A LUNGAIHUAI THAM TU HUN-A GAM UK MAKAITE DEIHNA KICIAN TAKIN A GEN GEORGE CARLIN' KAMMAL HOIH

 

A LUNGAIHUAI THAM TU HUN-A GAM UK MAKAITE DEIHNA KICIAN TAKIN A GEN GEORGE CARLIN' KAMMAL HOIH

"Hong uk kumpite in (governments) a gam mite (milip) a pil ding deih lo uh hi. Bang hang hiam cih leh a pha leh a sia khentel theihna nei le-uh thu kigente ahih kei leh thukhensatna kibawlte nial thei ahih manun tua banga ngaihsutna neite ki-ukkhum zo lo hi. Governments ten siah piak theihna ding ciang bek pilna neite bek leh vote khia thei ding cianga hai milmel leh nekguk takgukna a ciing gam makaite teelcing thei ding mihaite bek deih uh hi."

"Mihai a hon in kipawl khawmte neumuh ahih kei leh neu ngaihsut kha ngei kei in."

George Carlin i cih pen American stand-up comedian, actor, author & social critic hi a, government leh gam makaite ciamnuih thuthukpipi zangin a tawlem den khuaktai mahmah mi khat hi. A kammal zatte leh thugente, a diakdiakin tu hun in populist gam makaite gamtatna leh ngian zatte a a tawlemsak leh pholakkhiatna tam mahmah hi. A kammalte pen critics minthang George Orwell (1903-1950), Mark Twain (1835-1910) cihte kammal zatte leh laigelhte tawh kinaih thei mahmah hi. Hih i gen pak mi thumte' thugente leh laigelhte pen politics ah vote khemna dinga ngian zangte leh mutpute zuaugennate pholakkhiasakin, thuman thutang hangsan takin gen ahih manun mi dangte muhna tawh kibang loin amau muhna bangin thugen (critics, Zokam in mi gensia ahih kei leh a demlah manin langpang ci-in kammal i nak zat mahmah) minthang ahi uh hi.

George Carlin 12 May, 1937 in Manhattan, New York, US ah na piang hi. 22 June 2008 in Santa Monica, California, US ah si hi.

KUA IN BANG GEN?

"Ngaihsutna suakta takin gen khiat theihna (freedom of speech and expression) kilak khiatsak ding hi le'ng gawh dingin a kipaipih a ham thei loin a dai dide tuu (lamb) kibang hi."
- 1st US President (Federalist) George Washington

"President i muhna leh ngaihsutna bangin gen (criticism - Zokam in gensia i cih lanlan pah) theih loh ding, ahih kei leh a man leh man lo ah din'pih ding hi ci-in tangkopihna pen gam itna ahih loh banah sila bangin a na sepsak ding ut luatna ahih kei leh a lungkimna dingin a maipha zon luatna (servile) bek hi loin American mipite lehdona ahih kei leh lehpei-in sawm simna (treason) hi."

- 26th US President (Republican) Theodore Roosevelt

@ Thang Khan Lian #ZUNs reports

3Cing Munluah, Thong Za Chin Samte and 1 other

TU HUN TAWH KISAI KA NGAIHSUTNA

 

TU HUN TAWH KISAI KA NGAIHSUTNA

Arab mite paunak in, "Na dom khiat zawh loh suang pen zahtak (nam) in," (The stone which cannot be lifted should be kissed) a cih bangun, ei deih ei gup in hong zawh loh ciangin kiko, kigim neihna in i zat loh ding thupi hi. Tua mah bangin ei gup ei deih in hong zawh ciangin zong uang lua-in i om loh hoih ka sa hi. Ei deih hong deihpihte zong i lawm hoih pen na hi khin tuan lo hi. Vai khat ah i kituah hangin vai dang khawngah i kituahpih pen dingte hi tuan lo thei hi.

Winston Churchill in "Galte na nei hiam? Hoih ei, bang hiam khat dinpih nuntakpih cihna hi," (You have enemies? Good, that means you've stood up for something, sometime in your life) ci hi. Galte i et dan kibang lo ding a, hong langpan (oppose) om kei leh thudik thuman kimu lo ding hi. Tua hong langpan manin kipum muhdah cih pen picin'na hilo a, ei tawh kipawl lo mi peuhmah mudah ding hi le'ng i muhdah ding leitungah tam lua ding hi. Tua hangin Arab mite paunak mah in, "Nang tungah thusia buaina hong kibawl khempeuh sehnel tungah gelh in la, ahi zongin hoihna phatna hong tung khempeuh suang tungah gelh in," (Write the bad things that are done to you in sand, but write the good things that happen to you on a piece of marble) ci uh hi. Maisak loh ding mi na neih leh na maisak lohte'n lah na phawk se lo dingin nang a maisak lo mi a gim zaw na hi hi. Paunak khat in, "Maisak lohna pen gutui (poison) dawn tawh kibang a, i maisak lohte a si ding i sak leh ei a guitui dawn pen in kisihpih ding hi," ci hi.

Jodahte' paunak in, "Khuaimeivak (candle) khat leina dingin tungsun ni (sun) zuak ken," (Don't sell the sun to buy a candle) ci uh hi. Khuaimeivak leh ni manphatna kikhinkhai ding hileh gen ding hi vet lo hi. Na lungkim loh manin na manpha suplawh ke'n, a manpha het lo khat neihna dingin a manpha mahmah khat zuak khak ding lauhhuai hi. Beh leh phung khawng, i Khristian hihna khawng khuaimei leina dingin i zuak khak loh ding deihhuai hi. Nagaland ah ciamnuih a kigen khat, "Vote (mee) khiat ni in misite zong hong nungta kik uh hi," ci uh hi. Topa' hong pai kik manin thohkikna hi loin zuau bulom tawh gualzawh ding ngaihsut manin misite zong vote piasak uh hi. Tua hangin i gam sungah Pasian sun ni hong tang nawn loin khuaimei vak kiaukiau bek hi.

Kenyate paunak khat in, "Thagum zanga mi a nawkgawp mipa in ngaihsutna kizat ding lau hi," (A man who uses force is afraid of reasoning) ci uh hi. Ngaihsutna zat ding nei i hih leh lungdamhuai in, ngaihsutna nei i hih hangin zat theih loh ngaihsutna ahih ding zong kidawphuai a, tua ciangin ngaihsutna kikupkupna panin hong piangkhia thu pen thu manpha zuih tak thu hi nuam mahmah hi. Tua hangin Democracy gamte ah "Parliament system of governance" ngaihsut sunkhop-kupkhop ki-ukna ahi hi. Tu ni dong i pai zia pen kikupkhop i kam tawh i cih hangin i ngaihsutna a kituah loh ciangin kikhen kibalna in i nei uh hi. "Debate" thu khat a hoih zaw ding muhna dingin kinialna kitung thei nai lo hi. Lai lamah sangpipi i zawh hangin i lungsim ngaihsutna na kawcik mahmah lai cih bang om thei hi. Kei ngaihsutna nong sansak kei ding uh leh ci a kitaisan cih pen picin lohna namkhat hi.

Tua kong gente kei ngaihsutna ahih manin na thukim kei leh zong i muh zia kibang lo hi lel hi. Judahte mi nih a om leh ngaihsutna nam thum om cih kitung hak mahmah lai ding hi. Ei mite mi nga i om leh zong ngaihsutna khat kia paipih kisawm lai hi. A hoih pen zui thei a, amau ngaihsutna khek theite mipil hi. Topa in mimal a sim khempeuh pilna cimna thupha hong pia hen.

 Dr. JM Paupu

NORTH EAST INDIA AH POLITICS VAI-AH A KIBIL KIDAWH DEN THU KUPNA TAM LO

 NORTH EAST INDIA AH POLITICS VAI-AH A KIBIL KIDAWH DEN THU KUPNA TAM LO

Indo-Naga political talks hangin North East a minam tuamtuam in lunglutpih mahmah a, pawl khatte na guk pautauh mahmah uh a, pawl khatte leuleu lah na guk cihmawh mahmah henhan uh hi. A beisa kumte leh tu dong mah Zomi sunga social media ah laigelh thei ta ci-in ut teng gelh tawh, va-ak utong kineih sawm in Zomi kimlai Mizote beel zaw ding maw, Meiteite mah beel zaw ding maw, ahih kei leh Nagate beel zaw ding maw cih thu aisaan banga saan keei dim hi. A thukhupna uh-ah a tam zaw pen Mizote leh Nagate pen Christian ahih manun beel le'ng kisikhuai lo pen leh i Khristian hihna bit pen ding hi cih ciang khawng political thinkers leh political kamsang kineih kihau mahmah hi. Khristian ahih man bekun minam dang, na ngeina kibatpih loh khat na va pum belh sawm ma-in Zomi sunga Christian ahi na pawlpi kibatpih loh teng tawh kilem kituah masak sawm phot lecin minam dang Khristiante na belh nop leh zong hong baihsam zaw deuh ding a, kituah kilem ding lampi ol zaw deuh tuam ding hi. Minam dang ten India government tawh political talks nei-in amau hamphatna ding khuat cihtakin a khuat lai takun ei mite pawl khat (minam ki-itsak mahmahte hi lai) minam dang kuate kiangah kipia le'ng a meethuai pen tam cih tawh a buai henhan, Government of India tawh political talks i neih pikawi (hijacked) ding ngimna nei na tam mahmah bilbel hi. Kikhia tak hang ei. Minam dang suak nuam veve bang Bnei Manesseh khawng ah kipiakhuai sa zaw mai ing. Tua hileh Israel mite pen Pasian' minam teeltuamte hi cih a thukim mahmah pawl adingin lametna lian zaw leh kibang hi. Indian citizen na hih leh India gam a koi mun peuh ah na om a, na teng zongin Indian Constitution Article 23-25 ah Freedom of Religion pen na fundamental right hi cih thei in. Khristian taktak bang keekin na patauhpih henhanna ding om lo hi. Right to property pen 1977 in 44th amendment tawh fundamental rights panin a kilakkhiat hangin na constitutional rights hi lai veve hi cih ciang thei lecin na teen'na leitang leh gam a registration na neih leh colonialism leh imperialism hun hi nawn lo ahih manin kuamah in aana (coercion) tawh hong suhsak theih hilo hi. Pre 1978 Amendment ACT Right to property pen Pre 1978 Amendment Act Article 19(1)(f) ah fundamental right hi napi Post 1978 Amendment Act Articles 31(a), 31(a), 31(a), 300 A ah 1977 in 44th amendment in "right to acquire, hold and dispose of property" pen fundamental right panin kiphiatmang hi. Ahih hangin Constitution a Article 300 (A) sungah "No person shall be deprived of his property save by authority of law" kici ahih manin statutory right suak veve lai hi. I neih leh lamsate registered in a om peuh leh kuama'n hong suhsak theihna ding rights nei lo uh hi. Zomite pen minam dangte zah a tam miaimuai leh ngalhat veva pen i hih loh manin i phawk ding nam nih om hi. Ganhingte lak-a a thahat mahmah humpinelkai leh sahang (kamkei) in ganhing dangte mat ding, balzaan ding leh nek dingin delhdelh in man hi. Ahih hangin a mat khit ciangin ngia hon in delh uh a, tua humpenelkai ahih kei leh sahang in a thaneih teng tawh a mat khitsa suhsak zo ziau uh hi. Ngia (wolf) hon lakah tuute (sheeps) a kipumkhat lai teng ngia in ne zo lo hi. A thahat pen i hih loh hangin i kipumkhat ding thupi pen hi. Ganhingte tung panin sinna hoihpi lak theih hi. ✍️ Thang Khan Lian #ZUNs