NORTH KOREA IN SOUTH KOREA TAWH KIHOTHEIHNA DINGIN KIPHAWKKHIATNA A NEIHNA PEN 'GAM KIPAWLNA' HONG KHEN NOP MAN HI CI

NORTH KOREA IN SOUTH KOREA TAWH KIHOTHEIHNA DINGIN KIPHAWKKHIATNA A NEIHNA PEN 'GAM KIPAWLNA' HONG KHEN NOP MAN HI CI

Jan. 5, 2017: South Korea gam-a US Forces Commander Vincent Brooks in zan in, "North Korea nuclear leh missile programmes hangin kampi tawh kidona US leh North Korea kikal ah a nasia lai takin South Korea tawh kilemna neih theihna ding kihona neihna dingin hong kihon'na in, a sawmkhiatna leh phawkkhiatna (overtures) pen a hoih lam hilo hi," ci-in warning pia hi. New Year address a bawlna North Korean makai lubawk Kim Jong-un in USte pawl South Korea tawh kihona neih dingin ka kihong (ka man hi) a, February kha ciangin Pyeongchang, South Korea ah Feb. 9 panin Feb. 25 kikal Winter Olympics 2018 ah palai (delegate) ka sawl ding hi ci hi.

Kim Jong-un' thugen South Korea in na muak a, North leh South Korea gamgi a khua-ah 'high-level talks' kici kiho neih ding Pithai (Tuesday) in sawm pah a, Nilaini in North leh South Korea ten a kihona uh Feb. 2016 in a khaktat uh border hotline hong kik in kihona nei kik pah uh hi.

Hih thu hangin US Commander Brooks in Seoul khuapi-a university ah a thugenna ah, "Lametna i neih leh level kilawm ciang in tun' ciangin neih ding kisam hi. North ten hih banga South tawh kihona neih kik ding hong sawmna uh (strategy) pen gam nga - US, South Korea, China, Japan leh Russia hong khen nop man uh leh North Korea in a ngimna uh pen "nuclear nei dinga kilawm gam" ci-a a kipom ding a deihna uh hi. US leh South Korea in sikphaw leh mulkiatna banga hiam tem tawh kibang kipawlna (ironclad and razor-sharp alliance) neih ding poimawh hi," ci hi ci-in Yonhap news agency in suaksak hi.

Zanhal in White House in Trump in a Twitter ah, "Experts-te lawhsapna teng tawitehna kinei lai hi. North leh South Korea' tawh kihona leh kilemna thu gen ding kua'n um na hi uh hiam? Ka din'na kip loin, hat loin ut lo ka hih manin US in a thaneih khempeuh North Korea tungah zang ding hi," ci-a a tweeted gum a, Trump in thuhoih gen hi ci hi. US ulian ten North Korea in South Korea tawh kihona neih ding a sawmna zangkhai lak mahmah a, US State Department in North Korea in US leh South Korea kikal hong keek nop man hi ci hi.

#Behlapna: Bang hanga North leh South Korea kikhen a, gal na piang a, kua teng kigolh hiam? North Korea leh South Korea pen gam khatin Communist gam-ah gawmkhawm dingin North makaipi Kim Il-Sung in na hanciam a, South Korea gam-a US galkapte thusiamna tawh South gam democracy lencip dingin zol zo ahih manin South Korea kigawm ding na ut lo dingin a thuzawh manun North Korea in South Korea sim a, 25 June 1950 - 27 July 1953 kikal sung Korean War hong piang hi. Tua khit gal veng khit nungin gam nihte official in gam nih in hong kikhen uh a, kilemna taktak piang lopi in 'armistice treaty'' kici tawh gal hong veng a, gam nihte Korean Demilitarized Zone (DMZ) kici tawh kikhen uh hi. Tua khit nung gam nihte technical in kido den uh a, galpi bel piang kik lo hi.

Korean War pen Cold War hun lai-a Soviet leh United States beel "sattelite nations" kici teng kidona hi. South Korea sim North galkapte kinawk kik a, tua khitin US makaih UN gam kipawlna US, UK, Canada, Turkey, Australia, Philippines, New Zealand, Thailand, Ethiopia, Greece, France, Columbia, Belgium, S. Africa, Netherlands, Italy, West Germany, India, Israel, Norway, *a gum: Taiwan, Cuba, El Salvador, Spain = gam 25) in North Korea sim uh a, ahih hangin North Korea leh amau gum China, Soviet Union, Bulgaria, Czechoslovakia, East Germany, Hungary, Poland, Romania; * a gumte: India (INA galkapte), Mogolia gamte = gam 10 leh INA galkapte bekin na leh nang zo uh hi.

Tua khitin China in South Korea gam sim kik a, US leh UN gam a kipawlpih ten Chinate na leh nang zo kik uh ahih manin galkap thahat zaw om lo (military stalemate) a, Korean Armistice Agreement kici thukimna suaikaihna hong piang thei pan hi. Korean War hangin North Korea in South Korea leitang Keasang ngah a, South Korea in leitang 3,900 km2 meet lawh hi. US leh a pawlte galkap 972,214 lak panin 178,405 na si uh a, 32,925 mang uh a, 566,434 in liamna tuak hi. North Korea leh a pawlte galkap 1,642,600 lak panin 398,000-750,000 kikal na si uh a, 145,000 mang uh a, 686,500-789,000 kikal in liamna tuak uh hi. Hih gal ah South Korea galkap 137,899 si uh a, US galkapte 36,574 si uh a, UK galkap 1,109 leh India galkap 1 si hi. North Korea galkap 215,000-350,000 kikal si uh a, China galkap 183,108 si uh a, Soviet galkap 299 si uh a, vanleng 335 mang hi. Hih bang liamliam hangin US in North leh South Korea gam kihothei kik in, kigawm kik thei leh South-East Asia ah a galkap 28,500 valte galphual ding suplawh ding ahih manin South Korea gam huhna tuamtuam tawh pibawl mahmah hi.

Source: Reuters; The Hindu; Wikipedia
@Thang Khan Lian #ZUNs

Photo: DMZ, Paju khua panin numeino khatin North Korea gam a et laitak

FAMILY-BASED PHALNA TAWH 2017 A US LUT 25% PHIALIN KIAM SUK

FAMILY-BASED PHALNA TAWH 2017 A US LUT 25% PHIALIN KIAM SUK

Jan. 5, 2018: US President Donald Trump in US gam-a phalna tawh gambeel luttheihna (legal immigration) khawlsakna dingin US gam-a omte innkuanpihte (extended family members) "chain migration" a cihte lutna hangin national security vauna leh dengdelna piangsak hi ci-in a dalna dingin US Congress nawhna bawl hi. Trump' nawhna pen legislative action a om loh hangin family-based visas ngah a beisa kum sawm val sangin niampen hi ci-in Reuters in US Citizenship and Immigration Services (USCIS) data review a bawlna panin mu hi.

Family-based visas (I-130s zong a kicizaw) ngah Reuters in review a bawlna ah a beisa kha kua sung 2017 in ni dang tua bang hun sung sangin seh li suah seh khatin kiam a, visa apply bawl ni danga 5,30,000 pen nung kum kha kua sungin 4,06,000 bek om hi ci-in USCIS data ah mukhia hi. 1-130s visa tawh amau innkuanpih lian ahi lo a tanaute uh (relatives) visa ngah nung kum kha kua sungin 70% in kiam a, 2016 in tua banga visa ngah 32,500 pha napi nung kum kha kua sungin mi 1,08,000 bek pha hi. Nung kum 2017 fiscal year bup sunga 1-130s visa ngah pen 2000 kum panin tawmpen hi lai hi (Kum 17 sung adingin mi tawm lut zo pen cihna hi).

USCIS in 1-302 visa category kicing lo ahih manin a manlang thei pen in hih bang visas category kicin'na ding bawl masa sakna ding (prioritises processing visas) kihamciam a, kum sim in kiam zel in a khang zel ngeina (normal year-to-year fluctuations) bangin visa om bang kipiakhia a, thukhensatna kila hi ci hi.

USCIS a new immigration director L. Francis Cissna in USCIS agency ah family-base visas piakkhiatna dingin 'specific policy guidance' kici a tuamin kinei US a gambeelte innkuanpihte (immediate family members) tungah kinei lo a, USIS agecy in visa categories bang teng khemna leh bawltawm (fraud visas) a hong kipankhia hiam cih kikan hi ci hi.

#Behlapna: Trump' travel ban pen Supreme Court in pawlkhat bek Courts tuamtuamte dalna lakkhiatsak (partially lifted ban) pan a, Supreme Court in Trump' travel ban policy ahi bang lianin phalna (full ban) pia hi leh tualgen minthang US vantung tun ding sanga lunggulh zawte sunmang pen a mawkna suak lai ding hi. Trump in American Dreams a cihcih uh American Great Wall suaksak ziau se hi.

Source: Reuters
@Thang Khan Lian #ZUNs

Photo: New York khuapi-a Trump' immigration policies deih lo a lungphona neite

IRAN A MAKAI LIANPEN KHAMEINI IN LUNGPHONA PIAN'NA HANG "GALTE" HANG HI CI; IRAN' REVOLUTIONARY GUARD TEN LUNGPHONA DAI TA HI CI

IRAN A MAKAI LIANPEN KHAMEINI IN LUNGPHONA PIAN'NA HANG "GALTE" HANG HI CI; IRAN' REVOLUTIONARY GUARD TEN LUNGPHONA DAI TA HI CI

Jan. 5, 2018: Iran’ Supreme Leader Ayatollah Ali Khameini in Pithai ni (Tuesday) in televised speech a bawlna ah , "Galte kipumkhat uh a, a pang theihna teng uh, sumte, galvante, policies leh security services zangin Islamic regime Iran ah buaina hong piangsak uh hi," ci-in galte hanga lungphona piang hi ci-in ngawh hi. Iran ulian ten US, Britain leh Saudi Arabia in lungphona pian'na ding lampi sialin lungphona neite tawholh uh hi ci uh hi. Iran gam-a lungphona hangin Tuesday dongin mi 21 in sihna tuak hi cih kiza a, tua khit nung sihna tuak kiza nawn lo hi. US makaihna tawh UN Security ah Iran in lungphona neite human rights palsatin bengdai hi ci-a kinialna neih ding a puaklut bangin kinialna zan in nei uh hi.

Lungphona kipat khit ni nga cin' ni-in central province of Isfahan sunga om Qahderijan ah lungphona nei guk in sihna tuak hi ci-in state TV in Tuesday in pulak hi. Isfahan kiim-a khuapi gol lua lo (town) thum ah Tuesday zan in lungphona nei ten ngongtatna bawl uh a, Iran' Revolutionary Guards galkap khangno khat, police khat leh lampi a ding khat in sihna tuak uh hi. Lungphona kipatna pen Iran gam-a biakna makaite nekgukna hangin nuntakna man ding sang (high cost of living; vanman khang) hi ci-in Iran gam-a khuapi golpen nihna Mashhad panin hong kipan a, khuapi tuamtuam peh hi. Hih lungphona pen 2009 khit adingin Islamic regime Iran in mipi lungphona leh tona lianpen a tuah patna hi.

"Gal ten Iran gam lutsim theihna ding leh do theihna dingin hunlem zong uh hi," ci-in Ayatollah Khamenei in ci hi. Lungphona khuapi tuamtuamte a peh hangin lungphona nei a buaina (unrest) bawl ten makai kician nei lo uh ahih manin policete kongzing lampite ah lungphona neite betdaih kipan pah uh a, Iran khuapi Tehran ah lungphona mun khat Monday in piang man hi. Nung Kiginni tan in police ten lungphona neite 450 Tehran khuapi ah man uh a, Isfahan khua-ah Monday in 100 val man uh hi ci-in ulian ten local media kiangah gen uh hi. Revolutionary Guards spokesman in ko a langtangin ka kigolh ding uh hong kiphal lo a, ahih hangin "gam kiphelkhapna leh keekna ding piangsakte" (“seditionist elements”) gamtatna mipi ten report hong pia un ci-in ngetna bawl uh hi.

*Iran lehdona dinga gam nih val kihelna gal ('Proxy war against Iran’): “Iran' dengdelna ding leh kip-a a om kim lai kip lo/kho lo-a a om beh ding kiphal lo hi. Ulian ten hih bang a beina dingin thukhensatna la ding uh hi," ci-in Revolutionary Guards local branch deputy commander Esmail Kowsari in ci hi ci-in state television in pulak hi. Supreme National Security Council secretary Ali Shamkhani in, "Hih buaina pen Iran mite lehdona dinga gam nih val kigolhna gal hi. Hashtags leh messeges panin Iran thupiang pen US, Britain leh Saudi Arabia panin hong pai hi," ci-in local media kiangah gen hi.

President Hassan Rouhani in lungphona daihna dingin presidency website ah, "Hih thupiang bangmah hilo hi. Mi tawmkhatte in Iran revolution sian'thona a simmawhna uh leh revolution manphatna a simmawhna uh hi ci hi. "Lungphona kipat cil panin matna tuakte thukham palsatna nasia semsem ahih manin gawtna a tuah ding uh zong nasia semsem ding hi. Hih banga lungphona nei a ngongtatte a rights uh ngen bangun kingaihsun nawn lo ding a, Iran kumpi ngim leh lehdo in kituat ta ding hi," ci-in Tehran khuapi a revolutionary court lutang Moussa Ghazanfarabadi in Tasnim news agency-te kiangah gen hi.

Iran Foreign Ministry spokesman Bahram Ghasem in US President in lungphona neite a gupna thu leh leitung bup in Iran thupiang leh human rights palsatna ki-en hi ci-in a Twitter ah ah a thugen dawng kik a, "Trump in gamdangte ngimna tawh simmawh tweets a khahkhah in a hun a mawk beisak sangin amau gam a teen'na ding inn nei lo leh gilkial millions-te leh nisim a mi tampi (dozens) kithahnate awlmawh masa zaw hen. Trump in Iran gam 'terrorist nation' leh Iran panin US a lut dingte a dalna in US's travel ban nung kum in a bawl lai-in 'Persian Gulf' min man lopi 'Arabian Gulf' a zat khit nung Iran mite gupna ngah nawn lo hi," cihsan hi. (*Persian Gulf bek om a, Arabian Gulf kici om lo a, Arabian Sea kici bel om hi).

Iran gam-a lungphona pen nung kal Thursday in kipan a, ama' deihna bang bek-a gam uk (dictator) si hen, Iran kumpi tuk hen ci-in lungphona neite awngin Iran kumpi a deih lohna uh social media ah khahkhia ziahziah uh hi. Nilai ni-in Iran' Revolutionary Guards lutang (head) Mohammad Ali Jafari in, "Ni guk sung kumpi langpangte lungphona dai ta a, lungphona ah mi 15,000 kihel a, 'buaina bawlte" (troublemakers) diak khempeuh kiman khin ta hi. "Sedition 1396' beita hi tu ni-in kici thei hi. Pasian' huhna tawh gualzawhna piang ding hi," ci-in semiofficial Fars news agency-te kiangah gen hi. Zanhal in Tehran khuapi ah "Arecan tungah sihna tung hen" (Death to Americans) ci--in Tehran khuamite awng ta uh hi.

#Behlapna: Iran Foreign Ministry spokesman Bahram Ghasem' thugenna man maw? US gam milip 100% lak panin 0.5% (i.e. 1.56 million) in teen'na ding inn nei lo (Homeless) uh ahih manin emergency shelter or transitional housing program ah October 1, 2008 leh September 30, 2009 kikal mi om uh hi. US ah Great Recession kici sumbawlna kiatna lianpi piang khit nung inn nei lo tam leh gilkial mi tam mahmah hi. US ah nek ding kicing nei kicing nei lo (food insecure) 2015 panin 12.7% in kiamsuk a (innkuan 15.8 million lak panin giat lakah khat food insecure in kiciamteh hi). 2014 in food insecure a kiciamteh innkuan 14.0 percent kiam a, (17.5 million innkuan/households lakah food insecure a kiciamteh sagih lakah khat om hi). 2011 in food insecure innkuan 14.9 percent om a, food insecure a kiciamtehna sangpen tung hi.

Ahih hangin 2015 in food insecurity pen 2007 pre-recessionary level a 11.1% sangin sang zaw hi. Food-insecure households ci-a kiciamtehte pen kum khat sunga dingin innkuan bup kisapna tuamtuamte (resources) hangin haksatna hangin nek ding kicing nei zo lote genna hi a, 2015 in food insecurity innkuan a kiciamtehte pen "very low food security" kicite hi a, nakpi takin kiamsuk hi ci-in Coleman-Jensen 2016b leh United States Hunger Facts, Poverty Facts 2016 - World Hunger News ah kiciamteh hi. Hih thu hangin Obama administration in minsiatna lianpi tuak a, ObamaCare a phuankhiatna hangin mizawng tampi in phattuampih hi. US ah 2013 in nonfatal firearm injuries (thau a kikapliam) 100,000 om a, thau a kikaplum 73,505 (23.3 per 100,000 injuries), amah leh amah kithat/kisihbawl (suicides) 21, 175, thau zatkhialhna leh awlmawh loh/pilvan' lohna hanga kithat kha 505, ngimna lo tawh thau a kithat 281 om hi. Mi 2, 596,993 site lak panin 1.3% thau a kithat/si ahi hi. 2016 US Presidential election ah Democrats candidate Hillary' cin' zawh lohna hang zong hih thu hang zong hi kha hi. Trump in ObamaCare a phiat sawm den manin mi tampi lungkim lohna thu zong hih thu teng hang mah ahi hi. US ah Great Recession (mid-2007 a kipan) pian'na hangin US economy nakpi takin kia a, Obama administration hun sungin US leibat $ 18 trillion val tung hi.

Source: Agence France-Presse; United States Hunger Facts, Poverty Facts 2016 - World Hunger News; Wikipedia

@Thang Khan Lian #ZUNs

Photo 1: Iran’ Supreme Leader Ayatollah Ali Khameini
Photo 2: US a homeless kicite

US NORTHEAST ''BOMB CYCLONE' IN NAWK, MI 16 SI TA

US NORTHEAST ''BOMB CYCLONE' IN NAWK, MI 16 SI TA

Jan. 5, 2017: US leilu-nisuahna lam modern history adingin khuavot huihpih lak panin a hatpen pawl a kigen in States sagih ah khuavot huihpi Hurricane category 1 tawh kikim "bomb cyclone" (blizzard zong ni dingin kisak cih mahmah) kici in nawk kipan taktak ta a, khuavot luat manin mi 16 si ta hi US flights 3,000 val ki-cancelled khin zo hi. Bomb cyclone kici pen technical term hi a, huihpi hatna/nawkna (storm pressure) naikal 24 sungin millibars 24 nuai lam a kiatsuk zawh ciangin bomb cyclone kici hi.

Zan in bomb cyclone hangin New England khuapite tupi pangte tuivot in nawk a, vukkhal dim phengphang pah hi. "Tuipi pang ah pai kei un," ci-in Boston National Weather Service in Twitter ah tuangsak hi. Zan nitak lamin tuihual sangna "tide gauge" kici Boston Harbor ah 15.1 feet in sang a, tua banga tuihual sang 1978 kum bekin na sang ngei hi. Bomb cyclone huihpi hatna 80 mph hi a, hat beh sem kha thei dingin ki-ummawh hi. New York ah vuk sahna letmat (inch) 10 pha ding a, Long Island ah letmat 12 in sah dingin kilamen hi. Ahih hangin khuahun genkhol (forecasters) ten New York ah letmat 8, Philadelphia ah letmat 8 in sah ding hi ci uh hi. Bomb cyclone hangin East Coast kiim tengah mei (electricity) ngawl mi 46,000 pha ta hi ci-in state nga sunga utility companies-te tung panin report kiza hi.

Boston Mayor Marty Walsh in khuamite kiangah kongzing lampite ah vuk kihemkhia nuam a, vut hepkhiat nawngkaisak dingin na mawtawte uh tawh hong pusuak kei un ci-in 12:30 am Jan 5 in a Twitter panin thu zasak hi. Bomb cyclone pen thakhat thu-in atmospheric pressure a kiam vat a, zan khat thu-in low-pressure system piangsak hi. Bomb cyclone hangin Quincy, Massachusetts, kongzing lampi khat vuk lui (icy river) suak hi. Zan bekin US flights (vanleng) 4,300 US flights ki-cancelled hi ci-in Flightaware.com. in ci hi. New York khuapi-a LaGuardia airport zan nitak lamin kihong kik a, JFK International zong kihong kik dingin kilamen hi. East Coast ah sangin za tampi kikhak a, vanzuakna mun sumbukte a van koihnate (grocery store shelves) ah van lei ding kimu zo loin awng in om uh hi.

"Huihpi nasia mahmah hi. Lamet loh tuak dingin kilamen un," ci-in NWS Boston office in a Twitter ah khahkhia hi. Connecticut ah Governor Dan Malloy in khuamite lampi ah om lo dingin kunh hi. Khuahun genkhol ten vuk letmat 6 in sah ding a, huih 50 mph in hat ding ahih manin mei kingah lo thei hi ci uh hi. Nitak lam news conference a neihna Governor Malloy in third-shift kumpi nasem (state employees) zan nitak in huihpi hat diak khit ciangin nasem ciah kik pan dingin thupia hi.

Virginia Gov. Terry McAuliffe in "state of emergency" pulak a, khuamite huihpi panin kikemkhol leh kithawisa-in om dingin zasak hi. Virginia nisuahna lamah vuk khepeek tum a sah kia dingin kilamen hi. "Vuk kiat nasiat luat manin khualzinna nawngkaina, mei mitna leh cidamna leh bitna ding panin dengdelna leh lauhuaina piang ding ahih manin kuapeuh kithawikhol in om un," ci-in McAuliffe kuapeuh kidawm dingin zasak khol hi. Khuavot leh vuk kia record-breaking temperatures kipat dingin kithawi ta hi.

Khuapi tuamtuamte ah record-breaking in vot ding hi ci-in CNN meteorologist Brandon Miller in ci hi. Tu nipi kal bei kuan (weekend) sung New York City leh Philadelphia 3 degrees in vot ding a, Boston ah 7 degrees below zero -- plus khepeek ciang dong vuk kia ding hi ci uh hi. Hong pet lianga huihvot (winds chills) votna pen tu kal bei ciangin minus 40 tung ding hi. Bomb cyclones pen leilu lamah huih vot leh hong pet lianga vot khuahun (icy temperatures) tawh kithuah peelmawh hi. Mars planet sangin tu-in US khuahun vot zaw hi ci uh hi. Bomb cyclone pen North America a huih vot leh Atlantic Ocean a huih lum a kitaihtuah/kinawktuah (collides) ciangin piang mun mahmah a, eastern Asia leh South America ah zong piang zel hi.

Bomb cyclone in tu lianin US Northeast nawk a, zan khat thu-in "bombogenesis" kici ahih kei leh naikal 24 sungin pressure 24 millibars nuai-ah kiasuk a, naikal 21 sungin 53 millibars in kisuk ahih manin manin a beisa history (tangthu) a bomb cyclone-te sangin pressure manlang zaw hi.

#Behlapna: Khuahun kilaih (Climate Change) i cih pen mi' up theih dinga kuphuaktawm, zuau thu (hoax) hi ci ngam leh climate leh weather khen thei lo a buai mi tam lo om laite lak panin US President Donald Trump kihel hi. Climate Change hoax hi ci-in Trump in gam 172 kipawlna in climate change leh global warming dona dingin US in sum tampi a mawkna in kipaai hi ci-in June 1, 2017 in Paris Climate Agreement panin US dokkhia ding hi ci-in pulakkhia a, official in US State Department in Aug. 4 in a kidokkhiatna pulak hi. A dokkhiat pen climate change dona dingin sum US piak ding a thawhkhiat nop loh zong hi a, kidokkhiat taktakna dingin thukham zuih ding (legal procedures) saupi om ahih manin ama' term bei khit ma US official takin kidokkhia thei lo ding hi.

US in a baihlam pen in Paris Climate Agreement Nov. 2019 in kidokkhia (withdrawal) sawm a, ahih hangin zum tawh paikan in kidokhiatna (officially exit) US presidential election kik ni November 4, 2020 khit ciangin bekin kidokkhia thei pan ding hi. Dec. 3 in zong Trump in gambeelte leh taitaite huhna ding a kipawlna UN Migrants and Refugee Pact panin US na dokkhia hi. Leitunga na lui, khuapi luite mun poimawhte leh siamsinna leh science lam laptohna dinga leitung kipawlna UNESCO panin zong Oct. 12 in US na dokkhia hi. Trump' hangin gambeel, galtai leh cimawh tampi leh leitung bup haksatna kum khat zong pha nai loin piang ta hi.

Climate change i cih in leitung bup satna "Global warming" bek piangsak lo a, thakhat thu-a khuahun kilaih vatna, vot luatna, vuk nasia tak-a kiatna, khuakheng (drought), guahtui a zuk hun lopi zu vat, guahtui tam luatna, upmawh hun lopi in mualmei/tangkang (volcano), ziinliing, leh adng dng tampi piangsak hi. 7:01 Dec. 28, 2017 in Trump in a Twitter ah, "Nisuahna (East) ah pen New Year's Eve adingin a votpen hun a ckiciamtehna tung kha ding hi. I gam lumsak (Global Warmining a genna) in khua vot hong huh kha thei ding a, gamdangte aa in hong huh lo ding hi. Tua dalna dingin trillion dollars kihumbit hi. Na kawng gak un," cih tuangsak bak hi. 6:33 am Jan. 3 in, "Boom cyclone in a theih loh hangin ama' bomb sangin kei bomb golzaw hi," cih tuangsak lemluam kik hi. 6:58 am Jan 3 in, "Big Baby, "Bomb Cyclone" in US 54 millibars tawh hong vau hi. Megaton bang zah hong kia hiam enkhia ni. Guallel/lawhsamte aw," cih tuangsak kik hi (a millibars gen zah zong man lo hi). US mite nuntakna 16 in luangkham ta a, Trump bel Kim Jong-un tawh kambeem in a kido loh sung nangawn climate change tawh kidona ding na mu veve hi. President khat leh khuahun tawh a kidona ngekngek ahi hi. Kua'n a zo tam?

Source: Vice News; Reuters; CNN, Business Insider; Wikipedia; www.un.org; VOA; Independent; Patheos; Wikipedia

@Thang Khan Lian #ZUNs

https://www.facebook.com/vicenews/videos/946511145508836/