ZOMI TEN I NGAIHSUTNA UH KINGAIHSUT PHAT HUAI HI

ZOMI TEN I NGAIHSUTNA UH KINGAIHSUT PHAT HUAI HI

Camp leh cialpi a om ciangin a piangthak kitam mahmah mahmah napi a sawt loin a ngei a bang suk pahpah kitam mahmah se hi. Siate thugensiam lua maw, pawlpi mite kikhemnop lua maw cih kithei zo lo a, Satan nasepna khauh lua maw, i khaici vawhna mun dai lua maw, i thuciamteh theihna (memory) buah/peeng lua ta maw ahih kei leh piangthak limlim ki-addict gawp maw cih zong kitel zo lo hi.

Kikhopna ah mi' thuman leh genbaang lo bang keek in a khe bang thuap lenlan in a tu beubau kitam mahmah a, biakinn sangkil pusuak khia lian leng thusia leh kha nin tawh a kipawlkhawm pah kitam mahmah se hi.

Laivuanna ding a nai ciangin leh haksatna i tuah ciang bekin biakna hahkat leh thunget hahkat ding bek a ngaihsun kitam mahmah se a, laivuanna bei in, tawm khat i neih leh lam kicing zaw deuh leh antang a thungen banga tang kitam mahmah se hi.

Genbaang lo zah bang keek-a kimihoihsak kitam mahmah a, ei mawhna leh citlahna kitheihmawh bawlin mi' mawhna leh citlahna ding bekbek a leitang zon' den keei leh a muh siam kitam mahmah se hi. Ei gamtatna kuamah hong theihpih ding leh muhpih ding a ut ki-om mel lo napi-in mi gamtatna teng a encik​ den CCCTV camera a bang mi kitam mahmah mawk hi.

Kiteelna ding leh meetna ding a om ciang bekin gam it kitam mahmah se a, makaite gen teng um in a kihon thutuah kitam mahmah se diak hi. Gam makaite zong kiteelna ding om ciang bekin gam it leh thugensiam om se hiam ahih kei leh mipite kimawl lua lai hiam cih zong a ngaihsuthuai mahmah thu khat ahi hi.

Biakna makaite leh i pastorte zong mopawina a om ciangin a thupha piakte uh khauhpai mahmah leh lawhcing mahmah diak se a, mopawi khit kha nga kha guk khit ciangin nau nei kitam mahmah ta hi. Pastorte' vanglian lua maw ahih kei leh a thupha piak uh khauh lua maw ahih kei leh vangam malep ci-a la i saksak pen nupa malep cih sak leh zuih a thuah pah kitam lua ta maw cih zong thu hamsapi khat suak ta hi.

Inn sungah ah maigum ngemngam den napi mipi lakah a om ciangin a maitai seisai leh a kamsiam daldal se kitam mahmah a, mipi lakah a om ciangin a kam sungah i khut guanglut leng zong hong petsak lo ding zah a kibawl siam kitam mahmah se hi.
Inn sungah aw tol lala, hi phangphang napi mipi lakah i om ciangin mite' mitmei ven siam kitam mahmah se a, mipi lakah kidawm lua kisa-in ak gul mu a bang duaiduai kitam mahmah se hi.

Zi leh tate hawmthawh bawl-a, ak tui banga dawm leh a kihta khualkhual kitam mahmah napi-in i sanggamte leh midangte awlmawhna a nei vet lo kitam mahmah se a, mipi lakah a om ciangin vompi halung vei a bang buatbuat se kitam mahmah hi. Ama' ngaihsutna lo gen kha zek leng khuaibu pal khaksak a bang keei kitam mahmah hi.

Mipite phattuampih ding lamsang ah a khut me nangawn a tangsak nuam lo kitam mahmah napi-in mipite phattuampih theih ding a sem, a bawl, a gen leh a gelhte a gensia kitam mahmah se hi. Tu hun ciangin thukizasak media leh social network lamsang a hat minamte mah thunei pen uh a, a ngeina uh leh a laite uh kemcing zo pen, zuak zo pen, minthangsak zo pen napi-in media lamsang nasemte huhna piak ding leh thapiak ding sangin huih thau leh veih bang uh hi cih ngaihsutna nei a, mi gengen nuam kitam lai mahmah mawk hi.

Pasian nasemte adiakin khasum kipia lo hunbit nasemte, evangelist-te, missionaryte leh pastorte thapiak leh thungetsak ngei beek lo napi-in a gensia nuam, a mawhna ding uh leh a citlahna ding bek uh a zong nuam kitam mahmah sese lai mawk hi. Pasian nasem leh biakna uuk i cihte zong mihing mah hi uh a, a thuman lohnate uh tai ngam, hilh ngam, pholak khiat ngam loh ding cihna bel hilo hi. Jesuh in zong biakna uuk mahmah leh minam ngeina a kemcing Farisai leh Saddusi mite zong na tai gawpgawp lel hi. Jesuh' za len ni cihna hilo a, pawlpi mite in a gen ngam pen hoih zaw pek a, lawki ten hong gen leh pholakkhiat ciangin mindaina leh maizumna i tuah pen sah zaw pek hi cih nop man bek hi zaw hi.

Na tutna kuamah in hong sik nitsak ding na deih loh bangin midangte tutna zong va sik nitsak se ken la, na inn kongah nin paih ding na deih loh bangin midangte inn kongah nin va buaibuai nawn kei in. Midangte huan sungah kiak leh ling po-in, tulak bang hi na va cih saksak hangin nang huan sunga kiak leh ling leh lopate na bei tuam lo ding hi cih phawk in.

Vangik pua-a a lel mi khat na huh zawh kei ding leh a hakkol va lak khiatsak se kei in la, a thanem mi khat na huh zawh kei ding leh vangikzaw va guan' behsak se kei in. A puk mi khat na phot nuam kei leh a tung va sik khum beh sawnsawn kei in. Midangte na thusim loh hangin nang zong kuamah in hong thupi muh lua lo kha ding hi cih mangngilh kha kei in. Mi na huh zawh loh ding khat tungah huhna piak ding ciam kha kei in, nang leh nang leiba kiguan tawm se kei in.

Hih khialna (mistakes) pen a maisakna ding baih mahmah napi-in mi khat i muanna i khahsuah khak leh i khan' tawntung hong muan kik theihna ding uh i ngah kikna dingin sum tawh kilei kik zo lo hi.

- Thang Khan Lian