CHRISTIAN HYMN-TE' TANGTHU
"A Sia Ding Honkhia In (Rescue the Perishing)"
(Luke 14:23)
Fances J. Crosby (1820-1915)
William H. Doane (1831-1915)
(Luke 14:23)
Fances J. Crosby (1820-1915)
William H. Doane (1831-1915)
Kum tampi sung New York City-a Bowery Mission (tu’n kiphel khin) a tutphah khat’ tungah, “Kum 50 val sung hih mission ah Fanny Crosby hong hawh simin hih tutphat tungah tu den hi. Hih tutphat tungah a tut laitakin “A Sia Ding Hon In” cih gospel la ngaih a phuah nading inspiration ngah hi” ci-in sumngo pek khat tungah kigelh hi.
“1869 kum, keima’ kum 49 ka phak kum ahi hi. Ka la phuahte tampi pen New York mission-a ka kihel khit-a ka phuah ahi hi. Hih la mahmah zong tuate laka khat ahi hi. Nisat mahmah ni khat nitak lamin nasemmi tampi a kikhopna mun ah thu ka gen hi. Tua banga thu ka gen laitakin nupi khat’ tapa tua nitakin a kihotkhiat kei leh cikmah-in kihonkhia zo ngei nawn lo ding hi, cih ngaihsutna bekbek ka lungsimah hong suak hi. Tua ahih manin, tua kikhopna sungah a nu’ inn leh thuhilhna pana a pialmang tangval khatpeuh a om leh kikhop man ciangin kei’ kianga hong pai nading nakpi takin ka gen hi. Kum 18 a pha tangvalno khat hong dingto-a, ‘Tu-a na gen pen kei ka hi hiam? Ka nu’ kiangah. ‘Vantungah kimu ni’ ci-in kamciam ka piak hangin tu-a ka nuntak zia peuhmah tawh piang thei lo ding hi’ ci-in hong gen hi. Tua pa’ adingin nakpi-in thu ka ngetsak uh a, a tawpna ah tua tangvalnopa maitaii seisai-in hong dingto-a, ‘Tu’n bel ka nu tawh vantungah kimu kik thei ta ning ei, Pasian mu ta ingh ei’ hong ci hi.
“Tua hun madeuh-in Dr. Doane in, Luke 14:23 bulphuh-in, “A Sia Ding Honkhia In, A Si Ding Don In” cih la thulu khat hong khaka, tua thulu tawh la dawng khat ka phuah nadingin hong ngen ngei hi. Tua nitakin ka lungsim ah thu dang khat mahmah zong om lo-a, inn ka tun ciangin hih la ka phuak pah-a, ka lup ma-in a la-aw bulh ding bekin samin ka mansiang hi. A zingsang ciangin tu-a kisasa la-aw bulhsak dingin ka lamalte Dr. Doane ka khak pah hi.
“1870 kuma kikhen Dr. Doane’ bawl Songs of Devotion labu sungah kihel-a a kikhet masaknapen ahi hi. Hih la ka phuahna mahmah ah Pasian in i tuahkhak thute leh midangte’ hong piak ngaihsutnate gawmkhawmin a hoihpen dingin lemin nasem den hi, cih kimu thei hi” ci-in laphuaknu Fanny Crosby in gen hi.
Hih la a phuak Fances Jane Crosby pen America gam Southeast, New York ah March 24, 1820 ni-in suak hi. Fanny J. Crosby ci-in kitamlawh zaw hi. Kha khat leh a lang (nipi kal 6) a phak ciangin a mit na-a, zatui kizang khial a hih manin a mit taw-a, a khan tawntung mit khua mu lo-in om hi. A sih dongin New York City-a St. John’s Methodist Episcopal Church ah pawlpi mi citak mahmah khat-in om den hi. A neutunga kipanin a pi in thu le la kici khempeuh ah pantah hi. New York School for the Blind kici mit khua mu lote’ sangah pilna sin hi. 1847 kum panin 1858 kum dong tua sang mah ah sangsia sem hi. 1958 kumin tua sang mah-a sem mite’ zahtaak mahmah music sia Alexander Van Alstyne tawh kiteng uh hi.
A neu tunga kipan in laphuah lam a vak hi a, ahi zongin a la phuahte leitung la pian vive hi zaw hi. Kum 8 a phak laitakin a mit in khua a muh loh hangin a lungkimna hih bangin poem khat na phuak hi:
Oh, what a happy soul I am!
Although I cannot see,
I am resolved that in this world
Contented I will be.
How many blessings I enjoy
That other people don’t;
To weep and sigh because I am blind,
I cannot, and I won’t.
Although I cannot see,
I am resolved that in this world
Contented I will be.
How many blessings I enjoy
That other people don’t;
To weep and sigh because I am blind,
I cannot, and I won’t.
A poem phuahte lakah, “Rosalie, the Prairie Flower” kici la a phuahna hangin $3,000 ngah ngei a, tua hun adingin tawm het lo hi. Church music lam-a minthang mahmah William B. Bradbury’ thuzawhna tungtawnin kum 40 a phaka kipanin gospel lamal bek phuaka, ama’ genna ah “tua gam sunga a lungnuampen mi” hong suak hi. Fanny Crosby in la a phuah ciangin khukdin-in thungen-a Pasian’ makaihna zong masa lo peuhmah-in la phuak ngei lo hi. A Laisiangtho sungah American lan (flag) khat tep liklek den se hi. Ama’ hun-a gospel laphuak minthang mahmah Ira D. Sankey, William H. Doane, John R. Sweney, George C. Stebbins, George F. Root, William J. Kirkpatrick, leh adang tuamtuamte tawh kithuah-in la tampi phuak hi. A khan sunga a la phuah pongpong dawng 8,000 val hi ci-in kiciamteh hi. February 12, 1915 ni, ama’ kum 95 a phak laitakin i Topa’ kiang hong zuatsan hi.
Fanny Crosby’ phuah late lakah hih la “A Sia Ding Honkhia In” (Rescue the Perishing) banah, “Lungmuanna Thupha” (Blessed Assurance), “Amah Thei Ning” (My Savior First of All/I Shall Know Him), “Lam Tawntung A Hong Paipih Hi” (All the Way My Savior Leads Me), “Pasian Min Pha Ta Hen” (To God Be the Glory) cih la ngaihte kihel hi.
Hih la a aw a phuakpa William H. Doane pen America gam Preston, Connecticut ah February 3, 1832 ni-in suak hi. Mihau mahmah khat hi a, factory president khat ahi hi. A om ngei nai lo van-zat thak nam 70 phuankhia hi, kici hi. Music lam a uk mahmah hangin nasep-a nei bel hi lo hi. Tua hun lai-a gospel musician minthang mahmah khat hi veve hi. A nuntak sung buppi Mount Auburn Baptist Church of Cincinnati, Ohio ah pawlpi mi-in om den-a, kum tampi sung Sunday School superintendent leh choir leader sem hi.
A aw a phuah gospel la dawng 2,000 val hi. Tuate lakah hih “A Sia Ding Honkhia In” (Rescue the Perishing) banah, “Hong Paisan Ke’n Migi Topa”(Pass Me Not, O Gentle Savior), “Nang A Hi’ng, Topa”(Draw Me Nearer), “Singlamteh Kiang”(Near the Cross), “Pasian’ Min Pha Ta Hen”(To God Be the Glory), “Zeisu Min Manpha Na La In” (Take the Name of Jesus) cihte kihel a, a tamzaw-in Fanny Crosby’ la phuahte a aw phuahsak denzaw hi.
A tei : Rev. Zam Khat Kham (Christian Hymn te’ tangthu 2005)
Courtesy : Zomi Daily
Maan : Fanny Crosby
Courtesy : Zomi Daily
Maan : Fanny Crosby
