US IN 9/11 ATTACKS A KUM 20 CIN'NA PHAWKNA HUN ZANG; US PRESIDENTS LUITE KIHEL NAPI-IN TRUMP VOTE ZONG LEH ZUAUGEN IN BUAI-IN KIHEL LO
Sept. 12: Leitung tangthu sungah terrorist suamna lak panin a nasia pen September 11 attacks or 9/11 a kici Sept. 11, 2001 ni 8:46 a.m. – 10:28 a.m. (EDT) kikal sungin Manhattan, New York; Arlington County, Virginia; Stonycreek Township near Shanksville, Pennsylvania munte ah a om World Trade Center or WTC (AA 11 and UA 175), Pentagon (AA 77) leh U.S. Capitol or White House muitumna in commercial flights li al-Queda members 19te in pikawi-in a suamna ah a vanleng pikawi teng leh mi 2,977 a sih banah mi 25,000 liamna piangsak a, a sumtangin infrastructure leh property $10bn kisiatna a pian' ni a kum 20 cin'na phawkna US in zang hi.
VANLENG KIPIKAWI LITE LEH A KIAT/DEN'NA MUN
American Airlines Flight 11: 7:59am in Logan airport panin lengkhia-in Los Angeles a manawh crew 11, 76 passengers leh a vanleng pikawi mi ngate Boeing 767 aircraft sungah tuang uh hi. Boeing 767 aircraft a pikawite (hijackers) ngate in New York khuapi-a om WTC leilu lam-a om North Tower kici a leilu building (northern facade) lam 8:46am in taihsakin kicimsak uh hi.
United Airlines Flight 175: Logan airport panin 8:14am in lengkhia in Los Angeles a manawh crew kua leh passengers 51 banah a vanleng pikawite nga Boeing 767 aircraft ah tuang uh hi. A vanleng pikawite in Boeing 767 tawh New York khuapi-a om WTC leitaw lam-a om South Tower a leitaw building (southern façade) lam 9:03 a.m. in taihsakin kicimsak uh hi.
American Airlines Flight 77: Washington Dulles International Airport panin 8:20am in lengkhia-in Los Angeles a manawh crew guk, 53 passengers leh a pikawi ngate tuanna Boeing 757 aircraft lengkhia hi Boeing 757 pikawite in Arlington County, Virginia ah a om US galphualpi Pentagon kici a nitumna lam building (western facade) 9:37am in taihsak uh hi. Super power gamte galphual Pentagon kisuamna bekah a munah mi 184 si uh hi.
United Airlines Flight 93: Newark international Airport panin 8:42am in lengkhia-in San Francisco a zuan crew sagih, passengers 33 leh a pikawi mi lite tuanna Boeing 757 aircraft lengkhia hi. Boeing 757 pikawite a passengers ten a ngimna mun uh-ah a lengsak theih lohna dingin matcip sawmin a vanleng sungah passengers hangsante leh a pikawite kilaina piang ahih manin a pikawite in a ngimna mun uh dengsak/taihsak thei lo uh ahih manin Shanksville, Pennsylvania kianga om Stoneycreek Township sunga om Somerset County lo lai-ah 10:03am in a vanleng kia hi.
1980s Soviet-Afghan war hun (1979-1986) kikal sungin Afghanistan ah Soviet galkapte lehdo dingin US in funding, training leh galvan tawh huhna a piak mujahideen or holy warriors lakah kihelin damin a-Qaeda a phuankhia Osama bin Laden leh a deputy Ayman al-Zawahiri khuakpeina (masterminded) tawh Saudi mi 15 kihelin al-Qaeda members 19te in a vanleng pikawite uh zangin America a suamna uh-ah mi 2,997 a thahna uh phawkna leh kum 20 a cin'na ni-in a site minte kisim khia hi. US in hun khat lai-in a huh ngekngek ngei Bin Laden in a thukkik ciangin kahna leh ha gawina piangsak zawsop hi.
9/11 attacks ah a site a phawkna leh 9/11 attacks kisuamna a kum 20 cin'na Pennsylvania ah nei uh hi. Tua hunah 9/11 attacks hun lai-in US President (Republican) George W. Bush in zong thugenna nei hi. Bush in a thugenna ah America ah kikhenna (division) leh politics ah huatna a deih lohna leh a beina ding a deihna leh gam bup kipumkhatna ding thu gen a, Trump presidency hun Jan 6, 2021 in Biden' gualzawhna dalna dingin Trump in do cih takin do un (fight like hell) ci-in a thapiak a nungzuite in Congress in EVMs votes kipsakna leh Biden' gualzawhna a kipulak ding dal sawnin Trump gumte in Capitol building a buluhna uh hem gen hi.
9/11 ATTACKS HUN LAI-IN TRUMP' KAMPAU
New York, Shanksville leh Pennsylvania ah US local time in Saturday in 9/11 attacks official in a phawkna pawi (memorial ceremonies) neihna hunte ah ex-President Donald Trump zong a kihel dingin a kicial hangin mun khat beekah va kihel lo hi. Trump in a beisa kum 20 hun lai-in US a kisuam lai-in New York khuapi-a WTC building nihte vanleng tawh a kitaihsakin a kicip khit nungin, "WTC a kicipna Jersey City, New Jersey panin a en mi a tul-a simte lungdamin awng ziahziah (cheering) uh hi," ci-in Sept. 9, 2001 in gen mawk hi.
Tua hunin politics ah a lut sawm nai lo leh real-estate developer in sumbawl Trump in downtown Manhattan, New York ah Trump Tower kici building sang nei hi. Tua hunin local TV station WWOR kiangah Trump kiangah, "Donald, Financial District, 40 Wall Street ah landmark buildings omte lakah nang zong khat na nei hi. Nang building kisia kha lo hiam? Tua lai-ah bang piang hiam? ci-in Trump' lawm, publicist lui leh WWOR analyst Alan Marcus in na dong hi.
Trump in, "Pha hi, phone call lamdang (amazing phone call) ka ngah hi. Ka gennop bel downtown Manhattan ah 40 Wall Street (ama building) pen buildings omte lakah a sangpen nihna hi. WTC a kilam ma-in a sangpen ni napi-in WTC a kibawl khit a sangpen nihna hi a, tu-in kei building a sangpen hita hi. Tu mahin ka mite ka hopih khin lian a, amaute in up zawh loh ding thupiang mu uh hi. WTC panin blocks sagih or giat kigamla hih tuak hi. Feet nih in a sang suang leh leiseek, leh sik leh steel-te WTC ah kuang lai hi," ci-in ama building sang a phatna a kisialhpih kawmin dawng hi. WTC a kisuamna hangin downtown Manhattan ah ama building a sangpen a suahsak a lungdampa 9/11 attacks kisuamna a site dahpihna leh phawkna hunah a kihel nuam loh pen a lamdang hilo hi.
9/11 ATTACKS MEMORIAL CEREMONIES
A beisa kum 20 hun lai-in World Trade Center towers nihte a kicipna phawkna National September 11 Memorial hun Saturday zingsang US local time in President Joe Biden, ex-president George W. Bush, ex-President Bill Clinton leh ex-President Barack Obama-te dahna pawi "somber ceremony" kici-ah kihel ciat uh hi.
Flight 93 vanleng tawh a kisuamna Shanksville ah 9/11 attacks ah a site phawkna dingin pakkual sialna "wreath-laying ceremony" kici hunah a kihel dingin Biden va pai hi. Tua ma-in Flight 93 memorial hunah ex-President George W. Bush leh Vice President Kamala Harris in thu gen tuak uh hi. New York, Pennsylvania leh Shanksville ah 9/11 memorial ceremonies neihna hunte khat beekah a va kihel lo Trump in New York City (NYC) sunga om Trump Tower building panin blocks bangzah hiamin a kigamla 17th police precinct leh NYC neighboring fire station ah va pai zawsop hi.
Genkhol masa loin Shanksville fire department ah Biden a va hawhna ah a thugenna ah George W. Bush in American gam bup kipumkhatna ding a genna hangin a lungdam thu ko a, Afghanistan gam panin kidawhkhiatna (withdrawal) ah a panlakna a kimawhsakna thu a gupna press pool ah gen hi. Kiginni in a tawpna dingin Biden in Washington DC khuapi-ah National 9/11 Pentagon Memorial hunin a zi US First Lady Jill Biden, Vice President Kamala Harris, Defense Secretary Lloyd Austin leh Joint Chiefs of Staff chairmar Gen. Mark Milley tawh hanah pakkual koihna hunah va kihel uh hi.
9/11 attacks a kum 20 phawkna Saturday in Biden in a ngeina bangin thugenna (formal remarks) a neih loh hangin Friday in a video statement panin US khang thu sunga kisuamna nasia pen ah site a phawkna leh gam bup kipumkhatna ding gen hi. Sept. 11, 2001 ni-in al-Qaeda terrorists 19te in US nitumna lam west coast zuan dinga leng dalsi a kiguang (fuel-loaded) US commercial airplanes li a pikawite uh New York City, Washington DC, leh Pennsylvania state sunga om Shanksville pua a suamna uh-ah mi 2,977 na that uh hi.
9/11 attacks phawkna a kum 20 cin'na ni-in US presidents luite - Bush, Clinton leh Obama a kihel kim uh hangin mun khat beekah kihel lo napi-in Americans mite nuntakna a it pen bangin America First leh Make America Grat Again (MAGA) cih bil-aphuai liangin a tangkopih mun mahmah Trump in New York Police Department officers-te kiangah 2024 ciangin president a tuh kik sawmna thu genin vote zon'na hunin zang zawsop hi.
New York Police Department officers lakah khat in 20th anniversary of 9/11 attacks hunin Trump Tower kianga om 17th precint ah White House na tuh kik sawm hiam ci-in a dotna a dawn'na ah Trump in, "Oh, tua pen dotna haksa hi,'' ci-in dawng a, ''A taktakin dotna haksa hi loin dotna nuam hi,'' ci-in dawng kik hi. "Ka hih ding keimah in ka thei hi. Ahih hangin tua thu ka gen uh hun nai lo hi. Ahih hangin lungdam mahmah ding hi teh,' ci-in campaign finance laws in president a tuh kik sawmna thu gen khiat phal lo hi, ci-in a tuh kik sawmna thu hem gen hi.
New York mi Trump in a beisa kum 20 hun lai-in America khang thu sunga kisuamna nasia penna 9/11 ceremonies hun zatna mun koimah ah Kiginni in kihel lo a, Washington DC ah Christian event hun ah kihel sawm hi, ci-in reports in a gen banah Kiginni zanin Florida ah Evander "The Real Deal" Hollyfield vs Vitor "The Phenom' Belfort boxing kitupna ah ringside commentator in va pangin sum zon'na hun tawh buai sawm lel dih hi.
Kiginni zingsangin New York City ah 9/11 memorial service hunin a site min ngah takin a kisim khiatna hun zatna President Joe Biden kihel a, ex-presidents Barack Obama leh Bill Clinton zong kihel uh hi. 9/11 Memorial & Museum spokesman Lee Cochran in The New York Times kiangah, "Ex-president (tRump) zong hong kihelna dingin a kicial hangin hong kihel lo hi," ci hi.
United Airlines 93 pikawite in a ngimna mun uh a den'sak theih lohna dingin a vanleng sungah a pikawi al-Qaeda member lite a vanleng sungah a kilaipihna hangun a vanleng Somerset County ah lo lai-ah kiden'na hi. Shanksville, Pennsylvania ah United Airlines Flight 93 sunga tuang a site phawkna hun zatna ah Biden va kihel hi. Shanksville memorial service hunah ex-President George W. Bush leh Vice President Kamala Harris in a thugenna uh-ah US gam bup kipumkhatna ding gen uh hi. Pentagon ah 9/11 memorial service hunah zong Biden kihel hi.
Kiginni in Midtown ah Trump kiangah NYPD officer khat in, "White House tutna na ngah zawh kik kei leh New York City' mayor na tuh sawm hiam?" ci-in na dong hi. Trump in, "Tua bang dotna lungluthuai hi. Na i mansak/tangsak (straigtened it up) thei uh hi. Nipi kal khat sungin hong pulak khia ding uh hi. Crime bangmah om lo hi..... Nasep dingin tua bang (mayor office) baih ding hi," ci-in dawng hi.
Midtown ah tawl khat sung a va hawhna ah Trump in kingakna ding a bul a bal a nei lo 2020 election ah vote hong kiguksak hi, ci-in ngawh kik a, "Tu ni-in hih thu ka gen nuam kei hi," ci-in Biden administration in Afghanistan panin US galkapte a dawhkhiatna (withdrawal) gensiatna zom leuleu hi. Trump administration hunin US in Feb. 20, 2020 in Doha ah peace agreement Islamic hard-line terrorist Taliban group tawh US kidawhkhiatna dingin thukimna suai na kai uh hi. Trump in ama presidency kum li sungin a kamciamna a zawh loh Biden in ama hunin US galkap khempeuh Aug. 31 ni-in na dokkhia hi.
Kabul airport panin US galkapte leh Talibante khut thuak ding a lau US-led coalition forces tawh kipawl Afghan mi 124,000 valte evacuation process hun Aug. 15-31 kikal sungin kihemkhia a, war history sungah mi tam a kihepkhiat penna hi lai hi. Aug. 26 ni-in ISIS sihpih bomb puaksakte in Kabul airport a suamna uh-ah mi 170 val site lakah US galkap 13 kihel uh hi. Hih thu hangin Trump leh Republicans makaite leh a gumte in Biden pen mihai leh cinh lo ci-in a paikhiatna dingin impeachment proceeding pat ding a deih tam mahmah uh hi.
Republican president Bush hunin Pentagon kihelin US gam sung terrorists ten commercial airlines li zangin a suamna uh-ah mi 2,997 si uh hi. US galphualpi Pentagon kisuamna bekah a si 184 pen Kabul airport kisuamna ah si zah sangin tam zaw lai hi. Ahih hangin paihkhiat ding a sawm nak sangun president term nihna len dingin Republicans ten Bush teelcing kik veve uh hi. Trump in Covid-19 pandemic a kipal cilin Democrats ten hong paihkhiatna dingun mi uptheih ding zuau a phuahtawm thak uh "new Democrats HOAX" hi, season flu mawkmawk hi, Chinese-virus hi peuh na ci a, Covid-19 testings a kinak bawl leh a natna kimu tam ahih manin a tests khiam un, peuh na ci hi.
March 13, 2013 in Trump in pandemic hunin a mawhpuakna thudon loin mi dang bek mawhsakna ding na zong hi. "2009 H1N1 pandemic hun April 2009 leh 2010 kikal sungin Americans 60 million in H1NI or swine flu natna ngah uh a, Obama administration in testing bawl lo hi Testing a patin zekai lua khin hi," ci-in Obama a pum mawhsakna thu na gen hi. March 13, 2020 in South Korea in ni sim in a gamah Covid-19 a tests zah 11,000 tawh Trump administration uliante in tua hunin kal sagih sungin Americans 11,000 kitests hi, ci-in a gen zah uh tawh kikim hi. March 13, 2020 in US ah Covid-19 positives mi 1,700 val a, mi 41 si khin ta hi. Tua ni-in Trump in daily Covid briefing hunin, "I do not take responsibility at all," ci-in mawhpuakna tavuan ka la vet kei hi, ci-in American mite nuntakna humbit dingin a tavuan a thudon lohna na gen lai hi.
Trump in White House office a nusiatsan ni-in leitung bup-ah Covid hangin mi 2 million a si lakah US ah Covid-19 hanga si mi 400,000 val khin ahih manin Galpi Nihna ah Americans si 405,000 hi ci-in Department of Veterans Affairs ciamtehna zah tawh Covid-19 hanga si kikim dektak hi. Tua hunin leitung bup-ah Covid-19 hangin a si 100% lakah US ah a si 5% na tung a, leitung bup-ah Covid-19 natna ngah 96 million cases om lakah Americans 24 million Covid-19 cases nei Trump' presidency kum li sungin na om hi.
TRUMP' PRESIDENCY HUNIN THUPIANG PAWL KHATTE
Kum li sung Jan. 20, 2017 panin Jan. 20, 2021 kikal sung Trump in US president a let sungin hate crimes 17 year record-high na tung a, Christian biakinn (church), Judah biakinn leh sumbuk Jersey Kosher Grocercy ah kisuamna na pen, high school, shopping mall leh public concert ah gun violence nasia pen US tangthu sungah na piang hi. Tua loin Egypt leh Sri Lanka gamte ah Good Friday leh Palm Sunday ni-in Christian biakinn kisuamna mi tam na kithat pen a, Trump' presidency hun sungin America tangthu sungah Christian percentage na nak kiam pen lai hi.
Trump' presidency hunin US in a foreign policy tawh democratically elected Syrian President Bashar al-Assad leh a government lotkhiatna dingin ISIS do kineihin a kipawlpih gam 68 val tawh Syria a dona ah guallelh leh lawhsap piikpeek khit nungin Assad government a lehdo leh ISIS dona ah funding leh galvan a supply Kurdish rebel groups nusiatsanin Syria panin US galkapte na dokkhia hi. Syria gam-a US military bases teng Russia leh Turkey galkapte leh a pawlte in luah pah uh hi.
Trump administration in Syria ah US kipawlpih Kurdish rebels leh a pawlte nusiatsan a, US galkapte a dawhkhiat hunin evacuation operation ah US pawlte a hepkhiat ZERO hi. Ahih hangin tua hunin tRumpanzees ten," Thupi tak e, tRump in ISISte leitung panin beisak mang zo hi. Syria panin US dokkhia-in a kamciam bangin sem hi," ci-in pum phat thapai uh hi.
Trump in leitung panin beisak leh thah bei khit ISIS ten Biden' hun evacuation operation hun lai-in August 26, 2021 in Kabul airport a suamna uh-ah mi 170 val site lakah US galkapte 13 kihel hi. A ISIS thah beite a hankhuk sung panun a va kaihthawh kik hi ve maw? ahih kei leh Obama leh Biden in a thawhkiksak hi, ci nuam niloh hi zaw ai tam?
Trump in leitung panin ISIS a beisak leh Middle East sung, cikmah in a om ngei loh uh Africa leh Asia gamte ah ISIS ngongtatte gamtatna leh suamnate na piang lo ding hi. Trump presidency hun in Palm Sunday ni 9 April 2017 in Egypt gam leilu lam-a Nile delta ah a omTanta khuapi-a George' Church biakinn kisuamna ah mi 78, Alexandria khuapi-a St. George' Church biakinn kisuamna ah ah mi 48 - a vekpi in ISIS ten mi 126 suicide bombings tawh a thahna uh hi.
Trump presidency hun sungin Christian biakinn kisuamna nasia pen Easter Sunday ni-in Sri Lanka gamah RC biakinn thumte leh luxury hotels thumte 21 April 2019 in a kisuamna uh-ah mi 269 (+8 bombers) a sih banah mi 500+ liamna thupiangte zong a beisak ISISte Obama leh Biden in vok ek va namsakin a va suam lupsak uh hi ve uh maw?
Trump presidency hun sung mahin American tangthu sunga Christian biakinn kisuamna lak panin a nasia pen Texas State sunga om New Braunfels, Texas mi Devin Patrick Kelley in November 5, 2017 in Sutherland Spring Church biakinn a va suamna ah mi 26 a thah banah mi 26 na kapliam hi.
American tangthu sungah high school shootings ah mi tam a kithahna penna February 14, 2018 in kum 19 mi Nikolas Cruz in Stoneman Douglas High School ah mi 17 va kap lumin, mi 17 kapliam hi.
American tangthu sungah public concert ah mi tam a kithah penna dingin kum 64 mi Stephen Paddock in mandalay Hotel dawl 32 tung panin October 1, 2017 in Mesquite, Nevada ah Route 91 Harvest music festival a suamna ah mi 60 (amah tawh 61) a kap lup banah mi 867 (thau tawh a kapliam 411) in liamna tuak uh hi.
15 March 2019 in Muslim ten Friday Prayers a neih hun lai takun Trump in a anti-immigration vai leh migrant invasion cih kammal zangin gambeelte a deih lohna thu a gennate hangin tha hong pia hi, a ci far-right extremism, Islamophobia, white supremacy, white genocide conspiracy theory, Great Replacement conspiracy theory leh ecofascism ideologies a nei amah bekin a gamtang (lonewolf) Australia mi Brenton Harrison Tarrant kicipa in New Zeland gam-a Chrischchurch khuapi na suam hi. Tarrant in AR-15 style rifles nih, 12-gauge Mossberg 930 semiautomatic shotgun, 12-gauge Ranger 870 pump-action shotgun, .357 Magnum Uberti lever-action rifle leh .223-caliber Mossberg Predator bolt-action rifle tawi-in Al Noor Mosque leh Linwood Islamic Centre a va suamna ah mi 51 a thah banah mi 40 kap liam hi.
American tangthu sungah mall shopping kisuamna ah hate crimes ah mi tam a kithahna penna dingin August 3, 2019 in El Paso, Texas ah Walmart store kum Patrick Wood Crusius in a suamna ah a tamzaw Hipanic kihelin mi 23 a thah banah mi 23 a kapliam hi.
US tangthu sungah Judahte kisuamna nasia penna ding October 27, 2018 Sabbath zingsangin Robert Gregory Browes in Pennsylvania State sunga Pittsburgh khuapi-a Tree of Life – Or L'Simcha Congregation or synagogue kici Judahte biakinn a va suamna ah mi 11 a thah banah mi sagih na kap liam hi.
May 1, 2020 in Covid-19 lockdown a deih lohna thu a kutkut thangah a nungzuite in Michigan State Capitol va buluh uh hi. Democrats new HOAX a cih pandemic hangin a presidency hun sungin Americans 400,000 val a sih banah a natna ngah 24 millions val hi.
December 31, 2019 panin January 1, 2020 kikal Iraq state capital Baghdad khuapi-a US embassy kubuluhin, mei tawh kihal a, a sunga sem staffs-te lau in US gam dongah lehtai uh a, US embassy staffs member om zah kikhiam suk uh hi. March 2020 in Iraq gamah US in militaryv bases giat a neihte lakah thum ah US galkapte in Jan. 3, 2020 in IRGC commander Qassem Soleimani kicipa Baghdad airport ah a suam lupsakna a thukkikna hangin nusiatsan uh hi. Soleimani kithah khit US bases kisuamna ah US galkap leh American civilian contractors a hun khop liamna leh sihna tuaklawh uh hi.
November 3, presidential elections ah Japan Gal bangin guallelhna tuakin votes 7 millions val tawh a guallelh thuman sang nuam loin vote kigukna om hi, ci-in a zuau bulomtang tawh a tawholh a nungzui ten January 6, 2021 in US Capitol building va buluh uh a, police khat kihelin a nungzuite li si uh hi.
Afghanistan ah US galkapte kidawhkhiatna pen February 29, 2020 in Trump administration hunin US in terrorist group in a ciamteh Taliban group tawh kilemna thukimna Doha Peace Accord a kici thukimna suai a kaihna thukhun sungah US galkapte khempeuh Afghanistan gam panin dawhkhiat dingin a kamciamna bangin thupiang leh Biden' hunin sepkhiatna hi. Biden in Jan. 20, 2021 in White House office a let ni-in Trump in Afghanistan ah US galkap 2,500 bek na koih lai hi.
Trump presidency hunin Covid-19 pandemic hangin leitung bupah a natna ngah leh a si leh a natna ngah America ah mi tam pen hi. 1930s Great Recession khit US economy kisia pen, unemployment rate sang pen a, innsap a pia zo mi tam kihawkhia (evicted) pen lai hi.
Trump presidency hun sungin American tangthu sung adingin US ah Christian nak kiam pen lai hi. White House ah a pasian puak lut pen zuau or Baal pasian na hih tuak zawsop hi. Amah a gum thusuak ngah a kineih kamsang kineihkhemte in, "Pasian' sathau nilhpa leh a mi zat Trump term nih cingkik ding hi," ci-in a genkholhna khempeuh uh leh a guallelh khit nungin president len kik veve ding hi, ci-in November 3 elections ma leh khit nungin a thusuak gente uh leh pro-Trump news gente a tangtung khat zong om nai lo hi. Pasian leh Lai Siangtho cikmah in zuau ngei lo ahih manin Trump leh a gumte pasian gengen pen milim pasian - khua mu thei lo leh khua a za thei lo pasian mawkmawk hih tuak hi.
Kam beembeem in America First leh Make America Great Again ci-in otot ding baih mahmah a, mi kim in tua bang gen theih hi. Ahih hangin a kisap hun taktak ciangin tua bang hunin a kimu lo leh a kibu mang pen Trump hi zaw a, Vietnam War hun lai-in bone spur a kici guh natna or guh kisia ka nei hi, ci-in military draft nga vei tak a kipelna (deferment) dingin America sik leh tangin galdo ngam lo leh ding ngam loin a zuau a gen leh a kampi bek tawh a gam a itpa hi. 1891 kum in White House ah electrict a kitunsak khit nung June 1, 2020 in George Floyd kithahna hangin White House gal Lafayette Park ah lungphona neite kihta-in White house mei taangsak ngam loin a mitsak masa leh a bucip masa pen mi hangsan Trump kicipa bek om pan hi.
Source: Associated Press; Politico; Washington Times; Business Insider; BBC; Independent; Xinhua; Web MD; ABC; Businesscom; Pew Research Wikipedia
@Thang Khan Lian #ZUNs reports
