SUNDAY FOOD FOR THOUGHT
Ei khamtung mite pen i ngeina cih ding liang lah hi sam kei napi-in pawi i bawl ciangin ak, ui leh vokte tai tautauna leh kibualna leitual ah i gantate tawh an a nekhawm laite ihi hi. Kitualniam lai mahmah napi-in kikhangto sak mahmah lai zen hi hang. Cidamhuai het lo hi. Leitual ah annek pen i ngeina hi loin cidamhuai lo cih i pu i pate in a theih loh ban uh-ah kuang kicing a neih zawh loh man bekun leitual lakah anne a khangkhia ihi zaw hi. Dawi leh kau biakna zong i ngeina hilo a, vanglian Pasian i theih ma-in dawi leh kaute bia ngeite ihi zaw hi.
Khristian biakna min humbit kineih in zuau bulomtang gen in a kuku khat pum gup ding cih mahmah Lai Siangtho sungah a om loh banah Khristian na hihna na lahkhiatna dinga zuih ding kisam thukhun hi, cih mahmah om keuhkeuh lo hi. Zuau gum ding leh gitlohna leh muhdahna tawh mi dangte a nengniam ding, gam dangte economy teng zawngkhalsakin gilkhialte khual loin keupi tawh giltui liangin a hawp dinga Khristian suak kihi loin thuman thutang din'pih ngam ding, a kinengniam mite khahkhia dinga Khristian suak kihi zaw hi.
Khristian biakna kicite pen angsung ding bek meetna khualna leh thupha ngahna ding bek bek hilo zaw in piakkhiakna leh mi dangin it in khualna, kepna (giving or sharing and caring) hi zaw hi cih Topa Jesuh in a nuntakna leh a thuhilhna panin hong lakkhia leh sinsak hi. Mi dangte na it na khual na kep theihna dingin sum leh paai na hauh masak kisam sese lo hi. Mihau tampi tak lungkim hun nei loin deih toto thangpai toto lel zaw ahih manun mizawng pente hi zawsop uh hi.
Topa in kamsang Isaiah' kiangah hih bangin gen hi:
Kei’ deih antanna hih bang pawl ahi hi: Gitlohna khaute phelin, hakkol savun khaute phel a, a kinengniam mite khahkhia-in thuman lohna hakkol khempeuh suktan ding ahi hi. Na an uh a gilkialte tawh nekhawm un la, inn nei lo a zawngte na innsung uh-ah paipihin, tangguakin a om mite puan silhsakin, na mipihte uh kiang panin bu lo ding hilo na hi uh hiam? Tua ciangin ka maipha pen phalvak tung hong bang ding a, note’ tungah hong taangkhia ding hi.
Manlang takin na liammate uh hong dam ding hi. Note hong ompih tawntungin note kong hon ding a, na nung na mai uh-ah ka hong dal ding hi. Tua ciangin nong thungetna uh ka hong pia ding a, nong sap uh ciangin ka hong dawng ding hi. Mi bawlsiatnate khawlin, mi simmawhna leh kam gilo na paunate uh na khawl uh a, gilkial mite an pia-in, kisapna a nei mite tungah a kisapnate na piak uh leh na kimkot uh-a khuamial pen khuavak hong suak ding a, na lungzinna uh nitaang hong bang ding hi.
Tua ciangin note lam kong lak tawntung ding a, na hoihte tawh kong lungkimsak ding hi. A cidam a thahatin kong omsak ding hi. Tui tampi a ngah tawntung huan, a kang ngei lo ciktui tawh na kibang ding uh hi. Tanglai-in a kisia na munte uh na lamkik ding uh a, khang tampi sung a kisia bulpite na dingtosak kik ding uh hi. Note pen a sia a puahkik, teen'na dingin mun siate a ngei a bangsak kikte hong kici ding hi. (Isaiah 58:6-12)
Sawktakte tangthu sungah thu um masa Khristian a kicite nuntak zia hih bang hi:
Thu um khempeuh kikhawlin omkhawm uh a, a neihsate uh zong a neikhawm uh hi. Amaute in a neih a lam teng uh zuak uh a, a sumte pen amau kisapna tawh kizui-in amaute lakah a hawm uh hi. Ni simin biakinn-ah kikhawm uh a, a innte uh-ah an nekhawmin, lungdamna leh kiniamkhiatna tawh a ne ciat uh hi. Pasian phat uh a, khat leh khat thupha kideihsakin a om uh hi. Pasian in ni simin hotkhiatna a ngah mi kibehlapsak tawntung hi. (Sawltak 2:44-47)
A tunga Pasian' kammal panin socialism kici pen Dawi hi a ci ngamte pen Pasian biabia napi-in Dawi hi a cici teng leh Khristian biakna taktak pen Dawi biakna hi a cici teng na hi khinkhian zawsop uh hi.
Thang Khan Lian
