SYRIAN AIRSPACE HUMBITNA DINGIN PANTSIR, BUK LEH TOR KOIH BEH LOHIN S-400 AIR DEFENSE BEK HUN LO

SYRIAN AIRSPACE HUMBITNA DINGIN PANTSIR, BUK LEH TOR KOIH BEH LOHIN S-400 AIR DEFENSE BEK HUN LO

April 10, 2017: US ten April 6 (Thursday) nitak in Syria gam sunga Homs province a om Ash Sha'irat airbase Tomahawk cruise missile 59 tawh a kapte lak panin 23 bekin airbase kha a, 36 ten a khakna mun kithei lo hi ci-in Russian Defense Ministry spokesman Maj. Gen. Igor Konashenkov in ci hi. USte geelna bangin Ash Sha'irat airbase kisia lo a, MiG-23 fighters 6, storage depot, training na mun, galkapte an nekna mun (cafeteria) leh radar station bek sia a, galkap 8 leh nautang 9 in sihna tuak hi. Defense experts ten missile 23 bekin airbase a khak pen a lamdang thu hi a, Tomahawk missile pen hoih zo maw, a kimanna bei maw, ahih kei leh a kizatna ding hoihpen hun ciam sunga kizang lo (simply duds, past their "best before" date) ahih kei leh Syrian Defense system in 36 na kapkhiatsak hi kha ding hi ci uh hi.

Russian Defense Ministry spokesman Maj. Gen. Igor Konashenkov in US in cruise missile in Syria a kap manin Russia in Syrian air defenses bitna ding leh thakhauh zawkna dingin kihuh ding hi ci hi. Russia in Syriate van poihmawh koihna munte humbitna dingin air defense systems kipuahpha in kikhauhsak beh ding hi ci-in Friday in Ministry briefing a neihna gen hi.

Russian experts ten Russia in Syria gam-a air defense systems a koihte (S-300 leh S-400) pen Russia galkapte leh a vanzat teng bit takin a humbitna (pinpoint defense) ding bekin a koih hi a, US kapna dingin a koih hilo a, US-Russia in Syrian airspace ah a vanglengte uh a kitaihtuah khak lohna dingin "memorandum on flight safety over Syrian airspace" kici thukimna a neih manun Russia in air defenses tawh a lawm USte vante 'friendly' US objects kici kap loh dingin thukimna nei uh hi. Hih bang thukimna pen US in Syria a kap khit nungin hih thukimna Russia in beisak hi. S-400 air defence missile battery pen Russia in Syria a galkapte phual Hmeymim airbase humbitna dingin a koih hi a, S-300 air defense pen Tartus a Russiate Naval base humbitna dinga a koih ahi hi.

Russia in Syrian air defenses khauhsakna dingin S-300 leh S-400 long-range antiaircraft missile systems bek a koih ding pen kicing zo lo ding hi ci-in Moscow a Defense Ministry's Military University professor sem leh Air Force colonel pension Vladimir Karjakin in ci hi. Huih lak panin Syria gam kikapna a kihumbit zawhna dingin S-300 leh S-400 air defense system kikoih pen military-diplomatic gamtatna bek hi a, Turkey leh Russia in zong Syrian airspace sungah vanleng lengsak lohna ding mun Russia leh Turkey in thukimna kibawl a, tua zong phatuam mahmah hi. Ahih hangin hih teng bek tawh Syria airspace kihumbit zo lo dinga, Buk medium-range air defense system, short range Tor leh Kub, leh portable systems- Verba leh Igla zong kisam lai hi ci hi.

Tua banah Syrian air bases leh galkapte phualte (garrisons) Pantsir-S self-propelled anti-aircraft missile leh gun systems zong koih ding kisam lai hi ci-in Karjakin in ci hi. Gun systems in vanleng, helicopter, huih lak-a remote controlled bomb kizangte (guided aerial bomb) leh galte ballistic missile cihte seconds tam lo sung bekin na theithei pahpah in, na kapkhiai thei hi ci hi. Pantsir-S1 pen vanleng kapkhiatna leh thaupi (cannons) kithuah ahih manin huih lak bek hilo in lei lam panin suamna dalna dingin tu lai leitung adingin galvan muanhuai hi ci hi. Pantsir-S1 pen short surface-to-air missile weapon system leh medium range surface-to-air missile weapon system ahi hi. Syria ten Pantsir-S bek nei hi leh US in Tomahawk cruise missile tawh Ash Sha'irat airbase a kap uh piang lo ding hi ci-in gen beh hi. Hih bangin US in Syria a kap manin Syria galkap ten air defense systems kicing in a neih ding uh a sinna (lesson) uh hi a, air defense system khat bekin a gam bup uh humbit zo lo ding hi ci hi.

Karjakin in a thugen a khupna dingin hih bangin Trump in Syria a kap pen kap kikkik lo dinga, cruise missle tawh Syria a kap manin US ah political elite (mihau, laisiam, uliante) mitmuhna uh-ah a thupi ngaihsutna uh (rating) khangsak a, media leh politics lamsanga amah langpang ten a gensiatna bang uh hilo in, mi khauhpai leh thukhensatna kician nei mi hi cih a lahna hi ci hi. Tua bang ngaihsutna leh gamtatna lakkhia nuam bek ahih Syrian air defenses khauhsak beh ding kisam se lo dinga, "poi tak ei cih sangin bit ding hoihzaw hi" (better safe than sorry) a cih bangun air defense systems a kicingin koih in, khauhsak leng tua bek in liam kikna ding panin hong humbit thei dinga van poimawh pen hi ci hi. USte April 6 zan in a gamtatna panin Syria leh Russia in sin ding hoih kingah hi. Thu khatpeuh ah gam khempeuh in thu kikumkhawm dialdial in, buaina vensak ding thutawpna dingin a hoihpen hi. Ahih hangin US tua bang ut loin a phengtat kik uh leh Syria buaina pen buaina lianpi suaksak ding uh hi ci-in a thugen khum hi.

Source: Sputnik
A tei: Thang Khan Lian 

US IN MISSILE TAWH SYRIA A KAPNA MIT TAWH MUPA: "HIH MUN AH KA OM THEIH LAI UH PEN RUSSIA HANG BEK HI" CI

US IN MISSILE TAWH SYRIA A KAPNA MIT TAWH MUPA: "HIH MUN AH KA OM THEIH LAI UH PEN RUSSIA HANG BEK HI"

April 9, 2017: US ten Syria galkap ten Idlib province chemical galvan tawh suam in, mi 80 kiim in sihna tuak hi ci-in ngawh in, April 6 in Tomahawk cruise missile 59 tawh Syria galkapte vanleng phual Ash Sha'irat kapsak uh hi. News report ten a si leh vanleng sia pha zah a gen dan uh tuam tek a, pawl khatin vanleng 7 kisia, pawl khat in 20 kiim kisia in, pawl khat in mi sagih si, pawl khat in mi 16 si ci uh hi. Ash Sai'rat airfield omna Homs governor in bel mi nga si hi ci a, ground reports in bel galkap 8 leh nautang 9 si (naupang li kihel in) a, MiG-23 fighters vanleng guk kisia hi ci hi.

Ash Sha'irat airbase kiang-a khua om Ash Sha'irat khua ten Russiate hang lieuliau in ka teenna uh-ah a teng ngam lai bek ka hi uh hi ci uh hi. Ash Sha'irat khua pen Syria tualgal kipat ma-in mi 1,400 kiim teenna hi a, tu-in a teng tawm mahmah ta hi. Hih khua-a teng Saleh kici kum 45 mi khatin Russia' Svobodnaya Pressa online newspaper ten a interview na-ah, " Syria tualgal hangin a innkuanpihte sihna tuak lote galtai mang khin uh a, ka nu a beisa kum 10 in si a, ka pa 2013 in zatui hamsat man leh siavuan muh ding a hamsat manin cancer natna hangin hong sihsan hi. Ka lawmte tawh hanmual ah ka pa ka vui uh a, ka khua uh hong kisim ding launa tawh ki-om den hi. Gal kipat ma-in sumbawlmi ka hi a, ka sumbawlna ah ka daupai mahmah hi. Tu-in kei bek ka inn ah ka tol teen a, ka inn kianga piteek khat ka kem hi. Gal hangin nasep ding kimu zo nawn lo a, huhna (humanitarian aid) hong kipuakte hang bekin ka nungta uh hi. Russia in huhna hong puakte hong tun' kik kal kingaklah mahmah a, ka khua ua galkap ten US ten cruise missile tawh hong suam man un a sawt loin Russia galkapte hong kisawl pah ding hi hong ci uh hi. Ka galkapte uh US in bomb hong khiat leh dong tuakte huh dingin Russia galkapte hong kisawl ding hi ci-in kamciamna hong pia uh hi," ci hi.

"(Muslimte' zingsang thunget) al-Fajr ka man khit lianin ka inn kiangte kimuh dingin ka pai lai takin US ten missile tawh hong kap uh hi. Thawmging ngaih mahmah ka za a, a bomb puak vak bel ka muh loh hangin bomb hi cih ka tel pah hi. A ging pen hong thawn ziahziah a, bomb puah manin lei kiling in hong naih tektek hi. Tua bangin tatsat loin bomb puak in, lei kiling zom hi. A bomb leh a bomb puak ka muh loh hangin khuami ten ka inn uh hong kha dek hi ci uh a, a inn kongkhakte uh leh a tawlette uh bomb puahna hangin kihong zo hi. Khua sunga van koihna kongte mun tampi kisia hi," ci-in Saleh in ci hi. US ten bomb tawh hong kap lamdang nasa hiam cih dotna a dawnna ah Saleh in, "Kamsiatna tawh ci leng lamdang ka sa kei hi. Ka kiim uh-ah galkap tampi om a, a gen uh kibang a, "Americate gamtatna hi" ci uh hi. Tua bangin TV ah zong hong kipulak pah a, ko khua panin a gamla lo-a om Syrian Armed Forces airbase ngimna tawh a kap uh hi ci uh hi ci-in dawng hi.

A gen khempeuh in US ten a ngim lohpi in un kamsiatna (accidentally) tawh hong kap khak uh hi a cih hangun a thugente uh ka um kei hi. A man takin a hing lai ka hih hangun ko pen a om nawn lo ka hih manun a ut bangbangin hong bawl lel uh hi. US ten a kapna uh-ah chemical galvan kikoih hi a cih hangun om takpi hi leh kap uh ahih manin a nungta ka om nawn kei ding uh hi. Hih bang pen gal bek hilo a, Syria mite lom thahna (genocide) hi ci-in Saleh in ci hi. Hong kikap beh lai ding na lunghimawh hiam ci-a dotna a dawnna ah, "Hih thu pen Syria mi ten ka dal theih uh hilo hi. Na khempeuh Russia leh Americate khut sungah om hi. US ten hong thah nop uh leh Russia bek in hong humbit zo ding hi. President Assad bekin terrorist-te do zo lo ding hi. America ten Assad thah sawm ding uh a, ahih hangin Russia bek in dal zo ding hi. Russia hang bekin ka gam uh a humbit zo lai ka hih manun Russiate tungah ka lungdam mahmah hi. Tu lianin Americate a ut bangbang un a gamtat nuam hangun Russia in phal lo ding hi ci hi.

Saleh in Syria' mailam hun ding pen Russia' mailam hun ding zah in poimawh hi. Bang hang hiam cih leh Syria manthang leh hih banga gam vanglian khat Russia kuamah in phawk in nei nawn lo ding hi. Tua ahih manin hih bang piang lo ding hi. Russia in Syria humbitna dingin galvan thak hong puak sawm hi cih ka za hi. Zan diakin ka galkap major pa in galkap dangte kimuhpih a, ka kisap khempeuh uh hong pia dingin hong ciam uh hi. A kisam khempeuh Russia in hong pia ding hi ci uh hi ci-in gen hi. Ash Sha'irat khua-a teng laite a tai khiat sawm hangun a tai nopna munte uh pen terrorists leh kumpi langpangte (opposition rebels) ukna ahih manin taina ding koimah kinei lo hi. Tua banah US in Assad do sawm ahih manin taina ding om lo zaw semsem lai hi ci hi.

Source: Sputnik
A tei: Thang Khan @ Zomi United News (ZUNs)