Zomi Khristiante Sungah Kilemkikna
(Reconciliation amongst the Chin Christians)
-By Rev. Dr. Pau Khan En
Mihingte' teenna leitung in kilamdanna leh kibat lohnate in zem hi. Minam kibat lohna, melpuak kibat lohna leh kampau kibat lohnate pianpih hi a, uttawm thu-in kikhel thei lo hi. Sum-le-paii zon zia, gam kimakaihzia ahih kei leh thungaihsutna-thupom zia cihte pen mihingte bawltawm thu hi-in, mihingte' ut thu leh khensatna zui-in kikhel thei hi. Hih kibat lohnate leh kilamdanna tuamtuamte i bulphuh luat ciangin kimuhdahna, ki-etsatna, kikhenkhapna leh kibawlsiatnate tam veipi a pian banah i mihing nuntakna sungah kilemnana ding leh kithuhual na ding khaktan tawntung hi.
Khel theih loh ding pianpihnate a kikhelsawm tak ciangin a dahhuai thu ahi hi. Khel theih loh pianpihnate khel a kisawm ciangin siatna leh hemna tampi piang thei hi. A lang khatah, mihingte' khantohna dinga a kikhel thei thu pawl khat a kikhel loh ciangin zong kiamsukna leh man'thanna piang leuleu hi. Hih munsan takah tualnuntakna dinga thukhung siam Reinhold Niebuhr' thungetna i pawk ding kisam hi:
"Maw Topa, a kikhel thei lo thute ka sansiam theihna dingin lungduaina hong guan in la; a kikhel thei thute khel theihna dingin hansanna hong guan in; hih thunihte ka khentel theihna dingin nopna hong pia ta peuh in."
A tung-a i gen thute siksanin Zomi Khristiante' nuntak-khuasak zia i lungngaih kik ciangin i Zogam nuntakna a ginat zawk theina dingin kikhelna a kisap lam mite in mu a, a lunggulh ciang bekin i kilamdannate kitelsiamna-in nei in, khel theih ding thu tampi i neih lam i kimu thei pan ding hi. Kum za khat bang a khangham Zomi Khristiante in a beisa thute enkik a, kilemkikna leh kipumkhatna tawh i mailam ding i lamphat ding kisam hi. Tua bang ngimna tawh Zomi Khristiante hong kitamkhamsak bang thu hi a, bangci leng i kitapna meimate damkik theih ding, cih thu hih thului sungah kisung ding hi.
A. Zomi Khristiante' Thu Sittelna
(Diagnosis of Chin Christian Society)
Zomi Khristiante hong kitamsak thu masa khat in i tual lungsim (localism) ahi hi. Thu tuamtuam hangin Zomite mun tuamtuam leh khuata tuamtuam ah kithehthangin teeng uh hi. Tua manin amaute in makai tuamtuam leh ngeina tuamtuam nei ciat uh hi. Tua khuate ah pau leh ham tuamtuam zong piangpah hi. Kizop-kivanna hamsa ahih manin khua khat leh khua khat mi tuampi suak uh hi. Kidemna tuamtuamte in zong mikhual hong tangsak hi. Tual lungsim neihna hong khang semsem a, Khristian a suah khit ciang nangawn un tua in kikhenna piangsak hi. Tual lungsim, kual lungsim, leh huang lungsim neihnate in Zomi Khristiante lakah a kigen khia lo hong kitamkhamsak lungsimte ahi hi.
Hong kitamsak thu nihna in i pawl lungsim neihna (denominationalism) ahi hi. Khristian biakna ah a kikhel khit uh ciang nangawn un Khristian pawl tuamtuamin kikhen lai uh a, RC pawlpi, Tuiphum pawlpi, Methodist pawlpi, Presbyterian pawlpi, SDA pawlpi, leh AG pawlpi ci-in kikhen lai uh hi. A tual lungsim uh pawl lungsim in behlap lai ahih manin kitapkhap lohna ding thu om lo hi. Khua-le-tui sungah Pawlpi tuamtuam hihna in hong khenkham ahih manin i tual nuntakna ah kipumkhat ding baih lo hi.
Hong kitamsak thu thumna in i Pasian' thusan dan ahi hi. 1970 kimin khanlawhna Zogam ah limsang upna lim pua in, pawlpi sungah hong lut hi. Tua manin Zomi Khristiante sungah pianthakna hong lang mahmah hi. Theih loh kalin i buahpih thu in tangtawng pek-a omsa thu nih hi ngel a, diktansakna (justification) leh sianthona (sanctification) thu ahi hi. Khanlawhna a sang mite in diktansakna, Jesuh Khrih' hotkhiatna thu bulphuh in, a langkhat-ate in sianthona bulphuh uh hi.
Hih thu nihte' deihna theikah lo bek dom lo-in zong kikum ngei beek lo uh hi. Hih banga Pasian thu saan dan hong thuklut zek ciangin pawlpi sung khat-a om tektek hi napi-in up dan-saan dan kituakte kiho thei-in a kituak lote kiho thei lo uh hi. Limsang upna hong khanna in zong pawlpi kitapna a piangsak thumung khat ahi hi. Tua banga limsang upna a zuite in a pawlpi nusia loin lawpna tawh biakpiakna ultungsak uh hi. Tua manin limsang RC, limsang Tuiphum, leh limsang Methodist cih bangin i nei hi. Kilamdan'na in thu-uppi (doctrine) hang hi loin thuzuih dan (practical) hi zaw a, a laingek sangin a hawng hi zaw hi.
Hih a tung-a i gen thu li ahi lo kikhenkhapna a piangsak thu tuamtuam leh la tuamtuam om ngel lai ding hi. Lai-gelhpa in, "Zomi Khristiante hong kitamsak hih thu li teng bek hi," ci bikbek lo hi. Laisimte in ngaihsun pha in, a ettehtak Khristian kipawlna, kihuaina a pianna dingin hong khaktan thute zon beh a kipumkhat nopna lungsim i neih ding kong hantawn nuam hi. Hih bang-a hong kitamsak thute ngaihsun kawmin kitapkhapna a damsak thei zatui pawl khat kong pulak nuam hi.
B. A Kikhenkham Zomi Khristiante Adingin Damna Zatui
(Quest of Remedy for the Divided Chin Christian Society)
A kikhenkham Zomi Khristiante adingin damna zatui masa pen in kilemkikna ahi hi. Khristian pawlpi in a kilemkik kipawlkhopna hi a, Jesuh Khrih zong tua kilemkikna phut dingin leitungah hong pai ahi hi (2 Cor. 5:11-21). Khristian lungdamna laingeek in a tung lam leh a phei lam kilemkikna ahi hi. A tung lam i cih ciangin Pasian leh mihingte' kilemkikna hi a, a phei lam ih cih ciangin mihing leh mihingte' kilemkikna ahi hi.
Hih kilemkikna bawl dingin singlamteh tungah eite' mawhlawh tawi-in Jesuh Khrih a si ahi hi. Tua hi a, lungdamna thu leh singlamteh hong puak thupha in kilemkikna ahi hi. Kum za nih sungah a lut ta Zomite adingin hih kilemna thu in, thulian khat ahi hi. A kitamkham leh a kikhenkhia Zomi Khristiante adingin kilemkik nasep in kum zalom 21st sungah damna zatui bang ahihna kong hawm sawn nuam hi.
1. Lai Siangtho Thuk Theihzawkna
(Deeper Understanding of the Bible)
Lai Siangtho in To thum Pasian' thu hong hilh hi. Khristiante in nam thum pawl khat Pasian i bia hi. Leitung Pawlpi (universal-catholic) in van tuamtuam a nei Khrih' pumpi khat hi, ci-in Lai Siangtho in hong hilh lai hi (1 Cor. 12). Lai Siangtho pen kipumkhatna leh kilemkikna laibu ahih manin Khristiante in kilemkik theihna dingin i sintel ding ahi hi. Pawl tuamtuamte' (denominations) ngeina leh tat ziate Leitung Pawlpi' ngeina leh tat zia tawh tehkaakin thuk takin i sin ding kisam hi.
Thu-ummi tampi takin Lai Siangtho' hong hilh ngeina leh tat ziate sangin amau pawlpi leh up dan thute ultungsakin Lai Siangtho leh sawltakte' hong hilh thu leh late sangin bulphuh zaw uh ahih manin a kisam lo kitelkhialnate leh kitapkhapna tuamtuamte a piang ahi hi. Ngeina leh tat zia tuamtuamte ahi RC ngeina, Tuiphum ngeina, Presbyterian ngeina leh Methodist ngeinate Lai Siangtho' hong hilh ngeina leh tat zia tungtawnin i sintel ding kisam hi. Lai Siangtho' hong hilh ngeina leh tat ziate a masa-in koih a, ei pawlpite' aa a nihna-ah kong in hi leng Lai Siangtho i theih dan hong kibang pan ding a, tua in kilemkikna zungpi hong hi pah ding hi. Lai Siangtho in kilemkikna laibu ahih manin Zomi Khristiante Lai Siangtho ah ciahkik dih ni.
2. Khristian Theology Thu Telzawkna
(Better Understanding of Christian Theology)
Leitung Pawlpi (Catholic Church) 1054 kumin hong kitam a, RC pawlpi leh Orthodox pawlpi hong piankhiat a kipanin pawl tuamtuamte hong piangkhia ahi hi. Hih kikhenkhap ma-in Nicence Thupum (Nicence Creed) ci-in upna pulakna AD 324 kumin Leitung Pawlpi in na nei khin a, Khristian khempeuh ii a neihkhop uh upna pulaakna ahi hi. Tua Nicence Thupum sungah Pawlpi i cih pen pumkhat (one), siangtho (holy), leitung bup huam (Catholic) leh sawltakte tawh kizom (apostolic) ci-in ki-um hi.
Hih thu lite a nengtawn-in sut ding ci leng laimai hong huamzek ding hi. A kidawk mahmah thu khat in Pawlpi i cih pen pumkhat hi takpi a, Khrih' pumpi sungah pumkhat hihna in kua pawl, kua pawl ci loin pawlpi khempeuh in i kepcing ding ahi hi. Hih tang tawng pek pan-a a omsa kipumkhatna i neihtheih kikna dingin Zomi Khristiante in Pasian' thuthuk i sinzek ding kisam hi. Khristian upna bulpite leh laingilte ih pawlpi ciatciat ah ahi zongin, ih kipawlna tekah ahi zongin ih sinding kisam hi. Tua bangin Khristian upna lai gilte, i neihkhop, Khristian thupomte i sinkhop theihna dingin a kibang laibu sung panin ei munsan ciatciat-ah a bul panin i sinkhop ding a kisam ahi hi.
3. Pawl Dangte tungah Lungsim Hoih Neihna
(A New Attitude towards other Denominations)
Zomi Khristiante sungah kilemkikna a om theihna dingin pawl dangte tungah lungsim hoih leh muhna dik i neih ding kisam pha mahmah hi. Khrih sungah unau-sanggam khat i hihna, Khrih nungzui tek mah i hihna hangin khat-le-khat kithupisim a, lungsim kongkhakte i hon ding kisam hi. Hih lai mun-ah laigelhpa in kilemkikna ding leh kipumkhat theihna dingin RC pawlpi tungah a lungdamna thu leh thupi a sakna thu a pholak nuam hi. RC pawlpi in, "RC pawlpi loin gupkhiatna kingah lo-extra-ecclesiam nulla salus)" cih thu bullet mahmah ngei uh a, kum za tampi tua upna tawh kalsuan uh hi. Ahi zongin Vatican Council Nihna (1961-1965) sungah Pope John Paul XXIII in tua upna satkhamin RC ahi lo Khristian dangte (Protestant Christians) pen a kikhenkhia sanggamte (separated brethren) ci-in thu-umkhial (heretics) in hong ngaihsun nawn kiuhkeuh lo uh hi.
1995 kum ciangin Pope John Paul II in RC pawlpi khempeuh ah a laihawmna sungah, 'Amaute pumkhat a suahna dingun (Ut Unum Sint)' cih bulphuh a, RC pawlpi ahi lo pawl dangte tawh kitelsiamna nei-a: Pasian' um lote (atheist) bangin ngaihsut nawn het loin, Khrih' nungzui Khristian taktakin ngaihsut ding lim gen pah mahmah hi. Hih bang thute pen kipumkhatna ding leh kilemkik theihna dingin a tawsawn mualsuangpite hi a, RC pawlpi' matutna lianpi khat ahi hi. Lungsim kipiakna (openness) pen kilemkik theihna dingin Khristian pawlpi sungah a kisam pha mahmah thu hi a, tua in khat leh khat kisaansiamna leh kithupisimna piangsak hi. Khristiante' kipumkhatna dingin mun tuamtuam leh gam tuamtuam-a mite' hanciamna leh a bawl uh thuhoihte i etteh ding zong kisam hi.
Pawl dangdangte tungah lungsim kipiak theihna dingin khat leh khat kitelkhialhna leh kitelkhial theihna dinga a man lopi-a kigensiatna thute (misinformation) khempeuh i paikhia ta ding hi. Khristiante in pawl dangte' tangthu dik leh upna mante kipumkhatnopna lungsim tawh i sin takpi ding hi. Kipumkhatna leh kilemkikna zing ni hong suah khit mah bangin kimawhsakna leh kigensiatna hunte zong kum zalom 20th hunin bei khin ta hi. Kipumkhatna hun sungah tu laitak i nuntak mah bangin kideidannate peelin, Pasian' leenggah huanah na i sepkhop theihna ding a thukzaw leh a zaizaw in i kizopsawm ding kisam hi. Kilemkikna ding leh kihotuah theihna dingin eite in kikupkhopna hunpi sungah i lut khin zo a, kilangpan hunte i paisan khin ta hi.
4. A Thukzaw-in Pawlpi Khat-le-khat Kizop Ding Kisam
(The Quest for a Deeper Inter-church Relationship)
Kilemkikna i cih pen a taktakin ngaihsut thu bek hilo a, i nuntakna leh khat leh khat i kizopna sungah i zatpah ding thu ahi hi. Kim leh pam i nuntakna sungah a taksuak ding ahi hi. Tua thu pen Lai Siangtho sungah na om a, Pasian leh mihingte' kizopna sungah taksuak takpi in, tangthu sunga om pawlpite' nuntakna ah na kilang hi.
Hih kilemkikna Zomi Khristiante in a nuntakna sung uh-ah a neih takpi ding kisam hi. Tua bangin kipumkhat theihna dingin a phualphual-a a ki-uktawm pawlpi pan a lianzaw kipawlna dongah program tuamtuamte i bawl ding kisam hi. Biak piakkhopna, sinkhopna, conference neihkhopna, seminar neihkhopnate i kizopna a thukzawkna dingin i neikhawm ding hi. I tual nuntak a khantohna dingin pilna lam ah, cidamna lam ah, khantohna a tuamtuamah na i semkhawm ding hi a, tua in i kim leh pam-a thupiangte leh i kisapnate hong theisak ding hi. Khristian biakna i cih pen zuih kul biakna ahih manin itna, daihna, kilemkikna, leh kimaisaknate i nisim nuntakna sungah i bawlkhawm takpi ding hi. Khristian biakna in sepna tawh itna a lakkhia biakna hi a, ngaihsunsun cih ciang bek hi loin sep takpi hong kal biakna ahi hi.
Thukhupna
Khristian pawl tuamtuamte sungah kibat lohna tampi tak mah a dil a sai-in om hi. Kipumbatna a hilo kipumkhatna Zomi Khristiante sungah i neihna dingin i hanciam ding kisam hi. A hangin Khristian biakna in kipumbat biakna hi loin kipumkhat a hanciam den biakna hi zaw hi. Ama pumpi dinga Pawlpi a phut Jesuh Khrih in koici banga biakpiakna pia ding, bang thukhun nei ding cih a neng a tawngin hong hilh zenzen lo hi. Hihte pen pawlpi tuamtuamte in tanglai pekin Sawltakte' hun a kipanin a bawltawm uh zuih-ngeina (tradition) hi zaw hi.
Jesuh Khrih in ahih leh lungdamna thu laingek ahi itna, kipumkhatna leh gam thak nasepnate zuih-ngeina dingin hong bawlsak bek hi. Zomi Khristiante' adingin a kibang lo zuih-ngeinate bulphuh luat loh ding hun hita hi. Pawl dangte Khrih' nungzui Khristiante mah ahih lam thei-in sangsiam in i thupisim ding ahi hi. Zomi Khristiante nungta khawmin, sinkhawm a, khangto khawmin, a tawpna-ah minam leh Pasian ading sepkhawm ding uh ahi hi. Bang hang hiam cih leh amaute in To khat bek, Upna khat bek, Tuiphumna khat bek leh Lai Siangtho khat bek a nei uh hi. Hih in kilemkikna man hi a, Zomite' tual nuntakna sungah Pasian' gam i phuhna dingin kum zalom 21st sungah hong tona (challenge) thu lian pen khat ahi hi.
(Hih thului pen Rev. Dr. Simon Pau Khan En in Yangon Chin Catholic Fellowship (YCCF)-te' Ruby Jubilee Commemorative Magazine (1968-2008) sunga,"Reconciliation amongst the Chin Christians" cih Manglai-in a gelh laimai 294-299 pan-a ka tei ahi hi. Zomi khempeuh in sim ta peuh leh cih deihsak ka hih manin hong puak ka hi hi. Mr. Suang Khen Pau)
Courtesy: Zomi News
