US 46th PRESIDENT PRESIDENT DINGA KITEELCING THAK JOE BIDEN' THUGENNA

 

US 46th PRESIDENT PRESIDENT DINGA KITEELCING THAK JOE BIDEN' THUGENNA 

Nov. 8: US incumbent President Donald Trump in Nov. 3 presidential election - a khum vet loin kiteelna ah kidemna (bitterly fought election a kici liang) ah guallelhna lianpi hangin guallel khin mah hi'ng ci-in sang nuam lo a, US President-elect Joe Biden in gualzawhna a ngah khit nungin a thugen masakna ah thukpi in a kikhen khin Ameria gam damsak kik hun ta hi ci-in gen hi. November 20, 1942 in Scranton, Pennsylvania ah a piang kum 77 mi Joseph Robinette Biden Jr. in kiteelna ah gualzawhna a ngah khit nungin a teen'na khua Wilmington, Delaware ah thugenna hih bang teng hi:

Hih gam mipite in thugen khin zo uh hi. A kitelcian gualzawhna hong pia uh hi. Ka Americans mipihte aw, i gam mite in thugen khin zo uh hi. A uphuai ding gualzawhna kician hong pia uh hi. "Ei a Mipite" (We the People) i gualzawhna hi. I gam tangthu sungah presidential ticket vote tam kikhia kikhiat penna ah gualzawhna i ngah uh a, 74 million i ngah uh hi.

Kei tungah upna leh muanna na hong neih ngamna hangun angtanhuai ka hi. I gam red states (Reublicans hatna) leh blue states (Democrats hatna) cih bangin en sese loin United States hi ci-in a ente adingin a kikhensak ding hi loin a kipumkhatsak president hi dingin ka kiciam a, ka lungsim khempeuh tawh mi khempeuh muanna ka ngahna dingin nasem dingin ka kiciam hi.

Tua bang pen America ahihna: a mipite (people) hi. Tua banah tua bang a bulphuh administration (vaihawmna) hi ding hi. America' nungtakna kha; lungsim (soul) a om kik sak dingin president zum (office) tuh ka hi. I gam kingakna; nungzangguh (backbone) - middle class mite a lamkik (thahatsak kik) dingin hih zum ka tuh ka hi. I kiim i kianga gam omte (leitung) in America hong zahtak kikna ding uh leh i gam (i inn ah) ah i kipumkhat kik theihna dingin hih zum tuh ka hi hi. American millions tampi in saupi ka muhna (vision) ka sepkhia theihna dingin ka nuntak hun sungin a mee (vote) uh hong piak manun angtan'huai ka sa hi. Tu-in hih vision a taksuah theihna dingin nasep kipat hun ta hi.

A beisa hun-in tampi vei ka gen khitsa mah bangin, kei pen Jill (Biden)' pasal ka hi hi. Jill' hong itna leh gim leh tawl ing ci loin hong thapiakna (gupna) loin hih ciang ka tung kei ding hi. Hunter, Ashley, ka tute leh a zite uh leh ka innkuante khempeuh hong thapiakna leh nungthuapna lo tawh hih ciang ka tung zo kei ding hi. Amaute pen ka lungtang hi. Jill pen pen nu, galkap nu (military mom) leh pilna siamna hilhin a pattah mi (educator) ahi hi. Jill in a nuntak hun sungin pilna siamna (education) hilhna ding kipiakhia a, ahih hangin lai hilh bek a nasep hi loin ama hihna pen amah ahi hi. Pilna siamna hilhin a pattah America mite adingin tu ni pen ni thupi hi a, note in White House ah mi khat nei-in American president' zi "great first lady" ding Jill hita hi.

A thupi mahmah, numei masa, mivom numei masa, South Asian' suan leh khak masa, hih gam adingin national office ah immigrant khat i tanu Vice-President masa ding ahi Kama Harris tawh nasem khawm ding ka hih manin angtan'huai ka sa hi.

Hih bang a pian' theihna dingin hun sawtpi kingak a, hih bang a pian' theihna dingin tha leh zung tampi suplawh in mapangte i phawk hi. America pen thuman thutang lam manawh in leitung vannuai-ah sia leh pha khentheihna thukhun zangin a kinga gam hi cih ka hong phawksak kik nuam hi. Kamala, Doug - na ut in na ut kei ta zongun note pen ka innkuanpihte na hi uh hi. A zahtakhuai Bidens na hi uh a, na kipelhtheihna ding uh lampi om lo hi.

Ut thu tawh a kipiakhiate (volunteered), Covid-19 pandemic hun in vote khiatna ah nasemte, local election kumpi uliante - na vekpi un i gam sik leh taang dingin lungdamna a tuam ngiatna hong kikoh ding na kilawm uh hi. Hih bang a pian' theihna dingin mapang ka campaign team, volunteers khempeuhte tungah leibat khempeuh kong ba hi. Tua leh tha hong pia-in hong gumte tungah i campaign bawlna angtan'huai ka sa hi. I mapang khawm ziate uh, a zai thei pen ding leh i tangthu adingin minam tuamuam tam pen kipawlin ma i pan' khawm theih angtan'huai ka sa hi.

Democrats, Republicans leh Independents. Progressives, moderates leh conservatives. Khangno leh khanghamte. Khuapi, khuapi gol lua lo leh khuata mite. Gay, straight, transgender. White. Latino. Asian. Native American. Tua banah a diakdiakin, hih campaign ah a niam penna a tun' hun in hong din'pih African American community hi. Amaute kei nungzang hi den uh a, amaute nungzang kei ka hi den hi.

A kipat cil panin america mite sik leh tangin a ding dingin campaign ka deih hi cih mah bangin tua bang i semkhia uh hi cih ngaihsutna ka nei hi. Tu-in a administration zong tua mah a bat ding ka deih hi. President Trump adingin vote a khia mite aw, tu zan in na lungkiat thanem kisakna uh hong theisiam hi. Ke'n zong kiteelna nih vei ka na lel khin zo hi. Ahih hangin tu-in hunpha khat leh khat kipiatuah ni. Cihtakna leh thumanna a kihel lo leh thuman leh khiatna kician nei loin mite thuzawhna dingin kam khauh (harsh rhetoric) zat a satna i khiamsukna ding, khat leh khat i ki-et theihna ding, khat leh khat thugente i kingaihsak theihna ding, i mainawt theihna dingin i khawlsan hun ta a, i langte gal bangin et i khawlsan hun ta hi. Eite pen gal leh sa ihi kei a, Americans ihi hi. Lai Siangtho in na khempeuh in hun nei uh hi ci-in hong hilh mah bangin lam hun om a, a gahte at hun om hi. Tua mah bangin damsak hun om hi. Tu-in America a damsak hun hita hi.

Tu-in campaign hun bei ta a, mipite deihna bang hi hiam? Amaute thukhensatna bang hiam? America in thumanna leh khentuam nei lo thatang a lahkhiat hun hi ci-in hong sam hi. Ei khang hun in galdona lian i tuah thatang in nong nawk lai takin lametna a om theihna in science thatang tawh i do kisam hi. Hih virus (Covid-19) i ukzawhna dingin i do loh phamawh hi. Hauhna, nopsakna (prosperity) i lamna dingin do loh phamawh hi. Na innkuante' health care kepbitna dingin do loh phamawh hi. I gam-ah minam hanga kideidantuamna om loin thuman thuman (racial justice) a om theihna ding leh ahi ding bangin minam dang khat sangin minam dang khat thupi zaw ahih kei leh niam zaw hi cih ngaihsutna (systematic racism) a zungpi i kalhkhiatna dingin i do loh kiphamawh hi.

Khuahun, khualum - khuavot leh nisa guahzu (climate) humbitna dingin do loh phamawh hi. Thumanna a om kikna ding, democracy humbitna ding leh i gam leh mi khempeuh in hamphatna a ngahna dingin do loh kiphamawh hi. Uk zawhna nuai-ah Covid-19 i koih zawhna dingin nasep kipat kisam hi. I economy i puahphat kik theihna ding, i tha i zungte a khauh kikna ding, nuntakna manpha pen ahi i tute kip takin i pom theihna ding, suahni pawi, mopawi, graduations pawite i bawl kik theihna dingin hih virus uk zawh leh kham zawh masak loh kiphamawh hi.

Monday ciangin Biden-Harris COVID Plan leh Jan. 20th, 2021 ciangin action blueprintt omte nasep a kipat theihna dinga hong huh dingin leading scientists leh experts groups-te transition advisors dingin kiguang ding hi. Tua geelna kingakna suang science hi ding a, lainatna, itna leh hhpihna, leh lunghimawhna tawh kilam ding hi. Hih Covid-19 panddemic panin i kiheikhiat theihna dingin nasepna leh hanciamna siit ka nei kei ding hi. Democrat ka hihna kisakheihpihna tawh president ka tuh hi. Tu-in American president ding ka hita hi. President panmun ka let theihna dingin vote hong pia leh hong pia lote adingin na ka sm ding hi.

America a gilo ahih kei leh a sia-in a mial hun (grim era of demonization) a bei kipatna tu-in kipan ta hen. Democrats leh Republicans khat leh khat mapang khawmin nasep khop nuam lohna pen i uk leh kham zawh loh ding thatang hatna a nei hilo a, eite in i teel man hi zaw hi. Mapang khawm thei lo dingin i deihna i teel thei mah bangin mapang khawm dingin deihna i teel thei hi. Hih pen American mite in a lunggulhna uh tawh a thukhenna uh hi cih ka um hi. Amaute in i pan'hawm ding hong deih uh hi.

Tua bang dingin thukhensatna ka bawl hi. Congress, Democrats leh Republicans ten tua bang a teelna dingun ka kunh hi. American tanghu pen ol pai napi-in hamphatna damdam in zai semsem hi. Hihkhiah nei kei ni - sunmang tampi sawt i diah lua khin zo hi. Mi khempeuh - a ci leh sa, a minam, a biakna, ahihna ahih kei leh pianken in mipoi ahi zongin America a taksuahna dingin kamciamna nei ni. America in haksatna tuamtuam i ut lohpi i pal kha khin zo hi.

1860 kum in (Abraham) Lincoln in Union na hunkhia hi. 1932 kum in haksatna lianpi a tuak i gam hutkhiatna dingin Franklin D. Roosevelt (FDR) in New Deal na ciam hi. Kennedy (JFK) in 1960 kum in New Frontier na ciam hi. Tua khit a beisa kum 12 hun in Barack Obama in tangthu na bawl a, "Hi mah hi, I hih thei hi," ci-in "Yes, we can," ci-in hong hilhin hong gen hi.

Tu-in a na/hun haksatsa mun ah i ding kik uh hi. Lungkiatna i zawhna dingin i gam hauhna leh khantohna leh a ngimna nei-in i lam theihna dingin hunpha i ngah hi. I zo ding uh hi. I zo ding uh hi cih ka thei hi. America nuntakna kha/lungsim (soul) gal dona thu ka genna sawtpi hita hi. America' nuntakna kha/lungsim neisak kik ding hi hang. I gam in vantung mi a hoih zaw vantung mite (better angels) leh thakhat thu-in hong nawk thatang/i lunggulhna (impulse) kidona tawh kilam hi. A hoih zaw vantung mite gualzawh hun ta hi. Tu nitak in leitung bup-in America mitsuanin hong en hi. Leitung bup-ah America a hoih penna lahkhiatna tawh i makaih kisam hi cih ka um hi. I thahatna leh vanliatna (power) gentehna (example) diing zangin i makaih kei ding a, ahih hangin gentehna vangliatna tawh i makaih ding hi.

America cih kammal khat tawh a khiatna kigen thei hi cih upna ka nei den a, tua in piangthei hi, hi thei hi (possibilities) cih ahi hi. Pasian in hih theihna leh siamna (abilties) hong piakna ciang a tun' theihna ding leh a sunmang neih ciang uh a i tangtunsak theihna dingun America ah mi khempeuh hamphatna i piak ding ahi hi. Hih gam adingin ahi thei leh piang thei om hi cih ka um hi. I mailam ding i en den uh hi.

America mai ah i lunggulhna banga sepkhiatna leh thuman zawk ding om hi. America mai-ah hihna tawh kituakin nasepna leh zahtakna piangkhiatsak ding om hi. America mai-ah natnate lakah cancer leh Alzheimers cihte a damsak dingin hong ngak hi. America mai-ah kuamah i nung ah i nusiatsan loh ding hi. America mai-ah lungkia-in i khawlsan lohna dingin hong ngak hi. America pen gam thupi hi a, eite pen mihoih ihi hi. Hih in United States of America ahi hi. I pan'khawm ciangin a piang zo lo cih bangmah om lo hi.

Campaign ni tawp kuan hun in hymn la khat ka ngaihsun a, kei leh ka innkuanpihte, adiakin ka tapa phamsa Beau adingin a la kammal leh thute manpha mahmah hi. Ka thu upna ka khahsuah lohna ding leh America kepcipna ding hong phawksak hi. Tua la-in tu kum in a lauhuai hih virus hangin a it a ngaih uh nuntakna 230,000 valte mansuah khinsate innkuanpihte a kuapeuh hong hehnem dingin ka lamen hi. Covid-19 hangin innkuanpihe suplawhte khempeuh kong thuakpih hi. Hih la-in no zong hehnepna leh lungnopna hong guan dingin ka lamen hi:

'"Muvanlai' khate omna ciang dongah

Amah in hong domto ding a,

Phalvak dong hong lenkip ding hi;

Ni bangin nang hong taangsak ding a,

A khut tawh Ama'n hong len ding hi."

Tu-in muvanlai' khate tuangkhawm in Pasian' nasepna ah i tuang khawm ding a, tangthu in hong sapna bangin sep dingte mapang khawmin i sem khawm ding uh hi. I lungsim khempeuh leh i khutte kilen kawmsa-in America leh khat leh khat i kimuanna, i gam i itna leh thuman thutang tui duh bangin i dangtakna tawh i gam leh i minam tun zawhna ding ciangah tungsak ni. Gam leh minam kipumkhat in gam leh minam thahatsakin damsak hi.

Source: The Times of India

@ Thang Khan Lian #ZUNs reports

POLITICS KICI RELIGIOUS DOGMA PEUH SASA-IN A PATAU DEN KHRISTIAN MI TAMPI TAKIN HONG TELKHIAL DEN

 

POLITICS KICI RELIGIOUS DOGMA PEUH SASA-IN A PATAU DEN KHRISTIAN MI TAMPI TAKIN HONG TELKHIAL DEN

Ka pian ka khan panin politician kicite khatpeuh idol bangin ka ngaihsun ngei kei a, political party khatpeuh pum gup leh pum phat cih ka nei ngam ngei kei hi. Ka political idaeologies pen ka rights leh hamphatna ngah khempeuh hong pia liberal ideas leh leftist lamah a awn zawk pian hangin radical liberal or radical left ka hi kei hi. Radical leftist or radical rightist leh Talibanisation of politics cihte ka sang zo kei hi. Tua hi napi-in Khristian Taliban tampi in hong telkhia den uh a, thuman lopi-in hong ngawh den uh hi.

Gam khempeuh in zuih ding Upadi (Constitution) kinei a, Constitution zahtak leh lenkip politician leh party, a political manifesto bangun a semte ka en masa zaw hi. Tu tung US kiteelna ah zong American Constitution zahtak leh zui zaw, humanity leh human rights gum zaw hi ci-in right-wing leh white supremacist ideologies lenkip Trump sangin Democratic presidential candidate Joseph Robinette Biden Jr. pen America mite bek hi loin global democracy cidamna ding, human rights, right to freedom of expression (right to protest kihelin), media freedom, scientific knowledge & innonavation, climate change cih a um, international organizations, international treaties or agreement lenkip zaw hi cih kum 47 sung a political career ah kimu hi.

A tunga i gente a langdo in US in a thukimna letmat thuhsa uh a dokkik themthum niloh den Donald Trump sangin Biden hoih zaw a sa bek ka hi hi. Biden ahi a, politician or party khatpeuh a pum gup keei leh pum phat keei ding ka hi ngei kei a, ka hi ngei kei ding hi. Biden in president a ngah hangin poitics leh media uk khat ka hihna tawh ka ngaihsutna suakta takin ka gen theihna ding freedom of speech and expression ka nei hi. A policies ka deih loh a om leh hansan takin ka gen ding hi. Na ngaklah lua nai kei un.

Politics pen power kituhna leh dirty game ahih manin zuaugen ngei lo leh a thuman zo den politician leh party kuamah om lo hi. Ahi zongin a thuman zaw deuh, zuau bulomtang vive bekbek mutmut leh gen lo zaw deuh, a sia lo zaw deuh (lesser evil) na om den ahih manin apple  muat nihte lak panin a muat lo zaw a limci zaw deuh pen koi hi zaw hiam cih theih leh teel zawk na kisam den hi. Greek mipil "Father of Philosophy" Plato in, "Na government vaihawmna ziate (affairs) thudon loin lunglutna na neih kei leh nang sangin a hai zawte'n hong uk khum den ding uh hi," a cih mah bangin politics kici panin nawlkhin khiatsan a, kidapkoih liuleu den theih hilo hi.

Power ngahna ding ahih peuh leh Khristian min zangin zuau bulomtang vive pian ngen leh mi dangte lauhsakna dingin vauna vive leh gawtna (threat and sanctions) a zang leh right-wing polilism agenda zangin mi dangte ngaihsutna leh biakna dangte thuakzawhna a nei vet lo mite (religios bogot) political agenda a zang den, minam dangte leh gam dangte simmawhna tawh "animals, shithole countries" cih kammal zang muatmuatin a deidantuam den mipa pen Khristian hi ci-in a um ngam lo bek ka hi zaw hi. Bang hang hiam cih leh LST in mi deidan lohna ding thu hih bangin na gen hi:

Lai Siangtho sungah, “Nangmah na ki-it bangin na vengte na it in,” ci-in a genna Topa’ Thukham zui le-uhcin a hoih hi pah hi. Ahi zongin mi na deidan uh leh note a khial na hi uh a, Thukham a palsat na hi veve uh hi. Mi khatpeuh in thukham dang khempeuh a zuih hangin khat a khialh nak leh a vekpi-in a khial mah ahi hi," ci-in James 2:8-9 sungah na gen hi. Pasian um ing a kici makai khempeuh zong Khristian mmakai muanhuai pen cihna na hilo hi. Bang hang hiam cih leh James 2:19 sungah, "Pasian khat bek om hi, ci-in na um hi. Tua pen hoih mahmah hi. Dawite nangawn in zong tua bangin umin lau-in ling deldel uh hi," na ci hi.

Political Science laibu sungah LST tangthu leh kammal kisin ngei lo a, zong kihel been loin gam ki-uk zia hoih zaw a pian' theihna ding thu vive bek kisin hi. Religious dogma pen politics hilo ahih manin politics ah biakna meetbawl in power leh vote ngahna dingin Khristian kineih tawm pak, Khristian mite humbit kineih gamvai gamtatna ah a thuman lo (politically and morally corrupted) politician khat in term khat sung thuneihna a pheng zat niloh den keei cimtakhuai a sa lua mahmah ka hi zaw bek hi.

US President a ngah theihna dingin 2016 election campaign panin Khristian mite humbitpa, khual diakpa leh Khristian taktak hong kineih biangbuang leh samsam Trump in a thuneihna khahsuah ta ahih manin Khristian mite humbitpa, khual diakpa leh Khristian taktak ahihna a lahkhiat nop leh Khristian mite humbitna ding leh noptuamna ngah theihna dingin January 20, 2020 panin full-time in nasem thei ta ding a, a neih a lamte missionary nasepna dingin piakhia-in gammial keekna dingin a muibun zaw sem in a zat theih a kipatna ding hi zaw ahih manin ama dingin thuhoih hi zaw hi. Khristian thu upna ah a hahkat ahihna a lahkhia theihna dingin hun hoih zaw ngah ta hi. A Khristian hihna a kip takpi mah hiam cih hong kilang khia semsem zaw kan lai ding hi.

Trump langpang ka hi kei a, mi dangte khualna nei loin amah bek thupi a kisa (egomaniac), mi dangte hehpihna leh lainatna nei loin amah bek a kipum phatphat leh pahtawi mi (narcissist), sia leh pha khentel theihna zangin mi nial loin mi dangte muhdahna kampau zatna vive bek tawh amah a kideih theihna dingin kampau vive a zang gam makai (demagogue), mi hoih a kineihkhem (hypocrisy), a double standards, a racist leh anti-immigration policies or agenda, sanction regime, mi dangte leh gam dangte vau launa dingin threat and intimidating tactics a zang den, zuau bulomtang vive a mutmut (pathological serial liar) mi ahihna a mudah leh langpang leh kihuai a sa ka hi zaw bek hi.

2020 US presidential election ah voter suppression ngian zangin drop-off mail box ciangtan ding ci-in Republican party hatna states pawl khatte in county khat ah drop-off mail box khat bek koih kei le-uh Trump' makaih Republican party a guallelhna uh nasia zaw ding hi lai hi. Biden in votes tawm ngah sa lua-in lamdang ka sa zaw lai hi. Fascism vs democracy kidona ah democracy in a beisa hun in a zawh den zawk manin tu-in gualzawhna a ngah hi zaw hi.

Right-wing politics vai tawh kisai 1981 Parade ah Billy Graham in a genna ah, "Mi dangte leh a upna uh leh ngaihsutna uh thuakzawhna a nei vet loh limlim khatpeuh ka mu nuam kei hi. Biakna laibu a khiatna a khauh lua-in a khiat mite leh political right (right-wing) a kigawm/kiteen' khak ding ka lunghimawh hi. Extreme right-wing mite in biakna amau deih danin hei kawi ding cih cih loh buang biakna vai-ah lunglutna nei lo uh hi," na ci a, hun sawtpi Communists mite pen "Lucifer' nungzuite hi," a cih khial a kisakna thu zong gen hi.

I Khristian hihna pen mi dangte muhdahna leh a mi gal bawlna ding hi loin thuman lo mudah leh a thu deih loin, ci bangin al-in khuavak bangin i taan'sak ding i mawhpuakna hi zaw hi. Gam Upadi leh Supreme Court in nauphiatna leh neih kibang kiteen'na a phal hangin Khristtian mite Pasian in hong phal lo ahih manin tuate panin kikem in i ciin' loh ding hi zaw hi. US Constitution sunga Fourteenth Amendment in phalna na pia ahih manin 1976 kum in Republican President Richard Nixon' hun in Supreme Court in Roe vs Wade case a thukhenna ah 7-2 vote tawh numei naupaaite liberty tawh kisai "right to privacy" cih thukhun zangin nauphiat na phal a, 2015 kum in Democatic President Obama' hun in Supreme Court in Obergefell vs Hodges case vai a thukhenna ah "fundamental right to marry" cih Fourteenth Amendment bulphuh in 5-4 votes tawh neih kibang kiteen'na na phal hi bek hi. Hih thu nawngkaihuai nihte pen Republicans (Nixon) leh Democras (Obama) in phalna a kipiak hi loin US Constitution bulphuh in Supreme Court in a piak hi zaw hi.

Leitung pen vantung gam hilo ahih manin LST pen gam Upadi hilo hi cih zong i theih kisam a, Khristian kicite in LST kammal bangin nungta-in, mi dangte gamtatna bangin gamta loin i tuam om ngam ding (dare to different) i mawhpuakna hi. I Khristian doctrine pen mi dangte tungah aana (coercion) zangin zawhthawh thu tawh i zuihsakna theihna dingin gam Upadi sungah freedom of religion leh secular democratic gamte ah rights kinei lo a, tua bangin religious bigotry zangin Khristian Talibanisation pen thukham palsatna hi cih zong i theih ding kilawm hi.

Judah kumpipa Jehoiakim kumpi a suah zawh a kum thumna kumin, Babylon kumpipa Nebukhadnezzar in Jerusalem khuapi simin a umcih hi. Kumpi Nebukhadnezzar in a galmatte lakah Daniel (Belteshazzar), Hananiah (Shadrak), Mishael (Meshak), Azariah (Abednego)-te in kumpi inn sunga zu leh sate lim nono a kipiak hangin tuate tawh kininsak loin, kham milim in a kibawl Nebukhanezzar' lim mai-ah bia-in a kun nuam loh manun meiphualpi sungah khiatna a thuak ngam bangun i Khristian hihna i din'pih leh nuntakpih ngam ding hi zaw hi.

Khristian mite a gum leh hu ding gam makai khat muan leh suan in na neih khak leh amau thuneih hun sung bek teng bek mah bit leh muang na kisa ding hi. A kua a kua (makai or party) in thuneihna a len zongin a gam Upadi sunga "freedom of religion" a kiphiat mang mateng patauh luat henhenna ding thu om kiuhkeuh lo hi. A patau den Khristian na hih leh na kikopna Khrist hilo a, a min bekin Khristian hi teh cihna hi.

"Mi i muan sangin Topa belh ding hoih zaw hi. Uliante i muan sangin Topa belh ding hoih zaw hi," ci-in Late 118:8-9 sungah na gen hi. "Topa a muang mite pen ling het loin a om tawntung Zion Mual tawh kibang hi. Jerusalem kimkotah mualte a om mah bangin ama mite’ kimkotah tua kipan a tawntungin Topa om ding hi. Thuman mite a khialhkhak lohna dingun amau a kipia leitang tungah mi gilote in amaute uk paisuak lo ding hi," ci-in Late 125:1-3 kikal sungah na gen ahih manin Pasian a muang mite ling ngei lo uh a, thuman mite adingin khialh khak lohna dingin amah a muang mite kempa zawngkhal lo hi. Khristian patau den leh a man lopi-in mi' polical standpoint telcian lo-in thukhen leh telkhial hi nawn kei in.

@ Thang Khan Lian #ZUNs