasian' kiangah, "Topa aw, ka tun'na ding mun ka teel theihna dingin hell leh vantunggam hong ensak in," ci-in ngen hi. Tua leh Pasian in nong ngetna bang hi ta hen ci-in mun khatah tonpih hi Tua munah kong khak nih na om hi.
Pasian in a kong khak masa pen hong in, ensak a, tua nu in a kong panin a et leh sabuai bek golpi khat tungah an leh meh limci mahmah kikoih mu hi. Tua sabuai tunga nek ding kikoihte lim tuak kisa-in kong khak dongah a nam kiza vauvau hi.

Ahih hangin tua sunga om mi ten an leh meh lim mahmah a om tei hangin cidam mel loin ngawng thei mahmah uh hi. Tua banah a gil uh kial tuak thei mahmah hi. A khutte uh-ah sikkeu kihencip a, a sikkeute uh pen a khutte sang un sau zaw hi. Sabuai tungah nek ding limci a kikoih hangin a khutte uh sangin a sikkeute uh sau zaw ahih manin sikkeu tawh nek ding a suak hangun a kam uh-ah hen/guang lut thei lo uh hi.

Pasian in hell mu khin ta na hih manin vantunggam kong lak ding hi ci-in tua nu kong khak a nihna pen ah paipih leuleu hi. Tua mun-a omte tutna a laizang ah sabuai bem lian mahmah tungah nek ding kicingin om a, ahih hangin hell khuk sunga mite bangin a khutte uh-ah sikkeu kihencipte pen a khutte uh sangin sau zaw hi. Ahih hangin tua mun-a omte nuam sa-in maitai thei mahmah uh a, holim khawm liailiai uh hi.

Tua nu in Pasian kiangah, "Hell khuk sunga omte mah bangin a khutte ua kihencip sikkeute sau zaw hilo maw? Hell leh vantunggam a kilamdan'na om lo hi. Telsiam zo keng! Telsiam zo keng!" ci-in Pasian dong hi.

Pasian in, "Ka tanu aw, lamdangsa kei in, hih mun-a mi ten khat leh khat an kitulh/kipiak ding dan leitung-ah sin in, thei uh hi," ci-in dawng hi.

Source : Heignpragt.com

AKTA DUHGAWK KILAWH KHUH

AKTA DUHGAWK KILAWH KHUH

George kici pen mawtaw hawl a kivak ahih manin a nasepna hatkat mahmah a, a innkuanpihte - a zi leh a ta thumte tawh an zong ne khawm man ngei lo hi. Ni khat ni ciangin a hoihzaw sepna ka ngah theihna ding ahih khak leh cih lametna tawh nitak lam tengin pilna sinna ding lunggulhna tawh class kah den lai hi.

George in a hanciamna lungkimpih loin a innkuanpih ten, "Ko tawh hun kicing zang khawm ngei kei hang," ci-in na phunsan thei zel uh a, George in, "Note adingin khualna hangin hanciam in ka hih theih khempeuh hih in, na hoih pen sep ding a hanciam hi zaw ing," ci-in dawng thei zel hi.

A sawt lo khitteh a laivuanna hong ong (passed exam) ahih manin sepna hoih zaw leh sum tamzaw nasepna thak khat a lunggulh bangin hong ngah hi. A sum muh pen a car hawl lai sangin kicing zaw ta ahih manin a innkuanpihte puan hoih nono guan zo in, a lim nono puak zo in, a vang kim-in gamdangah khualzinpih khia thei zel ahih manin a sepna thak pen amah adingin a sunmang (dream) a tangtung zah liangin ngaihsun hi. Ahih hangin a nesepna ah hun a tamzaw a piak kul banah nasep ding zong tam zaw ahih manin a innkuanpihte tawh hun zang khawm man tuan mel lo hi. Khat vei leh nipi kal khat ta sung bang a innkuanpihte tawh kimu loin na a sep kul hi. Tua hangin a innkuanpih ten ko tawh hun a kicingin nong zang ngei kei hi ci-in phun veve uh hi.

Hun hong pai zel tawh kituakin a za panin khangin za lianzaw khat George in hong ngah hi. A za a khan mah bangin a lawh zong khang ahih manin a zi' awl ding ngaihsutna tawh inn nasem ding innteeng (maid) khat guai a, a inn uh kawkcik sa pian ahih manin inn golzaw khat lei ding ngaihsun hi. Tua ahih manin ni dang sangin na a hah sep zawk ding kisam a, tua banah a za a khan' beh theihna dingin lai zong ni dang sangin a hah sim zawk ding kisam lai hi. A laisim ding a tam zawk banah a nasep ding tam lua ahih manin Nipi ni nangawn in a innkuanpihte tawh hun zang khawm man loin amah sangin a naseppihte leh a sepna a kizoppihte (clients) tawh a kimuh loh phamawh hun hong tam mahmah ta hi. Tua bangin Nipi ni nangawn inn om man lo, inn om man loin a hun beibei ahih manin a innkuanpih ten ko tawh kikholh hun ding hun nong pia ngei kei hi ci-in phunsan ngeingai den uh hi. Ahih hangin George in, "Na khempeuh note kong khualna hang tawh ka sep hi," ci-in kam dam in dawng hiathiat lel hi.

A sawt loin George' za hong khang leuleu a, a sum ngah zong khan' beh ahih manin inn kicing mahmah khat lei zo hi. A inn lei khit a Nipi ni masa ni-in George in a innkuanpihte kiangah no deihna bangin inn ah ka om hithiat ta ding a, ka laisim leh ka nasep ka khawlsan ta ding hi ci hi. Tua a cih khit nung a zingsang kik in George a lupna tung panin tho kik nawn lo hi.

Hihte innkuan tangthu bangin ei Zomite zong a tamzawte pen mi khat bek lawhsa ne damdam in i kiphakvak a, i deih nono gen nuam lai, i duh nono ngen nuam lai napi-in a nasemte kiphunphunsan nuam zaw lai hi. A nasemte khual se loin vangik zaw sem kiguan' beh thei zaw lai a, ganhing van pua vangik zaw a guan beh nuam kitam lai mawk hi. Tua bek tawh hun sa loin inn om man kei teh khawng peuh kicihsan nuam lai hi. Tua ahih manin hong vak zo ta, sum hong khak zo ta ci-in cintui guhtui kang liangin a semte tung panin i deih khempeuh ngetnget tawpsan huai hi. Deih toto thangpai toto den kei in. Akta duh gawl kilawh khuh i pu i pa ten a na ci bangun zusa duh gawl zong thangah awk lawh hi.

Sources: Inspirational Stories : "How To Pray" panin kong teisawm ahi hi.

A NGENTE TUNGAH KIPIA HI

A NGENTE TUNGAH KIPIA HI 

James kici college ah sang a kah lai-in ni khat showroom ah a va dak leh sports car va mu kha hi. A car muh hoih sa lua ahih manin sawtpi va en hi. A car muh deih lua ahih manin a nu leh pa'n leisak zo ding hiam cih zong tel lopi-in ka Graduation ciangin ka sports car muh letsong (gift) dingin hong pia un ci-in ngen hi.

A Graduation ni-in a pa'n phone tawh hopih in ka zum ah hong pai in ci-in sam hi. A pa'n a itna thu leh a tapa a pahtakna thute leh ama hangin angtang a kisakna thu teng a gen khit ciangin a kitun lingleng van bawm (box) khat pia hi. James in zong lawp mahmahna tawh tua a pa letsong piak hong pah samsam hi Ahih hangin a lamet na bang vet loin savun kawm a nei Lai Siangtho khat mu hi. James in a pa ot khum gawp in, "Hau mahmah napi-in nong piak zawh hi Lai Siangtho bek hiam," cih tawh a pa' zum samsiat kawm in nusiat san a, tua bek hi loin a inn panin tai khia sawnsawn lai hi.

Hun leh nite hong bei zel in, kum sawt lo khitteh James pen sumbawl mihausa mahmah khat hong suak hi. Zi melhoih mahmah nei in, ta nih nei a, inn hoih mahmah sungah teng zo uh hi. Ahih hangin a pa tawh a kitelsiam lohna uh leh inn panin a tai khiatna hangin a lungsim tawng khat-ah a dam thei lo meima nei den bangin om hi. Graduation ni a kipanin a pa khatvei beek kimuhpih nawn lo hi.

Ni khat James in laikhak hong ngah a, tua laikhak sungah a pa a sihna thu zaksakna na leh a pa' neih leh lamh khempeuh ama ading ahihna thuzaksakna laikhak na hi mawk hi. A pa inn ah hong ciah kik pah a, lai poimawh tuamtuamte hong phek kawikawi hi. Tua leh lamet loh pi-in a pa'n graduation a ngah ni-in a letsong piak lim takin a kitun kik van bawm mu hi. A pa' letsong piak a muh ciangin a pa' kiang panin a tai khiatna leh a pa awsia teng tawh a ho na kammalte a bengham in za kik ahih manin a khasiat leh a dah suak mahmah hi.

Khitui leh naptui luang kawm in ling keuhkeuh sa-in a pa' letsong piak bawl hong a, a Lai Siangtho lim takin a vel phat leh Lai Siangtho sungah mun khat ciamtehna in a nuai na kigit hi. Tua mun a sim leh, " Note mi hoih lo hi napi-in na tate uh tungah a hoih piak ding theithei na hih uh leh vantung-a om na Pa un a ngente tungah mite tungah na hoihte pia zaw mahmah ding hilo ahi hiam" (Matthai 7:11) cih mu hi. Tua Lai Siangtho tang a sim khit lianin thakhat in car tawh (key) a Lai Siangtho panin hong kia suk hi. Tua car tawh a muh in James in a Sports car deih tawh a hih lam tel pah lian a, tua leh a Lai Siangtho a a en phat kik leh ciamtehna (tag) khat mu kik a, tua tag ah a graduation ni (date) ki-at in, "Car man khempeuh a vek in pia khin zo ing" cih zong kigelh hi.

I nu leh pa ten a neih zawh loh zah dongin cintui guhtui kang liangin hong vak uh a, i nget khempeuh hong leisak, bawlsak, guan zo ding uh hi leh hong leisak nuam, bawlsak nuam den uh hi cih i phawk a, hong deihsak uh pen i mangngilh loh ding thupi hi.

Source : Inspirational Stories "The Name of Your Angel:
Your Angel knows your Future" panin kong teisawm ahi hi.