Trump in Top Iranian Commander thah dingin a thupiakna tawh a kithah khitin Iran in thatang tawh phuba kila ding hi ci; Iraq gam-a American citizens khempeuh manlang takin Iraq gam panin a kihepkhiatna dingun warning kipia
Jan. 3, Laithai: President Donald Trump in Iran' top military commanders lak-a khat Baghdad airport ah thah dingin a thupiakna tawh tuithe vanleng (drone) zangin a kithah khitin Iran in phuba khauh takin lak dingin a ciam manin American citizens ten Iraq manlang takin a nusiatsanna dingun warning kipia hi.
Iran’ elite Quds Force (or IRGC) makaipi General Qassem Soleimani a kithahna hangin US leh Iran kikal ah buaina kibehlap thakna dingin kuangsak a, tu zingsang in Iran’ Supreme Leader Ayatollah Ali Khamenei in Soleimani pen leitung bup adingin US nen'niamna lehdo maitang hi ci a, US in a kithukkikna khauh mahmah ngak hi ci hi. "Zan nitak in Soleimani' sisan leh martyr dangte sisan baan'na thukham palsat mi gilote in phaba lak kikna khauh ngak uh hi," ci-in Khamenei in gen hi. Iran’ President Hassan Rouhani in Soleimani in US a lehnan' nasepnate kizomsuak lai ding a, a lian gam Iran in gitlohna thukham palsatna phu la kik ding hi ci hi.
Pentagon in airstrike a kibawlna ah Iraq gam leh a gam kiimte ah American diplomats leh service members omna suam dinga geelna nei Solemiani kithat hi ci hi. Experts ten hih kithahna hangin Trump in 2015 nuclear deal panin May 2018 in US a dawhkhiat manin US leh Iran gam-a kigalneihna om khinsa kuangsak ding hi ci uh hi. "Iran ngahsutna leh mutna panin hih zah val-a kiphinna lian zaw dang om lo hi. Iran in thukkikna khauh takin thuk lo ding hi cih ngaihsut ding hamsa hi," ci-in International Crisis Group chief executive Robert Malley in New York Times kiangah gen hi.
BANG THU PIANG HIAM?
Tu ni (Friday) zingsang baih takin Syria gam panin Baghdad International Airport ah Soleimani bawh in kum a, a tuanna vanleng ngak a om car nih omte lak-a khat sungah lut hi. Tua car nihte sunga tuangte lakah Iraqi militia members minnei mahmah thumte lakah Iraqi militia commander Abu Mahdi Al Muhandis zong kihel hi. A tuanna convoy uh airport pusuak dingin kithawi in cargo area kiang a tun in American MQ-9 Reaper drone panin missiles tawh kikap a, cars sunga tuang mi nga si uh hi. AP reports Soleimani’ luanghawm a zungbuh panin ama hi cih kitheikhia hi ci hi.
US officials ten informants mite tung panin top-secret information, electronic intercepts, reconnaissance aircraft, leh surveillance dangte panin Soleimani omna mun lian theikhia uh hi. Christmas khekleh ni in Iranian-backed militia ten American contractor rocket zangin a thahna hangun highly-classified mission kisuamna ding (Soleimani thahna ding) thu piangsak hi ci-in senior American official in New York Times kiangah gen hi.
SOLEIMANI KUA HIAM?
Soleimani a sih in kum 62 mi hi a, a galte adingin tangthu a kigen mintang dingmun (mythical status) a ngah den banah Iranian hardliners ten idol bangin a pahtak leh deih uh ahi hi. 1979 Iranian Revolution hun lai-in US in Iran kumpi Shah Pallavi gum in, democracy deih-a kiphinna betdaihna dingun a kigolh lai un Islamic Revolutionary Guards Corps’ (IRGC) galkap ah Soleimani hong lut a, 1980s Iran-Iraq war hun in US in Iraq dictator Saddam Hussien gum in, chemical galvan a piak hun in galkap tam lo tawh suamna (guerrilla-style attacks) bawlnate ah hong kipei khit nungin thuneihna lianpi ngah hi. 1980s hun lai-in IRGC (Quds Force) ten guerrilla-style attacks a zat uh pen Quds Force ten gal dona dingin lim zat mahmah uh hi.
Soleimani in Iraq gam-a majority-Shiite population mite tawh kizopna hoih mahmah nei ahih manin hih thu hangin Iran gam pualamte ah Iran' thuneihna huzap a kizelhsak theihna dingin Soleimani huh hi.1990s bei kuan in elite Quds Force ah in-charge dingin kiguang ahih manin a beisa kum nih sungin Iranian intelligence leh military forces ten operation a bawlnate uh-ah amah kigolh den hi.
American officials ten Iraq war ah American galkap za tampi sihna ah Soleimani' tungah mawhpuakna kinga a, bomb hoihte bawlna dingin van a piak banah Iraq government lehdo gamnuaimite (insurgents) training pia hi ci-in ngawh uh hi. Soleimani in Iran in a thuneihna huzap a gam pualam ah keekna dingin Middle East ah Iran' proxy wars - Iraq, Syria, Yemen leh Lebanon gamte ah galdo dinga kiphia mite (militias or rebels) zang hi.
"Iran' gamtatna na muhte ah, Syria ahi a, Iraq ahi a, Yemen ahi zongin Soleimani leh organization a makaih Quds Force kimu thei hi. Gam bit leh kho kimlai dengdelsakna dinga gamtatna ah Soleimani pen a lauhuai lianpi khat hi," ci-in 2018 in Middle East ah American military operations encik US Central Command (CENTCOM) commander General Joseph Votel in commander a let lai-in na gen hi.
SOLEIMANI KITHAHNA VAI-AH LEITUNG IN BANG GEN?
Iranian Supreme Leader Khamenei in Soleimani' sihna hangin gam bup in ni thum sung dahpihna pulak a, Tehran khuapi leh khuapi dangte kongzingte ah Friday prayers khitin anti-US slogans otna ging ziahziah, tuate lakah “Death to America,” cih bangin awng keek uh hi. Friday zingsang in Soleimani' khua Kerman sunga kongzingte ah puanvom silh in a dahpih mihon dim hi.
Baghdad airport ah a puakkham (explosion) om hi cih news a kizelh in social media ah Soleimani’ sihna thu tang pah hi. Trump in a Twitter ah bangmah gelh loin American flag lim tuangsak a, Congress ah Soleimani kithahna hangin party lines ah kikhenna lianpi piang pah ahih manin Trump in mipi zakin Soleimani kithahna thu pulakkhia nai lo hi (hih news a kigelh in).
Democrats ten Soleimani kithahna dingin Congress phalna om loin khensatna tawh gamtatna hangin gal kidona taktak piangsak thei hi ci hi. Congress Speaker Nancy Pelosi in, "Soleimani thahna dinga airstrike bawlna dingin Congress thu kidong masa lo ahih manin Iran phinna dinga gamtatna leh a khengval gamtatna hangin American service members, diplomats leh midangte nuntakna a lauhuai dinmun ah koih hi," ci hi.
Republicans ten Trump pum gup pah seisai uh a, Sen. Marco Rubio (R-FL) in, "Trump in a ettehhuai dingin a gamtatna kidawm kawmin gamtang a, tua bangin a gamtat kawm in red lines kician a khung banah red lines gi khengte thuak ding khung hi," ci hi. Secretary of State Mike Pompeo in Soleimani' sihna hangin Middle East sung mun tampi ah pawi kikham a, a sihna thu a za Iraq mite kongzingte ah laam uh ci in thu phuaktawm in deihkaih hi.
Trump' National Security Adviser leh Iran hawk John Bolton in Soleimani kithahna thu a lungdampihna leh phatna thu gen hi. Tua bangin 2015 nuclear deal panin a kidokkhia nai lo gamte in US leh Iran in a gamtatna uh a kidopna dingun kunh uh hi. France’ deputy minister for foreign affairs, Amelie de Montchalin in French radio station kiangah, "A lauhuai zaw leitung nawk dingin i tho (khia) uh hi. Galkap thahat zat behna pen lauhuai den hi," ci hi. UK Foreign Secretary Dominic Raab in, "Buaina a kibehlap ding kuamah hamphatna ngahna ding hilo ahih manin parties khempeuh in buaina a behlap lohna dingun ka ngen uh hi," ci hi.
MABAN AH BANG PIANG DING?
Experts tampite in Iran makai lubawk khat thahna hangin Middle East ah gal kidona taktak piangsak thei a, Trump in 2015 nuclear deal panin US a dawhkhiat khit nungin White House in Iran tungah nawhna sangpen campaign of “maximum pressure” a zat khum banah economic sanctions a koih khumna hangin Iran in ngongtatna tawh thukkik khinzo hi ci hi. Iran in tuate a thukkikna dingin Persian Gulf ah oil tankers taite suam in, Saudi oil facilities a suamsak banah US surveillance drone nangawn kapkhiatsak khinzo hi.
New York Times kiangah US officials ten Iran in phulak kikna dingin thukkikna tuamtuam - cyberattacks panin terrorism zangin US leh a kipawlpihte hong thukkik ding kithawikholsa-in ki-om hi ci hi. Friday zingsang in Iraq gam-a Embassy in US citizens ten manlang takin Iraq gam a nusiatsanna dingun warning pia a, ahih theih leh vanleng tawh lengkhia ding, tua ahih kei leh lei lampi tawm in gamdang ah a kihepkhiatna dingin thu pia napi a kikhepkhiatna ding uh gam minte gen beh lo hi.
Soleimani' sih khit nungin ama zalaih ding mun a awng ding panin a kipelh theihna ding leh Iran thukkikna a kineu ngaihsutsak lohna dingin Khamenei in hun mawk beisak lo a, Soleimani' deputy, Brigadier General Esmail Qaani kici pa Quds Force commander thak dingin Friday (tu ni) zingsang in guang pah hi.
Iran in US a thukkik peuhmah leh Tehran leh Washington bek ah a khuanungin thupiang om lo ding a, Middle East bup ah zong kizeelsak ding hi.
“Pentagon in Soleimani a kisuamna vai pen mailam hun ah Iran' suamna panin kidalna ding ngimna hi ci hi. Ahi zongin short term ah Iran in thukkik peelmawh kha ding ahih manin Middle East bup ah buaina kizeel ding hi," ci-in International Crisis Group ah senior Iran analyst Naysan Rafati in gen hi.
Sources: The New York Times; Washington Post; AP and VICE News
