NA BIAKNA ZUIH NA AAM LUATNA HANGIN MI BANG ZAH THAH BEH SAWM LAI NA HI HIAM?
Biakna/pawlpi (religion or church) leh politics gawm a mek khop (mix) pen tom vei khat sung gualzawhna ngahna dingin galvan hoih mahmah hi napi-in, galvan kihtakhuai pen sia huai pen ahi hi. Bang bang hiam cih leh biakna hahkat lote nangawin amau biakna mah pum gup in sihpih ngam uh hi. Biakna leh politics a kigawmna hangin Jerusalem lakkikna ding ngimna tawh November 27, 1095 in Pope Urban II in Muslim mite' tungah gal na pulak khum a, Holy Land lak kikna dingin “Deus vult!” or “God wills it!” a cih na tangkopih in Holy War pat dingin na hanthawn hi. Hih thu hangin 1095 – 1291 kikal - kum 196 sung vilvel Crusades gal kua vei piikpeek na piang napi-in Pasian' geelna leh thukimpihna hi loin politics ah biakna a meetbawl nuam biakna makaite leh gam makaite' geelna lel ahih manin na lawhsam a (na lawhcing kiau zel sam napi sawt kimang lo), tu dong Jerusalem khuapi bup kila zo tuan loin West Jerusalem lam teng Palestinian mite aa hi den lai hi. AD 70 kum in Roman galkap general Titus' makaihna tawh a suksiat uh Solomon's Temple kisiacip den lai a, tua mun ah Islam biakna zuite adingin mun siangtho pen thumna Al-Aqsa Mosque leh Dome of the Rock ding den lai hi. Crusades war hangin 5 millions bang mihing na kilom thah dingin na kituat hi.
Pasian' teenna biakinn pen Khristian a kicite pumpi hi ci-in I Korin 6:19-20 sungah, "Na pumpi uh, Pasian in a hong piak, note’ sungah a teng Kha Siangtho’ biakinn ahih lamtak thei lo na hi uh hiam? Note’ pumpi, nomau’ neihsa hi lo a, Pasian a’ ahi hi. Note pen Pasian in a hong leisa na hih manun na pumpi uh Pasian’ minthanna dingin na zang un," ci-in Sawltak Paul in na gen a, Rom 12:1 sungah "Tua ahih ciangin sanggamte aw, Pasian in eite tam veipi tak hong hehpih ahih manin ama lungkimna ding leh ama nasepna dingin nomau mahmah a hingtangin Pasian tungah na kipiakna dingun ka hong thum hi. Tua banga kipiakna pen Pasian biakna man taktak ahi hi," na cih beh hi. Na thu upna uh lahna dingin pumpi uh biakna dang zuite muhdahna ding leh thahna dingin a hingtang in kipiakkhiatna pen biakna man taktak na ci het lo hi.
Tu hun-a democractic gam-a biakna leh politics kituam khen ding hi cih upadi (constitution) a secularism palsat in politics ah biakna a meetbawl nuamte bangin Crusades war hun sa zo nai loin biakna leh politics a gawm Europe gam biakna leh gam makaite hangin Roman Catholic church vs Protestant church gumte - Christian a hahkat diak kineihte makaihna tawh kum 30 sung religious war a kici Thirty Years (23 May 1618 – 1648) a kici kum sawm thum sung Central Europe gam sungah na kido ngekngek uh a, mihing 4-12 millions kikal na kilom that beh kik leuleu hi.
Pawlpi lutang ahi Topa Jesuh in i talent i meetbawl ding zia bek hong hilh a, politics ah biakna meetbawl ding zia hong sinsak lo hi. Mi khatin to nih na sem khawm thei lo hi ci-in Matthai 6:24 ah hong hilh hi. Politics leh biakna gawm ding kisam lua hi leh Jesuh in politics na nak tangkopih mahmah in Judea gam a ukcip khum Roman Empire Dona ah na makaih ding a, Messiah in hong pai-in singlamteh tungah biakna leh politics gawm Judah siampite leh Rome gam uk Pilate' khut ah mawhpaihna tuakin singlamteh tungah hong si loin politician makai lian hong suak zaw ding a, a nungzui teng zong missionary in gam tuamtuam ah kuankhia loin Israel in Roman Empire panin suahtakna a ngahna dingin polician suak khin mang ding uh hi. Jesuh in politics thu a gen khaksun lakah Kaisar' sumte Kaisar' tungah na pia un la, Pasian' sumte Pasian' tungah na pia un na ci bek hi (Matthai 22:21).
Biakna hahkat nuam diak kineih in, gam mial leh Pasian' gam a keek beh nuam mite kuamah politician suakin DIRTY GAME hi a kici Liang politics ah kibual dihdih ngei lo uh a, a nuntakna lutang pia khia-in mission field a nasem dingin kuan zaw uh a, Lungdamna Thu za kha nai lote kiangah va tangkopih uh hi. Politics ah nungzui leh vote ngah theihna dingin biakna meetbawl pawl khatte in mi khemna tawh galvan hoih mahmah suak sakin biakna paulap in zang uh ahih manun kimuhdahna khaici a tuhte uh hong khang hanhan a, kitualvatna leh ngongtatna in zui pahpah hi. Leitunga gam khempeuh pen biakna tampi omna (multiculturalism) ahih manin biakna khat ultungsak tuam in politics ah kimawlna a zat pen nuclear galvan zah a kihtakhuai ahi hi.
Kum 33 kiim bang leitung ah Jesuh in hong nuntak sungin a thuhilhna khempeuh sungah politics ah biakna helh in na kimawlpih un la, gal na piangsak un ci-in tha hong pia-in lam hong hilh ngei lo hi. Topa Jesuh in Mual tungah a thuhilhna sungah:
A lungnem mite in Pasian’ ciamsa leitang ngah ding uh ahih manin thupha ngah mi ahi uh hi. Midang a hehpih mite tungah Pasian in hehpihna pia ding ahih manin thupha ngah mi ahi uh hi. Lungsim takpi tawh Pasian a zong mite in Pasian mu ding ahih manin thupha ngah mi ahi uh hi. Kilemna ding deihin a hanciam mite in Pasian’ tate cihna ngah ding uh ahih manin thupha ngah mi ahi uh hi. Pasian’ deihna bangin a gamtat manin bawlsiatna a thuak mite vantung ki-ukna sungah a omte ahih manin thupha ngah mi ahi uh hi. “Midangte in keima hangin a man lopi-in hong simmawhin hong bawlsia a, a nam tuamtuamin hong gensiat uh ciangin thupha ngah mi na hi uh hi. Note adingin vantungah thaman lianpi hong kikoih kholhsak ahih manin tua bang na tuah uh ciangin nuamin na lungdam un. Note’ hun ma-a kamsangte zong tua bangmahin a na kibawlsia ngei ahi hi (Matthai 5:5, 7-12) ci-in hong hilh hi.
Nungzuite lak-a sum kempa Judas Iscariot bangin Topa Jesuh meetbawl in ngun peek sawm thum tawh a zuak bangin politics ah zuakzuak nawn kei in. Judas bangin Jesuh nung na zuihna ah nangma meetna ngahna dingin Jesuh leh a nungzuite bang zah vei thah sawm lai na hi hiam? Sila khatin to nih na sem khawm thei lo hi. Na sat leh sa in la, na vot leh vot vet in. Zakna ding bil a nei khempeuh in hih thu na za ta un. Na biakna zuih pen mi muhdahna ding leh mi thahna ding hilo hi. Politics leh biakna kigawm pen khedap langkhat tuak a khau khih khawm bulh khak tawh kibang a, bulh in pai leng kimuktuk hi.
Thah dinga a kikaikhia mipa honkhia in la, sihna ding mun a zuan mipa lehkaih kik in. Ke’n theikha kei ing, na cihnop hangin lungsim a thei Pasian in theitel veve hi; nang hong encik Pasian in hong teltheihna phawk in. Mi khempeuh a gamtatna bangin a thukkik ding hi. (Paunak 24:11-12)
Khristian na kicih leh a nung na zuih Jesuh maw ahih kei leh politician a kici gam makaite hi zaw maw? Jesuh in, "“Mi khatpeuh ka nungzui a suahnop leh, ama deihna bangin gamta nawn loin, a singlamteh kisuanin hong zui ding hi," (Matt.16:24) na ci napi-in singlamteh pua loin na pum gup political party khat i ideologies bekbek na pua ngaungau kha zawsop hiam? Hih a leitung nuntakna a hu nuamte in a nuntakna bulpi nangawn tawh suplawh ding a, Jesuh' hangin hih a leitung nuntakna a suplawhte in a nuntakna bulpi huzo ding hi. Mi khatpeuh in hih leitung khempeuh a ngah hangin a nuntakna bulpi suplawh leh bang phattuamna om ahi hiam? A nuntakna bang tawh lei kik thei nawn ding ahi hiam? (Matt. 16:25-26). Na biakna zuih na aam luatna (zealous) hangin mi bang zah thah beh sawm lai na hi hiam?
- Thang Khan Lian
